ئەڤرۆ نیوز:
سەرۆک کۆمارێ تورکیا راگەهاند کو پشتی هەلبژارتنێن باژێرڤانیان ل تورکیا دێ پرسا سووریێ ل مەیدانێ دا چارە کەن و گۆت: (ئەم پرسا سووریێ ل سەر مێزا دانوستاندنان چارە ناکەین بەلکو دێ ل سەر ئەردی چارە کەین).
سەرۆک کۆمارێ تورکیا ئەو یەک ژی دیار کر کو هەتا نها مە گەلەک هاریکاریا خەلکێ سووریێ کریە و دێ هاریکاریا مە بۆ خەلکێ وی وەلاتی د بەردەوام بن.
ئەڤرۆ نیوز:
ل گۆر دەزگەهێن راگەهاندنا تورکیا ل نێزیکی حەلەبێ د ئەنجاما روودانەکا هاتنوچوونێ دا نەه سەربازێن تورکیا بریندار بووینە کو برینا هندەکا یا گرانە.
هەتا نها ب دروستاهی ئەگەرێ روودانێ نەهاتیە ئاشکرا کرن، لێ هندەک مالپەرێن سەر ب ئۆپۆزسیۆنا تورکیا دبێژن د ئەنجاما پەقینەکێ دا نەه سەرباز بریندار بووینە.
ئەڤرۆ نیوز:
نڤیسەر و دیرۆکناسێ ناڤدارێ روسیا تاراسۆڤ ستانیسلاو راگەهاند کو ترامپ ب چو رەنگەکێ رازی نابیت تورکیا هێرشی کوردێن سووریێ بکەت و نها ترامپ کوردێن سووریێ وەکو کارتەکا فشارێ ل دژی ئەردۆگانی بکار دئینیت دا کو ئەردۆگانی نەچار بکەت خوە ژ روسیا و ئیرانێ دوور بکەت.
ناڤهاتی ئاماژە ب هندێ ژی کریە کو ژ بەر هندێ ژی هەتا نها تورکیا نەشیایە هێرشی رۆژهەلاتێ فراتێ بکەت و ژ ڤێ یەکێ ژی ئەمریکا جارێ هێزێن خوە ژ سووریێ ڤەناکێشیت.
ئەڤرۆ نیوز، بارزان مزووری:
ئەندازیار ئیبراھیم یوسف بەرپرسێ ھوبا ئاڤدانێ ل قەزا شێخان بۆ ئەڤرۆ نیوز دیار کر ل دوڤ وێ ئامارا بەردەستێ مە ل سنورێ قەزا شێخان پتری ١ ھزار و ٨٥ ملیم یێن بارانێ بارینە ئەڤە چل سالە رێژا باران بارینێ نەگەھشتیە ڤی ئاستی د سالا بوری دا دڤی وەختی دا ٣٠٠م یێن بارانێ باریبوون.
ژلایەکێ دی ڤە د بێوار خنسی راوێژکارێ ئەمن و ئابووری یێ حوکمەتا ھەرێما کوردستانێ و بسپور دبوارێ جیولوجی دا بۆ ئەڤرۆ نیوز دیار کر کو ب گشتی هەکە ١٠٠مەترێن چارگوشە ل ئەسمانی بێنەخارێ ژ وانا ٦٥ مەترێن چارگوشە وێ ئاڤێ دێ ل سەر سەر عەردی چن دێ بنە جو و رووبار ٣٥ مەترێن چارگوشە یێن وێ ئاڤێ دێ چنە ل بن عەردی بنە ژێدەرێن ئاڤا ژێر عەردی.
ناڤھاتی خوەیا کر کو بارینا بارانێ دڤێ رێژێ دا پێدڤیە لێ ھشیار بن دێ بیتە ئەگەرێ ھەرفتنا ھندەک جھێن مەترسی و لافاو دروست بن پێدڤییە دیراساتێن باش بھێنە کرن ژلایێ حوکمەتا ھەرێما کوردستانێ ڤە تایبەت د نھا دا پێدڤیە حوکمەت بریارێ ل سەر بدەت کو ھەر کەسەکێ پرۆژەیەکی دروست کەت داخوازا نەخشەیێ جیولوجی یێ وێ دەڤەرێ بکەت ژ بەر مەترسیا لافاوان د پاشەروژێ دا.
ئەڤرۆ نیوز:
کومبوونا پەرلەمانێ کوردستانێ بۆ راستڤەکرنا قانوونا سەروکاتیا ھەرێما کوردستانێ و کاراکرنا وێ ئەڤرۆ ئێڤاری ٣٠-٣-٢٠١٩ دێ ھێتە ئەنجامدان، و ئێکەتی ژی پشکداری د ڤێ کومبوونێ دا ناکەت پشتی نەگەھشتیە رێککەفتنێ دگەل پارتی.
ئێکەتیێ داخوازا جێگرێ دویێ سەروکێ ھەرێما کوردستان کریە لێ پارتی رازی نەبوویە ژ بەرکو پارتی دخوازیت تنێ ئێک جێگر ھەبیت و ئەو ژی دایە تەڤگەرا گۆران، لەورا ئێکەتی ژی رەتکر پشکداریێ د کومبوونا ئەڤرۆ دا بکەت ژ بەرکو چو مفا بۆ وێ حزبێ نینن د ڤێ کومبوونێ دا.
