ئه‌ڤرۆ نيوز:
رێڤەبەریا گشتیا کەشناسی و بیڤەلەرزێ ل ھەرێما کوردستانێ راگەھاند کو سوبەھی رۆژا چارشه‌مبى رێکەفتی 7ی چريا دويێ 2018ێ ئه‌سمان دێ ئه‌وره‌كێ ناڤه‌ندى بيت و ل ده‌ڤه‌رێن چيايى دێ بارانه‌كا هۆر ل ده‌م و جهێن جودا باريت.
پشکا پێشبینیان ل رێڤەبەریا گشتیا کەشناسی و بیڤەلەرزێ ل ھەرێما کوردستانێ د نڤیسارەکێ دا کو دانەک بۆ ئەڤرۆ نیوز رەوانە کرینە راگەھاند کو دھێتە پێشبینیکرن ئه‌سمان دێ ئه‌وره‌كێ ناڤه‌ندى بيت و ل ده‌ڤه‌رێن چيايى دێ بارانه‌كا هۆر ل ده‌م و جهێن جودا باريت.
پشکا پێشبینیان دایە زایە زانین کو دێ ئله‌زاتيا بايى د ناڤبەرا 5 ھەتا 10کم دا و ماوێ دیتنێ ژی دێ د ناڤبه‌را 9 بۆ 10 دا بیت، پلێن گەرمێ ژی دێ د ناڤبەرا 12 بۆ 16 پلان دا بن.
ئه‌ڤرۆ نيوز:
رێڤەبەرێ حەج و عومرێ ل پارێزگەھا دھۆکێ ئاشکرا کر، بۆ وەرزێ ئەڤ سالە بھایێ چوونا عومرێ ل ھەمبەر سالێن بۆری نێزیکی 355 ئەرزان بوویە.
شێخ شەمسەدین تاھر شووشی، رێڤەبەرێ حەج و عومرێ ل پارێزگەھا دھۆکێ بۆ رۆژناما ئەڤرۆ گۆت: “ئەڤ سالە چوونا عومرێ بۆ ھەر کەسەکی ژ 900 دۆلاران بۆ 650 دۆلاران ھاتیە کێمکرن، ھەتا نوکە سێ گەر ژ پارێزگەھا دھۆکێ چووینە عومرێ کو دو ژ وان ژ سەنتەرێ دھۆکێ چووینە و ئێک ژی ل قەزا ئاکرێ چوویە”.
ناڤبری گۆتژی: “ئەڤ سالە بەری دەستپێکرنا وەرزێ چوونا عومرێ مە کۆمبوونەک ل گەل کۆمپانیێن چوونا عومرێ کر و ھەڤبەرکرنەک ل گەل کۆمپانیێن ھەولێَر و سلێمانیێ ھاتەکرن، پرۆگرام ئەرزان بوویە، ژ بەرکو دو فڕۆکێن سعوودیێ ھاتینە د ھێلێ دا، لەو عیراق ژی نەچاربوو بھایێ چوونا عومرێ بینیتە خوار، 65 دۆلار ژ پێلتێ ئینانە خوار، 385 دۆلار بۆ چوون و ھاتنا ھەر کەسەکی، دیسا فڕۆکێن سعودی 430 بۆ 450 دۆلارانە، ئەڤ سالە عومرە ل پارێزگەھا دھۆکێ ژ 650 دۆلاران ھەتا 750 دۆلارانە ژ ھەموویان پتر 800 دۆلارن”.
