ئه‌ڤرۆ نیوز، مه‌حمود نهێلی
ده‌زگه‌هێ خێرخوازیێ بارزانی ب هه‌ڤكاری ل گه‌ر رێكخراوه‌كا بیانی جلك ل سه‌ر زارۆیێن كه‌مپا داوودیێ ل سنورێ قه‌زا ئامێدیێ ئه‌ڤرۆ دوشه‌مبی 4/2/2019 به‌لاڤكرن.
شه‌ڤگه‌ر ره‌مه‌زان، نوونه‌رێ ده‌زگه‌هێ خێرخوازیێ یێ بارزانی بۆ ئه‌ڤرۆ نیوز دیاركر، كو وان ئه‌ڤ جلك ب هه‌ڤكاری ل گه‌ل رێكخراوا یونیسف ب سه‌ر زارۆیێن كومپا داوویێ ل ناحیا بامه‌رنێ ل قه‌زا ئامێدیێ به‌لاڤكرینه و گۆت : ئه‌و جلك 1538 زارۆیێن ته‌مه‌نێ وان دناڤبه‌را ئێك رۆژێ تا 14 سالی دا هاتنه پارڤه‌كرن. و ئاشكرا ژی كر، كو ئه‌و به‌رده‌وام هاریكاریان ب سه‌ر ئاواره‌یێن سنورێ ده‌ڤه‌را ئامێدیێ به‌لاڤ دكه‌ن بتایبه‌تی ژی یێن دكه‌مپان دا.
ئه‌ڤرۆنیوز:
وه‌زیرێ پێشمه‌رگه ب وه‌كاله‌ت، كه‌ریم شنگالی ل گه‌ل شانده‌كێ بلند یێ وه‌زاره‌تا به‌رگریا عیراقێ كو پێكهاتبوو ژ فه‌ریق روكن عه‌بدولئه‌میر یاروللا جێگرێ سه‌رۆك ئه‌ركانێن له‌شكرێ عیراقێ بۆ ئوپه‌راسیۆنان وشانده‌كێ دگه‌لدا كۆمبوو.
دكۆمبوونه‌كێ ژبلی ئاساییكرنا په‌یوه‌ندیێن دناڤبه‌را هه‌ر دو لایه‌نان دا، روناهی هاته خستن ل سه‌ر دووماهی پێشهاتێن ڤێ دووماهیێ ل عیراقێ وده‌ڤه‌رێ، هه‌ڤده‌م ب هووری دانوستاندن ل سه‌ر گوهۆرینێن ئه‌منی وره‌وشا ده‌ڤه‌رێن كوردستانی یێن ده‌رڤه‌ی ئیدارا هه‌رێمێ.
بریاره ل حه‌فتیا داهاتی لژنێن ب سه‌ر وان هه‌ردو وه‌زاره‌تان ڤه ده‌ست ب ئه‌نجامدانا كار وكۆمبوونان بكه‌ن.
ئەڤرۆ نیوز: سەباح زوھێر:
دیدار رەمەزان رێڤەبەرێ گەشت گوزارێ ل ئاکرێ بۆ ئەڤرۆ دیارکر ھژمارەکا جھێن گەشت و گوزاری ل دەڤەرا ئاکرێ تایبەت دەڤەرا نەھلێ و گەلیێ زنتا زیان پێ کەفتی نە.
زێدەتر گۆت: ئەو زیانێن بەر بجھێن گەشتیاری کەفتین خراببونا کەپر و پر و بەنداڤێن بچیکێن مەلاڤانیانە، ھەروەسا ھندەک جھێن گەشت و گوزاری رێکێن وان ھاتینە خرابکرن و ترومبێلین بچیک ناگەھنە وان جھان.
ناڤھاتی گۆت: مە ب ھەماھەنگیا ھندەک لایەنان راپورتەک بۆ جھێن پەیوەندیدار بلندکریە و کو ئەو جە بھێنە قەرەبووکرن و زوترین دەم بێنە چێکرن، چونکی دەمێ وەرزێ گەشتیارا یێ نزیک بووی و دێ کارتێکرن ل سەر ھاتنا گەشتیاران بۆ ڤان دەڤەران ھەبیت.
