ئه‌ڤرۆ نیۆز، ئه‌میر ئه‌ترووشى:
پشتى بۆرینا زێده‌تر ژ چوار سالان ل سه‌ر هاتنا رێكخراوا تیرۆرى یا داعش بۆ عیراقێ، هێشتا دو ملیۆن و 400 هزار عیراقى د ئاواره‌نه و هژماره‌ك ژ وان ژى ل هه‌رێما كوردستانێ دژین و هنده‌ك ژى ڤه‌گه‌ریانه مووسل و جاره‌كا دى ده‌ست ب ئاواره‌بوونێ كریه و رۆژانه ژى 20 خێزانێن مووسل دووباره ئاواره دبن.
هۆشه‌نگ محه‌مه‌د، رێڤه‌به‌رێ ناڤه‌ندا نه‌هێلانا قه‌یرانان ل هه‌رێما كوردستانێ بۆ ئه‌ڤرۆ نیۆز دیار كر، ل سالا 2014 و وێڤه‌تر نێزیكى سێ ملیۆن و 500 هزار عیراقى ئاواره بووینه و چه‌ندین هۆكار بووینه ئه‌گه‌رێ په‌یدابوونا ئاواره‌بوونا عیراقیان و ئه‌و ئه‌گه‌ر هه‌تا نها ژى هێشتا ماینه و چو گۆهۆرین ل عیراقێ په‌یدانه‌بووینه ببنه رێخۆشكه‌ر بۆ ڤه‌گه‌ریانا ئاواره‌یان و ژ وان ئه‌گه‌ران ژى مه‌ترسیا داعش و نه‌بوونا ئێمناهیێ و بێكارى و نه‌بوونا خزمه‌تگۆزاریان و وێرانبوونا وان باژێرێن داعش داگیركرین.
هۆشه‌نگ ئاماژه ب هندێ دا كو هه‌تا نوكه عیراقێ چو رێخۆشكه‌ر و پێنگاڤ بۆ ڤه‌گه‌ریانا ئاواره‌یان نه‌هاڤێتینه، عیراقێ دوو ملیار دینار بۆ ئاواره‌یێن ل هه‌رێمێ دژین ته‌رخانكربوون و بۆ هه‌ر رزگاربوویه‌كى ژ ده‌ستێن داعش دوو ملیۆن دینار ته‌رخانكربوون، به‌لێ هه‌تا نوكه چو ژ ڤان پاره‌یان نه مه‌زاختینه و چو پاره بۆ ئاواره‌یێن ل هه‌رێما كوردستانێ دژین نه‌هنارتینه و گۆت: هه‌یڤانه مه پێدڤى ب 150 ملیۆن دۆلاران هه‌یه بۆ دابینكرنا پێدڤیێن ئاواره‌یێن ل هه‌رێما كوردستانێ دژین.
ئاواره‌یێن ل هه‌رێمێ دژین هه‌یڤانه پێدڤى ب 150 ملیۆن دۆلارانه
نيشاندان