شەمسدین تاھر خویا کر، کرێیا چوونا عومرێ ئەڤ سالە ئەرزانبوویە، د ناڤبەرا 650 دۆلاران ھەتا 800 دۆلاران دایە کو سالا بۆری ب 9250 دۆلاران بوو، ئەڤ پارە وەلاتی ددەن بۆ ھاتنوچوونێ ب فڕۆکێ، ل گەل ڤیزێ و ئۆتێل و چوونا جھێن ئاینی یە، ب تنێ وەلاتی دێ خوارنا خوە دابین کەت و گۆت: “چوونا عومرێ سال بۆ سالێ بەر ب کێمبوونێ ڤە دچیت، سالا 2015 ئەوێن ژ دھۆکێ چووینە عومرێ پێنج ھزار و 655 وەلاتی بوون، ل سالا 2016 بوونە سێ ھزار و 326 و ل سالا 2017 بوونە چار ھزار و 87 کەس، لێ کێمبوون و زێدەبوون دێ ل سەر رەوشا ئابووری یا کوردستانێ و مووچان راوەستیت”.
شێخ شەمسەدین گۆت: “ئەگەرێ کێمبوونا وەلاتیان بۆ چوونا عومرێ بۆ بڕیارێن وەلاتێ سعوودیێ ڤەدگەڕیت، پێشتر خەلک ھەبوو سالێ دو جاران دچوو عومرێ، نوکە سعوودیێ بڕیار دایە ھەر کەسەکێ د سێ سالان دا دو جاران بچیتە عومرێ، دڤێت دو ھزار ریالێن سعوودی سزادانا خوە بدەت کو دبنە 560 دۆلار و ئەڤە بوویە رێگر خەلک کێم بچیتە عومری”.
گۆتژی: “ھەر کەسەکێ رێڤەبەریا عومرێ دیار کر کو دێ چیتە عومرێ، ھەکە فەرمانبەر بیت دەستووردان بۆ دھێتەدان، داخوازێ ژ وەلاتیان دکەم ھەر کۆمپانیەکا سەرپێچیەکێ بکەت، مە ئاگەھدار بکەن و دێ دووڤچوونێ کەین و مە سزادان ژی بۆ سەرپێچیکاران ھەنە”
پێدڤیە ھەرێما کوردستانێ بەلانسێ پەیوەندیێن خوە ل گەل ھەموو وەلاتێن جیھانێ بتایبەتی وەلاتێ ئیرانێ راگریت
ئه‌ڤرۆ نيوز:
شارەزایەکا پەیوەندیێن نێڤدەولی ئاشکراکر، گەڕا دویێ یا سزایێن ئەمریکا بۆسەر کۆمارا ئیسلامیا ئیرانێ دێ کارتێکرنێ ل سەر ھەرێما کوردستانێ ژی ھەبن، بەلێ بوی شێوەی نابیت وەک خەلکەک ھزر دکەت و دیارکر، بکارئینانا رێکێن دی دێ زیان ھەبیت ژبەرکو ئینانا کەلو پەلان ل وەلاتێن دی بھایێ وان دێ گرانتر لسەر خەلکی مە کەڤیت.
ئاشنا بابان، مامۆستایا زانکۆیێ و شارەزا کاروبارێن نێڤدەولەتی بۆ رۆژناما ئەڤرۆ گۆت: نێزیکترین وڵات کو ھەڤسینورە ل گەل ھەرێما کوردستانێ کۆمارا ئیسلامیا ئیرانێ یە و ژلایێ نێڤدەولەتی دانا سزایان ل سەر ھەر وەلاتی کاریگەری ل سەر وەلاتێن جیران ھەیە، زۆربەیا کەلو پەلێن دھێنە ناڤا ھەرێما کوردستانێ بەرھەمێ ئیرانیە و بازاڕێن ھەرێما کوردستانێ یێ تژیە ل بەرھەمێن ئیرانی ئەڤە ناھێتە ڤەشارتن، دەمێ سزا دھێنە دانان ل سەر ئیرانێ دێ بەھرا خوە کاریگەری ل سەر لڤینێن بازرگانی د ناڤبەرا ھەرێما کوردستانێ و ئیرانێ دا ھەبن، لەوڕا ژی سزایێن ئیرانێ دێ خەلکێ کوردستانی ژی ڤەگریت، بەلێ وەک دبێژن ھندی خوە و ب قەبارەیەکێ دیاری کری، چونکە ھەرێمێ چو سینورێن ئاڤی ل گەل جیھانا دەرڤە نینە، ژبلی رێکێن ئەردی و ھشکانی ل گەل وەلاتێن جیران مینا ئیران و تورکیا و سووریا، بەلێ زۆرترین سینورێ مە ل گەل ئیرانێ یە.
