ئه‌ڤرۆ نیوز، نه‌وزاد هلۆرى:
ب مه‌ره‌ما خزمه‌تكرنا گه‌نجان و ب هێز كرنا بنه‌مایێن خێزانێ، بو ئێكه‌مجار كومه‌له‌كا تایبه‌ت به گه‌نجێن ئه‌ڤیندار ل كوردستانێ هاته دامه‌زراندن كو ئه‌ركێ وان رێكخستنا ئه‌ڤینا دناڤبه‌را كچ و كورایه لسه‌ر بنه‌مایه‌كێ بهێز داكو ل ئاینده خێزانه‌كا به‌خته‌وه‌ر بهێته ئاڤاكرن.
ئاكام سه‌مه‌د، ئه‌ندامێ كومه‌لا گه‌نجێن ئه‌ڤیندارێن كوردستانێ بۆ ئه‌ڤرۆ نیوز گۆت: (ب مه‌ره‌ما رێكخستنا په‌یوه‌ندیێن خێزانى و ئاڤاكرنا خێزانه‌كا به‌خته‌وه‌ر و به‌رده‌وام، بو ئێكه‌مجار كومه‌لا گه‌نجێن ئه‌ڤیندارێن كوردستانێ هاته دامه‌زراندن و ئه‌ركێ سه‌ره‌كیێ ئه‌ڤێ كومه‌لێ دێ ئه‌و بیت كو گه‌نجان هوشیار بكه‌ن كو خێزانێ لسه‌ر بنه‌مایێ ئه‌شق و ڤیان دروست بكه‌ن داكو چوو كێشه ل ئاینده بو وان دروست نه‌بن ژبه‌ركو دنوكه دا ئێك ژ ئه‌گه‌رێن سه‌ره‌كى یێن ژێكڤه‌بوونا خێزانان دزڤریت بو نه‌بوونا چوو ئه‌شق و ڤیانێ دناڤ په‌یوه‌ندیێن كچ و كوران دا، ژئه‌گه‌رێ نه‌بوونا ئه‌شق و ڤیانێ ده‌هان كچ و كور توشى كێشه‌یان بوینه و چه‌ندین حاله‌تێن كوشتنێ رووداینه ئه‌ڤجا چو كوشتن بیت یا نخوه كوشتن).
زێده‌تر گۆت: (ئه‌و كه‌سێ ل كومه‌لا گه‌نجێن ئه‌ڤیندارێن كوردستانێ دبیته ئه‌ندام پێدڤى یه ژیێ وى لسه‌ر 18 سالیێ بیت، پاشان پێگیریێ ب رێنمایێن كومه‌لێ بكه‌ت، كومه‌لا مه تایێن تایبه‌ت ل هه‌موو باژێرێن كوردستانێ هه‌نه و ل پارێزگه‌ها دهۆكێ ژى هه‌یه، ئه‌ڤیندار و كچ و كورێن وێ ده‌ڤه‌رێ دشێن په‌یوه‌ندیێ ب كومه‌لا مه بكه‌ن، داكو ب باشترین شێوه خزمه‌تا كێشه و ئاریشه‌یێن وان بهێته‌كرن، كومه‌لا مه ب شێوازه‌كێ جوان دێ ره‌فتارێ ل گه‌ل وان كه‌سان كه‌ت و بزاڤێ كه‌ت ل گه‌ل لایه‌نێن شوله‌ژێ هه‌موو ئه‌وان ئاریشه و كێشێن دناڤبه‌را وان دا هه‌یى چاره‌سه‌ر بكه‌ت).
ناڤبرى د درێژاهیا ئاخفتنێن خودا دیاركر ژى كو پشكه‌كا زور یا كچ و كورێن كوردستانێ قوربانى داب و نه‌ریتێن جڤاكى بوینه و ژبه‌ر كه‌س و كارێن خوه و لسه‌ر خاترا وان خێزانێ پێكدئینن و پاشان توشى كێشه و ئاریشه‌یان دبن و زێده‌تر گۆت: (ئێكه‌م بنه‌مایێ پێكئینانا خێزانێ دڤێت لسه‌ر بنه‌مایێ ئه‌شق و ڤیانێ بیت، دیسان دڤێت ئه‌شق و ڤیان د هه‌موو كاروبارێن مروڤى دا هه‌بیت داكو بشێت خوه لگه‌ل بگونجینیت، دیسان ژبلى ئه‌شقا دناڤبه‌را كچ و كورا و دروستكرنا خێزانه‌كا به‌خته‌وه‌ر لسه‌ر وى بنه‌مایى، دهه‌مان ده‌م دا ئه‌م كار لسه‌ر ئه‌شق و ڤیانا وه‌لات و نیشتمانى ژى دكه‌ین، ژبه‌ركو ئه‌گه‌ر تاكێ كورد لسه‌ر بنه‌مایێ ئه‌ڤینا وه‌لاتى بهێته ئاڤاكرن ل وى ده‌مى دێ وه‌لاته‌كێ ئاڤا و بێ كێشه و خیانه‌ت هێته ئاڤاكرن).
نيشاندان
