ئەڤرۆ نیوز:
یاریزانێ ھێلا ناڤینا یانا لیون یا فرەنسی خویاکر کو ب بوچوونا وی یا بریارا رەتکرنا ڤەگوھاستنێ بو ناڤا رێزێن مانچستەر ستی ل مێرکاتویا ھاڤینا بوری یا دورست بوو.
تانجای ندومبیلی ماوەکە بویە جھێ گرنگیدانا ھژمارەکا یانێن ئوروپی یێن مەزن پشتی شیای ئاستەکێ باش ل گەل یانا خوە پێشکێش بکەت و ل دویڤ راپورتێن روژنامەڤانی یانا مانچستەر سێتی ل ڤەگوھاستنێن ھاڤینا بوری کوژمێ 45 ملیون جونەیھێن ئسترلینی بو ئیمزاکرنا ھەڤبەستا وی پێشکێش کربوون، لێ ڤی یاریزانێ فرەنسی رەتکر بھێتە ڤەگوھاستن و خواست زێدەتر گرنگیێ ب دەتە پێشکەفتنا ئاستێ خوە ل ناڤا رێزێن یانا و پشکداریێ ل گەل ھەلبژارتیێ وەلاتێ خوە ل شوونا ڤەگوھاستنێ بو یاریگەھا ئێتیحاد یا یانا ئنگلیزی.
زێدەتر ئاماژەکریە ئەگەرێ دی یێ سەرەکی کو رێزێن یانا خوە ب جە نەھێلیت گرنگیدانا یانا وی ب شیانێن وی بوو و نە دخواست بھێتە ڤەگوھاستن.
ئەڤرۆ نیوز:
ناڤێ یاریزانێ ھێلا بەرەڤانیێ یێ ھولەندی کەفتە د لیستا یاریزانێن داخوازکری ژلایێ یانا ریال مەدرید ڤە ژبو ب ھێز ئێخستنا ھێلا بەرەڤانیێ تایبەت پشتی ئاستەکێ نمونەی دگەل یانا لێڤەرپول پێشکێشکری بو وەرزێ دویێ ل دویڤ ئێک.
فیرگێل ڤان دایک ل زڤستانا 2017 ژ یانا ساوسھامبتون ھەمبەر 75 ملیون جونەیھێن ئسترلینی ھاتیە ڤەگوھاستن ھەر چەندە ل وی دەمی رەخنەیێن مەزن ھاتنە ئارستەکرن بو مەزاختنا ڤی کوژمێ مەزن بو یاریزانەکێ ھێلا بەرەڤانیێ، لێ ئەو شیا ھەبونا خوە دوپات بکەت.
تورا گولا یانا ریال مەدرید ھەتا نوکە د 15 یاریان تنێ دا پێشوازی ل 19 گولان کریە و ئەڤ چەندە رەوشا لاوانا ھێلا بەرەڤانیا وێ یانێ دیار دکەت و ئەگەرێن سەرەکی ژی بو پاشکەفتنا ئاستێ سێرجیو راموسل و رافائێل فارانی دھێنە ڤەگەراندن.
دھێتە پێشبینیکرن دەم نوکە یێ گونجای نینە ریال ڤی یاریزانی ب دەستخوەڤە بینت ژبەرکو یانا ئنگلیزی پێدڤی ب شیانێن وی ھەیە و ئەڤ ئارمانجا ریال بو ھاڤینێ بھێتە پاشخستن.
ئه‌ڤرۆ نيوز:
رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ راگه‌هاند كو ل سه‌نته‌رێ پارێزگه‌ها دهۆكێ مه‌زنترين رێژا جوداهيا باران بارينێ تۆمار كريه كو دبيته 314.4ملم.
د به‌لاڤۆكه‌كێ دا كو پشكا ئامارێ ل رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ به‌لاڤكريه و دانه‌ك ب ده‌ست ئه‌ڤرۆ نيوز كه‌فتيه تێدا جوداهيا باران بارينێ ل پارێزگه‌هێن هه‌رێما كوردستانێ به‌رچاڤ كريه.