ل دۆر رێکێن بەدیل بۆ لڤینێن بازرگانی ئەڤێ مامۆستایا زانکۆیێ دیارکر” راستە رێکێن دی ھەنە بازرگانێن ھەرێما کوردستانێ بکاربینن بمەرەما ئینانا کەلوپەلان ژ دەرڤە، بەلێ خویایە ھەر رێیەکادی ھەبیت دێ زێدەتر بیتە بارگرانی بۆسەر وەلاتیان، چونکە کریەکا زێدەتر دھێتە وەرگرتن و گەھشتن ب ساناھی نابیت وەک ل ئیرانێ دھات، ژلایەکێ دیڤە دراڤێ ئیرانێ ئەرزانترە ل دراڤێ عێراقی و دۆلاری ئەڤێ چەندێ ژی کاریگەریێن خوە ھەبوون، بۆ نموونە نوکە بەحس دھێتەکرن ل وەلاتێ سعودیێ کەلو پەل بھێنە ئینان بۆ ھەرێمێ، بەلێ بھایێ دراڤی سعودی بلندترە ل تومەنێ ئیرانی و ب گرانتر کەلو پەل دھێنە کڕین ئەڤە ژبلی رێیەکا دوورتر دھێتە بکارئینان و کرێژی دێ چیتە سەر، ھندی ل ئیرانێ بو دراڤێ ئیرانێ یێ ئەرزانبو کریا ڤەگوھاستنێ ژی زۆر ئەرزانترە.
ئاشنا بابان گۆت” پێدڤیە ھەرێما کوردستانێ بەلانسێ پەیوەندیێن خوە راگریت ل گەل ھەموو وەلاتێن جیھانێ، بتایبەتی وەلاتەکێ جیران وەکی ئیرانێ، واتە جورەکێ پەیوەندیان دگەل ھەموو وەلاتان ھەبیت بۆ مفا وەرگرتن ل ھەموو بیاڤاندا، نابیت ئەم ھند رەشبین بەرێ خوە بدەین سزایێن ئەمریکا بۆسەر ئیرانێ، چونکە مەژی ھندەک بەرھەمێ نافخۆ ھەیە و بڤی شێوەی کاریگەری نابیت وەکی خەلکەک ھزر دکەت، راستە دێ زیان ھەبن، بەلێ لەوانەیە زۆرژی پێڤە دیارنابیت، چونکە بیرامە نەچیت ددەمێ خەلکێ کوردستانێ ریفڕاندۆم ئەنجامدای ئیرانێ خالێن سینوری ل سەر ھەرێما کوردستانێ گرتن، چو کاریگەریێن زۆر خراپژی نەبوون لسەر مە، ڤێجارێ ژی کو ئەمریکا دێ سزایێن نوو دانیت سەر ئیرانێ مەرج نینە زیانێن زێدەتر بۆمە بھێن، دشێم بێژم بەھرا خوە دێ زیان ھەبن و نەزێدەتر، ئێک ژوان زیانان وەلاتیێن ئیرانێ دێ بۆ کارکرنێ بھێنە ھەرێما کوردستانێ و پارێ مە بۆ کەس و کارێن ھنێرن ئیرانێ، ژبەرکو بھایێ پارێ عیراقی و دۆلار ھەمبەر دراڤێ ئیرانێ زۆر دکەت.
ئه‌ڤرۆنیوز:
ئاژانسه‌كا روسى یا ده‌نگوباسن ل دووڤ بۆچوونا هژماره‌كا بنگه‌هێن ستراتیژى وشاره‌زایان وان جهان ئاشكرا دكه‌ت یێن كو دێ شه‌رێ جیهانى یێ سیێ تێدا رووده‌ت.
