ئەڤرۆ نیوز، لەزگین جوقی:

بەرپرسێ دەزگەھێ خیرخوازی یێ بارزانی ئوفیسا قەزا شنگال بۆ ئەڤرۆ نیوز دیارکر کو ب ھەماھەنگی دگەل بنگەھی لالش ھاریکاری ل سەر ١٠٠ خێزانیێن ئێزدی یێن ژ عەفرینێ ئاواریی ھەرێما کوردستانێ بووین ھاتنە بەلاڤکرن.

زێدەتر پیر دەیان بۆ ئەڤرۆ نیوز دیارکر ئەو خێزانێن ژ عەفرینێ ئاوارەی ھەرێما کوردستانێ بووین ھندەک ژوان ل سنۆری دھۆکێ نە و ھندەک ژی ل قەزا شێخان دژین وھندەک ژی ل پارێزگەھیێن دی یێن ھەرێما کوردستانێ نە مە شیا ھاریکاریێ بگەھینە ھەموویان و پێدڤیی ژیانێ یێن رۆژانە بۆ وان ھاتینە دابینکرن.

ئاشکەرا کر کو دەزگەھێ خیرخوازی بارزانی شیا خوە بگەھینتە چیایی شنگال وھاریکاری ل سەر ٧٥٠٠ زارۆکێن ئاوارە یێن چیایی شنگال ئاکنجی بەلاڤ بکەت د ناڤ ھەر خێزانەکی دا چەند زارۆک ھەبن ھندەک دەستێن جل وبەرگ و پێدڤیێن دی بۆ وان ھاتنە دابینکرن ئەم بەردەوامین ل سەر گەھاندنا ھاریکاریان بۆ ئاوارێن چیایی شنگال.

ئەڤرۆ نیۆز، ئەمیر ئەترووشی:

ل ھەر شەش قەزایێن دھۆکێ و گۆند و ناحیە و کۆمەلگەھان دەست ب دانانا پیڤەرێن ئاڤێ ھاتبوو کرن و ب رێژەیا زێدەتر ژ ٢٥% ھاتبوونە دانان و ل قەزا دھۆکێ ژی زێدەتر ژ ٥٠% ژ بەشداربوویان پیڤەرێن ئاڤێ گرێداینە و بریارە ل مەھا ئێک دەست ب وەرگرتنا پارێ ئاڤێ ل دووڤ پیڤەران بھێتە وەرگرتن.

ئەندازیار موسا عومەر، سەرپەرشتێ لیژنا دانانا پیڤەرێن ئاڤێ ل رێڤەبەریا ئاڤا دەوروبەرێن دھۆکێ بۆ ئەڤرۆ نیۆز دیار کر، ھەتا نوکە ل سەنتەرێ قەزا دھۆکێ زێدەتر ژ ٥٠% ژ بەشداربوویێن ئاڤێ ل دھۆکێ پیڤەرێن ئاڤێ داناینە و ل ھەر شەش قەزایێن (سێمێل، زاخۆ، ئامێدیێ، شێخان، بەردەرەش و ئاکرێ) ب تنێ ژ ٢٥% پیڤەرێن ئاڤێ ل مالێن خوە گرێداینە و د ڤێ حەفتیێ دا کۆمپانیەکا دی دێ پیڤەرێن ئاڤێ ئێخیتە بازاری و جارەکا دی ب شێوەیەکێ بلەز دێ دەست ب دانانا پیڤەرێن ئاڤێ ھێتە کرن.

ئەندازیار مۆسا ئاشکرا ژی کر کو ل ھندەک قەزایان ھێشتا نەھاتینە دانان و ژ بەر ھندێ رێژا گشتی یا دانانا پیڤەرێن ئاڤێ ل سنوورێ رێڤەبەریا مە یا کێمە و گۆتیشی: ل گۆرەی بریارا وەزارەتا شارەوانی و گەشتۆگۆزار، ل دەستپێکا سالا نوو یا ٢٠١٩، ب شێوەیەکێ فەرمی ل ھەموو کوردستانێ دێ دەست ب وەرگرتنا پارێ ئاڤێ ل دووڤ پیڤەران ھێتە کرن.

شێخان،بارزان مزووری:

ئەندازیار مەجید عبدالکریم، رێڤەبەرێ بەلاڤکرنا ئاڤا شێخان بۆ ئەڤرۆ نیوز دیارکر کو ٥  بیرێن ئاڤێ دگەل تورا ئاڤێ و ھێلا کارەبێ ب درێژاھیا ٥ کیلومەترا تور ھاتیە کێشان ژلایێ رێکخراواUNDP  ل سەر بودجەیا خوە ژلایێ رێڤەبەریا ئاڤا نەینەوا ڤە بکوژمێ ٣٥٠ ملیون دیناران.

ناڤبری ئەو چەندە ژی گۆت: بۆ ناڤ سەنتەرێ شێخان  ئەڤ پێنج بیرە ھاتنە کولان و ٨٠% کار ل سەر دوماھیک ھاتیە و رێڤەبەریا ئاڤا نەینەوا پرۆژەک بۆ شێخان ئەنجام دایە ژبەرکو حەتا نھا چ پرۆژێن دی نەھاتیە ئەنجام دان  دگەل ڤان پێنج بیرێن ئاڤێ دناڤ سەنتەرێ شێخان هژمارا بیرێن ئاڤێ گەھشتە ٣٥ بشێوەیەکێ بەرچاڤ پرۆژێ نھا ب دوماھیک بھێت ئاریشا کێم ئاڤیێ دناڤ سەنتەرێ شێخان دێ ب دوماھیک پێ ھێت،

ناڤھاتی خویاکر کو ٤ بیرێن ئاڤێ دگەل کێشانا تورا  ئاڤێ ھێلا کارەبێ  بکوژمێ ٣٠٠ ملیون دینارا ژلایێ رێکخراوا یونسیف ب ھەماھەنگی دگەل حکومەتا ھەرێما کوردستانێ  بۆ گوندێن “شەھیا،کانی کول،تلبزێنە یا مزووری،سەنتەرێ ناحیا کەلەکچی” کار ل سەر دوماھیک ھاتیە ئاریشا کێمبوونا ئاڤێ ل وان جھان ب دوماھیک ھاتیە.

ناڤھاتی گوت کو ژبلی وان بیرێن نوی ھاتین کولان ل سنورێ قەزا شێخان ئەم پێتڤی ب ١٠ بیرێن دی یێن ئاڤێ ینە مە کریە د پلانا خودا یا سالا بھێت .