ئەڤرۆ نیوز:
ئه‌ندامه‌كێ سه‌ركردایه‌تیا پارتی دیموكراتی كوردستان/ ئیران دیار دكه‌ت كو سه‌ره‌دانا ڤێجارێ یا رۆحانی بۆ ئورمیێ و خوێ چه‌ندین ئارمانجێن خوه‌ هه‌بوون و یا هه‌ری گرنگ ژی رۆحانی دخواست هنده‌ك سۆزێن بێ بنه‌ما بده‌ته‌ خه‌لكی و ترسا ده‌ستهه‌لاتا ئیرانێ ژ هندێ ژی هه‌یه‌ كو ژ به‌ر سزایێن ئابووری و ره‌وشا خراب یا وه‌لاتیان سه‌رهلدان ل رۆژهه‌لاتێ كوردستانێ ده‌ستپێ بكه‌ت.
دارا ناتق ئه‌ندامێ سه‌ركردایه‌تیا پارتی دیموكراتی كوردستان/ ئیران بۆ رۆژناما ئه‌ڤرۆ دیار كر كو نها كاریگه‌ریا سزایێن ل سه‌ر ئیرانێ رۆژ ب رۆژێ پتر ل سه‌ر جڤاكێ ئیرانێ و رۆژهه‌لاتێ كوردستانێ دیار دبیت و ره‌وشا ژیانا خه‌لكی ژی خراب بوویه‌، ژ به‌ر هندێ ژی رۆحانی سه‌ره‌دانا پارێزگه‌ها ئورمیێ ل رۆژهه‌لاتێ كوردستانێ كر و دخواست ڤێ په‌یامێ بده‌ته‌ رایا گشتی كو سزایێن ئابووری چو كارتێكرنا خوه‌ ل جڤاكێ ئیرانێ نه‌كریه‌ و گۆت: (ئاشكرایه‌ كو كوردستان جهێ به‌رخوه‌دانێ یه‌ ل دژی زۆرداریێ و ئه‌و دزانن ده‌مێ ده‌ستهه‌لاتا وان لاواز بیت و ئاریشه‌ دروست ببن مه‌ترسیا هندێ بۆ وان هه‌یه‌ كو جاره‌كا دی ل رۆژهه‌لاتێ كوردستانێ خوه‌نیشادان ل دژی ده‌ستهه‌لاتێ ده‌ستپێ بكه‌ت و رۆحانی ژی هاتبوو رۆژهه‌لاتێ كوردستانێ دا ب درووشمێن خوه‌ یێن به‌رێ وه‌سا نیشا بده‌ت كو ئه‌و بهێزن و سزایێن ئه‌مریكا چو كارتێكرنا خوه‌ نابن).
ناڤبری هه‌روه‌سا دیار كر كو رۆحانی به‌ری ببیته‌ سه‌رۆك كۆمار گه‌له‌ك سۆز ل دۆر ئازادیان و مافێن كوردان دابوونه‌ خه‌لكێ رۆژهه‌لات و شیا ده‌نگه‌كێ باش ل رۆژهه‌لاتێ كوردستانێ بده‌ستڤه‌ بینیت، لێ نها راستیا رۆحانی بۆ خه‌لكی ئاشكرا بوویه‌ و ده‌مێ سه‌ره‌دانا باژێرێ خوێ كری خه‌لكێ ب به‌ران هێرشی كاروانێن ترۆمبێلا وی كر و ئه‌و یه‌ك ژی ڤێ راستیێ نیشا دده‌ت كو ئێدی باوه‌ریا خه‌لكێ كورد و گه‌لێن دی یێن ئیرانێ ب رۆحانی و ده‌ستهه‌لاتا وی نه‌مایه‌ و گۆت: (درووشمێن رۆحانی و ئاخڤتنێن وی ل ئورمیێ و خوێ نیشا دده‌ت كو ده‌ستهه‌لاتا ئیرانێ گه‌له‌كێ لاواز بوویه‌).
دارا ناتق ئه‌و یه‌ك ژی دیار كر كو هه‌ر ده‌مێ ئالۆزی ل ئیرانێ دروست ببن ده‌ستهه‌لاتا ناڤه‌ندی دخوازیت ب هه‌موو ره‌نگه‌كێ بزاڤێ بكه‌ت كو نه‌هێلیت سه‌رهلدان ل رۆژهه‌لاتێ كوردستانێ و باشورێ ئیرانێ و ده‌ڤه‌رێن دی یێن ئیرانێ ده‌ستپێ بكه‌ن ئه‌و ده‌ڤه‌رێن كو نه‌ته‌وێن جودا تێدا دژین و د ماوه‌یێ چهل سالێن بۆری دا ده‌ستهه‌لاتا كۆمارا ئیسلامی یا ئیرانێ ب هه‌موو ره‌نگه‌كێ زۆرداری ل وان پێكهاتان كریه‌ و رۆژانه‌ لاوێن كورد و عه‌ره‌ب و نه‌ته‌وێن دی یێن ل ئیرانێ ل سێداره‌ دده‌ت و گۆت: (پشتی سه‌ره‌دانا رۆحانی گه‌له‌ك كه‌س ل خوێ هاتنه‌ ده‌سته‌سه‌ر كرن و ل گۆر زانیاریێن ل به‌ر ده‌ستێ مه‌ چاره‌نڤیسێ ب ده‌هان گه‌نجێن كورد و ئازه‌ری دیار نینه‌، زۆرداریه‌كا مه‌زن ل سه‌ر خه‌لكی هه‌یه‌ و ئه‌و یه‌ك ژی نیشا دده‌ت كو ده‌ستهه‌لات لاواز بوویه‌ و بۆ پاراستنا پێگه‌هێ خوه‌ هه‌ر تشته‌كێ دكه‌ت).
ناڤهاتی د دووماهیا ئاخڤتنا خوه‌ دا ئه‌و یه‌ك ژی دیار كر كو گه‌لێ كورد ل رۆژهه‌لاتێ كوردستانێ باش دزانیت نه‌ رۆحانی و نه‌ ژی چو كه‌سه‌كێ دی نه‌شێت پرسێن وان چاره‌ بكه‌ت و هه‌تا ده‌ستهه‌لاتا مه‌لایان ل ئیرانێ ل سه‌ر كاری بیت دێ زۆلم و زۆرداریا ل سه‌ر گه‌لێ مه‌ ژی به‌رده‌وام بیت، ژ به‌ر هندێ ژی ئه‌م دبێژین هه‌تا ده‌ستهه‌لاتا نها ژناڤ نه‌چیت چو گوهۆرین ل ئیرانێ روو ناده‌ت.