ئەڤرۆ نیوز:

بەری دەمەکێ وەزیرێ دەرڤە یێ فرەنسا جان لۆدریان گەهشتە هەولێرێ و ژ ئالیێ نێچیرڤان بارزانی سەرۆکێ حوکمەتا هەرێما کوردستانێ ل فرۆکەخانا هەولێرێ پێشوازی لێ هاتە کرن و بریارە وەزیرێ دەرڤە یێ فرەنسا ل گەل سەرۆک بارزانی، نێچیرڤان بارزانی سەرۆکێ حوکمەتا هەرێما کوردستانێ و هەروەسا ل گەل مەسرور بارزانی کۆم ببیت.

 ئەڤرۆ نیوز، سالار دۆسکی:

 ئەلماس عەبدو چالاکڤانەکا جڤاکێ مەدەنی یە بۆ ئەڤرۆ نیۆز ئاشکرا کر کو گەف ژلایێ لەشکەرێ ئازاد ڤە ل سووریایێ لێ ھاتنەکرن ب گونەھا وێ چەندێ کو پەیوەندی ل گەل پەیەدێ ھەنە، لەوما نەشێت ئێدی سەرەدانا رۆژئاڤا بکەت، بەر ب دەرڤەی وەلاتی چوویە.

 ھەمان چالاکڤانێ گۆت: نوکە گەلەک روودانێن نەخوش یێ ل عەفرینێ پەیدا دبن خەلک دھێنە گرتن و ئەشکەنجەدان و خەلکێ دەردکەڤیت و درەڤیت.

گۆت ژی: ژ ترسا گیانێ خوە دا من ناڤەکێ وەھمی بۆ خوە دروست کریە چونکو مەترسی ل سەر ژیانا من پەیدا بوویە،  کارێ مە نە سیاسی و نە لەشکەریە بەلکو ئەم کارەکێ مرۆڤایەتی دکەین بۆ خەلکێ عەفرینێ، ب ھەڤکاری ل گەل رێکخراوا نوشدارێن بێ سنور.

ئەلماسێ ئەو ژی ئاشکراکر کو ل دووڤ کارێ رێکخراوا مە یا کار دکەت ل عەفرینێ ١٢٣٠ زارۆ بێ دایک و باب ماینە، ٨٣٨ کەس ژی پەککەفتی بووینە، ئەڤە ھەموو بەرھەمێ شەری نە، پشتی ھاتنا لەشکەرێ تورکیا نەشێین، ب دروستی کارێ خوە بکەین.

ناڤهاتیێ ئەو یەک ژی ئاشکرا کر کو نوکە تەعریب ل عەفرینێ ب شێوازەکێ ئاشکرا دھێتەکرن و ژ گەلەک دەڤەرا خەلکێ بۆ ڤی باژێری ڤەگوھاستینە.

.

ئەڤرۆ نیوز، هۆشەنگ تاجر:

مستەفا جومعە ئەندامێ مەکتەبا سیاسی یا پارتی دیموکراتی کوردستان/ سووریا بۆ ئەڤرۆ نیوز دیار کر کو د ڤان دەمێن دووماهیێ دا هەلویستێ ئەمریکا ب رەنگەکێ باش ل هەمبەر کوردێن سووریێ هاتیە گوهۆرین و گۆت: (ئەمریکا بزاڤێ دکەت کو دەڤەرەکا ئارام بهێتە راگەهاندن کو ئەو دەڤەر ژی رۆژئاڤایێ کوردستانێ بیت و ئەمریکا دخوازیت ب ڤی رەنگی رێگریێ ل هێرشێن تورکیا بکەت و ئەو یەک ژی بۆ کوردێن رۆژئاڤایێ کورستانێ تشتەکێ باشە).

ناڤهاتی راگەهاند کو ئەردۆگانی گەلەک بزاڤ دکرن دەڤەرەکا ئارام بهێتە راگەهاندن دا ئەو پەنابەرێن سووریێ یێن ل تورکیا ل وێرێ بنەجه بکەن دا دیموگرافیا رۆژئاڤایێ کوردستانێ بگوهۆریت، لێ دیارە ئەمریکا ڤێ یەکێ ناکەت و داخۆیانیا وەزیرێ دەرڤە یێ ئەمریکا ل دۆر پاراستنا کوردان و هەروەسا گەفا دوهی یا ترامپی ل دژی تورکیا ژی نیشا ددەت کو ئەمریکا ب جدی دخوازیت کوردان بپارێزیت و ئەم هێڤیدارین ترامپ و ئەمریکا ل سەر ڤی هەلویستێ خوە بەردەوام بن.