ئه‌ڤرۆ نيوز:
بڕياره سوبه‌هى رۆژا ئێكشه‌مبى 3ى ئادارا 2019ێ مه‌كته‌با سياسى يا پارتى و ئێكه‌تى ل هه‌ولێر كۆمبوون.
ژێده‌ره‌كى ژ مه‌كته‌با سياسى يا پارتى ديموكراتى كوردستان ئاشكه‌را كر كو بڕياره سوبه‌هى پارتى و ئێكه‌تى بۆ دانوستاندنا پرسا پێكئينانا حوحمه‌تێ و پرسێن كه‌ركووك و به‌غدا كۆم بن.
پارتى و ئێكه‌تى ل سه‌ر چه‌ند پرسان د نه‌رێكن و ل 5ى شوباتا 2019ێ دووماهى كۆمبوونا فه‌رمى ئه‌نجام دايه، راوه‌ستيانا كۆمبوونان ژى كارتێكرن ل سه‌ر داكه‌فتنا پێكئينانا حوكمه‌تا هه‌رێما كوردستانێ هه‌بوويه.
ئه‌ڤرۆ نيوز، لزگين جوقى:
نڤيسينگه‌ها رزگاركرنا ره‌ڤانديێن ئێزدى رزگاركرنا 21 كه‌سێن دى راگه‌هاند كو 18 ژ وان زارۆ نه و سێ ژى كچ و ژنن.
حسێن قائيدى به‌رپرسێ نڤيسينگه‌ها رزگاركرنا ره‌ڤانديێن ئێزدى بۆ ئه‌ڤرۆ نيوز گۆت: “18 زارۆ و سێ ژن و كچ يێن دى ژ ده‌ستێ داعش هاتنه رزگاركرن”.
ئاشكه‌را ژى كر كو ئه‌ڤ كه‌سه پشتى رزگاركرنا باژێركێ باغوز ژ وێ ده‌ڤه‌رێ هاتنه رزگاركرن و دياره كو گه‌له‌ك هاتينه قوتان و ئه‌شكه‌نجه‌دان.
ئاماژه ب وێ چه‌ندێ ژى كر كو رۆژه‌كێ ل مالا ئێزديان ل سوريا ماينه و شڤێدى گه‌هشتينه شنگال و بڕياره ئه‌ڤرۆ پشتى نيڤرۆ ژى بگه‌هنه پارێزگه‌ها دهۆكێ و پێدڤيێن ئاهێن خوارنێ ل سه‌ر بهێنه به‌لاڤكرن و ژ لايێ ساخله‌ميێ ژى ڤه يا پێدڤى بۆ بهێته كرن.
ئەڤرۆ نیوز، سەباح زوھێر:
ئەڤرۆ رێکەفتی 2ى ئادارا 2019 ل جادەیا سەرەکی نێزیک دووریا کویشکێ ناحیا گردەسین یا سەر ب قەزا ئاکرێ ڤە روودانەکا ھاتنوچوونێ دروست بوو د ئەنجام دا سێ کەسا گیانێ خوە ژ دەست دا.
رێکەفت زوھێر بەرپرسێ ھاتنوچوونا قەزا ئاکرێ بۆ ئەڤرۆ نیوز ددەتە دیارکرن کو شڤێدی درەنگ د روودانەکا ھاتنوچوونێ ژ جورێ وەرگەریان ل سەر جاددەیا سەرەکی ل نێزیک دووریانا گوندێ کویشکی یا سەر ب ناحیا گردەسین دروست بوویە.
ناڤھاتی زێدەتر گۆت: “ژ ئەنجامێ وێ بوویەرێ ب مخابنی ڤە سێ کەس د وێ ترۆمبێلێ دا بوون و ھەرسێ یان گیانێ خوە ژ دەست دا، ئەو ژی ترۆمبێلا وان وەرگەریابوو د ئاڤێ دا، ئەو کەسێن گیانێ خوە ژ دەست دایی ب ناڤێ (رزگار حیدەر، عەلی عەبدولرەحمان، سالم مەلا ئیبراھیم) کو ھەرسێ ئاکنجیێن گوندێ (گوندک) ینە یا سەر ب قەزا ئاکرێ ڤە”.
ئه‌ڤرۆ نيوز:
رێڤەبەریا گشتیا کەشناسی و بیڤەلەرزێ ل ھەرێما کوردستانێ راگەھاند کو سوبەھی رۆژا پێنجشه‌مبى رێکەفتی 3ى ئادارا 2019ێ ئەسمان دێ د ناڤبه‌را ساهياتى و ئه‌وره‌كێ كێم دا بيت و بارانه‌كێ كێم و هوور دێ ل ده‌ڤه‌رێن چيايى باريت ل گه‌ل هنده‌ك به‌فرا كێم.