ئاژانسا سپۆتنیك یا روسى ئه‌ڤرۆ دوشه‌مبى 5/11/2018 راپۆرته‌ك به‌لاڤكر وتێدا به‌حسێ وان سیناریۆیان دكه‌ت كو پێشبینیا شه‌رێ جیهانى یێ سیێ دكه‌ن. ئێك ژوان سیناریۆیان ئه‌وه روسیات دێ هێرشێ كه‌ته سه‌ر وه‌لاتێن به‌لتیك ول وێرێ دێ هێرش ب به‌ر هێزێن قۆلپا ناتۆى كه‌ڤیت و دئه‌نجامدا دێ شه‌ر هه‌لبیت.
ئێك ژ پێشبینیان به‌حسێ وێ چه‌ندێ دكه‌ت كو ئه‌گه‌رێ هه‌ى شه‌رێ جیهانى یێ سیێ دناڤبه‌را ئه‌مریكا وكوریا باكوور بیت، به‌لێ ل دووڤ سیناریۆیه‌كا دى ئه‌گه‌ره‌كێ زۆر یێ هه‌ى ل سووریێ شه‌رێ جیهانى یێ سیێ روو بده‌ت، ده‌مێ ململانێ دناڤبه‌را ئه‌مریكا وروسیا ل ڤى وه‌لاتى زێده‌تر بیت وشه‌ر دناڤبه‌را واندا په‌یدا ببیت.
ئاژتنسا سپۆتینك یا روسى دبه‌رچاڤكرنا ڤان پێشبینیان دا پشت به‌ستن ب چه‌ندین شرۆڤه‌كار وبنگه‌هێن ڤه‌كۆلینێن له‌شكرى كریه، كو هنده‌ك ژوان پێشبینیا وێ چه‌ندێ دكه‌ن شه‌رێ جیهانى یێ سیێ دناڤبه‌را هندستانێ وپاكستانێ دا ده‌ستپێبكه‌ت وهنده‌كێن دى ژى دبێژن دێ دناڤبه‌را چینێ ویابانێ دا سه‌رهلده‌ت.
ئه‌ڤرۆ نیوز، نه‌وزاد هلۆرى:
نێزیكێ دو سالایه گه‌نجه‌كێ گوندێ (به‌رێ كه‌ر) ب ناڤێ ئاشتى ئیسلام ل رۆژئاڤا قه‌زا ئامێدیێ و ل سه‌ر جادا گشتى ب رێیا فرۆتنا كه‌لوپه‌لێن كورده‌وارى كه‌لتور و فولكلورێ كوردى بۆ گه‌شتیارێن ناڤخوه و بیانى دده‌ته نیاسین، ژبلى كه‌لوپه‌لێن كوردى دهه‌مان ده‌م دا رێژه‌یه‌كا زۆر یا كه‌رستێن چیایى و كورده‌وارى ژى دفرۆشیت وه‌كو كه‌شك، به‌رى ، گوهیشك ، ته‌حین و كه‌تكێن هژیران و چه‌ندین جۆره كه‌رستێن دى.
ئاشتى، بو ئه‌ڤرۆ نیوز گۆت: (ئه‌ڤه نێزیكێ دو سالایه من كافیه‌كا كه‌لتورى و فولكلورى ل سه‌ر رێیا گشتى دناڤبه‌را كومه‌لگه‌ها قه‌دش و ئامێدیێ ل گوندێ خوه ڤه‌كریه و گه‌شتیارێن ناڤخوه و بیانى و عه‌ره‌ب زۆر قه‌ستا من دكه‌ن هنده‌ك بۆ كرینا كه‌لوپه‌لان وهنده‌ك ژى بۆ گرتنا وێنێن دیمه‌نێن ناڤا كافیا كه‌لتوورى، چونكى من ب ستایله‌كێ جوان و سه‌رنجراكێش و كورده‌وارى دروستكریه و سه‌رێ كافیێ كریه كاریته و بنێ وێ ژى ئاخه داكو هه‌ر ل سه‌ر ره‌نگێ كورده‌وارى بیت و ب كه‌لوپه‌ل و مافورێن كورده‌وارى و ده‌ستى رائێخستیه و هه‌تا كورسى و مێز ژى ل سه‌ر ره‌نگێ كه‌لتورى هاتینه چێكرن).
