ئەڤرۆ نیۆز:

زوحال دەمیر کچەکا کورد یا خەلکێ باژێرێ دێرسیمێ یێ باکورێ کوردستانێ یە کو د کابینا حوکمەتا هەڤپەیمانی یا وەلاتێ بەلجیکا وەزیرا وەکهەڤی و شەرێ ل دژی هەژاریێ بوو و ژ بەر سیاسەتا دەولەتێ و پەیمانا کۆچبەریێ ل گەل سێ وەزیرێن دی دەست ژ کارێ خوە کێشا و ئەڤرۆکە دەست ژ کارکێشانا وێ ژ ئالیێ کۆچکا شاهی ب فەرمی هاتە قەبوول کرن.

زوحال سالا ١٩٨٠ ل وەلاتێ بەلجیکا ژ دایک بوویە و ئەنداما پارتیا نەتەوەپەرست یا فلەمانە و ژ سالا ٢٠١٧ هەتا نها وەزیرا وەکهەڤیێ و شەرێ ل دژی هەژاریێ بوو.

ئەڤرۆ نیۆز:

ئەحمەد ئاجەت نڤیسەرێ رۆژناما یێنی شەفەق یا نێزیکی حوکمەتا ئاکپارتیێ ئەڤرۆکە راگەهاند کو تورکیا هەموو بەرهەڤیێن خوە بۆ ئۆپەراسیۆنەکێ ل رۆژهەلاتێ فراتێ تەمام کرینە و چاڤەرێ هندێ یە کو ل دەمەکێ گونجای دەست ب ڤێ ئۆپەراسیۆنێ بکەت.

ئەو یەک د دەمەکێ دایە کو ئەمریکا چەندین خالێن سنوری ل سەر سنورێ رۆژئاڤایێ کوردستانێ و تورکیا دروست کرینە دا تورکیا هێرشی رۆژهەلاتێ فراتێ نەکەت و بەری نها ژی چەندین جاران بەرپرسێن ئەمریکی دیار کرینە کو ئەو ل دژی هندێ نە تورکیا هێرشی رۆژهەلاتێ فراتێ بکەت.

ئەڤرۆ نیۆز:

ئەحمەد تورک هەڤسەرۆکێ بەرێ یێ باژێرڤانیا مێردینێ و کەسایەتیێ سیاسی یێ باکورێ کوردستانێ راگەهاند کو گەلەک ئالی داخواز دکەن کو ل گەل هەدەپێ هەڤپەیمانیەکێ بۆ هەلبژارتنان دروست بکەن و ئازادی و مافێ مرۆڤان ژی وەکو بنەمایێ هەڤپەیمانیان ل قەلەم ددەن و گۆت: (بێی کوردان ل تورکیا ئازادی و دیموکراسی پێش ناکەڤیت و ژ بەر هندێ ژی یێن بخوازن ل گەل کوردان هەڤپەیمانیێ دروست بکەن دڤێت گوهداریا داخوازیێن کوردان بکەن).

ئەحمەد تورک هۆشداریا هندێ ژی ددەت کو نابیت چو هێز هزرا هندێ بکەت کو کورد دێ هەما وەسا پشتەڤانیێ ل وان کەن، چونکو داخوازیێن کوردان ل تورکیا دیارن و ئێدی کورد وەکو بەرێ دەنگێ خوە نادەنە هەر هێزەکا سیاسی.