ئه‌ڤرۆ نيوز:

نێچيرڤان بارزانى سه‌رۆك وه‌زيرێن هه‌رێما كوردستانێ د په‌يامه‌كێ دا جه‌ژنا “رۆژيێن ئێزى” ل ئێزديان پيرۆز دكه‌ت و سه‌ره‌رايى پيرۆزباهيێ، ته‌كست كر كو هه‌تا ره‌ڤانديێن ئێزدى د ده‌ستێ داعش دا مابن، دێ د بزاڤێن خوه‌ دا د به‌رده‌وام بن بۆ رزگاركرنا وان.

ئه‌ڤه‌ ژى ده‌قێ په‌يامێ يه‌:

ب گه‌رمى جه‌ژنا “ڕۆژى یێت ئێزى” ل خوشك و برایێت هێژایێت ئێزدى ل كوردستانێ و هه‌ر ده‌ره‌كا دنیایێ هه‌بن، پیرۆز دكه‌م. هیڤیدارم جه‌ژنه‌كا خۆش و ئارام ده‌رباس بكه‌ن و جه‌ژن ببێته‌ ئه‌گه‌رێ بجهبوونا زێده‌ترا ئاشتیێ و پێكڤه‌ژیانێ و ڤه‌گه‌ڕیانا خێر و خۆشیێ بۆ خوشك و برایێت مه‌ یێت ئێزدى و هه‌مى خه‌لكێ كوردستانێ.

ئه‌ڤ جه‌ژنه‌ ژى جاره‌كا دى د ده‌مه‌كێدا ڤه‌دگه‌ڕیت كو مخابن هێشتا هژماره‌كا مه‌زنا ئێزدییان د كامپێت ئاواره‌ییێدا دژین و نه‌شیاینه‌ ڤه‌گه‌ڕنه‌ سه‌ر جهـ و وارێت خۆ. هیڤیدارم جه‌ژنێت بهێن هه‌مى ب سه‌رفرازى ڤه‌گه‌ڕیابن سه‌ر جهـ و وارێت خۆ یێت ئارام و ئاڤه‌دانكرى و حكوومه‌تا هه‌رێما كوردستانێ دێ هه‌موو هه‌ولێ ژبۆ ڤێ یه‌كێ ده‌ت.

هه‌ر ب ڤێ هه‌لكه‌فتنێ هه‌مى خوشك و برایێت مه‌ یێت ئێزدى پشتڕاست ده‌كه‌ین كو هه‌تا خوشكه‌ك یان برایه‌كێ مه‌ یێ ئێزدى یێ ڕه‌ڤاندى ل ناڤ داعشێ یان ل هه‌ر جهه‌كێ مابیت، ئه‌م دێ به‌رده‌وام هه‌وڵ ده‌ین وان ڕزگار بكه‌ین و ڤه‌گه‌ڕینین ناڤ كه‌سوكارێت وان.

سلاڤ و دروود بۆ گیانێ هه‌مى قوربانیێت ده‌ستێ تیرۆرێ و ئه‌م ب ڕێز و حورمه‌ت وان ب بیر تینین.

جاره‌كا جه‌ژنا هه‌میان پیرۆز بیت.

نێچیرڤان بارزانى
سه‌رۆك وه‌زیرێ هه‌رێما كوردستانێ
14/12/2018

ئه‌ڤرۆنيوز:

ژێده‌ره‌كى ئاگه‌هدار بۆ ئه‌ڤرۆنيوز دياركر كو ئه‌ڤ شه‌ڤه‌ فرۆكێن توركى ناحيا گرعزێر وباب شلو ل چيايێ شنگالێ توپ باران كرينه‌.

وى ژێده‌رى دياركر ژى كو هه‌تا نوكه‌ زيانێن وێ توپ بارانكرنێ نه‌هاتينه‌ زانين.

ئه‌ڤرۆنيوز:

برياره‌ سه‌رۆكێ په‌رله‌مانێ عيراقێ محه‌مه‌د حه‌لبووسى سه‌ره‌دانا هه‌رێما كوردستانێ بكه‌ت ول گه‌ل سه‌رۆك بارزانى وچه‌ند به‌رپرسێن دى يێن هه‌رێمێ كۆم ببيت.

ژێده‌ره‌كێ ئاگه‌هدار ژ به‌غدا بۆ ئه‌ڤرۆنيوز دياركر كو سه‌رۆكێ په‌رله‌مانێ عيراقێ دێ سه‌ره‌دانا دهۆكێ ژى كه‌ت ودبيت سه‌ره‌دانا وى بۆ هه‌رێمێ بۆ ده‌مێ 3 رۆژان يا به‌رده‌وام بيت.