ئەڤرۆ نیوز:
سەرۆکێ ژوورا بازرگانی ل ھەرێما کوردستانێ دیار کر کو ب مەرەما وەبەرئینانێ ٣٠ کۆمپانیێن مەزنێن وەلاتێ ھندستانێ دێ د ڤێ حەفتیێ دا ھێنە ھەرێما کوردستانێ و گۆت: “ئەڤ کۆمپانیە دێ د ھەموو بواران دا کارێ وەبەرئینانێ ل ھەرێمێ ئەنجامدەن”.
دارا جەلیل خەیات، سەرۆکێ ژوورا بازرگانی ل ھەرێما کوردستانێ دیار کر کو بڕیارە د ڤێ حەفتیێ دا ٣٠ کۆمپانیێن وەلاتێ ھندستانێ ب مەرەما ئەنجامدانا کارێ وەبەرئینانێ بھێنە ھەرێما کوردستانێ و ھەر د چارچوڤێ ڤێ سەرەدانێ دا چاڤێ وان دێ ب وەبەرئینەرێن ھەرێما کوردستانێ ژی کەڤیت و دێ ل گەل ئێک ئاخڤن بۆ وێ چەندێ کارێن ھەڤپشک پێکڤە ئەنجام بدەن و بۆ مالپەرێ فەرمی یێ پارتی دیموکراتی کوردستان گۆت: “ئەڤ ٣٠ کۆمپانیە یێن کەسێن گرنگن و کۆمپانیێن ب ناڤودەنگن و دڤێن د ھەمی بواران دا کارێن وەبەرئینانێ ل ھەرێما کوردستانێ ئەنجام بدەن، چونکی ھندستان وەلاتیکێ پێشکەفتیە بۆ کارکرنێ و دڤێن کارێن باش ل ھەرێما کوردستانێ ژی ئەنجام بدەن و ھەڤالینیێ ل گەل ھەرێمێ دروست بکەن”.
ناڤھاتی ئاماژە دا وێ چەندێ کو ل رۆژا پێنجشەمبی ئەڤ کۆمپانیە دێ سەرەدانا ھەرێمێ کەن و دێ دانوستاندنێ ل گەل وەبەرئینەرێن ھەرێمێ ئەنجامدەن و گۆت: “پشتی ب دووماھی ھاتنا شەرێ دژی تیرۆرستێن داعش گەلەک کۆمپانی سەرەدانا ھەرێما کوردستانێ دکەن”.

ئەڤرۆ نیوز، مەحمود نھێلی:
ئێک ژ خودانێن ئاشێن تەحینێ ل ناحیا دێرەلۆکێ بۆ ئەڤرۆ نیوز دیارکر کو وان دەرگەھێ ئاشێ خوە گرتیە و نەشێن کار بکەن ژ بەر کو تەحینا ئامادە ل تورکیا ب بەرمیلان دھێت بێ سانسوور و وەلاتی نەشێن تەحینا وان بکرن.
سدقی ھاریکی خودانێ ئاشێ شیرانکی یێ تەحینا کونجیان بۆ ئەڤرۆ نیوز دیار کر کو ئەڤە پتری٣٠ سالانە وی ئاشێ تەحینا کۆنجیان ھەی و گۆت: “بەری نوکە من ئاشەک ھەبوویە ب ئاڤێ کار دکر، ل گەلیێ شێرانە ھاتبوو دانان، لێ پشتی ڤان پێشکەفتێن نوکە و ھاتنا کارەبێ و ب ساناھی کەفتنا کاری من ئاشێ خوە ڤەگوھاستە سەنتەرێ ناحیا دێرەلۆکێ و ب کارەبێ من ئاشی تەحینێ دا کاری”.
ناڤھاتی دیار کر کو وی دەرگەھێ ئاشتی خوە گرتیە ژ بەر کو کونجیا خوەمالی دکرە تەحین لێ ژ بەر کو کونجیا خوە مالی یا گرانە و تەحین گران ل سەر وەلاتیان دراوەستیا و گۆت: “سالانە ئاشێ من ٤٠ تەنێن تەحینێ بەرھەم دئینان، لێ نوکە تەحین ل تورکیا دەربازی ھەرێمێ دبیت و بێ سانسوور ل گۆمرکا دەرباز دبیت و کەس نزانیت یا چیە ژ بەر وێ یەکێ ب ئەرزانی دگەھیتە بەردەستێ وەلاتیان و وەلاتی نەشێت یا خومالی بکریت”.
ناڤھاتی خویا کر کو ناڤھاتی دیارکر، کو ئاشێ وی ب دووبەران کار دکر ئانکو دوو ئاش و بەردەوام کار دکر ژ بۆ بەرھەمئینانا تەحینەکا خومالی یا کونجیێن سافی و بێ کو چ کەرەستەکێ تێکەلی کرن ژ بەر وێ یەکێ ژی گران ل سەر وی راوەستیت و گۆت: “ئەڤ کونجیا ژ دەرڤەی ھەرێما کوردستانێ دھێت یا ئەرزانە و یا ئامادەیە بۆ ئاشی ژ بەر وێ یەکی ژی تەحینا وێ یا ئەرزانە لێ کونجیا ھەرێمێ بتابەتی ژی یا دەڤەرێ یا گرانە و ژ بەر وێ یەکی ژی تەحین گران ل سەر ھاولاتیان دراوەستیت”.

