زاخۆ ، عەلی حاجی:

بۆ ماوەیەکە باژێرڤانیا زاخۆ ل دەروازا باژێرێ کار سەر چێکرنا شوستەیان بۆ ھاتن و چوونا ھاولاتیان دکەت و قوناغێن کارێ چێکرنا وان شوستەیان بەر ب قوناغا دوماھیێ ڤە دچیت .

ل دۆر ڤی بابەتی ئەندازیارێ پروژەی ماھر ئەحمەد بۆ ئەڤرو نیوز گۆت : ب درێژاھیا ٢٠٠٠ مترا و فرەھیا ٤ متران ل ھەردو ئالیێن جادا دەروازا زاخۆ مە شوستەیەک ژ زاخۆ ھەتا ھەپی پارک بۆ وەلاتیێن زاخۆ دروست کری یە و نھا ل قوناغا بویاغکرنێ دایە و ھەر دیسان ژی ل سەر وان شوستەیان مە کورسیکێن بھێن ڤەدانێ ژی داناینە .

ناڤبری ل دووماھیێ گۆت: ل دەمەکێ نێزیک روناھی بۆ وان شوستەیان ژی ھێتە دانان داکو سیمایەکێ جوانتر ژی بھێتە دانان و ھەر ژ تونێلا زاخۆ ھەتا دگەھیتە دەروازا زاخۆ دێ دار ھێنە چاندن داکو جوانیەکا دیتر بدەتە دەروازا باژێرێ زاخۆ و ئەڤ کارە راستەوخو ژلایێ سەروکاتیا باژێرڤانیا زاخۆ ھاتیە ئەنجام دان.

ئەڤرۆ نیوز، نەوزاد ھلۆری:

پشتی چەند روژێن بوری ژ ئەگەرێ بارینا بارانێن زور و دروستبوونا لەھیان ھەند جھێن لوفێن جادا زرێزە ل سنوورێ ناحیا باتیفا خراپ بوینە، د نوکە دا بوو یە کێشا ھاتن و چوونێ بۆ شوفێرا. ئەندازیارەکێ ڤەدیتنان ل رێڤەبەریا رێک و پرا ل پارێزگەھا دھۆکێ دیارکر کو پێدڤی یە جاددە بھێتە ڤەگوھاستن نەک نوژەنکرن.

زێدەتر عسمەت مایی، ئەندازیار ل رێڤەبەریا رێک و پرا ل پارێزگەھا دھۆکێ بۆ ئەڤرۆ نیوز گۆت:چەند روژێن بوری ژ ئەگەرێ لەھیان چەند جھەکێن لوفێن زریزە ل سنوورێ ناحیا باتیفا تێکچویە، ژبەرکو ئەو چیایێ دکەڤیتە لوفێن زریزە ژ سەری ھەتا بنی ھەموو ئاخ و کوراتیە، ھەردەما دبیتە باران و بەفر ئەو ئاخ ل چیایی دھێتەخوارێ و دبیتە ئەگەرا شکەستنا جادێ.

زێدەتر گۆت: ب چوو شێوەیان سەخبێرکرنا لوفێن زریزە نابیتە ئەگەرێ دوماھی ھاتنا کێشا لوفێن وێ جاددێ، چونکی پێشتر ژی چەند جارا جاددە خراب بویە و دووبارە ھاتیە نوژەنکرن و جارەکا دن خراپ بویەڤە، خەلک و شوفێر وەسا ھزر دکەن کو باش ناھێتە سەخبێرکرن بەلێ د راستی دا وەسا نینە، بەلکو ئەگەر ھەموو ئەوە کو ژ ئەگەرێ بارانان ئاخ د خشیێت.

ناڤبری دیارکر ژی کو پێدڤی یە ل شوونا سەخبێریکرنا جاددێ، جاددە بخوە بھێتە ڤەگوھاستن و زێدەتر گۆت: ڤەگوھاستنا جادێ دنوکە دا ب زەحمەتە و پێدڤی ب پارەکێ زورە، دنوکە دا تنێ چارەسەریێن دەمکی بو ھاتنووچۆنا ترومبێلان دھێتەکرن، ئەم دخوازین کو جاددە بھێتە ڤەگوھاستن و چارەسەریا بنبر بو بھێتەکرن نەک دەمکی.

زرێزە پێکدھێت ژ جاددەکا چیایی و ١٣ لوفە تێدا ھەنە، چەندین جاران ژ ئەگەرێ بارینا بارانان و دروستبوونا لەھیان لوفێن زریزە ل چەند جھەکان تێکچویە و دووبارە ھاتیە سەخبێرکرن.