زێده‌تر گۆت: (مه‌ره‌ما من ل ڤێ كافیێ پتر فرۆتنا تشتان نینه، به‌لكو من دڤێت پشكداریێ د به‌لاڤكرن و ناساندنا كه‌لتورێ كوردى بۆ گه‌شتیار و خه‌لكى بكه‌م، من ل به‌ره ل سالێن بهێت به‌رفره‌هتر و جوانتر درۆست بكه‌م و زێده‌تر كه‌لوپه‌لان بینم دناڤدا).
كافیا كه‌لتورى یا گوندى زێده‌بارى كو جهه‌كێ تایبه‌ته ب كه‌لوپه‌لێن كوردوارى، دهه‌مان ده‌م دا بوویه جهه‌كێ تایبه‌ت ژى كو سترانبێژ و كه‌نالێن راگه‌هاندنێ به‌رنامه و شه‌ڤبێریێن خوه تێدا ببورینن، ل دۆر ڤێ چه‌ندێ ژى ئاشتى گوت: (دده‌مێ بۆرى دا هژماره‌كا زۆر یا سترانبێژ و هونه‌رمه‌ندێن ده‌ڤه‌رێ شه‌ڤبێرى و به‌رنامێن خوه ل كافیا كه‌لتورى یا گوندى درۆستكرینه، ئه‌ڤه زێده‌بارى كو چه‌ندین كه‌نالێن راگه‌هاندنێ سه‌ره‌دانا وان كریه بو چێكرنا راپورت و به‌رنامێن خوه).
ئه‌ڤرۆنیوز:
وه‌زاره‌تا ئه‌وقافێ وكاروبارێن ئایینى ل هه‌رێما كوردستانێ ل دۆر بێهنڤه‌دانه‌كا فه‌رمى ب هه‌لكه‌فته‌كا ئایینى رۆهنكرنه‌ك ده‌ركر.
نه‌به‌ز ئیسماعیل، په‌یڤدارێ وه‌زاره‌تا ئه‌وقافێ وكاروبارێن ئایینى راگه‌هاند” رۆژا چارشه‌مبى 7/11/2018 ل هه‌رێما كوردستانێ بێهنڤه‌دان نینه، به‌لكو ب هه‌لكه‌فتا ژدایكبوونا پێغه‌مبه‌رێ ئیسلامێ، ل رۆژا سێشه‌مبى 20/11/2018 دێ بیته بێهنڤه‌دانا فه‌رمى ل داموده‌زگه‌هێن حوكمه‌تا هه‌رێما كوردستانێ”.
ل هنده‌ك پارێزگه‌هێن عيراقێ ب هه‌لكه‌فتا وه‌غه‌ركرنا محه‌مه‌د پێغه‌مبه‌رى (س) كو دكه‌ڤيته رۆژا چارشه‌مبى 7/11/2018 كريه بێهنڤه‌دانا فه‌رمى، به‌لێ په‌يڤدارێ وه‌زاره‌تا ئه‌وقافێ دبێژيت” چو ساله‌كێ ب وێ هه‌لكه‌فتێ بێهنڤه‌دان نه‌بوويه ل هه‌رێما كوردستانێ”.
ئه‌ڤرۆنيوز:
ئه‌ندامه‌كێ خۆلا نوو يا په‌رله‌مانێ كوردستانێ راگه‌هاند، سوباهى سێشه‌مبى 6/11/2018 ل ده‌مژمێر 11 سپێدێ دێ ب پايسكلێ به‌ر ب ئاڤاهيێ په‌رله‌مانێ كوردستانێ چم ب مه‌ره‌ما سويند خوارنێ بۆ خۆلا نوو يا په‌رله‌مانێ كوردستانێ.
