ئه‌ڤرۆ نيوز:
ئه‌ندامه‌كێ مه‌كته‌با سياسى يا ئێكه‌تى نشتيمانى كوردستان هوورده‌كاريێن كۆمبوونا چاڤه‌رێكرى يا مه‌كته‌با سياسى يا ئێكه‌تيێ ئاشكه‌را دكه‌ت.
ئه‌ڤرۆ رۆژا شه‌مبى 23ى شوباتا 2019ێ سه‌عدى پيره راگه‌هاند كو كۆمبوونا مه‌كته‌با سياسى يا ئێكه‌تى نشتيمانى كوردستان ل سلێمانيێ كۆم بيت.
ئاماژه ب وێ چه‌ندێ ژى كر كو هه‌ر ئێك ژ ته‌وه‌رێن پێكئينانا حوكمه‌تێ، كێشێن پشتى 18ى شوباتێ و گوهۆڕينا به‌رنامێ ئێكه‌تێ بۆ پشكداريكرن د حوكمه‌تێ دێ هێنه گه‌نگه‌شه‌كرن.
ئه‌ندامێ مه‌كته‌با سياسى يا ئێكه‌تى نشتيمانى كوردستان ده‌رباره‌ى رێكه‌فتا 5ى شوباتێ ل گه‌ل پارتى ديموكراتى كوردستان گۆت: “ئه‌سلێ بابه‌تى به‌رنامه و سياسه‌ته”.
ئه‌ڤرۆنیوز:
زیا تارق ئاكجى سیاسه‌تمه‌داره‌كێ كورده ل باكوورێ كوردستانێ، ب دیتنا ئێدى ل توركیا سه‌رده‌مێ هه‌ده‌پێ ده‌ست پێكریه وپه‌كه‌كه ب دووماهى هاتیه، له‌وما گرنگه دنوكه دا په‌كه‌كه په‌یوه‌ندیێن خوه ل گه‌ل هه‌ده‌پێ ببریت.
زیا تارق ددیداره‌كێ دا ل گه‌ل مالپه‌رێ (T24) یێ توركی هه‌لسه‌نگه‌ندنا خوه بۆ پاشه‌رۆژا كوردان كر ل توركیا وره‌خنه ل په‌كه‌كێ گرت كو گه‌له‌ك ده‌ستێوه‌ردانێ دكاروبارێن هه‌دپێ دا دكه‌ت. دده‌مه‌كى دا پێدڤى ناكه‌ت وى كارى بكه‌ت، چونكى هه‌ده‌په پارته‌كه ل توركیا سیاسه‌تێ دكه‌ت وب شێوه‌كێ جودا ژ په‌كه‌كێ هاتیه دناڤ مه‌یدانا سیاسه‌تێ دا.
خویاكر” هه‌ده‌په پارته‌كا سیاسى یا توركى یه ونابیت په‌كه‌كه ژى ده‌ست دكاروبارێن ناڤخوه‌یى یێن توركیا وه‌ربده‌ت، چونكى نوكه چاره‌كرنا كێشا كوردى ب رێیا هچه‌كى یا ئه‌سته‌مه ویا ب دووماهى هاتى، گرنگه هه‌ده‌په وه‌كو پارته‌كا كوردى ب رێیا دیالوكێ وب شێوه‌كێ مه‌ده‌نیانه به‌حس ل چاره‌كرنا كێشا كوردى بكه‌ت.
ئه‌ڤرۆنيوز:
وه‌زاره‌تا ساخله‌ميێ ل هه‌رێما كوردستانێ ل دۆر به‌لاڤبوونا جۆره قه‌تره‌كا چاڤان كو ل تۆرێن جڤاكى ل سه‌ر ئه‌نترنێتێ ريكلام بۆ دهێته كرن، هوشداريێ دده‌ته وه‌لاتيان كو وێ قه‌ترا چاڤان بكارنه‌ئينن.
