ئەڤرۆ نیوز، هۆشەنگ تاجر:

ئەحمەد ئایهان چاڤدێرێ سیاسی یێ باکورێ کوردستانێ بۆ ئەڤرۆ نیوز دیار کر کو بریارا ترامپی ل تورکیا ب گەرمی هاتە پێشوازی کرن و دەزگەهێن راگەهاندنا تورکیا ب تایبەتی ژی یێن نێزیکی ئاکپارتیێ ئەردۆگانی وەکو سەرکەفتیێ ڤێ پێنگاڤێ ل قەلەم ددەن و دبێژن دێ ل دەمەکێ نێزیک دا تورکیا هێرشی رۆژهەلاتێ فراتێ کەت.

ناڤهاتی دیار کر مخابن دیسان کورد بوونە قوربانیا پیلانەکا دی یا نێڤدەولەتی و هەکە ئەمریکا ل سەر ڤێ بریارا خوە یا رژد بیت دێ تورکیا ب هاریکاریا رژێما سووریێ و روسیا هێرشی کوردێن رۆژئاڤایێ کوردستانێ کەت و گۆت: (دەمەکە ئەردۆگان گەفان دکەت و نها چو ئاستەنگی ژی ل هەمبەر ئەردۆگانی و لەشکرێ تورکیا نەماینە).

ئەڤرۆ نیوز:

بسپۆرەکێ کاروبارێ سیاسی یێ ئەلمانیا دیار دکەت کو ئەمریکا نەشێت وەسا زوو ژ سووریێ دەرکەڤیت، چونکو ئەو یەک دێ مەترسیەکا مەزن بۆ ئیسرائیلێ دروست کەت و لۆبیێن ئیسرائیلێ دێ فشارێن خوە ل سەر ترامپی زێدە کەن دا نەچار بیت ژ بریارا خوە ڤەبیت.

ئاندرێیاس بسپۆرێ ئەلمانی هەروەسا دیار دکەت کو کاریگەریا لۆبیێن ئیسرائیلێ ل سەر ئەمریکا زێدە یە و ژ بەر هندێ ژی ئەمریکا نەشێت وەسا زوو هێزێن خوە ژ سووریێ ڤەکێشیت.

ئەڤرۆ نیۆز، قائید میرۆ:

بەرپرسەکێ بلندێ سەربازیێ عێراقێ وەسا دبینیت بڕیارا ڤەکێشانا ھێزێن ئەمریکا دێ رەوشا سووریێ ئالۆز کەن و دبێژیت، ئالۆزبوونا رەوشا سووریێ دێ کاریگەریێن خوە بۆسەر عێراقێ و ھەرێما کوردستانێ ژی ھەبن.

ژێدەرەکێ بلندێ سەربازیێ عێراقی کو نەڤیا ناڤێ وی بھێتە بەلاڤکرن بۆ ئەڤرۆ نیۆز دیار کر” ئەگەر ھێزێن ئەمریکا ل سووریا دەست ب ڤەکێشانێ بکەن، ئەڤە کەس نزانیت پلانا ئەمریکا دێ چبیت و ھێزێن خوە دێ بەرەف کیرێ بەت، بەلێ دیتنا مە دێ ڤەکێشانا ئەمریکا ل سووریا چەندین ئاریشا دووڤ خوە ئینیت، چونکە ڤەکێشانا ئەمریکا ل سووریا دێ کاریگەری ل سەر رەوشا عێراقێ ژی ھەبیت، ژ بەر کو عێراق ھەڤسنورە دگەل سووریا و ھەردەمێ ئالۆزیەک ل سووریا پەیدا ببیت بێگومان دێ بۆ عێراقێ ژی ھێت.

ئەڤی ژێدەری خویا ژی کر” ل دەڤەرێ چەندین ئاریشە ھەنە ژ وانا ھەبوونا گروپا تیرۆرستیا داعش و گەفێن تورکیا ل سەر سووریا و ھەبوونا چەندین گروپێن چەکدار ل سووریا، بڕیارا ڤەکێشانا ھێزێن ئەمریکا ل سووریا دێ رەوشێ ئالۆز کەت و نوکە ھەموو لایەن یێن چاڤەڕێی کارڤەدانێن پشتی ڤەکێشانا لەشکەرێ ئەمریکا.

ل دۆر زیانێن ڤەکێشانا بۆ سەر ھەرێما کوردستانێ ژێدەری گۆت” راستە ھەرێما کوردستانێ دەڤەرەکا تەنایە ژلایێ ئەمنی ڤە، بەلێ ھەرێم دگەل سووریێ ھەڤسنورە و پێشبینی دھێتەکرن دگەل ئالۆزبوونا رەوشا سووریا ھەرێم ژی یا بێ بەھر نەبیت.

ئەڤرۆ نیوز:

پشتی بریارا ترامپی ل دۆر ڤەکێشانا هێزێن ئەمریکا ژ سووریێ شەڤێ دی گەلەک چەکێن گران و ترۆمبێلێن سەربازی ژ باکورێ سووریێ دەربازی هەرێما کوردستانێ بوون.

دەزگەهێن راگەهاندنا جیهانی ژی ئاماژە ب هندێ دکەن کو ئەو بریارا ئەمریکا ژ ئەنجاما رێککەفتنەکا نهێنی یا ل گەل تورکیا یە، لێ هەتا نها دیار نینە کا تورکیا چ دایە ئەمریکا کو ترامپ ژ نشکێ ڤە بریارەکا وەسا دا.

ئەڤرۆ نیوز:

پەیڤدارا وەزارەتا دەرڤە یا روسیا ماریا زاخارۆڤا راگەهاند کو بریارا ترامپی یا ل دۆر ڤەکێشانا هێزێن ئەمریکا ل سووریێ بریارەکا د جهێ خوە دایە و ئەم کەیفخوەشین، چونکو هەتا هێزێن ئەمریکا ل سووریێ بمینن ئاستەنگی دێ ل هەمبەر پرۆسێسا سیاسی هەبن و ژ بەر هندێ ئەم پشتەڤانیێ ل هەلویستێ ترامپی دکەین.

ل ئالیێ دی سەرۆکێ روسیا ژی راگەهاند کو ئەو باوەر ناکەت ئەمریکا هەموو هێزێن خوە ژ سووریێ ڤەکێشیت.