ئەڤرۆ نیوز:

ل دووڤ داخوازیا فەرمی یا جھنشینێ ئەبوزەبی سەروک بارزانی د گەل شاندەکی سەرەدانا ئیماراتا ئێکگرتیا عەرەبی کر دگەل شێخ محەمەد بن زاید ئەلنەھیان جێگرێ فەرماندەیا ھێزێن چەکدارێن ئیماراتێ کومبوو.

د ڤێ کومبونێ دا کو مەسرور بارزانی راوێژکارێ ئەنجومەنێ ئاسایشا ھەرێما کوردستانێ و ئازاد بەرواری ئەندامێ مەکتەبا سیاسیا پارتی دیموکراتی کوردستان ژی ئامادەبوون، تێدا بارودوخێ سیاسیێ عیراقێ و پەیوەندیێن ھەردولا ھاتنە گوتوبێژکرن و دیسان گەنگەشە ل دۆر دووماھی گوھۆرینێن ل دەڤەرێ ھاتنە کرن.

ژ لایێ خوە ڤە جھنیشنێ ئەبوزەبی خوشحالیا خوە بۆ سەرەدانا سەروک مەسعود بارزانی بۆ بەغدا و پێشڤەچوونا پەیوەندیێن ھەرێم و بەغدا دیارکر و ئامادەیا خوە دیارکر پێشکێشکرنا ھەر ھاریکاریەکێ پێخەمەت ئارامیا دەڤەرێ.

ئەڤرۆ نیوز، رەمەزان ھەرنی:
یوسف بازیانی سەروکێ رێکخراوا رەوشنبیری و رێک و پرا ل ھەرێما کوردستانێ بۆ ئەڤرۆ نیوز گۆت : سێ ئەگەر ھەنە کو رۆژ بۆ رۆژێ رودانێن ترافێکێ بەرەڤ زێدەبۆنێ ڤە دچن ٨٠% شوفێر ئەگەرێ دروستبۆنا رودانایە ١٠% کێماسیێن ترومبێلێ ١٠% بۆ گوھۆرینا رەوشا سەقای، ب کارئینانا موبایلێ ل دەمێ شوفێری کرنی ٣٨% ئەگەرێ دروستبۆنا رودانایە ،ژبلی ڤان ئەگەرا ھوشیاریا کەسی ژی یا کێمە روژانە رێژا دروستبۆنا رودانا ل بلندبۆنێ دایە و نوکە ملیونەک و ٥٨٠ ھزار ترومبێل ھەنە ل کوردستانێ.
بازیانی گوتژی : ل کوردستانێ ئەگەر ھاتن و چونا ھێلێن پاسا و قیتارا ھەبا رێژا رودانا دا کێمتر بیت لێ ژبەرکو ب تنێ ھاتن و چۆن لسەر ئاستێ کوردستانێ ب ترومبێلێ یە رودان ژی روژ بۆ روژێ بەرەڤ زێدە بۆنێ ڤە دچن .
دوپاتکر ژ ئەگەرێ رودانێن ترافێکێ سالانە ل کوردستانێ پتر ژ ١٢ ھزار کەسا دبنە قوربانی و گیانێ خوە ژ دەستددەن و کێم ئەندام و بریندار دبن، سالانە ل جیھانێ ئێک ملیۆن و ٣٥٠ ھزار کەس گیانێ خوە ژ دەستددەن ژ ئەگەرێ رودانێن ترافیکێ پتر ژ ٥٤ ملیۆن کەسا ژی بریندار دبن و پتر ژ ٥ ملیون و ٤٠٠ ھزار کەسا ژی کێم ئەندام دبن و زیانێن مادی ژی ب ٧٠٠ بۆ ٧٥٠ ملیار دولارا دھێنە خەملاندن.