ئەڤرۆ نیوز:
بۆ جارا ئێکێ د دیرۆکا چامپیۆنزلیگێ دا ژنەک دێ بیتە دادڤانا یاریەکا وێ قاره‌مانیێ.
چامپیۆنزلیگا ئورۆپى د ڤێ حەفتیێ دا دێ گاڤەکا دیرۆکی هاڤێژیت و بۆ جارا ئێکێ د دیرۆکا وێ خۆلێ دا دێ دادڤانەکا ژن ب ناڤێ ستیفانی فراپارت یاریەکا وێ قاره‌مانیێ برێڤەبەت.
ستیفانی فراپارت، دادڤانا فرەنسی سوبه دێ بیتە دادڤانا یاریا د ناڤبەرا یانا یۆڤێنتۆس یا ئیتالی و دینامۆکیێڤ یا ئۆکرانی.
ناڤهاتیێ ل سالا 2009 ناسناما فیفایێ یا دادڤانێن نێڤدەولەتی وەرگرتییە و چەندین یاریێن گرنگ ب رێڤەبرینە.
ئەڤرۆ نیوز:
ئه‌ڤرۆ سێشه‌مبى، بەهائەدین نوری، سکرتێرێ به‌رێ یێ حزبا شیوعیا ئیراقى ل سلێمانیێ، د ژیێ 93 سالیێ دا ل نه‌خۆشخانا ئه‌نوه‌ر شێخه ب په‌ژیكا كۆرۆنایێ وه‌غه ركر، كو به‌رى چه‌ند رۆژان توشى كۆرۆنایی ب بوو.
بەهادین نوری، سەركردەكێ دیار یێ بزاڤا چەپێ ل كوردستانێ و ئیراقێ بوو، ل سالا 1927 ل گوندێ تەکێی قەرەداغ ژ دایکبوویە، ل سالا 1946 د ژ یێ 19 سالیێ دا چوویە ناڤ رێزێن حزبا شیوعییا ئێراقى.
ل سالا 1949، پشتى سێدارەدانا “فەهد” ى دامەزرێنەر و سكرتێرێ وێ حزبێ، بەهائەدین نوری، دبیتە سکرتێرێ حزبا شیوعییا ئێراقێ، ل سالا 1953 دهێته گرتن و فەرمانا سێدارەدانێ بۆ دەردكه‌ڤیت، به‌لێ نه‌هاته سێداره‌دان.
بەهائەدین نوری، ل سالا 1994 بزاڤا ئازادیخوازێن کوردستانێ دامەزراندیه.
ئەڤرۆ نیوز، زنار تۆڤی:
لژنا سەرپەرشتیکرنا مووەلیدان ل دهۆکێ راگەهاند: بۆ هەر ئەمپێرەکێ کارەبا مووەلیدان بۆ هەیڤا چریا دویێ شەش هزار و ٢٥٠ دینار هاتینە دیار کرن.
هەکار هرۆری نوونەرێ خودانێن موەلیدان د لژنا سەرپەرشتیا مووەلیدان دا ل دهۆکێ بۆ ئەڤرۆ نیوز دیار کر، بۆ هەر ئەمپێرەکێ کارەبا مووەلیدان بۆ هەیڤا چریا دویێ ل سنورێ پارێزگەها دهۆکێ شەش هزار و ٢٥٠ دینار هاتینە دیار کرن.
هەروەسا گۆتیە، دڤێ هەیڤێ دا وان ١٧٠ دەمژمێران کارەبا مووەلیدان دایە وەلاتیێن پارێزگەها دهۆکێ.
ئەڤرۆ نیوز:
سۆپایێ توركی و چەكدارێن سەر ب وی وەلاتیڤە، د بەردەوامن ل سەر توپبارانكرنا دەڤەرێن ل ژێر دەستهەلاتا هەسەدی ل رۆژئاڤایێ کوردستانێ.
ئاژانسا (سانا) یا سوری ئاشكرا كر، لەشكەر و چەتەیێن توركی چەندین گوند و دەڤەرێن سەر ب باژێرێ عەین عیساڤە توپباران كرن و زیانێن مەزن گەهاندینە مال و مولكێ خەلكێ وێ دەڤەرێ.
هەروەسا گۆتیە ژی، ژ ئەگەرێ هێرش و دەست درێژیێن بەردەوام یێن لەشكەرێ توركی و چەكدارێن توندڕەوێن سەر ب وی سوپایی ڤە، هژمارەكا زۆر ژ ئاكنجیێن گوندەوارێ عەین عیسا مال و دەڤەرێن خوە بجهـ هێلاینە و قەستا هندەك دەڤەرێن ئارام كرینە.
