ئه‌ڤرۆنيوز:
به‌رى ده‌مه‌كێ كێم ياريا يانا لێڤه‌رپۆل ومێهڤانا وێ بورنموس ب ئه‌نجامێ 3-0 بۆ لێڤه‌رپۆل ب دووماهى هات وب ڤێ چه‌ندێ لێڤه‌رپۆل جاره‌كادى هاته سه‌رێ رێزبه‌ندا خۆلا ئينگليزى يا ته‌پا پێ.
هه‌رسێ گۆلێن لێڤه‌رپۆل ژلايێ ياريكه‌رێن وێ مانى وفاينالدۆم وسه‌لاح ل خۆله‌كێن 24 و34 و 48 هاتن تۆماركرن.
ب ڤى ئه‌نجامى لێڤه‌رپۆل خالێن خوه گه‌هاندنه 65 خالان ل سه‌رێ رێزبه‌ندا خۆلێ ب جوداهيا 3 خالان ژ يانا مانشسته‌ر سيتى ويانا بورنموس ب 33 خالان ل رێزا 11 دهێت.
ئه‌ڤرۆ نیوز:
سه‌رۆك مه‌سعود بارزانی ئه‌ڤرۆ 2019/2/9 ل سه‌لاحه‌دین پێشوازی ل خه‌میس خه‌نجه‌ر سه‌رۆكێ مه‌شروعێ عه‌ره‌بی و شاندێ ل گه‌ل دا كر.
د دیداره‌كێ دا ره‌وشا سیاسی یا عیراقێ و بزاڤێن ته‌مامكرنا حوكمه‌تا نوو یا عیراقێ و پشته‌ڤانیكرنا سه‌رۆك وه‌زیرێن عیراقێ و كابینا وی گه‌نگه‌شه كرن.
د پشكه‌كا دی یا دیدارێ دا، بیرورا ل دۆر ب ده‌ستڤه ئینانا سه‌قامگیریێ و دوباره ئاڤاكرنا ده‌ڤه‌رێن زیان ل شه‌رێ داعشێ ڤێكه‌فتین لهه‌ڤ گۆهاڕتن.
ئەڤرۆ نیوز:
فەرشید محەمەدی چاڤدێرێ سیاسی ل باژێرێ ئورمیێ یێ رۆژهەلاتێ کوردستانێ بۆ ئەڤرۆ نیوز دیار کر کو دوهی مەلایێ گوندێ کورانە یێ هەرێما سوما و برادوست ژ ئالیێ هێزێن ئێمناهیێ یێ ئیرانێ ڤە هاتە قوتان و پاشی ژی هاتە دەستەسەر کرن.
دۆر ئەگەرێن دەستەسەرکرنا مەلا عیسا ئازەری ژی دیار کر کو ناڤهاتی چەندین جاران رەخنە ل هەلویستێ بەرپرسێن ئیرانێ ل دۆر مافێ کوردان و زۆرداریا ل سەر کۆلبەران گرتبوون و داخواز ژ بەرپرسێن ئیرانێ کربوون وەکو برا سەرەدەریێ ل گەل کوردان بکەن، ژ بەر هندێ ژی دوهی پشتی گەلەک سڤکاتی پێ هاتە کرن مەلا عیسا ئازەری هاتە دەستەسەر کرن و هەتا نها ژی کەسوکارێن وی نزانن کا ل کیڤە یە.
ئەڤرۆ نیوز، نەوزاد ھلۆری:
پەیڤدارێ دەستەیا گەشتوگۆزار یا ھەرێما کوردستانێ دیارکر کو ئەو یێ بەرھەڤیان دکەن بۆ ڤەکرنا ھژمارەکا فیستەڤال و پێشانگەھێن تایبەت ب وەرزێ زستان و گەشتوگۆزارێ ل دەڤەرێن جوداجودایێن کوردستانێ، ئەڤە زێدەباری وێ یەکێ کو بەرھەڤی دھێنەکرن بۆ ئەنجامدانا سێیەم کەرنەڤالا خلیشاندنا ل سەر بەفرێ ل سنوورێ قەزا سۆران.
زێدەتر نادر روستایی، بۆ ئەڤرۆ نیوز گۆت: ب گورەی پلانا سالا ٢٠١٩ یا دەستەیا گەشتوگۆزارا ھەرێما کوردستانێ ب مەرەما زێدەکرنا گەشتیاران د ھەموو وەرزێن سالێ دا، ھژمارەکا چالاکیێن دێ ب رێڤەچن.