جه‌لال په‌ريشان، ئه‌ندامێ په‌رله‌مانێ كوردستانێ ژ فراكسيۆنا پارتى ديموكراتى كوردستان بۆ مالپه‌رێ كوردستان تى ڤى گۆت” سوباهى هه‌كه باران ژى بيت هه‌ر ب پايسكلێ دێ چمه په‌رله‌مانێ كوردستانێ، بۆ رۆژ وهه‌يڤێن پاشتر ژى دێ ل سه‌ر پايسكلێ به‌رده‌وام بم بۆ چوونا خوه بۆ په‌رله‌مانى”.
گۆت ژى” يێ به‌رهه‌ڤ نيننم ترومبێله‌كێ وسێ زێره‌ڤانان كو دێ بۆ هه‌ر په‌رله‌مانتاره‌كێ ڤێ خۆلێ هێنه دابينكرن وه‌رگرم ودێ ره‌ت كه‌م”.
دياكر” بلا وه‌كو وه‌لاتێن دى په‌رله‌مانتارێن مه دساده بن وكار وكريارێن مه بۆ گه‌لێ مه بيت ودخزمه‌تا ده‌نگده‌رێن خوه دا بين”.
برياره سوباهى سێشه‌مبى 6/11/2018 خۆلا پێنجێ يا په‌رله‌مانێ كوردستانێ پشت سويند خوارنا په‌رله‌مانتارێن نوو ده‌ست ب كاربيت.
ئه‌ڤرۆ نيوز:
راھێنەرێ یانا ئەنتەر میلان یا ئیتالی دوپاتکر ئەو ھیڤیا وێ چەندێ دخوازیت یاریزانێ ئەرژەنتینی و ستێرا یانا بەرشەلونە لیونێل میسی ل یاریا سوبەھی د قارەمانیا یانێن ئوروپا دا ل ھەمبەری وان پشکداریێ نەکەت.
زێدەتر لوتشیانو سابالیتی دداخویانیەکێ دا بو روژناما موندو دیبورتیڤو یا ئسپانی خویاکر یا باشتر ئەوە میسی یاریێ نەکەن ژبەرکو نە پشکداریا وی بو وان دێ زێدەتر یاریەکا پری ئارامی و باوەری بیت و ئەو دێ د خوشحالبن یاریێ بەرامبەر بەرشەلونە بکەن بێ ستێرا ئەرژەنتینی ژبەرکو ل یاریا بوری وان وانەک وەرگرتیە چونکو شارەزایا بەرشەلونە دەلیڤە نەدایێ ئەنجامی راستڤەبکەن و ئەوا بەرشەلونە ل ھەمبەر وان کری تایبەت د نیڤا دویێ دا ب ئەگەرا وی روبەری بو یێ یاریزانێن وان بو ھێلای.
دھێتە میسی توشی ھنگافتنا دەستێ خوە ببو و چەند یاری بو پشکداری ل گەل پێکھاتیێ بەرشەلونە نەکربوو ل یاریێن خولا ئسپانیا و ژ وانا کلاسیکو و دیسان قارەمانیا یانێن ئوروپا ژی و ل ڤێ دووماھیێ ڤەگەریایە راھێنانا ب شێوەکێ ئاسای و راپورتێن روژنامەڤانی وەسا خویا دکەن ل یاریا سوبەھی دێ پشکداریێ کەت.
ئه‌ڤرۆ نیوز ، زنار تۆڤى:
ده‌مێ به‌رهه‌مێ جوتیارى دگه‌هیت،دڤێت حوكمه‌ت بازارى بۆ جوتیارى په‌یدا بكه‌ت، ژ پێخه‌مه‌ت به‌رهه‌مێ وان بهێته فروتن و ئه‌ڤ چه‌نده دێ وه‌كه‌ت كو به‌رهه‌مێ چاندنێ زێده ببیت و دێ بیته پشته‌ڤانیه‌ك بۆ جوتیارێ مه و دێ به‌رهه‌مێ چاندنێ ل كوردستانێ زێده‌تر لێ هێت.
