ئەڤرۆ نیوز:
ئەندامەکێ شاندێ دانوستانکارێ پارتی دیارکر بریارە د ڤێ حەفتیێ دا کومبوونەکا سێقۆلی سەبارەت پێکئینانا کابینەیا نوو یا حوکمەتا ھەرێما کوردستانێ ناڤبەرا پارتی و ئێکەتی و تەڤگەرا گۆران دێ ھێتە ئەنجامدان.
زێدەتر د.فەرسەت سوفی راگەھاند ئەو لژنەیێن بۆ پێکئینانا کابینەیا نوو یا حوکمەتا ھەرێما کوردستانێ ھاتینە دروستکرن دەست بکارێن خوە کرینە و ھێشتا د بەردەوامن پێخەمەت بگەھنە ئەنجامەکی، دیسان کومبوون بەری نوکە ژی ئەنجامداینە دگەل لایەنێن دی یێن حەزا پشکداریێ د کابینەیا نوو یا حوکمەتێ دا ھەی و ئەڤ چەندە ژی بۆ بلەزکرنا پێنگاڤێن پێدڤی بۆ پێئینانا کابینا نوو یا حوکمەتا ھەرێما کوردستانێ.
ئەڤرۆ نیوز، ئێقبال عومەر:
ب سەدان وەلاتیێن ناحیا شێلادزێ و دێرەلوکێ و کەسوکارێن وان کەسێن بەری نها ب دەستێ فرۆکێن تورکیا هاتینە شەهید کربوون بەری دەمەکێ
هێرشی بارەگایێ تورکیا ل کومەلگەها سیریێ یا سەر ب ناحیا شێلادزێ کرن و د ئەنجام دا چەندین ترۆمبێلێن لەشکری و دو تانک هاتنە سوتن و وەلاتیەک ب سڤک بریندار بوویە، چو زیانێن جانێ هەتا نها دیار نینن.
خوەنیشادان هەتا نها د بەردەوامن و خوەنیشادەر داخوازا چۆلکرنا بارەگایێ تورکیا دکەن.
ئەڤرۆ نیوز:
وەلی محەمەدی چاڤدێرێ سیاسی ل رۆژهەلاتێ کوردستانێ بۆ ئەڤرۆ نیوز دیار کر کو ئەڤرۆکە سپێدێ ل پارێزگەها خوزستان یا ئیرانێ کو پرانیا ئاکنجیێن وێ عەرەبن چەند چەکداران هێرشی بنگەهەکێ سەربازی یێ ئیرانێ کرن کو د ئەنجام دا هەتا نها ٥ سەربازێن ئیرانێ هاتینە کوشتن و هژمارەکا دی ژی بریندار بووینە.
ناڤهاتی راگەهاند کو هێزێن ئیمناهیێ یێن ئیرانێ بەردەوام خەلکێن عەرەب ل پارێزگەها خوزستانێ دەستەسەر دکەن و ب سالانە زۆرداریێ ل خەلکی دکەن، ژ بەر هندێ ژی نها چەندین گرۆپێن چەکداری ل وێ پارێزگەهێ شەرێ هێزێن ئیرانێ دکەن.
ئەڤرۆ نیوز:
رێکخراوا چاڤدێریا مافێ مرۆڤان یا سووریێ راگەهاند کو سەرەرای هندێ کو ئەمریکا بریار دایە هێزێن خوە ژ سووریێ ڤەکێشیت لێ د ماوەیێ دو رۆژێن بۆری دا ئەمریکا ٢٥٠ بارهەلگر چەک برنە رۆژئاڤایێ کوردستانێ و ل گرێ سپی، حەسەکێ و کۆبانێ بجه کرینە.
رێکخراوا چاڤدێریا مافێ مرۆڤی یا سووریێ ئاماژە ب هندێ ژی دکەت کو پشتی بریارا ترامپی هەتا نها گەلەک جاران ئەمریکا چەک برینە رۆژئاڤایێ کوردستانێ و ژ بەر هندێ ژی گومانێن ل دۆر ڤەکێشانا هێزێن ئەمریکا ژ سووریێ زێدەتر لێ هاتینە.
