ئاکرێ، سەباح زوھێر:
بەری دەمەکی ئەڤرۆکە ل ئاکرێ بریسیەکێ ل سنێلەکێ ١٣ سالی دایە و ژ ئەگەرێ رەوشا وی یا خراب ھاتیە ڤەگوھاستن بۆ نەخوشخانا تەنگاڤیان ل دھۆکێ.
د ڤی دەربارەی دا حسێن ھێرش نوشدارێ نوبەدار ل نەخوشخانا تەنگاڤیان ل ئاکرێ تایبەت بۆ ئەڤرۆ نیوز گۆت: ئەڤرۆکە رێکەفتی ٢٧/١٢/٢٠١٨ د روودانەکا لێدانا بریسیێ ل سنێلەکێ ١٣ سالی یێ تاخێ خرپێ ل ئاکرێ ب ناڤێ سوفیان عەدنان دایە، و ژ ئەگەرێ نە سەقامگیریا رەوشا ساخلەمیا وی ھاتە ڤەگوھاستن بۆ نەخوشخانا تەنگاڤیان ل دھۆکێ داکو چارەسەریا وی بھێتە کرن.
ئەڤرۆ نیوز:
ستێرا بەلجیکی و یانا چێلسی یا ئنگلیزی پشتی دوھی شیای سەرکێشیا یانا خوە چێلسی بکەت بوو سەرکەفتنێ ل سەر یانا واتفورد ب دو گولان بەرامبەر گولەکێ کو ھەردو گولێن یانا چێلسی ژلایێ ھازارد ھاتنە تومارکرن کو ب تومارکرنا ئەوان ھەردو گولان یاریزانێ ناڤبری ھژمارا گولێن خوە گەھاندنە ١٠٠ گولان ل گەل وێ یانێ.
ھازارد ئەوێ ل سالا ٢٠١٢ ژ یانا لیل یا فرەنسی پەیوەندی ب چێلسی کری کو د ماوێ شەش سالێن بوری دا ئایدین ھازارد ٣٢٢یاری ل گەل وێ یانێ کرینە و ب تومارکرنا دو گولێن دوھی ناڤبری ھژمارا گولێن خوە گەھاندنە ١٠١ گولان کو دبیتە یاریزانێ دەھێ د مێژویا وێ یانێ دا ١٠٠ گولان توماربکەت کو وی یاریزانێ ناڤبری ٢٢٦یاری دخۆلا پرێمرلیگ دا کرینە و ٧٩ گول تومارکرینە.
گولێن ھازارد چەوا ھاتینە تومارکرن ل گەل چێلسی
٧٠ گول ب لنگێ راستێ
٢٥ گول ب لنگێ چەپێ
٥ گول ب سەری تومارکرینە
٩١ گول د ناڤا دەڤەرا پەنەلتی
٩ گول دەرڤەی دەڤەرا پەنەلتی
١ گول ب لێدانەکا ئێکسەر
٢٣ گول ب لێدانا پەنەلتی تومارکرینە
ئەڤرۆ نیوز، نەوزاد ھلۆری:
چیایێ پیرس ئێکە ژ مەزنترین چیایێن کوردستان و پارێزگەھا دھۆک، ژئەگەرێ ھەبوونا جاددێ بۆ سەرێ چیایی، ھژمارەکا خودانێن تەرش و کەوالی قەستایی چیایی دکەن ب مەرەما خودانکرنا پەزێ خوە، لێ ھەبوونا مین و تەقەمەنیان مەترسی ل سەر وان دروستکریە.
ل دۆر ڤێ چەندێ ھەکار سورچی، ئێکە ژ وان کەسێن کو ل چیایێ پیرس پەزی ب خودان دکەت بۆ ئەڤرۆ نیوز گۆت: من پتری ٥٠٠ سەرێن پەزی ھەنە و ل چیایێ پیرس ب خودان دکەم لێ ھەبونا مین و تەقەمەنیان مەترسی ل سەر ژیانا مە و پەزێ مە دروستکریە لەورا دخوازین لایەنێن شولەژێ ھاریکاریا مە بکەن ئەم دشێن ل سەر کارێ خوە بەردەوام بین و ب ئازادانە ھاتن وچوونێ بکەین.