كاوه عه‌بدولعه‌زیز ئابوورناسه‌كه بۆ ئه‌ڤرۆ نیوز دبێژیت: پرۆسا چاندنا هه‌ر ژ ده‌مێ ده‌ستپێكێ هه‌تاكو دگه‌هیته ده‌مێ گه‌هشتنێ و چنینێ چو بهایێ خوه نابیت بۆ جوتیارى، هه‌كه بازاركرن بۆ وى به‌رهه‌مێ چاندنێ نه‌بیت، ژبه‌ركو جوتیار تێچوویه‌كێ باش ل به‌رهه‌مێ خوه دمه‌زێخیت، دیسا ئه‌ڤ چه‌نده دبیته باره‌كێ گران ل سه‌ر ملێن وى و خێزانا وى و ئابوورێ وى ژى، دیسا نوكه پرانیا وه‌لاتان پشت به‌ستنێ ل سه‌ر سێكته‌رێ چاندنێ دكه‌ن، هه‌ر چه‌نده مه ل كوردستانێ هه‌موو بنه‌مایێن چاندنێ ب ره‌نگه‌كێ باش هه‌نه، دیسا هه‌وا و سه‌قایێ كوردستانێ گه‌له‌ك یێ باشه، هه‌روه‌سا به‌رهه‌م یێ زێده بووى، لێ نوكه ل كوردستانێ مه ئاریشا فروتنا به‌رهه‌مى یا هه‌ى، له‌وما دڤێت حوكمه‌تا هه‌رێمێ بازارى بۆ فروتنا به‌رهه‌مێ چاندنێ په‌یدا بكه‌ت، هه‌ر چه‌نده نوكه به‌رهه‌مێ كوردستانێ ناچیته وه‌لاتێن ژ ده‌رڤه ب تایبه‌تى وه‌لاتێن ده‌وروبه‌ر وه‌كى توركیا و ئیرانێ، له‌وما دڤێت حوكمه‌تا هه‌رێمێ پلانه‌كا باش دانیت و به‌رهه‌مێ فێقى و چاندنێ ڤرێكه‌ته پارێزگه‌هێن عیراقێ و دڤێت ب هه‌ر رێیه‌كا هه‌بیت ڤێ بزاڤێ بكه‌ت، ژ پێخه‌مه‌ت به‌رهه‌مێ جوتیارێ كوردستانێ بهێته فروتن و بازارى بۆ په‌یدا بكه‌ت.
هه‌روه‌سا دڤێت حوكمه‌ت كارگه‌هێن داگرتنا فێقى و كارگه‌هێن ته‌زاندنێ دانیت، داكو به‌رهه‌مێ جوتیارى ب هه‌روه نه‌چیت و به‌رهه‌مێ وى بهێته فروتن و ئه‌ڤه ژى دێ بیته رێخۆشكه‌ره‌ك بۆ جوتیارى كو بشێت به‌رهه‌مێ خوه بفروشیت و دێ بازاره‌ك ژى بۆ به‌رهه‌مێ وى په‌یدا بیت، هه‌روه‌سا دڤێت هشیاریا چاندنێ ل ده‌ف خه‌لكێ مه په‌یدا ببیت و جوتیارێ مه ژى به‌رهه‌مێ باش و خراب ژێك جۆدا بكه‌ت و نه هه‌موو به‌رهه‌مێ باش و خراب تێكهه‌ل بكه‌ت، چونكى ئه‌ڤه دێ بیته ئه‌گه‌رێ هندێ كو به‌رهه‌مێ وى باش نه‌چیت، چونكى هه‌ر جۆره‌كێ فێقى و به‌رهه‌مێ چاندنێ دێ ب بهایه‌كێ چیت، دیسا دڤێت زانایێن ئاینى و ده‌زگه‌هێن راگه‌هاندنێ پێكڤه هشایاریه‌كێ ل ده‌ف خه‌لكێ په‌یدا بكه‌ن، كو هندى به‌رهه‌مێ نافخۆیى هه‌بیت ئه‌و به‌رهه‌مێ نافخۆیى بكرن، چونكى ئه‌ڤ چه‌نده ل پرانیا وه‌لاتێن جیهانى هه‌یه و ئه‌ڤه دبیته پالپشتى و هاریكاریه‌ك بۆ جوتیارێن كوردستانێ و ب ڤى ره‌نگى ژى دێ بازاره‌كێ باشتر بۆ وان په‌یدا بیت و دێ به‌رهه‌مێ وان باشتر چیت، له‌وما ئه‌ڤ چه‌نده ل سه‌ر پلانا حوكمه‌تێ رادوه‌ستیت.