ئەڤرۆ نیوز:
جێگرێ وەزیرێ دەرڤە یێ روسیا سیرگێی ریبابکۆڤ راگەهاند کو ئیران ل سووریێ هەڤپەیمانا مە نینە، ژ بەر هندێ ژی داخۆیانیێن بەرپرسێن ئیرانێ ژ راستیێ دوورن.
ناڤهاتی ئەو یەک ژی دیار کر کو ئێمناهیا ئیسرائیلێ بۆ مە ل رۆژهەلاتا ناڤین گرنگە و نابیت ئیران مەترسیان بۆ ئێمناهیا ئیسرائیلێ دروست بکەت.
ئەڤ داخۆیانیا بەرپرسێ روسیا پشتی هندێ هات کو بەرپرسەکێ ئیرانێ راگەهاند روسیا ل سووریێ هاریکاریا ئیسرائیلێ دکەت و سیستەمێ بەرگیریێ یێ روسیا ل سووریێ کار ناکەت و دەمێ فرۆکێن ئیسرائیلێ هێرش دکەن روسیا وی سیستەمی ژ کار دخینیت.
ئەڤرۆ نیوز، ئێقبال عومەر:
خەلکێ ناحیا شێلادزێ یا سەر ب قەزا ئامێدیێ ئەڤرۆ ٢٦/١/٢٠١٩ خوەنیشادان بەرامبەری بوردومانێن سوپایێ تورکیا بۆ سەر دەڤەرا ئامێدیێ و ھەرێما کوردستانێ ل سەنتەرێ ناحیێ ئەنجام دا.
رێزان ئەحمەد دناڤا خوەنیشادانێ دا بۆ ئەڤرو نیوز گوت: (بوردومانێن وەلاتێ تورکیا زیانەکا مەزن گەھاندیە وەلاتیێن کوردستانێ ب تایبەت یێن سنورێ قەزا ئامێدیێ، ئەڤە چەندین سالە گوند و وارێن مە ھاتینە چولکرن و سوتن و وێرانکرن ئەم بێ بەھر بووینە ژ داھات و بەرھەمێن جھ و وارێن خوە، چەندین وەلاتیێن سڤیل یێن ڤێ دەڤەرێ ژلایێ توپخانە و فروکێن سوپایێ تورکیا ڤە ھاتنە شەھید و بریندارکرن، ھەروەسا رەوشا گەشتیاری ژی ل ڤێ دەڤەرێ کەفتیە د مەترسیێ دا، ئەم ڤان کارێن درندانە یێن وەلاتێ تورکیا ریسوا و شەرمزار دکەین).
موحسێن دوسکی پەرلەمانتارێ فراکسیونا پارتی دیموکراتی کوردستان بۆ ئەڤرۆ نیوز گوت: (ھەلویستێ مە یێ نەگوهۆرە، پێدڤیە پەکەکە ئاخا باشورێ کوردستانێ ب جه بھێلیت و بچیتە مەیدانا خوە یا دروست یا خەباتا خوە، ژ بەر کو ھەر شورەشەکا رادبیت شورەشگیرێن وێ شورەشێ وەھا دھێنە پەروەردەکرن کو خەبات و تێکوشانا وان ژ بۆ پاراستنا گەل و وەلاتی بیت نە ژ بۆ پاراستنا کەسایەتیا خوە بیت و ژ ترسا جانێ خوە وەلاتیێن خوە بکەنە قوربانی شورەشا خوە یا ترسنوک).
