ئەڤرۆ نیوز:
ب مەرەما دلخوەشیا تووشبوو و رزگاربوویێن نەخۆشیا پەنجەشێرێ، ھۆنەرمەند (ھەڤال ئیبراھیم) و ھۆنەرمەند (دیلانار یێلدز) دێ مەزنترین ئاھەنگا سەرکەفتنێ ب سەر نەخۆشیا پەنجەشێرێ ل رۆژا ٢٧ چریا دویێ ٢٠١٨ێ ل دەمژمێر ٦:٣٠ ئێڤاری ل پێشانگەھا نێڤدەولەتی یا ھەولێرێ گێڕن و پلێت دێ د ھەمان رۆژ دا ل بەر دەرگەھێ ھۆلێ ھێنە فرۆتن و ھەر کەسەکێ حەزا ئامادەبوونێ د ڤێ ئاھەنگێ دا ھەبیت ئەو ب خوە دێ بھایێ پلێتی دیار کەت.
ئەڤرۆ نیوز ، ئەمیر ئەترووشی:
ژ ئێک خێزانا ئێزدی یا ئاکنجی گۆندێ گرزەرکێ ل باشوورێ چیایێ شنگالێ ٤٥ کەس ژ ئالیێ تیرۆرستێن داعش ڤە ھاتبوونە رەڤاندن و ھەتا نوکە ٣١ کەس ھاتینە ڤەگەراندن و ھێشتا ١٤ کەس ژ ڤێ خێزانێ د دەستێ داعش دا ماینە.
زریان چیچۆ ئێک ژ ئەندامێن ڤێ خێزانێ، بۆ ئەڤرۆ نیوز دیار کر کو دەمێ تیرۆرستَن داعش ب سەر دەڤەرا شنگالێ و گۆندێ وان یێ گرزەکێ دا گرتی، ھندەک خێزانێن وان یێن بنەمالێ بزاڤا رەڤینێ کر، بەلێ ھەمی ھاتنە دەستەسەرکرن و بزاڤ ھاتنە کرن بنەمالا وان ب تمامی ژناڤببەن و ب تنێ ژ خێزانا وان ٤٥ کەس ژ مەزن و زارۆیان ھاتنە رەڤاندن.
ناڤبری ئاماژە دا وێ چەندێ کو ھەتا نھا ٣١ کەس ژ خێزانا وان ھاتینە ڤەگەراندن و ١٤ کەس ھێشتا د دەستێن تیرۆرستَن داعش دانە و چارەنڤیسێ وان یێ بەرزەیە و گۆت: “ھندەک ژ وان بربوونە تلەعفەر و سووریا و نزانین یێن دی ل کیڤەنە و بابێ من و دایکا من ژی ھێشتا ڤەنەگەریاینە و چو جە نەماینە مە پرسیار نەکری و چو دیارنینە”.
زریان ئاشکرا کر کو ئەو د پشتراستن رەوشا وان گەلەک یا خرابە و د ژیانەکا سەخت دانە و ژ حوکمەتا ھەرێما کوردستانێ دخوازن وان ب سلامەتی ڤەگەرینن.
ئەڤرۆ نیوز، قائید میرۆ:
وەزارەتا ناڤخۆ یا حوکمەتا ھەرێما کوردستانێ رێڤەبەریەک بۆ رێگرتنێ ل بازرگانیکرنا ب مرۆڤان دامەزراندیە و بڕیارە نڤیسینگەھەک ژی ل دەمەکێ نێزیک ل پارێزگەھا دھۆکێ بھێتە ڤەکرن، بەرپرسەکێ وەزارەتا ناڤخۆ ژی دیار کر کو ژ نوکە پێڤە دێ ل گورەی قانوونێ سەرەدەریێ ل گەل وان کەسان کەین یێن بازرگانیێ ب مرۆڤان دکەن.
