ئه‌ڤرۆنيوز:
سه‌عدى ئه‌حمه‌د پيره ئه‌ندامێ مه‌كته‌با سياسى يا ئێكه‌تى نيشتمانى كوردستان پشتى ئه‌ڤرۆ ده‌ست ژ پۆستێ په‌يڤدارێ ئێكه‌تيێ به‌رداى، ئه‌گه‌رێ ده‌ست ژكاركێشانا وى دهێته ئاشكراكرن.
ژێده‌ره‌كى دياركر كو ئه‌گه‌رێ ده‌ست ژ كاركێشانا سه‌عدى پيره‌ى دزڤريت بۆ نڤيسينه‌كا قوباد تاله‌بانى كول حه‌فتيا بۆرى دبه‌رپه‌رێ خوه دا ل سه‌ر تۆرا جڤاكى يا تويته‌رى به‌لاڤكربوو وتێدا تانه ل سه‌عدى پيره‌ى دابوو.
وى ژێده‌رى بۆ باسنيوز گۆت” ل حه‌فتيا بۆرى دخۆلا ئينگليزى يا ته‌پا پێى دا پشتى يانا شيلسى تووشى دوراندنێ بووى ل سه‌ر ده‌ستێ يانا مانشسته‌ر سيتى ب ئه‌نجامێ 6-0، راهێنه‌رێ يانا شيلسى كۆنگره‌كێ رۆژنامه‌ڤانى سازكربوو، قوباد تاله‌بانى دبه‌رپه‌رێ خوه دا ل سه‌ر تويته‌رى ئاماژه ب وێ چه‌ندێ كر كو”ئه‌و كۆنگرێ رۆژنامه‌ڤانى شێوێ كۆنگرێن رۆژنامه‌ڤانى يێن سه‌عدى پيره‌ى نه”. ئه‌ڤ چه‌نده ژى وه‌سا هاته شرۆڤه‌كرن كو ئێكه‌تيێ ژى ب جه‌هان كێشه دكۆمبوونێن خوه دا يێن هه‌ين، به‌لێ سه‌عدى پيره وه‌سا دئاخڤيت كو چو روونه‌دا بيت.
ژلايێ خوه‌ڤه سه‌عدى پيره بۆ باسنيوز گۆت” من ده‌ست ژ كارێ پۆستێ په‌يڤدارێ ئێكه‌تيێ ل سه‌ر داخوازا خوه به‌ردا، به‌لێ هنده‌ك بابه‌تێن هه‌ستيار يێن هه‌ين كو يا گرانه هه‌موو كه‌سه‌ك بخوازيت ل سه‌ر باخڤيت”.
دكۆمبوونا ئه‌ڤرۆ شه‌مبيێ 16/2/209 يا جڤاتا سه‌ركردايه‌تيا ئێكه‌تيێ، ده‌ست ژكاركێشانا سه‌عدى پيره‌ى هاته په‌سه‌ندكرن ول جهێ وى (له‌تيف شێخ عومه‌ر) وه‌كو په‌يڤدارێ نوو يێ ئێكه‌تيێ ده‌ست ب كاربوو.
نيشاندان