ناڤھاتی زێدەتر گۆت: ژبلی راکرنا مینان پێدڤی یە جھێن شولەژێ ھاریکاریا مە بکەن بو ڤاکسیندانا تەرش و کەوالی و پەیداکرنا بازارەکی بۆ فروتنا بەرھەمێ وان، ژبەرکو ژبلی ڤی کاری ئەم چوو کارێن دی ناکەین، دیسان پێدڤی یە دەرمان بۆ چارەسەرکرنا نەخوشیێن ناف پەزێ مە دا ھەین بکەت.
ژلایێ خوە ڤە حازم محەمەد، ئێک ژ وەلاتێن دەڤەرێ یە ئەڤرۆ نیوز گۆت: سالانە خەلکێ دەڤەرێ پەزێ خوە دبەنە سەرێ چیایێ پیرس و خودان دکەن، ژبەرکو گژ و گیا و داروبار زورە و جھەکێ گونجایە بۆ ب خودانکرنا وان، ب تایبەتی ل وەرزێ زستانێ کو خەلک چلی دبرن و زستانێ ددەن پەزێ خوە لێ ترسا مین و تەقەمەنیان ل سەر ژیانا مە ھەیە د خوازین لایەنێن پەیوەندیدار ڤێ کێشێ چارەسەر بکەن.
ئەڤرۆ نیوز:
د یاریێن حەفتیا ھەژێ یا خولا ئیتالیا دا یانا ئەنترمیلان شیا سەرکەفتنێ ل سەر ناپولی توماربکەت، ھندەک پشتەڤانێن یانا ئەنترمیلان کریارێن رەگەز پەرستیێ دژی یاریزانێ ناپولی کولیبالی ئەنجام دا دیسان د کوشتنا پشتەڤانەکێ ژی پشتی یاریێ روودا.
ل دۆر ڤان رودانان راھێنەرێ ناپولی کارلو ئەنچلوتی دیارکر سێ جاران وان داخواز ژ دادڤانێ ڤێ یاریێ کر یاریێ رابگریت ژ بەر کریارێن رەگەز پەرستیێ دژی یاریزانێ وان کولیبالی لێ بێ مفا بوو لەورا ئەگەر ل یاریێن بھێت ئەڤ چەندە دوبارە بیت دێ یاریێ بجھـ ھێلێن ژبەرکو ئەڤ کریارە نە د بەرژەوەندیا تەپا پێ یا ئیتالیا دا نینە.
پشتی ب دووماھی ھاتنا ڤێ یاریێ ژی چار پشتەڤانان ژ دەرڤەی یاریگەھێ شەر کریە و تێدا ئێک ژ وان پشتەڤانان ھاتیە کوشتن ب لێدانا کێرێ لەورا پشتی ڤان رودانان سەروکێ پولیسێن باژێرێ میلان دیارکریە ئەو دێ چەند بریاران دژی پشتەڤانێن یانا ئەنترمیلان وەرگرن دێ وان چار پشتەڤانان دەستەسەر کەن دیسان ئێدی ریێ نادەن پشتەڤانێن یانا ئەنتر بەر ب یاریگەھێن دی بچن بۆ پشتەڤانیا یانا خوە دیسان دێ رێگریێ ل وان پشتەڤان ژی وەرگرن یێ، کریارێن رەگەزپەرستیێ دژی یاریزانێ ناپولی کولیبالی ئەنجام داین و ناچنە د یاریگەھا جوزێپی میاتزا دا.
ئەڤرۆ نیۆز ، رەمەزان ھەرنی:
موقەدەم کاروان زێوەر موفتی بەرپرسێ راگەھاندنا ھاتن و چوونا ئاکرێ د کونگرەکێ روژنامەڤانی دا رودانێن سالا ٢٠١٨ یێن قەزا ئاکرێ دیارکرن کو تێدا ٢٩روودانێن ترافیکێ دروستبۆینە و ٢٨ بریندارو ٥ کەسان گیان خوە ژ دەستداینە .