موقەدەمێ مافپەروەر دارا فاروق، رێڤەبەرێ بەرھنگاربوونا بازرگانیێ ب مرۆڤان ل وەزارەتا ناڤخۆ بۆ ئەڤرۆ نیوز دیارکر کو ل وەزارەتا ناڤخۆ رێڤەبەریەک ب مەرەما بەرھنگاربوونا بازرگانیکرنێ ب مرۆڤان ھاتیە دامەزراندن و بڕیارە شەش نڤیسینگەە ژی ل پارێزگەھێن ھەرێما کوردستانێ بھێنە ڤەکرن، کو ئێک ژوان دێ ل پارێزگەھا دھۆکێ بیت، ب مەرەما رێگرتنێ ل بازرگانیکرنێ ب مرۆڤان، وەزارەتا ناڤخۆ ئیدی دێ ل گورەی قانوونێ سەرەدەریێ دگەل وان کەسان کەت یێن مامەلێ و بازرگانیێ ب مرۆڤان دکەن و گۆت: “ل رۆژا ٧ی ھەیڤا تیرمەھا ئەڤ سالە پەرلەمانێ کوردستانێ قانوون پەسەندکریە لدۆر رێگرتنێَ ب بازرگانیا مرۆڤان، لەوڕا ھەر ل گورەی ئەڤێ قانوونێ دێ رەوشا بازرگانیکرنێ ب مرۆڤان ھێتە کۆنتڕۆلکرن و دووڤچوون و ڤەکۆلین دێ ھەبن”.
رێڤەبەرێ بەرھنگاریا بازرگانیکرنێ ب مرۆڤان خویا کر کو ل ھەرێما کوردستانێ بازرگانی ب مرۆڤان دھێتەکرن، ب تایبەتی ئەڤێن دبێژنێ کرێکارێن بیانی، چونکی ل گورەی پێزانینێن ل بەردەست ئەڤ کرێکارە ژ لایێ کۆمپانیان ڤە دھێنە ھەرێما کوردستانێ و گەلەک جاران دھێنە ڤەگوھاستن بۆ بەغدا و دەڤەرێن ناڤین و باشوورێ عیراقێ ب مەرەما کڕین و فرۆتنا وان ب پارەکێ زێدەتر و گۆت: ” لیژنەک ژ دەزگەھێن ئاسایش و ئاسایشا ساخلەمی و پۆلیسان ھاتیە پێک ئینان ب مەرەما ڤەکۆلینێ ل دۆر بابەتێ فرۆتنا گۆلچیسکان ژ لایێ وەلاتیان ڤە، چونکی ل گورەی قانوونێ دڤێت لیژنە پەسەندێ بدەتە ھەر کەسەکی ھەکە بڤێت ئەندامەکێ لەشێ خوە بدەتە کەسەکێ دی، نابیت ب چو شێوەیەکی کڕین و فرۆتن ب ئەندامێن لەشێ مرۆڤی و گۆلچیسکا بھێتەکرن ب تنێ ھەکە کەسەکی بڤێت بشێوەیێ خوەبەخش نەبیت”.
ئەڤرۆ نیوز:
بهایێ نەفتێ به‌رده‌وام د داكه‌فتنێ دایه و جارەکادی نەفتا خام یا برێنت 5% بهایێ خوه ژ ده‌ست دا.
د بازارێن جیهانی یێن نەفتێ دا، ژ ئەگەرێ زێده‌بوونا به‌رهه‌مێ نەفتێ و خواستەیا كێم، بهایێ نەفتێ نزمترین ئاست هه‌ر ژ هەیڤا چریا دویێ یا سالا بوری تۆماركر و هه‌ر به‌رمیله‌كێ خاما برێنت 3 دۆلار و 34 سه‌نت ژ ده‌ستان و گه‌هشته 59 دۆلار و 26 سه‌نتان، ب ڤی رەنگی هه‌ر به‌رمیله‌كێ 5% بهایێ خوه ژ ده‌ست دا.
هەروەسا هه‌ر به‌رمیله‌كێ خاما ئه‌مریكی ژی چار دۆلار ژ ده‌ستدان و گه‌هشته 50 دۆلار و 60 سه‌نتان و وێ ژی 7% ژ بهایێ خوه ژ ده‌ست دا.
ژبەر ڤێ چەندێ ژی رێكخراوا ئۆپك ل بەرە ل شه‌شێ كانوونا دویێ یا ئه‌ڤ ساله كۆم ببیت و گۆتوبێژان ل سەر سنۆرداركرنا به‌رهه‌مێ نەفتێ بكه‌ت، ئەڤە ژی دێ بیتە وه‌كو بزاڤه‌كێ ژبۆ راگرتنا بهایێ داكه‌فتنا نەفتێ ل بازارێن جیهانی دا.