ئەڤرۆ نیوز:
ستێرا بەرێ یا بەرشەلۆنا و ھەلبژارتیێ بەرازیل ریڤالدو د دیدارەکێ دا دیارکر ھەکە یانا ریال مەدرید ٢٨٠ ملیون ملیون یورۆیا یاریزانێ فرەنسی و یانا پاریس مباپێ بدەت دبینت مبالغەکا گەلەک مەزنە ژبەرکو نابینت ئەو یاریزان ھەژی وی کوژمێ پارە یە نە بتنێ ئەو یاریزان بەلکو میسی و رونالدو ژی نە ھەژی وی کوژمێ پارەی نە.
سەبارەت وی دەنگوباسێ دھێتە بەلاڤەکرن کو ھازارد ل ھاڤینا بھێت دێ ھەڤبەستا ریال مەدرید ئیمزا کەت ناڤبری دیارکر دبینت ھەکە ریال مەدرید ھەڤبەست ل گەل ھازارد ئیمزا بکەت دێ ریال مفایەکێ گەلەک مەزن ژ شیانێن ئەوی یاریزانی بینت ژبەرکو یاریزانەکێ خودان شیان و سەرکێشە د یاریگەھێ دا دێ رولەکێ مەزن ل گەل ریال مەدرید ھەبیت .
ئەڤرۆ نیوز:
یانا یوڤانتوس یا ئیتالی بوو مرێرکاتویا ھاڤینا بھێت چار یاریزانێن ریال مەدرید کرینە ئارمانجا خوە بۆ دەستڤە ئینانا شیانێن سێ ھەتا دو ژ ئەوان یاریزانان لێ حەفتی بوو حەفتیێ پلانێن یوڤانتوس یێ دھێنە ژناڤبرن تایبەت پشتی زێدان ھەڤبەستا ریال مەدرید ئیمزاکری کو ھەر ئێک ژ مارسێلوی و ئیسکو ژ بریارا خوە لێڤەبووینە بۆ یوڤانتوس دیارکریە ئەو پێدڤی دەمی نە ھەتا بریارێ ل سەر بەرسڤا ئەوان بدەن ھەردیسان یوڤانتوس نوکە ڤاران و خامێس رودرێگیز ژی کرینە ئارمانجا خوە سەرەکی لێ زێدان رەتکریە دەستا ژ ڤاران بەردەت و یاریزانێ چارێ ژی رودرێگیز بایرن میونیخ دێ پلانا یوڤانتوس ژ ناڤبەت .
رۆژناما توتو سپورت یا ئیتالی دیارکریە یانا بایرن میونیخ ل بریارا خوە پەشێمان بوویە پشتی ل ماوێ بوری دیارکری دبیت ئەو ھەڤبەستا رودرێگیز ئیمزا نەکەن ل دووماھیا ڤی وەرزی کو بریارە ھاڤینا بھێت دەمێ ڤەگوھاستنا وی یا ب قەر ب دووماھیی بھێت و ڤەگەریتە ریال مەدرید ڤە لێ پشتی وی یاریزانی ل چەند حەفتیێن بوری شیای ئاستەکێ بلند پێشکێش بکەت ل گەل یانا میونیخ ، ل بریارا خوە پەشێمان بووینە و ھزر ل کرینا ئەوی یاریزانی کریە ب فەرمی ژ ریال مەدرید.
ھەژی گوتنێ یە یانا بایرن میونیخ یا ئەلمانی ھەڤبەستا خامێس رودرێگیز بەری دو وەرزان ب شێوەیێ خواستن ژ یانا ریال مەدرید ئیمزاکریە و ل گەل مەرجەیێ کرینا ئەوی پشتی بورینا دو وەرزێن وی ب دووماھیی بیت بەرامبەر کوژمێ ٤٢ ملیون یورۆیا .
ئەڤرۆ نیوز:
چاڤەرێ دھێتەکرن ئەڤرۆ ل دەمژمێر ٦:١٥ پشتی ئێڤاری ل دیڤ دەمێ کوردستانێ ھەردو یانێن بەرشەلۆنا و ئیسپانیول ل یاریا دێربیا کەتەلونیا ھەمبەری ئێک بەن ل یاریگەھا کامپ نوو ژ چارچوڤێ یاریێن گەرا ٢٩ ژ خۆلا لالیگا ئیسپانی.
راھێنەرێ یانا بەرشەلۆنا ڤالڤێردی بەری ڤێ یاریێ دیارکر حەفتی بوو حەفتی ئەو یێ نێزیکی ئارمانجا خوە یا برنا ناسناڤێ خولێ دبەن و ئەو دخوازن بەری ب دووماھیی ھاتنا خولێ ئەو ناسناڤێ خولێ ب چەند حەفتیان ناسناڤێ خولێ مسوگەر بکەن داکو ل دووماھیێ توشی چ مەترسیا نەبن ھەر چەندە نوکە چیاوازیەکا باش دناڤبەرا ئەوان و ھەڤرکیێن ئەوان دا ھەیە کو ١٠ خالان لێ د یاریا تەپا پێ دا پێدڤی یە پێشبینیا ھەر ئەنجامەکی بکەین لەورا ئارمانجا ئەوان ل ھەموو یاریێن بھێت ھەتا ناسناڤێ خولێ مسوگەر بکەن ئەو دێ پشت بەستنێ ل سەر ھەمان پێکھاتی کەن ئەوێن بەری نوکە.
