ئه‌ڤرۆ نیوز ، زنار تۆڤى:
موزیكژه‌ن سه‌باح زاخۆیى كو ئێكه ژ موزیكژه‌نێن به‌رنیاس ل سه‌ر ئاستێ كوردستانێ د دیداره‌كێ دا بۆ ئه‌ڤرۆ نیوز دیاركر: ئه‌و ره‌سه‌ناتیا یا د ژه‌نینا موزیكى كوردى یا به‌رێ دا هه‌یى، نوكه ئه‌و تام و روحیه‌ت د موزیكا كوردى یا نوكه دا نینه، ئه‌ڤ چه‌نده هات، پشتى كو كه‌نالێن راگه‌هاندنێ ل كوردستانێ زێده‌بووین، له‌وما د سه‌ر ده‌مێ مه دا مه چو كه‌نالێن راگه‌هاندنێ نه‌بوون و مه چو تشت نه ددیت و مه گوه دچو نه‌دبوو، له‌وما ئه‌و كارێن مه ئه‌نجام ددان، هه‌موو یێن سرۆشتى و خۆمالى بوون، دیسا ئه‌و ئاواز و موزیكا مه د ژه‌نى و ئه‌و به‌رهه‌مێ مه به‌لاڤ دكر و داهێنان ژى تێدا دكر، ئێش و ژانێن كوردان تێدا دیار دبوون، روحه‌كا كوردینیى و ره‌سه‌ناتیا ملله‌تێ كورد و فولكلۆرێ مه تێدا دیار بوو، ئه‌ڤه هه‌موو وه‌كو بنگه‌هه‌كێ بۆ، موزیكا كوردى ژى ل سه‌ر ڤى بنگه‌هى هاتیه ئاڤاكرن، دیسا ئه‌م ژى ل گه‌ل ملله‌تێ خوه د ناڤا وان خۆشى و ئێش و ئازارا دژیاین، هه‌ر تشتێ مه چێدكر ژ هه‌ست و هزرێن مه بوون، ئه‌و روحیه‌ت دناڤا وێ موزیكێ دا هه‌بوو.
ناڤهاتى زێدەت گۆت: پشتى ئه‌ڤ كه‌نالێن راگه‌هاندنێ و كۆلیژ و په‌یمانگه‌هێن هونه‌رى په‌یدا بووین، ئێدى خه‌لك نامینیته مه‌حتل، وه‌كو هه‌بوونا ماموستا و سترانبێژان و گرۆپێن هونه‌رى، كو هه‌ر تشت ل به‌رده‌ست هه‌یه، هه‌موو به‌رهه‌م مه ب ره‌نگه‌كێ زیندى چێدكرن، له‌وما هه‌تا نوكه ئه‌و تام و خۆشى مایه، هه‌تا نوكه ئه‌و به‌رهه‌مه ل سه‌ر ده‌ڤێ هه‌موو هونه‌رمه‌ندێن كورد ماینه، د نوكه دا نه موزیكژه‌ن سترانبێژان دبینیت، نه ئه‌و موزیكژه‌نان دبینن، له‌وما موزیكا نوكه ئه‌و تام و روحا خوه ژ ده‌ستدایه.
نيشاندان