ناڤھاتی گوتژی : دسالا ٢٠١٨ ێ دا ٣٦٥٦ کەسان داخوازا مولەتا ھژووتنا ترومبێلێ کریە ژوانا ١٦٩٠ کەسا مولەتا گشتی و ١٢٤٥ کەسا موەلەتا تایبەت وەرگرتیە ل گەل ١٩٥ مولەت بۆ ئافرەتان وەرگرتیە دیسان ٤٢٩٢ کەسان داخوازا نووکرنا مولەتا ھاژوتنێ کریە.
ل دووماھیێ ئەو چەندە ژی ئاشکراکر ١٥ ھزار و ٢٧٢ سەرپێچی جودا ھاتینە تومارکرن و ٥٢٠ ترومبێل ھاتینە دەستە سەرکرن و ل گەل ٥٩ ماتور سکلان ل گەل رەوانەکرنا ٢٩٥ کەیسا بۆ دادگەھێ کو ٣٥ سنێلە بۆینە.
ئەڤرۆ نیوز:
شاھـ سەلمان بن عەبدولعەزیز شاھێ سعویێ ئەڤرۆ چەند گوھۆرین د وەزیرێن حوکمەتا وەلاتێ خوە دا کرن.
ژوان وەزیرێن ھاتینە گوھۆرین ب بریارا شاھێ سعودیێ، دانانا ئیبراھیم عەساف وەک وەزیرێ ژ دەرڤە ل شوونا عادل جوبەیر، دانانا عەبدولا بن بەندەر وەک وەزیرێ زێرەڤانێن نشتیمانی دیسان ترکی شبانە بۆ وەزیرێ راگەھاندنا سعودیێ.
وەزیرێ بەری نوکە یێ ژ دەرڤە عادل جوبەیر بۆ وەزیرێ کاروبارێن دەرڤە یێ وەلاتی.
ئەڤرۆ نیوز، عەزیز ھەورامی:
ئەڤرۆ ل رۆژا پێنجەشمبی ٢٧/١٢/٢٠١٨ د رێورەسەکێ تایبەت دا ل باژێرێ حەلەبچە ھژمارەکا خانیا ب سەر خێزانێن شەھیدێن پارتی ڤە ھاتنە بەلاڤ کرن.
د ڤی چارچوڤەی دا بەسام عەلی بەرپرسێ لقا ١٢ یا پارتی بۆ ئەڤرۆ نیوز گۆت: ئەڤرۆ ل باژێرێ حەلەبچە د چارچوڤێ بەلاڤ کرنا خانیان ل پرۆژێ گۆران ستی ل حەلەبچە ئەو شیان ٣٠ خانیان ل سەر خێزانێن شەھیدێن پارتی دا بەلاڤ بکەن.
ناڤھاتی ئەو چەندە ژی دیارکر بەری نوکە ئەوان ٦٠ خانی ل سەر خێزانێن شەھیدێن پارتی دا بەلاڤ کربوون لێ ئەڤرۆکە ئەو شیان د گەرا دویێ دا ٣٠ خانیان بدەنە وان کەسوکارێن شەھیدان و کومپانیا جێبەجێکار ژی سوز دایە زووترین دەم خانیێن دی ژی تمام بکەت ل قوناغا بھێت ل سەر ھژمارەکا دی یا شەھیدان بەلاڤ بکەت.
ئەڤرۆ نیوز:
ل سەلاحەدین ئەڤرۆ رۆژا پێنج شەمبی 27/12/2018 سەروک بارزانی پێشوازی ل سەروک وەزیرێن ڤاتیکان کاردینال پێترو پارولین و شاندێ دگەل دا کر، و د کومبوونەکێ دا بەحس ل فەرھەنگا پێکڤە ژیانێ و ئێکدو قەبوولکرنێ زێدەباری پەیوەندیێن ھەولێر و بەغدا و پرسا تیرورێ ھاتە کرن.