به‌كر حه‌سه‌ن جوتیاره‌كه ل ده‌ڤه‌را به‌روارى بالا دبێژیت: ئه‌ڤ ساله رێژه‌كا باش یا به‌رهه‌مێ فێقى و چاندنێ ل ڤێ ده‌ڤه‌رێ هه‌بوون، دیسا د ئه‌ڤ ساله‌دا رێژه‌كا مه‌زن یا هناران ل گوندێ هرۆرێ هه‌بوون، لێ پرانیا وان هناران ماینه پێڤه و خه‌لكێ گوندى نه چنینه، چونكى كیلۆیا وان ب بهایه‌كێ كێم دچیت و هه‌روه‌سا پرانیا وان هنارێن ماینه پێڤه ژى په‌قینه، له‌وما خه‌لكێ نه دڤیا كیلۆیا وان ب “500” دیناران بفروشن، هه‌وره‌سا هنده‌كان ژى هنارێن خوه چنینه و خه‌زن كرینه، بۆ وه‌رزێ زڤستانێ، لێ پرانیا وان پێڤه پیچ بووینه، ژبه‌ركو ئه‌ڤه وه‌رزێ زڤستانێ هات و مانه پێڤه په‌قینه.
هه‌وره‌سا گۆت ژى: ئه‌ڤ ساله جوتیارێن ڤێ ده‌ڤه‌رێ كه‌سێ مفا ژ فروتنا وان نه‌دیتیه، چونكى بازارێ فروتنا وان نینه، لێ هه‌كه حوكمه‌تێ كارگه‌هه‌كا داگرتنا فێقى ل ده‌ڤه‌را به‌روراى بالا دانابا، دا گه‌له‌ك جۆرێن شه‌ربه‌تا ژ وان جۆرێن فێقى هێنه چێكرن و جوتیار ژى دا مفایه‌كێ باش ژڤێ چه‌ندێ بینیت، لێ نه‌بوونا ڤێ چه‌ندێ وه‌كریه كو دلساریه‌ك بۆ جوتیارێ مه چێببیت و دیسا ل سالا بورى ژى وه پرانیا بنێن سێڤان برینه، چونكى هه‌ر سال سێڤێن مه ل بنى درزین و چو داهات بۆ مه ژێ نه دهات، له‌وما ژ نه‌چارى مه ئه‌ڤ كاره كریه، دیسا ئێدى ب ڤى ره‌نگى كارێ چاندنێ و جوتكاریێ ل ڤێ ده‌ڤه‌رێ ل كێمیێ دایه و ب تنێ خه‌لك تێرا خوه به‌رهه‌مێ چاندنێ دكه‌ت و نوكه گه‌له‌ك جوتیاران زه‌ڤیێن خوه هێلاینه و ئێدى كارێ چاندنێ ناكه‌ن، هه‌روه‌سا ئه‌ڤ ساله پترى 100 ته‌نێن هناران ل گوندێ هرۆرێ هه‌بوون، لێ هه‌كه هنارێن وان چو بان و داهاته‌ك ژێ هاتبا ئه‌و دا به‌رده‌وامیێ ده‌نه كارێ چاندنێ، لێ هه‌كه ب ڤى شێوه‌ى بیت، ئه‌و به‌رهه‌مێ هه‌ى ژى سالا بهێت نامینیت.
نيشاندان