ئەڤرۆ نیوز، رێوار مزیری:
بەرپرسێ پشکا پەیوەندی و راگەھاندنێ ل سەرۆکاتیا باژێرڤانیا دھۆکێ بۆ ئەڤرۆ نیوز دیار کر کو رۆژانە ٤٦٠ تەنێن گلێشی ژ سەنتەرێ باژێرێ دھۆکێ دھێنە راکرن و ڤەگوھاستن بۆ کارگەھا کاشێ یا ڤاڤارتنا گلێشی.
ئیسماعیل مستەفا، بەرپرسێ پشکا پەیوەندی و راگەھاندنێ ل سەرۆکاتیا باژێرڤانیا دھۆکێ ئاشکرا کر کو د دەمێ ١١ ھەیڤێن بۆری یێن ئەڤ سالە دا دا ١٥١ ھزار و ٨٠٠ تەنێن گلێشی ژ د ناڤ سەنتەرێ باژێرێ دھۆکێ دا ھاتینە راکرن، ھەروەسا د ھەمان دەم دا ٣٩٠ ھەوێن راکرنا گلێشی و بەرمایکان د ناڤ سەنتەرێ باژێرێ دھۆکێ دا و ژ دەرڤەی باژێری ھاتینە ئەنجامدان و گۆت: “د ١١ ھەیڤێن بۆری یێن ئەڤ سالە دا ٦٥٠ تەنێن بەرمایکێن سەیرانی و گەشتیاران ل جھێن خەلک بۆ سەیرانان دچنێ ھاتینە راکرن”.
ناڤھاتی ئاماژە دا وێ چەندێ کو د ئە سالە دا چەندین ھەو بۆ درینا گیایێن ل رەخێن جادان ھاتینە ئەنجامدان و سەرەرایی ڤێ چەندێ ھەوەکا ھەشت رۆژی بۆ پاقژکرنا رووبارێ دھۆکێ ژی ھاتبوو ئەنجامدان و نێزیکی ١٢٠ قەلابێن بچووک یێن گلێشی ژێ ھاتبوونە راکرن.

ئەڤرۆ نیوز، لەزگین جوقی:
زانکۆیا دھۆک ئەڤرۆ رۆژا ٢٥/١١/٢٠١٨ نۆشدار (خەلەف حسێن گەرگەری) تایبەتمەندێ نەخۆشیێن زارۆیان ل پارێزگەھا دھۆکێ خەلاتکر.
د. خەلەف حسێن گەرگەری، تایبەتمەندێ نەخۆشیێن زارۆیان ل دھۆکێ بۆ ئەڤرۆ نیوز دیار کر کو ژ بەر بزاڤێن وی یێن بەردەوام د ئەنجامدان و پێشکداریکرنێ د چالاکیێن زانستی و ئەکادیمی و نۆشداری دا د ناڤ ھەرێما کوردستانێ و ژدەرڤەی ھەرێمێ و عیراقی ئەڤرۆ زانکۆیا دھۆک ب فەر دیت رێزگرتنێ ل کار و چالاکیێن وی بگریت و خەلات بکەت.
د. خەلەف حسێن گەرگەری، تایبەتمەندێ نەخۆشیێن زارۆیان ل دھۆکێ ل نەخۆشخانا ھیڤی یا زارۆیان و کۆلیژا پزیشکی یا زانکۆیا دھۆک خزمەتی دکەت دچەندین کۆنفرانسێن زانستی و ئەکادیمی و نۆشداری ل وەلاتێن ژێک جۆ دا پێشکداریی کریە ب مەرەما مفا وەرگرتن ژ سەربۆر و زانستێ نوو یێ نۆژداری ل جیھانێ.