د دیدارەکێ دا سەروک وەزیرێن ڤاتیکان سلاڤ رێزێن تایبەت یێن قەداسەتا پاپایێ ڤاتیکان ب سەروک مەسعود بارزانی را گەھاندن، دیسان دەستخوشی ل سەروک بارزانی ھاتە کرن بۆ بزاڤێن وی یێن بەردەوام بۆ پێکئینانا حوکمەتا نوو یا ھەرێما کوردستانێ دیسان پاراستنا مەسیحیێن ل کوردستانێ و عیراقێ.
دووڤ دا سەروک وەزیرێن ڤاتیکان ئارمانجا سەرەدانا خوە بۆ ھەرێما کوردستانێ روون کر و راگەھاند ئەو دێ بزاڤێ کەن بارودوخێ ھەرێمێ و عیراقێ باشتر بکەن دیسان داخواز ژ سەروک بارزانی کر بارودوخێ ناوچەیێن نەینەوا و مووسل ژ لایێ ئەمن و ئاسایشێ ڤە باشتر بکەن داکو ئاوارەیێن ڤان دەڤەران ڤەگەرن.
د بەردەوامیا ئاخفتنا خوە دا سەروک وەزیرێن ڤاتیکان دلخوشیا خوە ھەمبەر پێکڤەژیان و ئیکدو قەبوولکرن و ئەمن و ئاسایشا ھەرێما کوردستانێ دیارکر دیسان دەستخوشی ل سەرو مەسعود بارزانی کر بەرامبەر رولێ وی بۆ باشترکرنا پەیوەندیێن ناڤبەرا ھەولێر و بەغدا و نەھێلانا کێشەیێن ناڤبەرا ھەردو لایان دا.
دەربارەی شەرێ تیرورستان ژی سەروک وەزیرێن ڤاتیکان ئاشکرا کر وی پێزانین ھەبووینە ل سەر وان قوربانیێن خەلکێ ھەرێما کوردستانێ داین د شەرێ ھەمبەر تیرورستان دا و خواست بەردەامی ب نەھێلانا ھزرا تیروری بھێتە کرن داکو بھێتە بنبرکرن.
ژلایێ خوە ڤە سەروک مەسعود بارزانی پێشوازیەکا گەرم ل سەروک وەزیرێن ڤاتیکان و شاندێ دگەل دا کر دیسان سوپاسیا قەداسەتا پاپایێ ڤاتیکان کر، پاشان ئاماژە ب فەرھەنگا پێکڤەژیانا خەلکێ ھەرێما کوردستانێ کر و راگەھاند، ل دەمێ ھێرشا تیرورستێن داعش خویشک برایێن مەسیحی ئاگەھدارکرینە ئەوان ژی ھەمان چارەنڤیسێ ھەڤپشک ھەیە د مرن و ژیانێ پێکڤە ھەیە.
سەروک بارزانی بەحس ل تاوانێن تیرورستێن داعش و قوربانیدانا خەلکێ کوردستانێ کر و ئەو چەندە ژی دیارکر پێدڤیە ل سەر کومەلگەھێ نیڤدەولەتی زێدەتر پشتەڤانیا خووشک و برایێن مەسیحی بکەت داکو ل وەلاتێ خوە بمینن ديسان داکو وەلاتێ خوە بجە نەھێلن.
سەروک بارزانی داخواز ژ کومەلگەھێ نیڤدەولەتی کر زێدەتر ھاریکاری و پشتەڤانیا ژین و ژیارا ھەموو پێکھاتەیان بکەت تایبەت ئاوارەیان، دیسان سەروک بارزانی ب شانازی ڤە بەحس ل فەرھەنگا پێکڤە ژیان و رێزگرتنا خەلکێ ھەرێما کوردستانێ بەرامبەر ئێکدو قەبوول کرن کر.
دەربارەی مەترسیا تیرورێ ژی ئاماژە دا وێ چەندێ کو ئەگەر وان ئەگەرێن پەیدابوونا تیرورێ چارەسەر نەکەن د ئایندەکێ نزیک دا دێ مەترسیەکا مەزنتر پەیداکەت.
