ھەولێر، قائید میرۆ:
بابەکر دڕەیی، ئەندامێ جڤاتا نیشتیمانیا بزاڤا گۆڕان تایبەت ب ئەڤرۆ نیۆز راگەھاند، کو بزاڤا گۆڕان ب چو شێوەیەکی پشکداری د رێکەفتنا ستراتیژیا نێڤبەرا پارتی و ئێکەتی دا ناکەن، ژبەر چەند ئەگەرەکان ژوانا دخوازین وەکی پارتەکا سیاسی ئازادبین و رەخنا بگرین و ئەم لسەر بنەمایێ رەخنا ھاتینە دامەزراندن، لەوڕا ئەم پشکداری ئەڤێ رێکەفتنێ ناکەین.
دڕەیی گۆتژی: “ئەم نابینین رێکەفتنا ستراتیژی بۆ بەرژەوەندیا مللەتی بیت و ئەگەر چو مفا ھەبانە، نوکە ئەف ئاریشەیێن نێڤبەرا پارتی و ئێکەتیێ چێنەدبوون”.
ئەف داخویانیا ئەڤی سەرکردەیێ گۆڕان پشتی ئاخفتنەکا مەلا بەختیار کارگێرێ مەکتەبا سیاسیا ئێکەتی ھات و راگەھاندبوو، دێ بزاڤێ بکەن ھەموو لایەنێن سیاسی پشکداری رێکەفتنا ستراتیژیا نێڤبەرا پارتی و ئێکەتیێ بکەن.

ئەڤرۆ:

ئەندامەکا پەرلەمانێ کوردستانێ دیار دکەت کو راستڤەکرنا قانوونا قەدەغەکرنا لەشفرۆشیێ دەرفەتەکا گرنگە داکو ئەو بشێن پێ بەرەڤانیێ ژ مافێن ژنان بکەن، سکرتێری ئێکەتیا زەلامێن کوردستانێ ژی ئاشکراکر کو د ماوێ پێن سالێن بۆری دا 60 زەلامان ل کوردستانێ سکالا ل سەر لەشفرۆشیا ژنێن خوە تۆمار کریە.

 تەلار لەتیف ئەنداما پەرلەمانێ کوردستانێ ھەروەسا گۆت دڤێت دەمێ قانوون دھێتە راستڤەکرن ناڤێ وان ژنان ژ تاوانبارن بگوھۆرن و بکەنە قوربانی، چونکو ب تنێ ژن دھێتە سزا دان و داخواز کریە کو ھەردوو رەگەز د یەکسان بن ل وەرگرتنا سزایی دا، گۆت ژی ئەو د رژدن کو د قانوونا نوو دا کا چاوا لێپرسین ل گەل ژنا لەشفرۆش دھێتە کرندڤێت ھەروەسا ل گەل زەلامی ژی بھێتە کرن.

ئەو ژی ئاشکرا کر کو پەرلەمانی یا ڤیایی ڤێ قانوونێ دەربێخیت بەلێ بارودوخێ نوکە گەلەک یێ ھاتیە گوھۆرین ب تایبەت پشتی ھاتنا ڤێ ھژمارا زۆر یا ئاواران و بەلاڤ بوونا وان ب ڤی رەنگی وەکریە کو ھندەک جاران بۆچوونێن جڤاکناسان ژی بەرامبەر ڤان کارێن ل ناڤ جڤاکی بھێنە گوھۆرین.

سکرتێرێ ئێکەتیا زەلامێن کوردستانێ بورھان عەلی فەرەج ژی دبێژیت زەلامان ژی سکالا ل سەر وان ژنان ھەنە ئەوێن کارێ لەشفرۆشیێ دکەن، ھەروەسا دیارکر کو ل دووڤ ئامارەکا وان ژ سالا 2008 و ھەتا نوکە 60 زەلامان سکالا ل سەر ژنێن خوە تۆمار کرینە ب تومەتا ھندێ کو کارێ لەشفرۆشیێ دکەن، کو ئەڤە ب دەستپێکا گوھۆرینەکا گرنگ دایە زانین کو ل شوونا ھندێ زەلام ژنێن خوە بکوژن پەنایێ بەەنە بەر تۆمارکرنا سکالایان.

ل دووڤ ئامارەکا پۆلیسێن سلێمانیێ ژی ل نەە ھەیڤێن بۆری 13 بادەکێن لەشفرۆشیێ ھاتینە ڤەکرن و ھەر بادەکەکێ ژی گرۆپەکێ لەشفرۆشی ئاشکرا کریە.

ئەڤرۆ، سالار دۆسکی:

بڕیاردەرێ جڤاتا پارێزگەھا دھۆکێ دیار کر کو ئەو ژ لایێ پارێزگەرێ دھۆکێ ب وەکالەت ھاتینە ئاگەھدارکرن، ل دووڤ راسپاردێن جڤاتا وەزیرێن ھەرێما کوردستانێ ھندەک پۆلیس بۆ پارێزگەھا دھۆکێ دێ ھێنە دامەزراندن، ژ بەر کو د رەوشەکا تایبەت دا دەرباز دبیت.

ئیدریس ھەرکی، بڕیاردەرێ جڤاتا پارێزگەھا دھۆکێ بۆ رۆژناما ئەڤرۆ ئاشکرا کر، دامەزراندنا پۆلیسان تایبەت بۆ دھۆکێ ژ بەر وێ رەوشێ یە یا پارێزگەە تێدا دبۆریت و ئاواران پێدڤی ب خزمەتێ ھەیە و گۆت “ھەتا نوکە نەھاتیە دیارکرن، ھژمارا وان پۆلیسێن دێ ھێنە دامەزراندن چەندن و کەنگی دێ ھێنە دامەزران، لێ ل سەرانسەری پارێزگەھا دھۆکێ دێ ھێنە دامەزراندن”.

خویا ژی کر، ل دووڤ گۆتنێن پارێزگەرێ دھۆکێ ب وەکالەت جڤاتا وەزیرێن ھەرێما کوردستانێ دێ ھندەک پلێن دامەزراندنێ کو تایبەتن ب پارێزگەھا دھۆکێ ڤە دامەزرینیت.