رێڤه‌به‌ريا كۆنترۆلا جۆرى يا ده‌رمانان ل وه‌زاره‌تا ساخله‌ميێ ل هه‌رێما كوردستانێ د رۆهنكرنه‌كێ دا به‌لاڤكر”قه‌تره‌كا چاڤان كو چو رێدان ورێنمايه‌كا زانستى بۆ دروستكرنا وێ نينه، ل تۆرين جڤاكى ريكلام بۆ دهێته كرن، بكارئينانا وێ يا ب مه‌ترسيه”.
رێڤه‌به‌ريا ناڤبرى داخواز ژ وه‌لاتيان كر كو باوه‌ريێ ب ريكلام وپرۆپاگندين تۆرێن جڤاكى يێن تايبه‌ت ب ده‌رمانان نه‌كه‌ن ووان ده‌رمانان نه‌كرن، چونكى بكارئينانا ده‌رمانان بێ نوشدارێ تايبه‌تمه‌ند، مه‌ترسيا مه‌زن ل سه‌ر ساخله‌ميێ يا هه‌ى، ب تايبه‌ت ئه‌و ده‌رمانێن په‌يوه‌ندى ب ئه‌ندامێ هه‌ستيارێ وه‌كو چاڤێ هه‌ى”.
ئه‌ڤرۆنيوز:
شره‌تكاره‌كێ مه‌كته‌با سياسى يا ئێكه‌تى نيشتمانى كوردستان ل دۆر په‌يوه‌نديێن دناڤبه‌را پارتى وئێكه‌تيێ راگه‌هاند، په‌يوه‌نديێن هه‌ردو لايه‌نان دێ ئاسايى بن.
سمكۆ ئه‌سعه‌د، شيره‌تكارێ مه‌كته‌با سياسى يا ئێكه‌تى نيشتمانى كوردستان گۆت” بريارا مه‌كته‌با سياسى يا ئێكه‌تيێ بۆ ئاساييكرنا په‌يوه‌نديێن پارتى وئێكه‌تيێ ئه‌وه كو كێشين مه ل سه‌ر مێزا دانوستاندنێ بهێنه چاره‌كرن، هه‌روه‌سا ئه‌م هه‌ردو لايه‌ن وه‌كو دو لايه‌نێن به‌رپرس مامه‌لێ ل گه‌ل چاره‌نڤيسێ ملله‌تێ خوه بكه‌ين”.
سمكۆى زێده‌تر بۆ باسنيوز گۆت” ئارمانجا ئێكه‌تيێ ئه‌وه ده‌ستهه‌لاتا كوردستانێ ل سه‌ر ئاستێ هه‌موو كوردستانێ يا ئێكگرتى بيت نه‌كو ده‌ڤه‌ر ب ده‌ڤه‌ر بهێته جوداكرن، ئه‌ڤه ئه‌و بناغه كو ئێكه‌تى دخوازيت دانوستاندنێ ورێككه‌فتنێ ل سه‌ر بكه‌ت”.
گۆت ژى” باوه‌ر ناكه‌م پارتى وئێكه‌تى بشێن په‌يوه‌نديێن خوه ببرن، چه‌نكى ئه‌و دولايه‌نه دزانن به‌رژه‌وه‌نديا بلند يا ملله‌تێ مه دسه‌ر به‌رژه‌وه‌نديێن حزبان دايه، هه‌روه‌سا ئێكه‌تى وپارتى هه‌تا نوكه ژبۆ به‌رژه‌وه‌نديا ملله‌تێ كورد خه‌بات وسياسه‌ت كريه، له‌وما چو ده‌مه‌كى په‌يوه‌نديا پارتى وئێكه‌تيێ ناگه‌هيته حاله‌تا دووركه‌فتنێ”.
دووپاتكر كو پارتى وئێكه‌تى دێ كۆمبن ودێ ل سه‌ر مێزا دانوستاندنێ كێشان چاره‌كه‌ن، گۆت ژى”به‌رپرسێن پارتى وئيكه‌تيێ بزاڤا چاره‌كرنا وان كێشان دكه‌ن، چونكى هه‌كه ئه‌و دو لايه‌نه كێشێن خوه چاره نه‌كه‌ن، دبيت زيان بۆ وه‌لاتيان هه‌بيت”.