د ڤێ به‌لاڤۆكێ دا، دايه زانين كو هه‌تا ئه‌ڤرۆ ل پارێزگه‌ها دهۆكێ 370.3ملم بارانێ بارينه و سالا بۆرى هه‌تا ڤى ده‌مى 55ملم بارى بوون و ب ڤێ چه‌ندێ ژى جوداهيا ئه‌ڤ ساله ل گه‌ل سالا بۆرى 314.9ملم بارانێ نه.
هه‌ر ب گۆره‌ى ڤێ به‌لاڤوكێ پارێزگه‌ها هه‌له‌بچه ل رێزا دويێ دهێت كو ب جوداهيا 271.2ملم، سلێمانى ل رێزا سيێ دهێت ب 263.4ملم بارانێ و پاشان ژى هه‌ولێر ب 223ملم و ل دووماهيێ ژى پارێزگه‌ها كه‌ركووكێ ب 187.7ملم بارانێ.
ئەڤرۆ نیوز، رەمەزان ھەرنی:
بەری نوکە ب مەرەما زێدەکرنا ژێدەرێن ئاڤێ بۆ کەرتێ چاندنێ و پەلەوەران ل سنوورێ ناحیا دینارتە ھژمارەکا بەنداڤا ھاتینە دروستکرن ل گەل بارینا رێژەکا باش یا بارانی ئەڤ بەنداڤە دێ مفای گەھیننە کەرتێ چاندنێ و پەلەوەران.
فەواد میکایل، سەرۆکێ باژێرڤانیا ناحیا دینارتە بۆ ئەڤرۆ نیوز دیار کر کو بۆ گرنگی دان ب کەرتێ چاندنێ و پەلەوەران ل سنوورێ ناحیا دینارتە ھژمارەکا بەنداڤێن ئاڤێ ھاتینە دروستکرن بۆ عمبارکرن و پاراستنا سامانێ ئاڤێ و گۆت: “ئەڤ سالە ل گەل بارینا رێژەکا باش یا بارانێ ل سنوورێ ناحیا دینارتە ئەو بەنداڤ تژی ئاڤ بووینە و جۆتیار دێ مفای ژ بەرھەمێ وان بینن بۆ چاندنێ”.
ناڤھاتی ئاماژە دا وێ چەندێ کو ئەڤ بەنداڤێن ھاتینە دروستکرن د بچووکن ھەکە دشیان دا بۆ دێ گەلەک بەنداڤێن دی یێن ئاخێ دروستکەین ل دەڤەرێ بۆ پاراستنا سامانێ ئاڤێ و ھاریکاریکرنا جۆتیار و باغدارێن دەڤەرێ و کەرتێ پەلەوەران.
ھەژی گۆتنێ یە کو ئەڤ سالە ل سەر ئاستێ ھەموو وێستگەھان ل سنوورێ ناحیا دینارتە 606 ملیمێن بارانێ بارینە.
ئەڤرۆ نیوز:
یاریزانێ گەنجێ یانا رێڤەرپلێت یا ئەرژەنتینی ئاشکراکر کو ئەو یێ ئارامە ل ھەمبەر دانوستاندنێن چونا وی بو یانا ریال مەدرید یا ئسپانی و ئارمانجا وی یا سەرەکی نوکە ب تنێ ناسناڤێ کاسا لێبرداتوس و گێرانا کەیف و خوشیێ یە ل گەل جەماوەرێ یانێ و خێزانا خوە.
