ئەڤرۆ نیوز، قائید میرۆ:

بەرپرسەکێ وەزارەتا ئاڤاکرن و ئاکنجیکرنێ ئاشکرا کر کو حوکمەتا ھەرێما کوردستانێ چەندین پڕۆژە بەرھەڤکرینە بۆ بجە ئینانێ و ب تنێ ل سەر مەزاختنا پارەی ماینە گوت: “ژبلی تۆنێلا زاخۆ مە پلان ھەیە چەندین تۆنێلێن دی ژی ل دھۆکێ بھێنە چێکرن”.

زانا دزەیی، رێڤەبەرێ گشتیێ پلاندانانێ ل وەزارەتا ئاڤاکرنێ بۆ ئەڤرۆ نیوز دیار کر کو ژ ئەگەرێ قەیرانا دارایی زۆربەیا پڕۆژێن وەزارەتا ئاڤاکرن و ئاکنجیکرنێ ھاتینە راگرتن، بەلێ پشتی باشبوونا رەوشا دارایی حوکمەتا ھەرێما کوردستانێ بڕیارا بجە ئینانا ھژمارەک پڕۆژان دەرکریە و ٩ ژوانا دکەڤنە سنوورێ پارێزگەھا دھۆکێ، ھەروەسا وەزارەتێ پلان دانایە دگەل مەزاختنا پارەی دێ چەندین پڕۆژە د بیاڤێن رێک و پرا و ئاڤاکرنێ ھێنە بجە ئینان و گۆت: “ئەم نوکە چاڤەڕێی پەسەند کرنا بۆدجێ دکەین ھەر دەمێ پارە بھێتە مەزاختن لیستا پڕۆژان یا بەرھەڤە”.

زانا دزەیی خویا کر کو ئەو ل سالا بۆری شیابوون تۆنێلا زاخۆ ڤەکەن و ئەڤ سالە ژی دێ تۆنێلا پیرمام بتەمامی ھێتە ڤەکرن، بەلێ چەند تۆنێلەکێن دی ھەنە و پێدڤیە حوکمەتێ لەزێ بکەت بۆ بجە ئینانا وانا، چونکی یا گرنگە تۆنێلا ھەیبەت سولتان بھێتە تەمام کرن، ھەروەسا چیایێ ھەریرێ بۆ قەزا رواندز و ھەتا سنوورێ ئیرانێ ل حاجی ئومەران دێ بیتە تۆنێل، کو درێژاھیا ٢١ کیلۆمەترایە و گۆت: “ل سنوورێ پارێزگەھا دھۆکێ ژی مە پێدڤی ب تۆنێلا ھەیە و ھەر دەمێ پارە ھەبیت دێ تۆنێلێن دی مینا یا زاخۆ ل دھۆکێ کەڤنە د بیاڤێ بجە ئینانێ دا”.

ئەڤرۆ نیوز، رەمەزان ھەرنی:

ئەندامەکێ بەرێ یێ پەرلەمانێ کوردستانێ ل لیژنا باژێرڤانی و گەشت و گۆزارێ دیار کر کو ئەو کەسێن بۆ دەمێ چەند سالانە مولکێ گشتی بۆ کارێن تایبەت ب کار دئینن، پێدڤیە کرێ یا ھەیڤانە ژێ بھێتە وەرگرتن و بھێنە سزادان.

سیراج ئەحمەد، ئەندامێ بەرێ یێ پەرلەمانێ کوردستانێ ل لیژنا باژێرڤانی و گەشت و گوزارێ بۆ ئەڤرۆ نیوز دیار کر کو چو ئامارێن فەرمی نینن ل دۆر وان پارچە ئەردێن مولکی گشتی بووینە شقە و پارک و بازار و جھێن تایبەت، بەلێ چەند کەسا کرینە تایبەت و پێدڤیە حوکمەت لژنەکا تایبەت بۆ ڤێ مەرەمێ دروست بکەت بۆ وێ چەندێ مولکێن گشتی ئەوێن بووینە تایبەت ب زڤرنەڤە یان ئەو کەسێن مولکێ گشتی ب کارئینای کریا ھەیڤا نە ژێ بھێتە وەرگرتن و گۆت: “پێدڤیە مولکێ گشتی بۆ کارێن گشتی ب زڤریت و تاکە کەس مفای ژێ نەبینن”.

ناڤهاتی خویا کر کو دڤێت ئەو کەسێن چەند سالە مولکێ گشتی ب کاردئینن کرێ یا ھەیڤانە ژێ بھێتە وەرگرتن و بەرامبەر ب کارئینانی سزایێن ماددی بھێنە دانان ل سەر وان کەسا کو کوگەه و جھێن گشتی بۆ کارێن تایبەت ب کار ئیناین.