پشکا پێشبینیان ل رێڤەبەریا گشتیا کەشناسی و بیڤەلەرزێ ل ھەرێما کوردستانێ د نڤیسارەکێ دا کو دانەک بۆ ئەڤرۆ نیوز رەوانە کرینە راگەھاند کو دهێته پشبينيكرن ئه‌سمان د ناڤبه‌را ساهياتى و ئه‌وره‌كێ كێم دا بيت و بارانه‌كێ كێم و هوور دێ ل ده‌ڤه‌رێن چيايى باريت ل گه‌ل هنده‌ك به‌فرا كێم.
پشکا پێشبینیان دایە زایە زانین کو دێ لەزاتیا بایی د ناڤبەرا 5 ھەتا 10کم دا و ماوێ دیتنێ ژی دێ 10کم بیت، پلێن گەرمێ ژی دێ د ناڤبەرا 2 بۆ 10 پلان دا بن.
ئه‌ڤرۆنیوز:
ب هه‌لكه‌فتا بیره‌وه‌ریا 40 سالیا وه‌غه‌ركرنا مسته‌فا بارزانى رێبه‌رێ بزاڤا رزگاریخوازا گه‌لێ كوردستانێ، ژبلى هه‌رێما كوردستانێ وپارچێن دى یێن كوردستانێ، ل باژێرێ به‌سرا ژى ئه‌ڤ هه‌لكه‌فته هاته ساخكرن.
مسته‌فا بارزانى كو پشتى شوره‌شا 14 ته‌مووزا 1958 ل گه‌ل هه‌ڤالێن خوه ژ ئێكه‌تیا سوڤیه‌تى یا جاران زڤرى عیراقێ، ل باژێرێ به‌سرا هاته دناڤ عیراقێ دا كو ل وێرێ پێشوازیه‌كا جه‌ماوه‌رى یا مه‌زن ژلایێ خه‌لكێ به‌سرا لێ هاته كرن، نوكه ژى هه‌لكه‌فتا 40 سالیا وه‌غه‌ركرنا بارزانیێ نه‌مر ژلایێ خه‌لكێ به‌سرا ب رێیا تۆرێن جڤاكى ب بلند هاته راگرتن.
په‌یچێ (هنا ئه‌لبه‌سرا) ل سه‌ر تۆرا فه‌یسبووكى كو ئێك ژ په‌یچێن سه‌ره‌كى یێن باژێرێ به‌سرایه، ب وێ هه‌لكه‌فتێ وێنه‌كێ مسته‌فا بارزانى به‌لاڤكریه ول سه‌رى نڤیسى یه ( په‌یڤا حه‌قیێ، هه‌كه مه ژى سه‌ركردێن وه‌كو یێن كوردان كوردان هه‌بان ، كو خه‌لك وباژێرێن خوه خوه‌ش دڤێن، مافێن به‌سرا به‌رزه نه‌دبوون”.
ئه‌ڤرۆنیوز:
رێڤه‌به‌ریا گشتى یا كه‌شناسیێ ل هه‌رێما كوردستانێ راگه‌هاند، ئه‌و پێلا به‌فر و باران بارینێ ئه‌وا چه‌ندین ده‌ڤه‌رێن هه‌رێما كوردستانێ ڤه‌گرتى، ئێڤاریا ئه‌ڤرۆ ئه‌ینیێ 1/3/2019 ب دووماهى هات.
ژێده‌ره‌كى ژ وێ رێڤه‌به‌ریێ دداخۆیانیه‌كا رۆژنامه‌ڤانى دا گۆت” ل ئێڤاریا ئه‌ڤرۆ ئه‌ینیێ ئه‌و پێلا به‌فر وباران بارینێ ئه‌وا بۆ ده‌مێ دو رۆژان ل هه‌رێما كوردستانێ به‌رده‌وام بووى، ب دووماهى هات”.
ئه‌ڤرۆنیوز:
ل دووڤ ژێده‌رێن ده‌نگوباسان یێن عیراقى، دانوستاندن دناڤبه‌را به‌رپرسێن بلند یێن سیاسى وده‌ستهه‌لاتا دادوه‌رى ل عیراقێ هاتینه ئه‌نجامدان ل سه‌ر زڤرینا چار مه‌زنه سه‌ركردێن سونى بۆ عیراقێ.
كه‌نالێ (الشرقیه نیوز) به‌لاڤكر”پێرابوونێن پێدڤى هاتینه هاڤێتن بۆ زڤرینا هه‌ر ئێك ژ تارق هاشمى جێگرێ پێشتر یێ سه‌رۆك كۆمارا عیراقێ ورافع عیساوى وه‌زیرێ دارایى یێ پێشتر وهه‌روه‌سا ئه‌سیل نوجێفى پارێزگه‌رێ پێشتر یێ نه‌ینه‌وا ل گه‌ل عه‌لى حاته‌م سه‌ركردێ دیارێ سونه‌یان ل پاریزگه‌ها ئه‌نبار”.