ھەروەسا ڤێ پەرلەمانتاری نەڤەشارت و گوت: (ھەمی جیھان دزانیت کو پەکەکە ب بریار و فەرمانا تورکیا دەربازی باشورێ کوردستانێ بووینە دا کو چەکێ خوە دانن و ژیانەکا سڤیل دەست پێ بکەن، بەلێ پەکەکێ خەلکێ مەیێ سڤیل کرە قوربانی ژیانا خوە و بووینە خزمەتکارێن دوژمنێ گەلێ کورد ژ بەر کو ب بەھانەیا ھەبوونا پەکەکێ ھێرشا دکەنە سەر پارچێن کوردستانێ ل باشور و روژئاڤا، لەوما ژی ئەم دبێژین شەر و ململانێ یا خوە ببەنە دناڤا گورەپانا خوە دا و دناڤا ئاخا خوە دا خەباتا خوە بکەن، نە بھێن دناڤ ژن و زارویێن باشورێ کوردستانێ دا خوە ڤەشێرن و وەلاتیێن سڤیل و بێ گونەە بکەنە قوربانی شاشیێن خوە).
دوسکی گوت ژی بوردومانێن ٢٣/١/٢٠١٩ ژلایێ فروکێن تورکیا ڤە ب بەھانەیا ھەبوونا چەکدارێن پەکەکێ ل ناحیا دێرەلوکێ ل سنورێ قەزا ئامێدیێ کو د ئەنجام دا شەش وەلاتیێن سڤیل کو خەلکێ گوندێن سنورێ ناحیا دێرەلوکێ نە ھاتنە شەھیدکرن، ئەم تورکیا و پەکەکێ ھەمبەری ڤان کارێن ھوڤانە و دژی مروڤایەتیێ ریسوا و شەرمزار دکەین.
ئه‌ڤرۆ نیوز:
سه‌رۆك مه‌سعود بارزانی ئه‌ڤرۆ ل سه‌لاحه‌دین پێشوازی ل شاندێ سه‌رۆكاتیا تایفا سریانی ئه‌رتۆدۆكس ل كوردستانێ و پارێزگه‌ها نه‌ینه‌وا و عیراقێ ب سه‌رۆكاتیا قه‌داسه‌تا پاتریارك مار ئه‌گناتیۆس ئه‌فرامێ دوێ، پاتریاركێ ئه‌نتاكیا و هه‌موو رۆژهه‌لاتێ و سه‌رۆكێ كه‌نیسا سریانی ئه‌رتۆدۆكس ل جیهانێ و شاندێ ل گه‌ل دا كر كو پێكهاتبوو ژ هژماره‌كا مه‌ترانێن كه‌نیسا ئه‌رتۆدۆكس.
د دیداره‌كێ دا، شاندێ مێهڤان سوپاسیا سه‌رۆك بارزانی و حوكمه‌تا هه‌رێما كوردستانێ كر د پاراستنا پێكهاتان و كرستیانێن كوردستانێ دا ل رۆژێن دژوار، و سه‌ره‌رای په‌یوه‌ندیێن دیرۆكی یێن كرستیانێن كوردستانێ و خه‌لكێ كوردستانێ دوپاتی ل پێكڤه‌ژیانێ و چاره‌نڤیس و پاشه‌رۆژا هه‌ڤپشكا گه‌لێ كوردستانێ و پێكهاتێن دی هاته كرن.
ژ ئالیێ خوه ڤه سه‌رۆك بارزانی رۆناهی خسته‌ر سه‌ر وان ئازار و نه‌خۆشیێن ل بوری ب سه‌ر كرستیان و خه‌لكێ كوردستانێ دا هاتین و دوپات كر كو كوردستان وه‌لاتێ هه‌موویانه و نابیت كه‌س ژی كرستیانان هان بده‌ت كو وه‌لاتێ خوه بجه بهێلن و نوكه ل قۆناغا پشتی نه‌مانا تیرۆرێ، پێدڤیه كولتوورێ پێكڤه‌ژیان و برایه‌تیێ كوورتر لێ بهێت.