ناڤبری سەبارەت پشکداریا میسی و سوارێز دیارکر ھەردو یاریزان د بەرھەڤیەکا باش دانە میسی ١٠٠% بوو یاریێ یێ بەرھەڤە.
ھەردیسان راھێنەرێ بەرشەلۆنا ئاماژە ب وێ چەندێ ژی کر ئیسپانیول تیمەکا باش ھەیە و نوکە د مەترسیا پاشڤەزفرینێ دا نین و شەری دکەن بوو دەستڤە ئینانا خالان داکو بشێن پشکداریێ د قارەمانیا یورۆپا لیگ دا بکەن لەورا و ئەو نزانیت کا ئیسپانیول بۆ یاریا ئەڤرۆ دێ شێوازێ خوە گوھورن یان نە لێ تیما مە دێ ل سەر رێکا خوە یا بەردەوام بیت و ب ھەمان شێوەیێ یاریێن بوری یاریێ کەن.
ئەڤرۆ نیوز ٬ عەلی حاجی :
ئەڤرۆ ئەینیێ ۲۹/۳/۲۰۱۹ ئەکتەرێ کومیدیێ باژێرێ زاخۆ (عەبدوللا بوتانی) یێ ناڤدار ب (رەمو شەلوال) پشتی بۆ ده‌مێ دو رۆژان مایە د نەخوه‌شخانێ دا ٬ ئەڤرۆ ل نەخوه‌شخانەکا وەلاتێ تورکیا وه‌غه‌ركر
مەهدی مونیر، بەرپرسێ نڤێسینگەها زاخۆ یا سەندیکا هونەرمەندێن کوردستانێ بۆ ئەڤرۆ نیوز گوت” پشی ئەکتەرێ کومێدێ عه‌بدوللا بوتانى ب مەرەما سەرەدانەکێ دچیتە باژێرێ جزیرێ ل وەلاتێ تورکیا٬ ل وی باژێری ژبه‌ر سه‌رمایێ نەخوەش دکەڤیت وبۆ ده‌مێ دو رۆژان دمینیتە دبن چاڤدێریا نوشداران دا وئه‌ڤرۆ وه‌غه‌ركر”.
گۆت ژى” بریارە سوبه‌هی شەمبیێ 30/3/2019 تەرمێ وى ب رێیا ده‌رگه‌هێ سنووریێ ئیبراهیم خەلیل بگەهیتە باژێرێ زاخۆ”.
مەهدی مونیری زێدەتر دیار کر كو ل سالا ۲۰۱۳ نەشتەرگەریەک بۆ دەمارێن دلێ ئەکتەرێ ناڤبری هاتبوو ئەنجامدان و ئەگەرێن مرنا وی ژی ژبەر وێ نەخوەشیێ بوویە.
عەبدوللا بوتانی ژئەکتەرێن ب ناڤودەنگ و خودان شیان بوو و هەر ل سالا ۱۹۷۰ دەست ب کارێ ئەکتەریێ کریە و پشکداری دچەندین فلمان دا کریە و ئەندامێ سەندیکا هونەرمەندێن کوردستانێ بوو.
ئه‌ڤرۆ نیوز:
وه‌زاره‌تا ده‌رڤه یا ئیرانى ئاشكراكر كو دانا ڤیزا بێ به‌رامبه‌ر بۆ وه‌لاتیێن ئیرانى وعیراقێ دێ ل رۆژا دوشه‌مبى 1/4/2019 چیته د وارێ بجهئینانێ دا.
به‌هرام قاسمى، په‌یڤدارێ وه‌زاره‌تا ده‌رڤه یا ئیرانى بۆ ته‌له‌ڤزیۆنا ئیرانى راگه‌هاند” پشتى سه‌ره‌دانا سه‌رۆكێ ئیرانێ حه‌سه‌ن رۆحانى بۆ عیراقێ به‌رى دو حه‌فتیان، رێككه‌فتن هاته كرن بۆ هه‌لوه‌شاندنا وه‌رگرتنا رسوماتان ل سه‌ر چوونا وه‌لاتیێن ئیرانى بۆ عیراقێ وبه‌رۆڤاژى چوونا وه‌لاتیێن عیراقى بۆ ئیرانێ، ئانكو دانا ڤیزێ ببیته بێ به‌رامبه‌ر د ناڤبه‌را هه‌ردو وه‌لاتان دا.
گۆت ژى” دانا ڤێزا بێ به‌رامبه‌ر بۆ وه‌لاتیێن عیراقێ وئیرانێ دێ ل رۆژا 1/4/2019 چیته د وارێ بجهئینانێ دا”.
نيشاندان