ئەڤرۆ نیوز، سالار دۆسکی:
قایمقامێ قەزا دھۆکێ بۆ ئەڤرۆ نیوز ئاشکرا کر پشتی پێزانین گەھشتینە کارگێریا پارێزگەھێ کو ل بازاری ھندەک پێلاڤ ھاتینە فرۆتن و بێ رێزی ھەبمەر پێکھاتەکا ئاینی ھاتینەکرن، ڤێ چەندێ نەرحەتی بۆ ھەموو خەلکێ دھۆکێ دروستکر ژ بەر ڤێ چەندێ ئەو پێلاڤ ھاتنە ژناڤبرن.
جەھوەر عەزیز، قایمقامێ قەزا دھۆکێ ئاشکرا کر کو وان
ب رێیا ئاسایشا ئابووری و چاڤدێریا بازرگانی ئەو پێلاڤ کو (٥٢) جووت بوون دەستەسەرکرن و ب رێیا لژنەکێ دھێنە ژناڤبرن و گۆت: “ب رێیا رێڤەبەرێ کارۆبارێن مەسیحیان یا سەر ب وەزارەتا ئەوقافێ ڤە و بەرھەڤبوونا نوونەرێن سازیێن پەیوەندار ل دەڤەرێ ئەو ھەر دو جە ھاتنە داخستن و دووڤچوون ل سەر بابەتی ھاتیەکرن”.
قایمقامێ دھۆکێ خویا کر کو ئەڤ پێلاڤە ب رێیا ئەنترنێتێ ھاتبوونە کرین ژ وەلاتێ چینێ و ب رێکا ئیرانێ ھاتبوونە د ناڤ ھەرێمێ دا و کەلوپەکێ ئەرزان بھایە و حاویەکا تەمام یا پێلاڤان کریە و د ناڤ ڤێ حاویێ دا ٥٢ جووتێن پێلاڤان ل گەل بوون و ھندەک فرۆتینە و رۆژا چارشەمبی ھندەکێن کرستیان چووینە دکانێ و ھایداربووینە و ڤێ چەندێ نەرحەتی بۆ ھەموو پێکھاتێن دھۆکێ دروست کریە، چونکی دھۆک باژێرێ پێکڤە ژیانێ یە و پیرۆزراگرتنا ھەموو پێکھاتێن ئاینی یە و گۆت: “د دووڤچوونێن مە دا و ھەتا ب باوەریا برایێن مەسیحی کو ئەڤ بابەتە یێ بێ دەستی بوو و ژ نیشکەکێ ڤە بوویە و ئەڤ کەل و پەلە کرینە و ئەڤە ژی ل گەل بووینە و ژڤانە سوباھی رۆژا دووشەمبی ژی لژنەک بھێتە پێکئینان و دناڤ بازاری دا بگەریت و دوکاندار ھشیار بن و دوڤچوونێ ل سەر ئەڤان بابەتا بکەن.

ئەڤرۆ نیوز:
ھێلا گەرم یا ١١٩ بریارە ئەڤرۆ ب کەڤیتە کاری بۆ ھەر وەلاتیەکێ سکالایەک ھەبیت تۆماربکەت یێن گرێدای توندوتیژیا خێزانی.
ل دور ڤی بابەتی مقدمێ مافپەروەر ئارام محەمەد رێڤەبەرێ نەھێلانا توندوتیژیا دژی ئافرەتان ل پارێزگەھا دھۆکێ بۆ ئەڤرۆ نیوز دیارکر کو ژورەک ل رێڤەبەریا وان ھاتیە دورست و ھێلا گەرم تێدا ھاتیە دانان و ٢٤ دەمژمێران دێ دکاری دابیت بو ھەر وەلاتیەکێ سکالایەکا خێزانی ھەبیت ب رێیا ڤێ ھێلێ توماربکەت و ئەو دێ دوویڤچوونا بابەتی کەن بۆ چارەسەرکرنێ.
زێدەتر ناڤھاتی ئاشکرا کر کو گەلەک سکالایێن ل رێڤەبەریا وان ھاتینە تومارکرن ئەو شیاینە ب رێیا سەنتەرێ دەرونی کو سەرنتەرێ ئێکێ بوویە ل ھەرێما کوردستانێ ل رێڤەبەریا وان ھاتیە دامەزراندن و چەند تایبەمەندێن دەرونی لێ کار دکەن وان کێشەیێن خێزانی چارەسەربکەن بەری ب گەھنە دادگەھێ.