ئه‌ڤرۆ، عه‌زيز هه‌ورامى:
پشتی روودانێن 16 ئۆکتۆبەرێ گرۆپەکێ ناڤا ئێکەتیێ ب ھەڤکاریا حەشدا شەعبی، رۆژانە 500 ھەزار ڕوانەی وەلاتێ ئیرانێ دھێنە کرن، چ بڕە پارەک بۆ خەلکێ کەرکووک ناھێتە مەزاختن، و نا چیتە ناڤا داھاتێ سندۆقا گشتیی یا عیراقێ ژی.
سەید حەسەن شێخانێ بەرپرسێ مەلبەندێ بزاڤا ئیسلامی ل گەرکووکێ، سەبارەت وێ پەترۆلا دھێتە ڕەوانەکرن بۆ ئیرانێ بتایبەتی بۆ رۆژناما ئەڤرۆ راگەھاند، ل گۆڕ پێزانینێن لبەر دەستێن مە ھەی رۆژانە نێزیکی (400 ھەتا 500) ھەزار بەرمیلێن پەترۆلا باژێرێ کەرکووکێ بۆ وەلاتێ ئیرانێ ب رێیا تانکەرێن بارھلگرێن پەترۆلێ دھێنە ڕوانەکرن.
بەلێ سەید حەسەن شێخانێ ئاشکراکر، پشتی وێ دۆرپێچا نوکە ئەمریکا ئێخستیە ل سەر وەلاتێ ئیرانێ، نوکە ھنارتنا پەترۆلێ بۆ ئیرانێ ژ کەرکووک ھاتیە راگرتن، نوکە حوکمەتا عیراقێ ب ھەماھنگیا حوکمەتا ھەرێما کوردستانێ ب نیازن ب رێیا وەلاتێ تورکیا و ل بەندەرێ جیھان پەترۆلا کەرکووک ب دەرڤەی وەلاتێ بھێتە ھنارتن، دیارە ئەڤە ژی بۆ ھەرێما کوردستانێ دێ دەستکەفتەکێ باش بیت.
بەرپرسێ مەلبەندێ بزاڤا ئیسلامێ گۆت: ل گۆڕ پێزانینێن بەر دەستێن مە و ل گۆڕ وان ئاماژێن بەرپرسێن حوکمەتا عیراقێ داین، داھاتێ پەترۆلا کەرکووک ھەتا وێ دەمژمێرا ھاتیە ڕاگرتن نە چوویە ناڤا سندۆق و خزینا عیراقێ، داھاتی پەترۆلا حوکمەتا عیراقێ و وەزارەتا پەترۆلا عیراقێ بیێ ئاگەھیا خوە دیار کرن، ھەڤدەم راگەھاندیە مووچێ فەرمانبەران و ھندەک پرۆژان سەرەرای کێم وکاسیان ژی دھێنە مەزاختن، بۆ نموونە زبل و کلێشێ سەر جادێن کەرکووکێ تژی بوویە ب تایبەتی دەڤەرێن کورد لێ ئاکنجی..
سەید حەسەن شێخانی ھەروەسا گۆت: پشتی روودانێن 16 ئۆکتۆبەرێ پارێزگارێ عەرەب (راکان جبوری) ب وەکالەت ھەموو بزاڤان دکەت، ب کەساتیا خوەیا شۆفینی ناسناما پارێزگەھا کەرکووکێ یا کوردی نەھێلیتن، بۆ نموونە چەندین بڕیار داینە ژ ئالیێ حوکمەتا عیراقێ ڤە، وان ئەردێن کێشە ل سەر ھەی کو بەری نوکە ئەو ئەرد دادگەھا عیراقێ بۆ کوردان ئێکلا کربوون، پشتی 16 ئۆکتۆبەرێ پارێزگارێ ھاتیە سەپاندن، بکارێ ئینانا وان عەرەبێن کو پشتەڤانیا رژێما بەعسا گۆڕبگۆڕ دکرن، ئیناینە سەر وان ئەردێن داگیرکری و ھێدی ھێدی ھێرشان دکەنە خێزانێن کوردان ل باژێرێن (داقوق ) و دەوربەرێن وێ بۆ ھندێ کوردان ژ جھێن گوندێن وان دەربێخن و بۆ عەربان چوول بکەن.
ل دووماھیێ سەید حەسەن گۆت: ئەم داخوازێ ژ ئەندام جڤاتا پەرلەمانێن عیراقێ یێن کورد ب دژی وان بڕیارێن شوفینی یێن ڕاکان جبوری راوەستن، و ھەموو ئەو بڕیارێن پشتی 16 ئۆکتۆبەرێ بھێنە ھەلوەشاندن رەوشا دەڤەرێ ژی بھێتە ئاسایکرن، ھەموو جھێن ناکوکی ل سەر ب دەستھەلاتەکا ھەڤپشک بھێنە برێڤەبرن و ئالایێ کوردستانێ کو ھێمایێ دوێ یێ پێکھاتا مللەتێن عیراقێ یە ل کەرکووک بھێتە بلند کرن.
نيشاندان