كه‌نالێ ناڤبرى به‌لاڤكر ژى كو ئه‌و چار سه‌ركردێن سونه پشتى دانوستاندنێ دناڤبه‌را سه‌ركردێن عیراقى یێن بلند وده‌ستهه‌لاتا دادوه‌رى بریارا ئێكلاكه‌ر هاتیه دان كو دشێن ل حه‌فتیا داهاتى بزڤرن عیراقێ.
پێشتر ئه‌و هه‌ر چار سه‌ركردێن سونى ژئه‌گه‌رێ بریارێن سیاسى ول ده‌مێ ناكۆكیان ل گه‌ل سه‌رۆك وه‌زیرێن عیراقێ یێ پێشتر نورى مالكى، ب تیرۆرێ هاتبوونه تۆمه‌تباركرن وهه‌ر چاران ب نه‌چاری عیراق بجه هێلابوو.
ئه‌ڤرۆنیوز:
گۆره‌كێ ب كۆم یێ كوردێن ئێزدى ل پارێزگه‌ها نه‌ینه‌وا هاته دیتن كو ته‌رمێ 23 وه‌لاتیان تێدایه كو ژلایێ چه‌كدارێن تیرۆرستێن داعشێ هاتبوونه كوشتن.
فه‌رمانده‌یا ئۆپه‌راسیۆنێن نه‌ینه‌وا، ل دووڤ مالپه‌رێ كوردستان تى ڤى، دبه‌یاننامه‌كێ دا به‌لاڤكر كو هێزێن وێ ل نێزیك ده‌ڤه‌را محه‌له‌بیه ل رۆژئاڤایێ مووسل، گۆره‌كێ ب كۆم یێن ئێزدیان دیتیه كو پێشتر ل ده‌مێ ده‌ست ب سه‌رداگرتنا مووسلێ ژلایێ داعشێ ڤه هاتبوونه كوشتن.
ئاماژه كر ژى كو ته‌رمێ 23 وه‌لاتیان دوى گۆرێ ب كۆم دایه كو هه‌موو وه‌لاتیێن ئێزدى نه.
پشتى ئازادكرنا مووسلێ وده‌ڤه‌رێن دى ژ تیرۆرستێن داعشێ، هه‌تا نوكه زێده‌تر ژ 60 گۆرێن ب كۆم یێن كوردێن ئێزدى یێن هاتینه دیتن.
ئه‌ڤرۆنیوز:
په‌قینه‌ك دناڤ ترومبێله‌كا وه‌لاتیه‌كێ پارێزگه‌ها سلێمانیێ دا ئه‌ڤرۆ ئه‌ینیێ 1/3/2019 روودا ودئه‌نجامدا كه‌سه‌ك ب گرانى برینداربوو وهه‌ردو پیێن خوه ژده‌ستدان.
كه‌مال ئه‌حمه‌د، به‌رپرسێ راگه‌هاندنا نه‌خوه‌شخانا شه‌هید ره‌ئووف به‌گ ل قه‌زا شاره‌زوور دداخۆیانیه‌كا رۆژنامه‌ڤانى دا گۆت”ئه‌ڤرۆ وه‌لاتیه‌ك ب بریندارى بۆ پشكا ته‌نگاڤیان ل نه‌خوه‌شخانا مه هاته ڤه‌گوهاستن”.
گۆت ژى” ئه‌و وه‌لاتى یه ب ناڤێ (فاروق حه‌مه سالح) دژیێ 40 سالیێ دایه، ژئه‌گه‌رێ په‌قینا بۆمبه‌كێ دناڤ ترومبێلا وى دا ل باژێركێ وارماوا ل سنوورێ سلێمانیێ، هه‌ردو پیێن خوه ژده‌ست دان وژبه‌ر گرانیا برینا وى، هاته هنارتن بۆ نه‌خوه‌شخانا ته‌نگاڤیان ل باژێرێ سلێمانیێ”.
هه‌ر ئه‌ڤرۆ ئێڤارى ژئه‌گه‌رێ برینا وى یا دژوار، وى وه‌لاتى گیانێ خوه ژده‌ست دا.
ئه‌ڤرۆنیوز:
جێگرێ سكرتێرێ گشتیێ ئێكه‌تى نیشتمانى كوردستان راگه‌هاند، شانده‌كێ بلند یێ ئیكه‌تیێ دێ ل گه‌ل پارتى دیموكراتى كوردستان كۆم بیت.
ده‌زگه‌هێن راگه‌هاندنێ یێن ئیكه‌تیێ به‌لاڤكر، كۆسره‌ت ره‌سول جێگرێ سكرتێرێ گشتیێ ئێكه‌تیێ راگه‌هاند” ل ڤان نێزیكان ل باره‌گایێ مه‌كته‌با سیاسى یا ئێكه‌تیێ دێ ل گه‌ل شانده‌كێ بلند یێ پارتى كۆم بن”.
کۆسرەت رەسول هه‌روه‌سا گۆت” دكۆمبوونێ دا دێ بزاڤا چاره‌كرنا كێشه وگرفتنێن دناڤبه‌را هه‌ردو لایه‌نان هێته كرن”.
نيشاندان