ئه‌ڤرۆنيوز:
وه‌زاره‌تا ساخله‌ميا عيراقێ بلندبوونا رێژا قوربانيێن له‌هيان ل چه‌ندين پارێزگه‌هان راگه‌هاند كو گه‌هشتينه 32 قوربانيان.
وه‌زاره‌تا ساخله‌ميا عيراقێ درۆهنكرنه‌كێ دا به‌لاڤكر” 10 كه‌سان ژ ئه‌گه‌رێ له‌هيان گيانێ خوه يێ ژده‌ستداى ( پێنج ل پارێزگه‌ها سه‌لاحه‌دين، دو ل پارێزگه‌ها زيقار، ئێك ل پارێزگه‌ها ميسان، ئێك ل پارێزگه‌ها به‌سرا وئێك ل پارێزگه‌ها واست”.
ئاماژه‌كر كو 22 كه‌س ژى ژ ئه‌گه‌رێ وان له‌هيان يێن بريندار بووين.
ئه‌ڤرۆ نيوز، ئه‌میر ئه‌ترووشى
ب مه‌ره‌ما وێ چه‌ندێ دادگه‌هكری ژ ڤان جۆره قاره‌مانیان بێ به‌هرنه‌بن، رێڤه‌به‌ریا چاكسازیا مه‌زنا ل دهۆكێ، قاره‌مانیه‌كا ته‌پاپێی بۆ هژماره‌كا زۆر یا دادگه‌هكریان هاته ڤه‌كرن و ل سه‌ر (16) تیمان دا هاتبوونه به‌لاڤكرن.
عرفان محه‌مه‌د ئه‌مین، به‌رپرسێ راگه‌هاندنا رێڤه‌به‌ریا چاكسازیا مه‌زنا ل دهۆكێ، بۆ (ئه‌ڤرۆنیۆز) دیار كر، قاره‌مانییا ته‌پاپێ دێ هێته‌برێڤه‌برن ژلایێ هوبا مه‌شقی پیشه‌یی ل چاكسازیێ و دادڤان و ماموستایێ وه‌رزشێ ل چاكسازیێ سه‌ربارحسن دێ سه‌رپه‌رشتیێ كه‌ت و ب هاریكاری و پشته‌ڤانیا به‌رده‌وام یا كارمه‌ندێن چاكسازیێ و ل ژێر چاڤدێری یا (مه‌ئموور و چاڤدێر و پاسه‌وانان) رۆژانه دێ یاری هێنه برێڤه‌برن و دێ بۆ ماوێ هه‌یڤه‌كێ یا به‌رده‌وام بیت.
ئه‌ڤرۆنيوز:
ل دووڤ دووماهى ليستا هاتيه ده‌ركرن ژلايێ ئێكه‌تيا نێڤده‌وله‌تى يا ته‌پا پێ (فيفا) بۆ رێزبه‌ندا هه‌لبژارتيێن ته‌پا پێ ل جيهانێ، هه‌لبژارتيێ به‌لجيكا ل رێزا ئێكێ دهێت.
ل دووڤ وێ رێزبه‌ندێ هه‌ر ئێك ژ هه‌لبژارتيێن فه‌ره‌نسا وبه‌رازيل وكرواتيا ل رێزێن دويێ وسيێ وچارێ دهێن وئينگلته‌را وپورتۆگال وئوروگواى ل رێزێن پێنجێ وشه‌شێ وحه‌فتێ دهێن وسويسرا ودانيمارك وئيسپانيا ل رێزێن هه‌شتێ ونه‌هێ و ده‌هێ دهێن.
ئه‌ڤرۆنيوز:
پشتى كو حوكمه‌تا تونسێ داخوازيێن فه‌رمانبه‌ران ره‌تكرين كو ژلايێ ئێكه‌تيا كارى يا تونسى بۆ هاتينه بلندكرن ل دۆر زێده‌كرنا مووچێن فه‌رمانبه‌ران، 650 هزار فه‌رمانبه‌رێن تونسى ل سه‌رانسه‌رى وه‌لاتى مانگرتن ژ ده‌وامێ كر.