ئەڤرۆ نیوز، مەحمود نھێلی:
بەرپرسێ لژنا موەلیدان ل ئامێدیێ بۆ ئەڤرۆ نیوز دیارکر، بھایێ کارەبا موەلیدان بۆ ھەیڤا ئێک یا ئەڤ سالە ل سەرانسەرێ قەزا ئامێدیێ ٩ ھزار دینارن بۆ ھەر ئەمپیرەکی.
ئەندازیار ھەکار ئامێدی گۆت: بەرنامێ کارکرنا موەلیدان ژی دێ ھەر وەکو ھەیڤا ئێک بیت کو ل دەمژێر حەفتێ سپێدێ بۆ نەھێ سپێدێ بیت و ل دەمژێر دویێ پشتی نیڤرۆ بۆ دویێ شەڤێ و رۆژانێن ئەینی و بھێنڤەدانێن فەرمی دێ ل دەمژمێر ١١ سپێدێ بو دو شەڤێ بیت.
ئەڤرۆ نیوز، نەوزاد ھلۆری:
بەری دەمەکێ ئەڤرۆ تیمێن نقومڤان و بەرگریا شارستانی ل سوران تەرمێ وەلاتەکی ل رووبارێ زێ مەزن ل نێزیک رێزان ھاتە دیتن، بەرگریا شارستانی ل سوران ژی دیارکر کو گومان دھێتەکرن ئێک ژ شەھیدێن بوردومانا فروکێن تورکیا بیت ل دێرەلوک.
عیماد رێکانی، بەرپرسێ بەرەڤانیا باژێری ل سوران بو ئەڤرۆ نیوز گۆت: ئێڤاریا ئەڤرۆ تەرمێ وەلاتیەکێ نە ناسیار ل رووبارێ زێ مەزن ل نێزیک رێزان د ئاڤێ دا ھاتە دیتن و تيمێن بەرەڤانیا باژێری ل بلێ ھاتیە دەرئینان و رەوانەیێ نەخوشخانا گشتی یا بلێ ھاتیەکرن.
زێدەتر گۆت: ھەتا نوکە ناھێتە زانین کا ئەو تەرمە کی یە، لێ مە داخوازی ل کەس و کارێن شەھیدێن بوردومانا دێرەلوکێ کریە کو بھێن بەلکی ئێک ژ وان بیت ئەوێن کو ھاتینە شەھیدکرن، ئەگەر ئەو نەبوون دێ رەوانەیێ ھەولێرێ ھێنەکرن داکو ناسناما وی بھێتە زانین.
شێخان، بارزان مزووری:
ئەڤرۆ نیڤرۆ رۆژا دوشەمبی ٤-٢-٢٠١٩ د چەند رێورەسمێن تایبەت ب ئیزدیان ڤە ل شێخان پێشوازی ل تەرمێ میر تەحسین بەگ میرێ ئێزدیان ل عیراقێ و جیھانێ ھاتە کرن و بریارە سوبەھی ل باخچێ مالا وی دا بھێتە ڤەشارتن و تازیا وی ژی دێ ل ھولا بابا شێخ ھێتە دانان.
میر تەحسین بەگ ل ٢٨/١/٢٠١٩ ل باژێرێ ھانوڤەر یێ ئەلمانی ژ ئەگەرێ نەخوشیێ گیانێ خوە ژ دەستدابوو.
ئەڤرۆ نیوز ، عەلی حاجی :
نڤێسینگەھا زاخۆ یا دەستەیا سەربەخویا مافێ مروڤان بۆ ماوەیێ چەند روژان کەمپینەکا نیشتیمانی دژی ب کارئینانا چەکی ل زاخۆ دەست پێکری یە و بریارە سوبەھی رۆژا سێ شەمبێ ٥/٢/٢٠١٩ ب دوماھی بھێت.
ل دور ڤی بابەتی وەلات محەمەد ، بەرپرسێ ھوبا راگەھاندنێ و پەیوەندیان ل نڤیسینگەھا زاخۆ یا دەستەیا سەربەخویا مافێ مروڤی بۆ ئەڤرۆ نیوز گۆت: کەمپینا دژی بکارئینانا چەکی ل سەرانسەری کوردستانێ ل رێککەفتی ٢١/١/٢٠١٩ دەست پێکری ھەتا ٢/٥ /٢٠١٩بدوماھی ھێت و ئەڤ ھەوە ژلایێ دەستەیا سەربەخویا مافێ مروڤی ل کوردستانێ دەست پێکری یە.