ئەڤرۆ نیوز، مه‌حمود نهێلى:
به‌رپرسێ شیره‌تكاریا چاندنێ ل دێره‌لۆكێ، بۆ ئەڤرۆ نیوز دیاركر: جوتیاره‌كى وه‌ك تێست بو ئێكه‌م جار جوره‌كى نوو یێ كڤاركێ ل دێره‌لۆكێ به‌رهه‌م ئینایه و یێ سه‌ركه‌فتى بوویه.
عه‌بدولستار خورشید، خویا كر ژی: كو ئه‌ڤه پێنگاڤه‌كا باش بوویه بو وێ یه‌كێ به‌رێ خه‌لكێ مه بكه‌ڤیته به‌رهه‌مێ خومالى یێ كڤاركى و گۆت: ( ئه‌ڤ جورێ كڤاركێ دهێته نیاسین ب ناڤێ محارى یان ژى سه‌ده‌فى كو ماوێ كارى تێدا تا دگه‌هیته به‌رهه‌مى دبنه 28 رۆژ ).
و ئاشكرا كر، سه‌قا و پلا گه‌رمێ و شه‌ها ده‌ڤه‌را دێره‌لۆك یێ گونجایه بو ڤى جورێ كڤاركێ و گه‌هشتن و به‌رهه‌م ئینانا وى ژى ل سه‌ر ڤان دوخان دمینت.
دیار ژى كر: ب خوشحالی ڤه ئه‌ڤ تێسته یا سه‌ركه‌فتى بوویه و د داهاتى دا ب ئانه‌هیا خودێ ، دێ كاره‌كى مه‌زنتر و به‌رهه‌مه‌كى پتر به‌رهه‌م ئینن، كو د بازارى دا ژى بهێته فروتن.
ئەڤرۆ نیوز:
دۆنالد ترەمپ، سەرۆکێ ویلایەتێن ئێگرتى یێن ئەمریکا راگەهاند، چ جاران ئه‌نجامێن هەلبژارتنان قه‌بوول ناکه‌ین.
د چاڤپێکەفتنه‌كێ دا ل گەل کەنالێ فۆکس نیوز، ترەمپ گۆتیه، دێ هەموو شیانێن خوه ب كار ئینم، داكو ب سەلمینم من شکه‌ستن نەئینایە، دیسان دڤێت دادوەر بڕیارێ ل سەر وان دۆسییان بدەن و دڤێت دادگه‌ها بالند بڕیارێن مه‌زن بده‌ت ل سەر بنەمایێ هەموو تشتان.
ناڤهاتى گۆتیه ژى: هوون نه‌شێن بۆچوونێن من ب گۆهۆرن، د ماوێ شەش هه‌یڤێن بهین دا ئه‌ز بۆچوونێن خوه ناگۆهۆرم چونکى سه‌ختەکاریه‌كا گه‌له‌ك مه‌زن هاتییه كرن.
ترەمپى هێرش کریە سەر میدیایان و گۆتیه، ئەو دوژمنێن خەلكێنه.
ئەڤه د ده‌مه‌كێ دایه كو ترەمپى د چەند دۆسییان دا ده‌ربارەی هەلبژارتنان ل دادگه‌هان شكه‌ستن ئینایه.
ئەڤرۆ نیوز:
بۆ جارا دویێ شاندەکێ بلند یێ بەرپرسێن ئۆزبەکستانێ سەرەدا رۆژئاڤایێ کوردستانێ دکەن و پشتی ھەڤپەیڤینان، ھژمارەکا دیل و ھەڤژین و زارۆیێن چەکدارێن داعش یێن ب ڕەگەز ئۆزبەکی ژ ئیدارا خۆسەر . وه‌رگرتن.
ئاژانسا میهر دیار کریە، شانده‌كێ بلند یێ وەلاتێ ئۆزبەکستانێ سەرەدانا ھەردو کەمپێن ھۆل و رۆژ کریە ل رۆژئاڤایێ کوردستانێ، داکو وان ھەموو ئۆزبەکیان ب بینن یێن کو بەری نوكه چەکدارێن داعش بوون و نوكه دیلێن داعشێ یان ھەڤژینێن داعشان بوون و نوكه ل وان کەمپانه.
ئەڤە جارا دویێ یه، كو ھژمارەک ژ وەلاتیێن ئۆزبەکستانی یێن سەر ب داعشێ ڤە بوون بھێنە ڤەگەراندن بۆ وەلاتێن وان.