شيره‌تكارێ مه‌كته‌با سياسى يا ئێكه‌تێ خوياكر ژى”ئاسايي كرنا په‌يوه‌نديێن پارتى وئيكه‌تيێ پێدڤى ب ناڤبه‌ريا چو لايه‌نه‌كێ دى نينه، چونكى پارتى وئێكه‌تى چه‌ندين ساله ڤى وه‌لاتى ب رێڤه‌دبه‌ن وهه‌ر ئه‌و ب خوه ژى لايه‌نێن سيێ وچارێ نه وهه‌ر ئه‌و ب خوه دێ بن ئێك لايه‌ن بۆ چاره‌كرنا كێشان”.
ئه‌ڤرۆنيوز:
ئه‌ندامه‌كێ په‌رله‌مانێ كوردستانێ ژفراكسيۆنا پارتى ديموكراتى كوردستان ده‌ستپێشخه‌ريه‌كا سه‌رۆك مه‌سعود بارزانى بۆ چاره‌كرنا كێشێن هه‌رێما كوردستانێ وپێكئينانا حوكمه‌تا نوو يا هه‌رێمێ ئاشكرا دكه‌ت.
زانا مه‌لا خالد، ئه‌ندامێ په‌رله‌مانێ كوردستانێ ژ فراكسيۆنا پارتى بۆ باسنيوز راگه‌هاند” ده‌نگوباسه‌كێ دلخوه‌شكه‌ر بۆ خه‌لكێ كوردستانێ يێ ب رێڤه وب ده‌ستپێشخه‌ريا سه‌رۆك مه‌سعود بارزانى ل چه‌ند رۆژێن داهاتى گرفتێن دناڤبه‌را پارتى وئيكه‌تيێ ل دۆر پێكئينانا حوكمه‌تا نوو يا هه‌رێما كوردستانێ دێ هێنه چاره‌كرن”.
ل دۆر وێ چه‌ندێ ژێده‌ره‌كى بۆ باسنيوز دووپاتكر كو سه‌رۆك بارزانى داخوازكريه هه‌ردو مه‌كته‌بێن سياسى يێن پارتى وئێكه‌تيێ ب زووترين ده‌م كۆمببن.
ئه‌ڤرۆنيوز:
جڤاتا دادوه‌ريێ يا بلند ل عيراقێ زمانێ كوردى ل سه‌ر لۆگۆيێ خوه يێ نوو لادا، جێگرێ سه‌رۆكێ په‌رله‌مانێ عيراقێ ژى داخوازا رۆهنكرنێ ژ جڤاتا ناڤبرى دكه‌ت.
به‌شير حه‌داد، جێگرێ دويێ يێ سه‌رۆكێ په‌رله‌مانێ عيراقێ دداخۆيانيه‌كا رۆژنامه‌ڤانى دا راگه‌هاند كو وى داخوازا رۆهنكرنێ ژ جڤاتا دادوه‌رى يا بلند ل عيراقێ كريه كو ئه‌گه‌رێ لادانا زمانێ كوردى ل سه‌ر لۆگۆيێ نوو يێ جڤاتا ناڤبرى رۆهن بكه‌ن.
به‌شير حه‌داد گۆت ژى” ئه‌ڤ كارێ جڤاتا دادوه‌رى يا بلند ئه‌نجامداى، به‌رۆڤاژى مادا چار ژ دستوورێ عيراقێ يه وبه‌رۆڤاژى مادێن 3 و 4 يێن قانوونا زمانێن فه‌رمى يه ل عيراقێ يا هژمار 7 يا سالا 2014 ومه نڤيساره‌كا فه‌رمى ئاراسته‌ى جڤاتا ناڤبرى كرى ودێ دووڤچوونا جدى ژى بۆ كه‌ين ودێ مه هه‌لويست ژى هه‌بيت”.
به‌رى ده‌مه‌كى جڤاتا دادوه‌رى يا بلند ل عيراقێ، لۆگۆيێ خوه گوهارتيه ونڤيسينا كوردى ل سه‌ر لادايه وتنێ زمانێ عه‌ره‌بى وئينگليزى ل سه‌ره.
نيشاندان