ئه‌ڤرۆ نیوز:
عادل عەبدولمەهدی سه‌رۆك وه‌زیرێن عیراقێ و عومه‌ر ره‌زاز سه‌رۆك وه‌زیرێن ئوردن گه‌هشتنه رێككه‌فتێ سه‌باره‌ت نه‌فت و لێكگوهارتنا بازرگانى یا د ناڤبه‌را وان دا و ل گۆر رێككه‌فتنێ، نه‌فتا كه‌ركووكێ دێ ب تانكه‌ران بۆ ئوردن هێته ڤه‌گوهاستن.
ل گور رێكه‌فتنێ رۆژانه دێ 10 هزار به‌رمیلێن نه‌فتا خاڤ ب بهایه‌كێ تایبه‌ت ب وه‌لاتێ ئوردن هێنه فروتن.
د ماوێ بوورى دا، ژ ئه‌گه‌رێ سه‌پاندنا سزایان ب سه‌ر ئیرانێ، هنارتنا نه‌فتا كه‌ركووكێ بۆ ئیرانێ هاتبوو راگرتن.
ئەڤرۆنیوز،سەباح زۆهێر:
ل ئێڤاریا ئەڤرۆ ل ناحیا روڤیێ ل قەزا بەردەرەش ل رودانەکێ دا دۆ کرێکار برینداربوون و هاتنە رەوانەکرن بۆ نەخۆشخانا تەنگاڤیا ل ئاکرێ.
حوسێن هێرش نوبەدارێ کارگێری ل نەخۆشخانا تەنگاڤیا ل ئاکرێ بۆ ئەڤرۆنیوز دیاردکەت کو ئەڤرۆ ئێڤاری ل دەمێ کارکرنێ ل ناحیا روڤیێ کو دۆ کرێکارا ل سەر ئاڤاهیەکێ کارکریە کو بانێ وی ئاڤاهی دهاتە صەبکرن، لێ ب شاشی ڤە بۆریا سەرەکی يا ئامیرێ کارکرنێ ب هەردو کرێکاران کەفت وهەردو د ئاڤاهی دا هاڤێتی نە و برینداربووینە کو هەردو کرێکار برا و گەنجن و پەنابەرێن سوری نە.
ناڤهاتی گۆت کو پشتی هەردو هاتینە رەوانەکرن بۆ نەخۆشخانا تەنگاڤیا و دەست ب چارەسەریا وان کری دیاربوو کو ئێک ژوان کرێکارا رەوشا وی نەیا باشە و هاتە رەوانەکرن بۆ،نەخۆشخانا تەنگاڤیا ل پازێزگەها دهۆکێ و یێ دی ژی رەوشا وی باشترە و ل نەخۆشخانا تەنگاڤیا ل ئاکرێ ل بن چاڤدێریێ یە.
ئەڤرۆ نیوز:
محەمەد حەمید بسپۆرێ کاروبارێن سیاسی یێ مسری بۆ ئاژانسا سپۆتینگ یا روسیا دیار کریە کو ٦ وەلاتێن عەرەبی (مسر، سعوودیا، ئیمارات، ئوردن، کوێت و بەحرێن) ل دژی تورکیا و ئیرانێ بریار داینە کو هێزەکا هەڤپشک یا سەربازی ئاڤا بکەن.
ناڤهاتی راگەهاند کو وەلاتێن عەرەبی ژ سیاسەتا تورکیا ل عیراقێ و سووریێ دلگرانن و ناخوازن ئێدی تورکیا دەستێوەردانێ د کاروبارێن ناڤخوەیی یێن وەلاتێن عەرەبی دا بکەت، ل ئالیێ دی دخوازن سنورەکێ بۆ زێدەگاڤیێن ئیرانێ ژی دانێن و ژ بەر هندێ ژی بریارە د دەمەکێ نێزیک دا هەر شەش وەلات هێزەکا سەربازی ئاڤا بکەن و د هەموو بیاڤان دا هەڤکاریا هەڤدو بکەن.