مونا ئه‌لمه‌يموونى، رۆژنامه‌ڤانا تونسى بۆ ئه‌ڤرۆنيوز گۆت” هه‌رچه‌نده حوكمه‌تا تونسى ب سه‌رۆكاتيا يوسف ئه‌لشاهد يا دبن فشاره‌كا مه‌زن ڤه ژلايێ سندووقا دراڤى يا نێڤده‌وله‌تى وهنده‌ك وه‌لاتێن قه‌ر داينه تونسێ ل دۆر زێده‌نه‌كرنا مووچان دچارچۆڤێ چاكسازيان دكه‌رتێ گشتى دا ل تونسێ، به‌لێ به‌رده‌وام فه‌رمانبه‌رێن تونسێ ب رێيا ئێكه‌تيا كارى ل تونسێ داخوازا زێده‌كرنا مووچێن خوه دكر”.
دياركر ژى” بهايێن هه‌موو كه‌لوپه‌لان ب شێوه‌كێ به‌رچاڤ يێن زێه‌بووين ل تونسێ ومووچێن فه‌رمانبه‌ران ژى هه‌ر وه‌كو به‌رێ نه وڤێ چه‌ندێ كارتێكرنه‌كا مه‌زن ل بارێ ئابوورى وژيانا فه‌رمانبه‌ران كريه”.
ئاماژه كر” بۆ نموونه مووچێ من يێ هه‌يڤانه ب دۆلارێ ئه‌مريكى دبيته 154 دۆلار وئه‌ڤه پاره‌كێ كێمه بۆ فه‌رمانبه‌رێ دهه‌يڤه‌كێ دا هه‌به‌ركرن ل گه‌ل بهايێ بازارێ ئه‌ڤرۆ ل تونسێ”.
گۆت ژى” له‌وما ئێكه‌تيا كارى ل تونسى مانگرتنه‌كا سه‌رانسه‌رى ل وه‌لاتى راگه‌هاند و650 هزار فه‌رمانبه‌ران پشكدارى دوێ مانگرتنێ دا كر ونه‌چوونه سه‌ر كارێن خوه وه‌كو فشاره‌ك ل سه‌ر حوكمه‌تێ بۆ زێده‌كرنا مووچێن وان”.
خوياكر” فه‌رمانبه‌رێن قوتابخانا وزانكۆ ونه‌خوه‌شخانێن گشتى ووه‌زاره‌تان پشكدارى د مانگرتنێ دا كر”.
ئاشكراكر ژى” نوكه پتريا وه‌لاتيێن تونسى ژ دووباره‌بوونا سيناريۆيا روودانێن بوهارا عه‌ره‌بى ل تونسێ ئه‌وا به‌رى حه‌فت سالان رووداى ودئه‌گه‌ر دا سه‌رۆكێ تونسى يێ وى ده‌مى زه‌ينولعابدين بن عه‌لى ده‌ست ژ كورسيا ده‌ستهه‌لاتێ به‌رداى وره‌ڤى بۆ ده‌رڤه‌ى تونسێ ول سعوديێ ئاكنجيبووى”.
ئه‌ڤرۆ نيوز:
د هژمارا خوه یا تایبه‌ت یا تۆرا جڤاكیا تویته‌ری دا، مه‌سرور بارزانی شیره‌تكارێ جڤاتا ئاسایشا هه‌رێمێ دیار كر، نها ده‌لیڤه‌یه‌كا گرنگه و د 2 رۆژێن بووری دا، دانوستاندنێن گرنگ و به‌رهه‌مدار بۆ چاره‌كرنا كێشه‌یان و سیسته‌ماتیككرنا په‌یوه‌ندیێن هه‌ولێر و به‌غدایێ هاتنه كرن.
مه‌سرور بارزانی، گه‌شبینییا خوه ژ چاره‌كرنا هه‌موو كێشه‌یێن هه‌ولێر و به‌غدایێ نیشاندایه و راگه‌هاندیه، ئه‌و گه‌شبینه، كو سه‌ركرداتییا نوو یا ئیراقێ، دێ سه‌ركه‌فتنێن هه‌ڤپشك و باجا زیانان بۆ گه‌لێ كوردستانێ و ده‌ڤه‌رێ به‌رچاڤ وه‌رگریت.
نيشاندان