زێدەتر گۆت: رۆژا ١٠/٢/٢٠١٩ دێ کەرنەڤالەکا خلشاندنا سەر بەفرێ ل چیایێ کورەک یا سەر ب قەزا سۆران ب رێڤەچیت و تێدا ٣٠ دیدار ل گەل کومپانیێن عیراقی ھێتەکرن بۆ راکێشان و ئینانا گەشتیارێن زێدەتر بۆ دەڤەرێن بەفرین یێن ھەرێما کوردستانێ، ئەڤ یەک ژی دێ ژلایێ رێڤەبەریا گەشتوگۆزارا سۆران و بنگەھێ گەشتوگۆزارا چومان و ب سپونەسەریا کورەک بیت، دیسان لرۆژا ١٧بۆ ٢٠ ھەیڤا شوبات ٢٠١٩ مەزنترین پێشانگەھا گەشتوگۆزارێ دێ ل ھەولێرێ ھێتەڤەکرن، لرۆژا ٢١/٢/٢٠١٩ رێڤەبەریا گەشتوگۆزارا سلێمانیێ دێ کوربەندەکی بۆ ھژمارەکا کومپانیێن عیراقی ڤەکەت، ئەڤە ھەموو ب مەرەما زێدەتر راکێشانا گەشتیاران دێ ھێنە ئەنجامدان.
ئەڤرۆ نیوز:
ئەڤرۆ رۆژا شەمبی رێککەفتی ٩/٢/٢٠١٩ مەسرور بارزانی شیرەتکارێ جڤاتا ئاسایشا ھەرێما کوردستانێ پێشوزای خوان خوسیە ئیسکۆبار ل بالیوزێ ئسپانیا ل عیراقێ و شاندێ دگەل دا کر.
د دیدارەکێ دا کو قونسلێ فەخری یێ ئسپانیا ل ھەولێرێ ژی ئامادەبوو پەیوەندیێن دوقولی و پێشھاتیێن دەڤەرێ ھاتنە گوتوبێژ کرن، مەسرور بارزانی سوپاسیا خەلک و حوکمەتا ئسپانیا کر ل سەر وان ھاریکاریێن وی وەلاتی بۆ ھەرێما کوردستانێ کرین دیسان تەکەست ل سەر پەوەندیێن دوقولی یێن ھەرێما کوردستانێ و وەلاتێ ئسپانیا ژی ھاتە کرن زێدەتر ڤان پەیوەندیێان پێشبێخین د ھەموو بواران دا.
ژلایێ خوە ڤە بالیوزێ ئسپانیا دلخوشیا خوە ب ڤێ سەرەدانێ دەربری دیسان دیارکر ئەو رێزێ ل قوربانیێن گەلێ کوردستانێ د شەرێ دژی تیرورستێن داعش و بزاڤ و خەباتا ڤی گەلی پێخەمەت ئایندەیەکێ گەش دگرن، دیسان وەلاتێ ئسپانیا ژی حەزا بەرفرەھکرنا پەیوەندیێن خوە ھەیە دگەل ھەرێما کوردستانێ د ھەموو بواران دا.
د لایەکێ دی دا بەحسا رەوشا دەڤەرێ و پێکئینانا کابینەیا نوو یا حوکمەتا ھەرێما کوردستانێ تەوەرەکێ دی یێ ڤێ دیدارێ بوو.
ئەڤرۆ نیوز:
ئەڤرۆ ئێڤاری ل بارەگایێ ئێکەتیا تەپا پێ یا ھەرێما کوردستانێ پشککێشانا قوناغا دویێ یا خولا ھەرێمێ بۆ یانێن پلە دو ھاتە ئەنجامدان و ھەڤرکا یانا سێمێل بۆ گەرا بھێت دیاربوو.
د ڤێ پشککێشانێ دا کو نوونەرێن ھەموو یانێن سەرکەفتی پشکداربوو ھاتە ئەنجامدان و پشت یانا سێمێل ل یاریا بوری شیای سەرکەفتنێ ل سەر یانا ئالا توماربکەت ب دو گۆلان بێ بەرامبەر ڤێ گەرێ دێ یاریا خوە دگەل یانا زانکویا جیھان یا ھەولێرێ کەت ل ڤێ حەفتیێ.