ئەڤرۆ نیوز:
عەبدولرەحمان دیلیپاک نڤیسەرێ ناڤدارێ تورکیا راگەهاند کو هەلبژارتنێن ٣١ ئادارێ یێن باژێرڤانیێن تورکیا وەکو هەلبژارتنێن بۆری نابن و دێ بنە ئەگەرێ ئالۆزیێن مەزن ل تورکیا و گۆت: (بزاڤەکا مەزن یا سەختەکاریێ یا هەی، ل گەلەک دەڤەران هەر نها دەنگێن سەختە بۆ هەلبژارتنان هاتینە ئامادەکرن و ئاکپارتی ب هەموو رەنگەکێ بزاڤێ دکەت کو پرانیا دەنگان بدەستڤە بینیت و ژ بەر هندێ ژی دێ ئەو یەک بیتە ئەگەرێ ئالۆزیێن نوو ل تورکیا).
ناڤهاتی راگەهاند کو رەنگە ل گەلەک دەڤەران خەلک نەچنە سەر سندوقێن دەنگدانێ ژی، ئانکۆ دێ رێژا پشکداریێ یا وەلاتیان گەلەکێ کێم بیت، ژ بەر هندێ ژی ئەز دبێژم ئەڤ هەلبژارتنە وەکو یێن بەرێ نابن و رەنگە ئالۆزیێن مەزن ل تورکیا دروست ببن.
ئەڤرۆ نیوز:
ئەڤرۆ سەرۆک مەسعود بارزانی پێشوازی ل شاندێ دانوستاندنکار یێ ئۆپۆزسیۆنا سووریێ کر و د هەڤدیتنێ دا شاندێ ئۆپۆزسیۆنێ داخواز ژ سەرۆک بارزانی کرن کو رۆلەکێ گرنگ ژ بۆ چارەکرنا قەیرانا سووریێ و پرسا کوردی بگێریت.
شاندێ ئۆپۆزسیۆنا سووریێ ب سەرۆکاتیا د. نەسر حەریری داخواز ژ سەرۆک بارزانی کرن کو ژ بۆ چارەسەریا ئاشتیانە ل سووریێ و گەرەنتیکرنا مافێن گەلێ کورد ل وی وەلاتی خوەدان رۆل بیت، چونکو سەرۆک بارزانی هەتا نها ژی گەلەک بزاڤ بۆ ئاشتیێ و چارەسەریا سیاسی و هەروەسا بۆ بدەستڤەئینانا مافێ گەلێ کورد ل سووریێ کریە.
هەروەسا د دیدارا سەرۆک بارزانی ل گەل شاندێ ئۆپۆزسیۆنا سووریێ دا بەحسێ ڤەکێشانا هێزێن ئەمریکا ژ سووریێ و بزاڤێن جودا جودا یێن بۆ چارەکرنا قەیرانا وی وەلاتی و مافێ کوردان هاتە کرن.
ئەڤرۆ نیوز ، عەلی حاجی:
دەزگایێ خێرخوازی یێ بارزانیێ نەمر ل زاخۆ ب ھەڤکاری دگەل یانا ھەسپ سواری ل ھەولێرێ، رابوون ب بەلاڤکرنا جل و بەرگ و یاریان ل سەر ٢٣٥ زارۆیێن وان پێشمەرگەێن ل شەرێ دژی داعشێ دا شەھید بووین و هەروەسا زارۆیێن بێ سەمیان ل زاخۆ.
دداخویاینەکێ محەمەد مەھدی بەرپرسێ دەزگایێ بارزانیێ نەمر ل زاخۆ بۆ ئەڤرۆ نیوز دیار کر د بەردەوامیا ھاریکاریێن دەزگایێ بارزانیێ نەمر بۆ ماوەیێ دو سالانە ئەم ب ڤی کارێ خێرخوازی رادبین بۆ ئەڤ سالە ژی ل زاخۆ بۆ ٢٣٥ زارۆیێن شەھیدێن شەرێ دژی داعشێ و زارۆیێن بێ سەمیان رابووین ب کرین و بەلاڤکرنا جل و بەرگ و یاریان ل ئێک ژ مولێن ل باژێرێ دھوکێ.
