ئەڤرۆ نیوز:

رۆژنامەڤانێ ناڤدارێ تورکیا جەنگیز چاندار راگەهاند کو بەری چەندین سالان تورکیا هەموو بزاڤ کرن کو نەهێلیت ل عیراقێ چو هەرێم ب ناڤێ کوردستانێ بهێتە ئاڤاکرن، لێ د بزاڤێن خوە دا سەرکەفتی نەبوو و دووماهیێ ژی نەچار ما دانپێدانێ ب هەرێما کوردستانێ کر.

ناڤهاتی راگەهاند کو نها رەوشا سووریێ ژی گەلەکێ ئالۆزە و هەبوونا گەلەک هێزێن بیانی ل سووریێ ژی وەسا کریە کو رەوش هەر کو بچیت ئالۆزتر لێ بهێت و گۆت: (ئەز ب باوەرم پشتی دەمەکێ هەکە رەوش ل سووریێ ئارام بیت و کیانەکێ کوردی بهێتە ئاڤاکرن، دێ تورکیا ژی نەچار بیت دانپێدانێ ب کوردێن رۆژئاڤایێ کوردستانێ بکەت).

ئەڤرۆ نیوز:

وەزارەتا دەرڤەیا وەلاتێ ئێکگرتیێن ئەمریکا راگەھاند پارتا کرێکاران (پەکەکە) ما د لیستا تیرۆرێ دا.

ل دووڤ راگەھاندنەکا وەزارەتا دەرڤەیا ئەمریکا کو دوھی ل ئێکێ ئادارێ ٢٠١٩ بەلاڤ کریە زێدەتری بیست سالانە ئەمریکا ناڤێ پەکەکێ د لیستا تیرۆرێ دا دانایە و ئەو بەرھنگاری مەترسیا ڤێ حزبێ بوویە داکو بەرفرەھتر نەبیت لەورا د گەل ھەڤپەیمانێن ناتو ژی ( تورکیا) کار کریە بۆ رێگری گرتن ل کاروبارێن وان یێن دارایی ژ پارە کومکرنا وان ل ئوروپا و وەلاتێن دی، و واشنتون ژی دێ یا پێگیر بیت ب بەرھنگاربوونا ڤێ حزبێ.

ئەڤ بریارا ئەمریکا دێ رێ دەتە وان وەلاتان دەست ڤالا نەمینن د جێبەجێکرنا یاسایا نێڤدەولەتی دا دژی ئەندام و سەرکردێن پەکەکێ.

بەری نوکە ژی ل سالا ٢٠١٨ حوکمەتا ئەمریکا خەلاتێ ١٢ ملیۆن دولار بۆ وی کەسی تەرخان کریە یێ پێزانینان ل سەر جھێ ھەرسێ سەرکردێن مەزن یێن پەکەکێ بدەتە وان یان رێ خوش بکەت بۆ دەستەرکرنا وان.