ئاژانسا میھر ئەو ژى گۆتیه، کو پڕانیا وان کەسان ژن و زارۆکن و د دەمێ ٣ ساڵێن بوری دا ل کەمپێن رۆژئاڤایێ کوردستانێ دا ژیاینە.
ل سالا بوری ئۆزبەکستانێ ٢٢٠ وەلاتیێن خوه ژ رۆژئاڤایێ کوردستانێ وەرگرتینە و ڤەگەڕاندینە.
ئەڤرۆ نیوز:
هەڤسەرۆکێ ئێکەتیا نشتیمانیا کوردستانێ د دیدارەکێ دا ل گەل هژمارەکا رۆژنامەڤانێن کوردستانێ دیار كر: وى باوەرى ب دو ئیدارەیێ نینە و رێكێ ناده‌ن چ به‌رنامێن وه‌سان ژى سه‌ربگرن.
باڤل تالەبانى ئاشكرا كر ژى: پشتى هەلبژارتنێن ئیراقێ دێ پارێزگارەکێ کورد بۆ وێ كه‌ركۆكێ هێتە دانان، هه‌ر چه‌نده نوكه حوکمەکێ سەربازى ل وێ پارێزگه‌هێ هەیە، دیسان ب دوور دبینم كو تورکمانەک ببیتە پارێزگارێ کەرکۆکێ.
ناڤهاتى گۆت ژى: تیما ئێكه‌تیێ پشکەکە ژ حکومەتێ و گازندەیا وان ژ هەموو حکومەتێ هه‌یە، هه‌روه‌سا نوكه چارەسه‌ریا قەیرانا دارایى ل بەغدایە و ئەو دژى وێ چه‌ندێ نە كو مووچێن هەرێمێ بچنە سەر بەغدا ڤە.
باڤل تاله‌بانى، هەڤسەرۆکێ ئێکەتیێ دیار كر ژى: دڤێت ئه‌م چاکسازیا راستەقینە بکەین و پێدڤییه کورد ب ئێک دەنگى شەرى بۆ چارەسه‌رکرنا ڤێ رەوشا نوكه بکەن.
ئەڤرۆ نیوز:
پارزینگەهەكا نەفتێ یا پارێزگەها سەلاحەدین هاتە موشەكباران كرن و داعشێ بەرپرسیاریا خوه ژ وێ هێرشێ راگه‌هاند.
تیرۆرستێن داعشێ بەرپرسیاریا خوه ژ وێ هێرشێ دیار كر، یا كو ب موشەكان ل سەر پارزینگەها سینیە ل قەزا بێجی ل پارێزگەها سەلاحەددین هاتییە كرن.
ژێدەرەكێ ئێمناهیێ ل وێ پارێزگەهێ دیار كریه: د وێ هێرشێ دا ئاگر بەربوو پشكەكا پارزینگەهێ و گەلەك زیانێن مادی هەبوون، لێ چ زیانێن گیانی نەبوون.
ئەڤرۆ نیوز:
ب ئامادەبوونا وەزیرێن پەیوەندیدار، پەرلەمانێ كوردستانێ دێ كۆچكرنا گەنجان بۆ دەرڤه‌ى وه‌لاتى گوتۆبێژ كه‌ت و دێ خواندنا ئێكێ بۆ دو پێشنیارێن قانوونى كه‌ت.
ئەڤرۆ دوشەمبی، 30/11/2020 پەرلەمانێ كوردستانێ دێ كۆم بیت، لدووڤ بەرنامێ کارى، کۆمبوونا ئەڤرۆ یا پەرلەمانی دێ خواندنا ئێكێ بۆ پێشنیازا قانوونا پەروەردێ و خواندنێ ل هەرێما کوردستانێ و پێشنیازا قانوونا راستڤه‌كرنا ئێكێ یا زانکۆیێن تایبەت هێته كرن.
هەروەسا دێ خواندنێ و گوتۆبێژێ ل سه‌ر هەردو راپۆرتێن لژنا پەیوەندیان و رەڤەندا کوردستانێ و لژنا ره‌وشه‌نبیری و جڤاكێ مەدەنی و وەرزش و لاوان، سەبارەت ب کۆچكرنا گەنجان بۆ دەرڤەی وه‌لاتى ب ئامادەبوونا وەزیرێن پەیوەندیدار ل حکومەتا هەرێما کوردستانێ كه‌ت.
نيشاندان