مه‌ترسیێن تیرۆرێ و هزرا توندره‌و و ره‌وشا سیاسی و ئێمناهیا سووریێ ته‌وه‌ره‌كێ دی یێ دیدارێ بوون.
ئه‌ڤرۆ نيوز:
رێڤەبەریا گشتیا کەشناسی و بیڤەلەرزێ ل ھەرێما کوردستانێ راگەھاند کو سوبەھی رۆژا ئێكشه‌مبى رێکەفتی 26ی کانوونا دويێ 2019ێ ئەسمان دێ ژ ئه‌وره‌كێ كێم بۆ ئه‌ورێ ته‌مام هێته گوهۆڕين و ل جهـ و ده‌مێن جودا دێ رێژێن جودا يێن باران بارينێ بارن و باران دێ هه‌موو جهان ڤه‌گريت و ب تايبه‌ت ژى ب شه‌ڤ و رێژه ژى دێ زێده بيت.
پشکا پێشبینیان ل رێڤەبەریا گشتیا کەشناسی و بیڤەلەرزێ ل ھەرێما کوردستانێ د نڤیسارەکێ دا کو دانەک بۆ ئەڤرۆ نیوز رەوانە کرینە راگەھاند کو دهێته پشبينيكرن ئه‌سمان ژ ئه‌وره‌كێ كێم بۆ ئه‌ورێ ته‌مام هێته گوهۆڕين و ل جهـ و ده‌مێن جودا دێ رێژێن جودا يێن باران بارينێ بارن و باران دێ هه‌موو جهان ڤه‌گريت و ب تايبه‌ت ژى ب شه‌ڤ و رێژه ژى دێ زێده بيت.
پشکا پێشبینیان دایە زایە زانین کو دێ لەزاتیا بایی د ناڤبەرا 10 ھەتا 30کم دا و ماوێ دیتنێ ژی دێ د ناڤبه‌را 5 بۆ 10کم دا بیت، پلێن گەرمێ ژی دێ د ناڤبەرا 6 بۆ 15 پلان دا بن.
دايه زانين ژى كو ئه‌ڤ باران بارينه دێ ب شه‌ڤ ل هنده‌ك ده‌ڤه‌ران گه‌له‌ك زێده بيت و بيته ئه‌گه‌رێ رابوونا ئاڤێ ب تايبه‌ت ل سنورێ پارێزگه‌ها دهۆكێ دێ ئه‌ڤ رابوونه ل سنورێ قه‌زا ئاكرێ بيت و ل ده‌ڤه‌رێن چيايى ژى دبيت به‌فر ژى بباريت.
ئه‌ڤرۆ نيوز، نه‌وزاد هلورى:
ل رێککەفتی ۲۰ى كانوونا دويێ ۲۰۱۹ ھەر دو وەلاتیان پێکڤە سەرەدانا دەڤەرا ھێتوتێ کربی ل سنورێ ناحیا دێرەلوک ب مەرەما ب سەخبێرکرنا مێشێن ھنگڤینی، بەلێ مخابن کو بەری سێ روژان بووینە ئارمانجا فروکێن تورکیا ھەردو ھاتنە شەھیدکرن.
ھەردو وەلاتی پێشمەرگەنە و خێزاندارن، ب ناڤێ (بەخیار حەسەن و زیاد حەجی) خەلکێ گوندێ ھێتوتن، ته‌رمێ هه‌ردو شه‌هيدان ل كۆمه‌لگه‌ها هێتوتێ هاتنه ڤه‌شارتن.
د ڤان رێوره‌سمان دا، سه‌رۆكێ ده‌مكى يێ په‌رله‌مانێ كوردستانێ و چه‌ندين په‌رله‌مانتارێن كوردستانێ و ئه‌ندامێن جڤاتا نوونه‌رێن عيراقێ و سه‌ركردێن له‌شكرى و به‌رپرسێ لقا 18 و چه‌ندين كه‌ساتيێن ناڤدارێن ده‌ڤه‌رێ ئاماده ببوون.
نيشاندان