وەلات محەمەد زێدەتر گۆت: ل گورەی پلانا ھاتیە دارێژتن د ڤێ کەمپینێ دا ب رێکا راگەھاندنێ و مینبەران وەلاتیێن خوە ل سەر بکار نەئینانا چەکی ئاگەھدار کرینە ژ بەرکو ل گور ئامارەکا سالا ٢٠١٨ ل زاخۆ ژ سەرجەمێ گشتیێ روودانێن ب چەکی دروست بوین ٢٢ روودان بون ، ١١ کەس ب چەکی ھاتینە کوشتن و ١١ کەسێن دی ب چەکی خوە کوشتیە.
ناڤھاتی زێدەتر گوت : ئامارا ھەمی باژێران دێ ھێتە رەوانە کرن بۆ دەستەیا گشتی یا مافێ مروڤی ل کوردستانێ و پاش ئەو ئامارە ب رێکا پەرتوکەکێ رادەستی وەزارەتا ناڤخو ھێتە کرن، ئامارێن سالا ٢٠١٧ – ٢٠١٨ گەلەک نێزیکی ئێک بون و چو جیاوازیەکا مەزن نینە ل رێژەیا تاوانێن ب کارئینانا چەکی .
ئەڤرۆ نیوز:
رۆژناما ئاس یا ئسپانی دەربارەی پشکداریا ستێرا یانا کەتالونی لیونێل مێسی د یاریا کلاسیکویێ دا بەرامبەر یانا ریال مەدرید ژ کاسا شاھێ ئسپانیا ل رۆژا چارشەمبیا بھێت د مەترسیێ دایە ژ بەرکو ئەڤرۆکە پشکداری د راھێنان دا نەکریە ژ ئەگەرێ ھنگافتنێ.
ھەمان ژێدەر زێدەتر دیارکریە د یاریا بوری یا یانا بەرشەلونە دا بەرامبەر یانا ڤالێنسیا مێسی تووشی ھنگافتنێ بوو و سەرەرای ھنگافتنی ژی یاری تمام کر و ئەڤ چەندە بوو ئەگەرێ ھەودانێ ل جھێ ھنگافتنا وی و ھەتا نوکە چارەسەر نەبوویە ب شێوەکێ دروست و پشکداری د راھێنانێن ئەڤرۆکە رۆژا دوشەمبی نەکرینە و بەر ب کلینکا نوشداری چوویە بۆ ئەنجامدانا پشکنینان و دیارکرنا ئەگەرێ بەردەوامیا ئێشانا ھنگافتنێ.
ھەتا نوکە چو تشتێ فەرمی ژلایێ یانا بەرشەلونا ڤە نەھاتیە ئێکلاکرن بۆ یاریا کلاسیکویێ ھەمبەر ریال مەدرید دێ پشکداریێ کەت یان نە ل رۆژا چارشەمبی
ئەڤرۆ نیوز:
ئەڤرۆکە هەشت وەلاتێن ئێکەتیا ئورۆپا (بریتانیا، ئەلمانیا، فرەنسا، ئیسپانیا، لیتوانیا، هولەندا، سوید و دانیمارک) ب فەرمی راگەهاندن کو ئەو خوئان گوایدۆ وەکو سەرۆکێ ڤینزویلا قەبوول دکەن و ب چو رەنگەکێ مادورو وەکو سەرۆک قەبوول ناکەن.
هەر هەشت وەلاتێن ئورۆپا دیار کرینە کو پێدڤی بوو حەفتیا بۆری مادورو بریارا هەلبژارتنێن پێشوەخت دابا و هەلبژارتن هەر زوو ل ڤینزویلا هاتبانە کرن، لێ ئەو یەک نەهاتە کرن و ئێدی ئەم مادورو وەکو سەرۆکێ ڤینزویلا قەبوول ناکەین.
نيشاندان