ل دووماھیێ سەروک بارزانی ئاماژە دا پەیوەندیێن ناڤبەرا ھەولێر و بەغدا دا و دیارکر ھەردەم ئەو دگەل زمانێ دیالوگێ نە بۆ چارەسەریا کێشەیان و نوکە مژوولی چارەسەریا ڤان کێشەیانین و سەروک وەزیرێن عیراقێ عادل عەبدولمەھدی پشتەڤانیا خوە دیارکریە بۆ چارەسەریا ھەموو کێشەیان و باشترکرنا ژیانا خەلکی.
ئەڤرۆ نیوز:
محەمەد سەلاح ستێرا مسری و یانا لیڤەرپول ل وەرزێ ئەڤ سالە دەستپێکەکا لاواز تومارکر ل گەل یانا خوە تایبەت دخولا ئنگلتەرا دا کو ل ١٤ یاریێن دەستپێکێ ژ خۆلا ئنگلتەرا یاریزانێ ناڤبری ھەشت گول بتنێ تومارکر بوون لێ ل شەش یاریێن ڤێ دووماھیێ ل دیڤ ئێک ناڤبری شەش گول و ل گەل سێ ئەسیست تومارکرن کو پێنچ گول و سێ ئەسیست دخۆلا ئنگلتەرا دا بوون و گولەک د قارەمانیا چامپیونیز لیگ دا بوو.
ھەژی گوتنێ یە محەمەد سەلاح ل وەرزێ ئەڤ سالە ٢٦ یاریی بۆ لیڤەرپول کرینە د ھەموو قارەمانیێن یانا وی تێدا پشکدار و شیا ١٥ گولان توماربکەت کو سێ د قارەمانیا چامپیونیز لیگ دا و ١٢ گول دخۆلا ئنگلتەرا دا و ل وەرزێ بوری ٥٢ یاریان دا پشکداری ل گەل یانا لیڤەرپول کر و شیا ٤٤ گولان د ھەموو ئەوان قارەمانیێن لیڤەرپول تێدا پشکدار توماربکەت کو ٣٢ گول دخۆلا ئنگلتەرا دا و ١٠ گول د چامپیونیز لیگ بوون.
ئەڤرۆ نیۆز، قائید میرۆ:
سکرتێرا ئێکەتیا ئافرەتێن کوردستانێ ئاشکرا کر، تنێ د ئەڤسالە دا نێزیکی ٣٠٠ ئاریشەیێن ژنان ل پەیمانگەھا خێزانی یێن سەر ب ئێکەتیا ئافرەتێن کوردستانێ ھەنە و دبێژیت، ھندەک ژوان دھێنە ھنارتن بۆ دادگەھێ.
زێدەتر دکتۆرا ڤیان سلێمان، سکرتێرا ئێکەتیا ئافرەتێن کوردستانێ بۆ ئەڤرۆ نیۆز دیارکر” تنێ د ئەڤسالە دا ٢٠١٨ێ نێزیکی ٣٠٠ کەیسێن ژنان ل ئێکەتیا ئافرەتێن کوردستانێ ھەنە و ئەڤان ژنێن ئاریشە ھەی سەرەدانامە کریە بۆ چارەسەرکرنا ئاریشەیێن وان، مە پەیمانگەھەکا تایبەت بۆ پرسێن جڤاکی و خێزانێ ھەنە و بەردەوامژی کار دکەین بۆ دو مەرەما ئێک ئاریشە بھێنە چارەسەکرن و یا دوێی ژی رێژا توندوتیژیێ بھێتە کێمکرن.
دکتۆرا ڤیان سلێمان ئاماژەکر” ئەف کەیسێن ژنان یێن ل ئێکەتیا ئافرەتان ھەین ب رێیا کەسێن بسپۆر و سکرتاریەتێ دھێنە چارەسەرکرن، لێ یێن نەھێنە چارەسەرکرن ب رێیا پارێزەرێن مە دھێنە ھنارتن بۆ دادگەھێ، ئەڤێن پێدڤی ب رێڤەبەرایەتیا توندوتیژیێ ھەبیت دھێنە رەوانەکرن و ھەر ئێک ب شێوازێ خوە دھێتە چارەسەرکرن، چونکە ھندەک ئاریشە ھەنە ب ساناھی دھێنە چارەسەرکرن و یێن دژوار ژی دھێنە ھنارتن بۆ دادگەھێ.
نيشاندان