ئەڤرۆ نیۆز، ئەمیر ئەترووشی:

ڤەکۆلەرەکێ ئێزدی دیار کر، ژ دەستپێکا شەرێ داعش و ھاتنا حەشدا شەعبی و ھەتا نھا، ٢٥٩٦ زارۆ ئێتیم و سێوی بووینە و ھندەک ژی وان بێ باب ماینە و ھندەک بێ دایک و ھندەک ژی بێ دایکوباب ھەردو ماینە.

ڤەکۆلەرێ ئێزدی داوود موراد خەتاری بۆ ئەڤرۆ نیۆز راگەھاند، ژ سالا ٢٠١٤ و ھەتا نھا ھژمارەکا مەزن یا زارۆیێن ئێزدی تووشی دەربەدەریێ و مالوێرانیێ بووینە و زیانا مەزن یا ئێزدیان ب بەر زارۆان کەفتیە و گۆت: ھەتا نوکە ٣٧٢ زارۆ بێ دایک و باب ھەردوو ماینە، ھەروەسا ١٧٨٨ زارۆ بێ باب ماینە و نھا ب تنێ ل گەل دایکا خۆ دژین، دیسا ژی ٤٣٦ زارۆ ماینە بێ دایک و نھا ب تنێ ل گەل بابێ خۆ دژین.

رێکخراوا یونیسف ژی ل عیراقێ د دووماھی ئامارا خوە یا سالانە دا ئاشکرا کریە کو ھەتا نھا ژ ئەنجامێ شەری و ململانەیان و نەبوونا وەبەرھێنانێ، د ماوێ چار سالێن بوری و ھەژاریێ دا، نێزیکی چار ملیۆن زارۆیێن عێراقێ پێدڤی ب پشتەڤانیێ و خزمەتکاریێن بلەز ھەیە ل ھەموو دەڤەرێن عێراقێ.

ھەروەسا ئاماژە دایە ھندێ کو ملیۆنەک و ٣٠٠ ھزار زارۆ دناڤا دۆ ملیۆن و ٦٠٠ ھزار ملیۆن ئاوارەیان دا ھەنە، ئانکو نیڤا رێژەیا ئاواران زارۆن کو ژ ئەنجامێ شەری ل دەڤەرێن جۆدا ئاوارە بووینە.

ئەڤرۆ نیوز، بارزان مزووری:

بەیار حازم سەرپەرشتێ بنگەھێن دەنگدانێ ل شێخان سەر ب کومسیونا بالا یا ھەلبژارتنان تایێ مووسل بۆ ئەڤرۆ نیوز ئاشکرا کر کو کومسیونا بالا یا ھەلبژارتنان ل عێراقێ ئەم ئاگەھدار کرینە ب نڤیسارەکا فەرمی کو ئەو کەسێن بایومەتری ئەنجام نەدابیت پێدڤیە ل دەستپێکا سالا نوو سەرەدانا بنگەھێن دەنگدانێ بکەت ئەو بنگەھێن ناڤێ وی لێ بیت بایومەتری ئەنجام فدەت، کارتا خوە یا دەنگدانێ وەرگریت ژ بەر کو بریار ھاتیە دان کو ھەر کەسێ بایومەتری ئەنجام نەدەت ماف نامینیت بۆ دەنگدانێ ئەڤە دووماھیک دەلیڤەیە بۆ وان کەسان، ل شێخان بنگەە ھاتیە ڤەکرن ھەر ژ سپێدێ هەتا ئێڤاری دێ دەوام لێ ھێتە کرن بۆ ئەنجامدانا بایومەتری.

ناڤھاتی خویا کر کو  ئەو کەسێن ئاوارە سەرەدانا وان بنگەھێن خوە بکەن یێن جھێ لێ ئاوارەبووین ھەر ئێک بۆ دەڤەرا خوە  یێن کەمپان ژی دێ بنگەھێن دەنگدانێ ھێن ڤەکرن بۆ وان.

بەیار حازم گوتژی ٩٠%  خەلکی بایومەتری ئەنجام نەدابوو بەری نھا ب تنێ ١٠% ئەنجام دابوون، ئەو کەسێن بایومەتری ئەنجام دایی وان ژی ئاگەھدار دکەین کو بھێن و کارتا خوە یا نوو وەرگرن.

ئەڤرۆ نیوز، بارزان مزووری:

ئەسعەد محیەدین، رێڤەبەرێ پەروەردا شێخان بۆ ئەڤرۆ نیوز دیارکر ژ سەرجەمێ ١٣ سەرپەرشتیاران ل پەروەردەیا شێخان تنێ ئێک مایە و یێن دی ھاتینە ڤەگوھاستن و نوکە ڤالاتی د پەروەردێ دا پەیدابوویە.

ناڤھاتی خویاکر کو ژوان ١٣ سەرپەرشتیارێن مە پێنج بۆ پەروەردا دھوک و شەش بۆ پەروەردا ئاکرێ ئێک بۆ پەروەردا شەنگال ھاتنە ڤەگوھاستن و تنێ ئێک سەرپەرشتیار بو پەروەردا شێخان مایە ژبەرکو دەمێ مە داخاز سەرپەرشتیارا کری مە وەکو پێدڤی پێ نەبون لێ د نھا دا پتریا سەرپەرشتیارێن مە ھاتنە خانەنشینکرن جھێ وان ڤالایەک کەفتە تێدا لەوما نھا ئەم پێدڤی ب سەرپەرشتیارێن باخچێ زاروکا و بابەتێ کوردی و بیرکاری و زانست ھەیە.

ئەڤرۆ نیوز، لەزگین جوقی:

نوونەری مەسیحیان ل جڤاتا قەزا شنگال بۆ ئەڤرۆ نیوز دیارکر نوکە ب رێژا ٣٠% مەسیحین ئاکنجین قەزا شنگال یێن چووینە دەرڤەی وەلاتی بتایبەتی ژی یێن چووینە وەلاتی کەندا و ئوسترالیا.

عیسا شەمعون، نوونەری مەسیحیان ل جڤاتا قەزا شنگال دیارکر کو ھەتا ٣٠٠ کەسێن مەسیحی ل شنگال دژیان بەری جینوسایدا ل شنگال رووبدەت ھەتا نوکە ئەڤ ھژمارا کەسێن مەسیحی نەشیاینە جارەکا دی بزڤرنە شنگال ژ بەرکو ٥٢ مالێن مەسیحیان ل شنگال ھەبوون ھەموو خانیێن وان یێن ھاتینە پەقاندن وسووتن ھەتا نوکە ژی بەغدا ھەڤکاری نەکریە بۆ چێکرنا خانیێن شنگال رەوشا شنگال ژی ھاریکار نینە خەلک ڤەگەرن ئەڤە نێزیکی پێنچ سالانە ئاوارێن مەسیحی یێن خەلکێ شنگال دناڤ خانیێن گرێدانە و ھەیڤانە گریا خانیان ددەن.

ناڤھاتی ئەو ژی خۆیاکر کو ل سەردەمێ جینوسای دا شنگال چار کەسێن مەسیحیی ھاتنە بێ سەروشین کرن ھەتا نوکە تنێ تەرمێ کەسەکی ژوان د ناڤ کەنیسەکێ دا ھاتینە دیتن ئەو ژی ناسنامە وی دگەل دا بوو لەورا ھاتیە ناسکرن ھەر سێ کەسێن دی ھەتا نوکە دبێ سەروشینن وچارەنڤیسی وان دیار نینە.