ئەڤرۆ نیوز:
ئاژانسەکا روسیا دیار دکەت کو د سەرەدانا ئەردۆگانی یا ڤێ دووماهیێ بۆ روسیا دا سەرۆک کۆمارێ تورکیا داخواز ژ بەرپرسێن روسیا کربوو کو رێڤەبەریا هەرێما ئارام یا ل سەر سنورێ سووریا و تورکیا د دەستێ تورکیا دا بیت، لێ روسیا ئەو یەک رەتکر و پوتینی ب رەنگەکێ ئاشکرا بۆ ئەردۆگانی گۆت کو ئەم رێ نادەین رەوشا سووریێ خرابتر لێ بهێت و دڤێت حوکمەتا سووریێ کۆنترۆلا هەموو ئاخا خوە بکەت.
رێکخراوا چاڤدێریا مافێ مرۆڤان یا سووریێ ژی دیار دکەت کو هەڤدیتنێن نهێنی د ناڤبەرا هەوالگیریا سووریێ و تورکیا دا ل دۆر بابەتێ هەرێما ئارام د بەردەوامن و هەتا نها سووریا رازی نەبوویە کو تورکیا هەرێما ئارام برێڤە ببەت.
ئەڤرۆ نیوز:
ئیلهام ئەحمەد هەڤسەرۆکا جڤاتا سووریا دیموکرات راگەهاند کو هێزێن سووریا دیموکرات و یەپەگە سەر ب پەکەکێ ڤە نینن و هێزێن سەر ب خوە نە و گۆت: (هەکە ئەمریکا هێزێن خوە ژ سووریێ ڤەکێشیت و بەری هندێ چو بەرهەڤی نەهێنە کرن دێ ئاریشێن مەزن ل سووریێ روو دەن).
ناڤهاتیێ راگەهاند کو تورکیا هەموو دەمەکێ دبێژیت هوون سەر ب پەکەکێ نە، تورکیا ڤێ یەکێ دکەتە بەهانە و ب جهێ هندێ دڤێت تورکیا پرسا کوردی ل وەلاتێ خوە چارە بکەت، چونکو مە چو ئاریشە ل گەل تورکیا نینن و ئەم بەرهەڤین ل گەل تورکیا دانوستاندنان ژی بکەین.
زاخۆ، عەلی حاجی :
ھێزێن پێشمەرگەیێ نێزیکی قەزا زاخۆ دەست ب سەر فروکەیەکا بێ فروکەڤان یا تێن تی کری دا دگریت و ئەو فروکە ژلایێ تیمێن ئەندازیاری ێن ھێزێن پێشمەرگەیێ کوردستانێ ڤە ھاتە ژناڤبرن.
د ڤی چارچوڤەی دا رائید جەمال سیاری ، ئەندازیارێ تەقەمەنیا ل فەرماندەیا دھۆک یا ھێزێن پێشمەرگەیێ بۆ رۆژناما ئەڤرۆ گۆت: پشتی ئەم ھاتیە ئاگەھدار کرن ل سەر کەفتنا فروکەیەکا بێ فروکەڤان یا تێن تی کری ل دووری ئێک کێلو مەتر ژ سەنتەرێ ناحیا رزگاری ل زاخۆ ، ئەم وەک تیما ئەندازەی ل جھێ دەست نیشان کری ئامادە بووین کو دیاربو ئەو فروکە ب دەستی ھاتیە دروست کرن و ئەو فروکە یا تێن تی کری بوو دیسان دو کامیرێن چاڤدێریێ ژی پێڤە گرێدای بوون ل ناڤ کامیرەیان ژی زێدەتری چەندین ساجمە ھەبون و ل گورەی زانیاریان ژی ئەو فروکە ژلایێ ھێزێن پەکەکێ ھاتبوو رەوانە کرن.
ناڤھاتی زێدەتر گۆت: کەفتنا وێ فروکەیێ ژبەر ھەبوونا سیستەمەکێ تایبەت یێ کەفتنا فروکان یا ھێزێن تورکی و ئەو فروکە دووری کێلومەترەکێ یا سەنتەرێ ناحیا رزگاری کەڤت بوو ھژمارەیا ل سەر فروکێ ژمارە ٣٩ بو و ب شێوەیەکێ ئەندازەی ھات بو دروست کرن ، لەورا ئەم ھەمی خەلکێ زاخۆ و دەوروبەرا ئاگەھدار دکەین ھەر دەما فروکەیەکا ب وی رەنگی دبینن نێزیک نەبن ژبەر کو پشتی بورینا دو روژان پاتریا وێ فروکەیێ دێ ژناڤ چیت ژبەر کو وەکو مە پێزانین ل سەر ھەین بەری نوکە ژی ھاولاتیەکێ ناحیا دەرکارێ ژبەر فروکەیەکا ب ڤی رەنگی ھاتبوو شەھید کرن.
نيشاندان