ئەڤرۆنیۆز، سالار دۆسکی:
ھیفا حاجی میرخان ئەنداما خولا چارێ یا پەرلەمانێ کوردستانێ ئاشکرا کر کو حوکمەتا عیراقێ مووچە بتنێ بۆ ٤٨ ھزار پێشمەرگێ کوردستانێ تەرخانکریە و ئەڤە رێژەکا گەلەک کێمە، چنکو کوردستانێ پێشمەرگە گەلەک ھەیە و دیسان دڤێت حوکمەتا عیراقێ بەرچاڤ وەربگریت ھەکە پێشمەرگە نەبا نوکە بەغدا ژی ل بن دەستێ داعش بایە و بتنێ حوکمەتا بەغدا دڤێت کوردان رازی بکەت.
ھەمان ئەنداما خولا بەرێ یا پەرلەمانێ کوردستانێ ب دوور زانی بۆدجێ ھەرێما کوردستانێ زوو ل ل حوکمەتێ ب دووماھی بھێت و پێشبینی کر ل ئەیارا ٢٠١٩ ب دووماھی بھێت ژ حوکمەتێ و بگەھیتە پەرلەمانێ کوردستانێ.
ھیفایێ بەحسێ رەوشا دارایی یا ھەرێمێ ژی کر کو بەر ب باشبوونێ ڤە دچیت و ئەڤێ چەندێ ژی دەم بۆ دڤێـت چنکو قەر ل سەر ھەرێمێ ھەنە و ھەتا زڤرینت بۆ کۆمپانیان و ھەمان دەم دەست ب پرۆژا ژی بھێتەکرن ھەتا مووچە بەر ب باشبوونێ ڤە بچن.

ئەڤرۆنیۆز، سالار دۆسکی:

د. دیار تەیب، ئەندامێ جڤاتا نوونه‌رێن عیراقێ ژ فراکسیۆنا پارتی دیموکراتی کوردستان بۆ ئەڤرۆ نیۆز گۆت: ب گشتی خالێن ناکوک د ناڤبەرا ھەرێمێ و بەغدا دا بەر ب چارەسەربوونێ ڤە دچن، بەغدا دیارکریە کو دێ رێژەکێ ژ بۆدجێ بۆ پێشمەرگەی ھێـتە تەرخانکرن وەک پشکەک ژ ھێزێن سەر عەرد ل عیراقێ، رێژە نەھاتیە دیارکرن و کا دێ چەوا ھێتەدان، ھاتیە دیارکرن کو بۆ مووچێ پێشمەرگەی یە، لێ پێشمەرگەی بۆدجە بۆ چەکكرنێ و جلكان و راھێنان ژی دڤێت نە ب تنێ مووچە یە.

ئەو ژی گۆت: کوردان ب گشتی تێبینی ل سەر بۆدجێ ھەنە و ئەگەر 17% نەبیت دڤێت ل دووڤ رێژا وەزارەتا پلاندانا عیراقێ بیت 14% کو ل دووڤ رێژا خەلکی ئەوان تەخمین کریە و ئەڤە خالەکا ناکوکە.

ھەمان ئەندام پەرلەمان ئەو ژی ئاشکرا کر کو گەلەک ژ خالێن قانوونێ سەردەری ل گەل ھەرێما کوردستانێ ھاتیەکرن وەک پارێزگەهێن وێ، یان باکورێ عیراقێ نابیت ژبلی ھەرێما کوردستانێ چ ناڤێن دی بھێنە گۆتن چونکو چار پارێزگەھە و بەلاڤەکرنا داھاتێ ھەرێما کوردستانێ ب خوە ڤەدگریت.