ئیزیکیل بالاسیوس یێ 20 سالی شیا د یاریا دویێ یا دووماھیا قارەمانیا کاسا لێبرداتوس دا ئەوا ب سەرکەفتنا یانا رێڤەرپلێت ل سەر بوکا جونیورز ب دووماھی ھاتی جھێ خوە ل ناڤا پێکھاتیێ یانا خوە دا بگریت و ئاستەکێ باش پێشکێش بکەت و ئەڤ چەندە بو ھاندەر کارگێریا یانا ریال مەدرید بزاڤێن ئیمزاکرنا ھەڤبەستێ لگەل دا بکەت.
ل دور رێککەفتنا یانا وی و ریال مەدرید و ڤەگوھاستنا وی بو ریال یاریزانێ ناڤھاتی ئاماژەکر ھەموو کارەک ژ نەشکەکێ ڤە ھاتە پێش ھەر چەندە ماوەکە لێگەریانا ڤێ دەلیڤێ دکەت.
ئەڤرۆ نیوز،بارزان مزووری:
رێڤەبەرێ گەشتوگۆزارێ ل قەزا سۆران بۆ ئەڤرۆ نیوز دیار کر کو رێیا دناڤبەرا بێخال بۆ خەلیفان ئەڤرۆ رۆژا 10/12/2018 ێ ھاتیە داخستن.
بارزان محەمەد، رێڤەبەرێ گەشتوگۆزارێ ل قەزا سۆران ئاشکرا کر کو رێیا دناڤبەرا بێخال بۆ خەلیفان دا ژ بەر ھاتنا خوارا کەڤرێن مەزن ژ چیایی ھاتیە داخستن و گۆت: “ئەڤ کەڤرە کەفتینە د رێیێ دا و رێ ب تمامی داخستیە”.
ناڤھاتی ئاماژە دا وێ چەندێ کو تیمێن سەخبێریا رێک و پرا نھا کار دکەن بو دووبارە ڤەکرنا وێ رێ یێ ژ بەر چوونا وەلاتیێن وێ دەڤەرێ و چوونا گەشتیاران بو جھێن گەشتیاری .
ئەڤرۆ نیوز، لەزگین جوقی:
کەسایەتیێ کوردێ ئێزدی ل قەزا شنگال بۆ ئەڤرۆ نیوز دیار کر کو ئێزدیان دەست ب گرتنا رۆژیان کریە ل ڤی حەفتیێ دێ ھەر سێ رۆژیێن ئێزی دەست پێ کەن و دێ ئێزدی قەستا سەر مریێن خوە کەن و گۆت: “داخوازێ ژ جەنابی سەرۆک بارزانی دکەین ریێا شنگال بۆ سحێلا بۆ ئێزدیان بھێتە ڤەکرن”.
قاسم شەشۆ، کەسایەتیێ کوردێ ئێزدی ل قەزا شنگالێ دیار کر کو ژ بەر داخستنا رێیا شنگالێ بۆ سحێلا خەلک تووشی ئاستەنگان بووینە و نەشێن قەستا سەر مریێن خوە بکەن بۆ جەژنا رۆژیێن ئێزی و گۆت: “ئەم داخوازێ دکەین رێیا شنگالێ بۆ سحێلا بھێتە ڤەکرن، چونکی ئێزدیان نەڤێت د ناڤ عەرەبان ڕا ھاتنوچوونی بکەن، ژ بەر وان خیانەتکارێن تەباخا سالا 2014ێ دەستدرێژکریە سەر کچ و ژن و زارۆکان، لەوڕا ھاتنوچوونا ئێزدیان د ناڤ عەرەبان دا گەلەک یا ب زەحمەتە”.
ژ ئالیێ خوە ڤە خەیری خانەسۆری ئەندامێ جڤاتا قەزا شنگال بۆ ئەڤرۆ نیوز دیار کر کو خەلکێ شنگالێ بەردەوام یێ داخوازێ دکەن رێیا شنگالێ بۆ سحێلا بھێتە ڤەکرن، نوکە ژی ئێزدی د بەرھەڤیێن جەژنا رۆژیێن ئێزی دکەن و گۆت: “خەلک دێ قەستا سەر گۆرستانێن مریێن خوە کەن ل ڤێ جەژنێ، لێ ھەکە رێ نەھێتە ڤەکرن دێ خەلکێ شنگالێ پتر تووشی ئاستەنگا بن، چونکی بۆ کوردێن ئێزدی یا ب زەحمەت د رێیا مووسل و تەلەعفەر ڕا بھێنە شنگالێ”.