ئەڤرۆ نیوز، هۆشەنگ تاجر:
فەیسەل ئیسماعیل ئەندامێ سەرکردایەتیا پارتی دیموکراتی کوردستان/ سووریا بۆ ئەڤرۆ نیوز دیار کر کو ئەمریکا بۆ پاراستنا کوردان ل سووریێ ل سەر پرۆژەکێ کار دکەت کو دێ چەندین وەلاتێن جیهانێ ژی تێدا خوەدان رۆل بن و گۆت: (لێ هەتا نها ناڤەرۆکێ پرۆژێ ئەمریکا ب تەمامی دیار نینە و هەڤدیتن ل دۆر پرۆژێ ئەمریکا ژی د بەردەوامن).
ناڤهاتی هەروەسا راگەهاند کو شاندەکێ ئۆپۆزسیۆنا سووریێ نها ل گەل سەرۆک بارزانی ژی ل دۆر ڤی بابەتی دانوستاندنان دکەن و دهێتە خواستن کو پێشمەرگێن رۆژ ل گەل هندەک ژ هێزێن ئۆپۆزسیۆنا سووریێ ل گەل هندەک هێزێن سووریا دیموکرات پێکڤە وێ دەڤەرێ بپارێزن کو ئەمریکا دخوازیت بۆ کوردان ئاڤا کەت، لێ وەکو من گۆتی هەتا نها ژی بابەت ب تەمامی ئاشکرا نەبوویە و دانوستاندن ژی د بەردەوامن.
ئەڤرۆ نیوز:
سلێمان سویلو وەزیرێ ناڤخوە یێ تورکیا راگەهاند کو ئێدی ئەم دەلیڤە نادەینە پەرلەمانتارێن هەدەپێ کو وەکو جاران پشکداریێ د تازیێن کوشتیێن پەکەکێ دا بکەن، چونکو بەری نها گەلەک تشت هاتنە کرن و نها ئەو یەک ب توندی دهێتە رەتکرن و گۆت: (هەر پەرلەمانتارەکێ هەدەپە سەرپێچیا قانوونێن تورکیا بکەت دێ ب توندی هێتە سزادان و ئێدی ئەو نەشێن ل گۆر کەیفا خوە ل تورکیا تشتێ بڤێن بکەن).
وەزیرێ ناڤخوە یێ تورکیا دیار کر کو گەلەک جاران پەرلەمانتارێن هەدەپێ قانوونێن دیموکراتی یێن تورکیا بنپێ کرینە و ئێدی ئەم ڤێ یەکێ قەبوول ناکەین و دێ ب توندی کەسێن وەسا هێنە سزدان.
ئەڤرۆ نیوز، عەلی حاجی:
د داخویانیەکێ ئەندازیار خالد سالح رێڤەبەرێ بەلاڤکرنا کارەبێ ل زاخۆ بۆ ئەڤرو نیوز دیار کر ژ بەر ھاتنا وەرزێ زڤستانێ گڤاشتنەکا مەزن دکەڤیتە سەر تورێن کارەبێ و گەلەک جاران دبیتە سەدەمێ پەقین و ژ کارکەڤتنا محاویلەێن مەزن ل ھند گەرەکێن زاخۆ.
خالد سالحی زێدەتر گوت: (ل سێ ھەیڤێن بوری دا ل سنورێ دەڤەرا زاخۆ ١٢٢ پێ گوھورێن کارەبێ ل گەرەکان ژ کار کەڤتینە و پەقینە و ل ھەیڤا ١١ ب تنێ ١٥ گوھورک و ل ھەیڤا ١٢ ژی ٤٩ گوھورک و ل ھەیڤا ١ ژی ٥٨ گوھورکێن کارەبێ ژ کار کەڤتینە و پەقینە ئەڤە ژی رێژەیەکا زورە ھاتیە تومار کرن ل سنورێ رێڤەبەریا مە).
ناڤھاتی گوت ژی پەقینا وان گوھورکان ئەگەرێن خوە ھەنە، بەلێ ئەگەرێ سەرەکی ژ بەر بارگرانیا دکەڤیتە سەر گوھورکان بوو و ھەر دیسان ژی ژ ئەگەرێ لێدانا بریسیا ھندەک ژ کارکەڤتن و پشکەکا دی ژی ژ ئەگەرێ خەلەتیێن تەکنیکی بوون کو ئەو گوھورک پەقینە.
نيشاندان