ئه‌ڤرۆ نيوز:
رێڤەبەریا گشتیا کەشناسی و بیڤەلەرزێ ل ھەرێما کوردستانێ راگەھاند کو سوبەھی رۆژا پێنجشه‌مبى رێکەفتی 6ى كانوونا ئێكێ 2018ێ ئه‌سمان دێ ئه‌وره‌كێ گه‌له‌ك كێم بيت و پاشان ئه‌و ئه‌ور پيچه‌ك زێده بن.
پشکا پێشبینیان ل رێڤەبەریا گشتیا کەشناسی و بیڤەلەرزێ ل ھەرێما کوردستانێ د نڤیسارەکێ دا کو دانەک بۆ ئەڤرۆ نیوز رەوانە کرینە راگەھاند کو دھێتە پێشبینیکرن ئه‌سمان ئه‌وره‌كێ گه‌له‌ك كێم بيت و پاشان ئه‌و ئه‌ور پيچه‌ك زێده بن.
پشکا پێشبینیان دایە زایە زانین کو دێ ئله‌زاتيا بايى د ناڤبەرا 5 ھەتا 15کم دا و ماوێ دیتنێ ژی دێ د ناڤبه‌را 9 بۆ 10كم دا بیت، پلێن گەرمێ ژی دێ د ناڤبەرا 5 بۆ 17 پلان دا بن.
ئەڤرۆ نیوز، محەمەدعەلی نوری:
کچا پارێزگەھا دھۆکێ و ھەلبژارتیا عیراقێ و یاریزانا یانا زێرەڤانی زەلال سەعید دەرباز بوو قووناغا چارێک دووماھیا قارەمانیا رۆژئاڤا ئاسیا یا تێنسا ئەردی پشتی ب سەرکەفتی ل سەر یاریزانا ئۆردنی “زێنە نور” ب دو کۆما بیێ بەرامبەر، دیسا د یاریەکا دی دا ل گەل یاریزانا ئیرانی ب دو کۆما بێی بەرامبەر ھاتە دوراندن، د ھەڤرکیێن وان دا ئەوا نوکە یاریێن وێ ل باژێرێ عومان یا وەلاتێ ئوردنێ دھێتە ئەنجامدان.
سەعید خەلیل سەرۆک شاندێ ھەلبژارتیێ عیراقێ بۆ ئەڤرۆ نیۆز دیارکر کو کچا باژێرێ دھۆکێ “زەلال سەعید” ل سەر ئاستێ کێمتر ژ 13 سالی دا دێ ئەڤرۆ دوشەمبی بۆ باشکرنا رێزا خوە د قارەمانیێ دا یاریەکا دی و بەرەڤ یاریا دووماھیێ ئەنجام دەت.
ھەروەسا ناڤھاتی گۆت: “د چارچۆڤێ ھەڤرکیێن جووت دا زەلالێ د گەل ھەڤالا خوە یاریزانا ھەولێرا پایتەخت لاڤا روسته‌م شیان سەرکەفتنێ ل سەر دو یاریزانێن ھەردو وەلاتێ قەتەری و سوری تۆمار بکەن و پێنگاڤەکا باش بەرەڤ رێزێن پێشیێ بچن”.
ھەروەسا سەعید خەلیل دیارکر کو یاریا ئەڤرۆ دوشەمبی یا یاریزانا دھۆکێ زەلال سەعید دێ بۆ سەرکەفتنێ بیت ژبۆ دەربازبوونێ بۆ یاریێن دوماھیا قارەمانیا رۆژئاڤا ئاسیا.
نيشاندان