ئەڤرۆ نیوز، لەزگین جوقی:

ب بەرھەڤبوونا نوونەرێ پارێزگارێ دھۆکێ و قایمقامێ قەزا دھۆکێ و سیرینا مورینی قۆنسلا گشتی یا وەلاتێ ئیتالیا و کلاریس پاستوری نوونەرا ئیکەتیا ئوروپا ئەڤرۆ 16/12/2018 ھژمارەکا پرۆژێن ساخلەمیێ ل پارێزگەھا دھۆکێ ھاتنە ڤەکرن.
کلاریس پاستوری، نوونەرا ئێکەتیا ئورۆپا دپرێس کۆنفرانسەکی دا دیار کر کو سالەکێ بەری نوکە بۆ دانانا بەرێ بنیاتێ ڤان پرۆژان ئەو ل دھۆکێ بوون نوکە ئەڤ پرۆژە ھاتنە ڤەکرن، ب تایبەت بۆ ئەنجامدانا نشتەرگەریان، ئەڤ پرۆژە ژ ئەنجامی ھەماھەنگی و ھەڤکاریا د ناڤبەرا حوکمەتا ھەرێما کوردستانێ و ئیکەتیا ئورۆپا و ئیالیا دا ھاتینە دروستکرن و گۆت: “ھەر چەندە ئەم دزانین ئەڤە پێنگاڤەکا بچووکە بۆ چارەسەرکرنا ئاریشێن ساخلەمیێ ل پارێزگەھا دھۆکێ، لێ ئەڤە پینگاڤەکا بھێزە بۆ دابینکرنا پرۆژە و خزمەتێن ساخلەمیێ ل دھۆکێ”.
د. نزار عسمەت، رێڤەبەرێ گشتی یێ ساخلەمیا پارێزگەھا دھۆکێ دیار کر کو ئێکەتیا ئورۆپا ب کوژمێ نێزیکی شەش ملیۆن یۆرویان پرۆژێن ساخلەمیێ ل دھۆکێ ئەنجامدان و گۆت: “ئەڤرۆ گەلەک بەختەوەر بووین دگەل ھەڤالێن خوە یێن ساخلەمیا پارێزگەھا دھۆکێ کو پرۆژەکی بۆ دەمێ پتر ژ دو سالان ئەم ھەموو پێڤە دمژوول بووین ڤەکەین، ھەر ژ قەزا ئاکری ھەتا نەخۆشخانا ژن و زارۆبوونێ و نەخۆشخانا ھەوارھاتنێ و نەخۆشخانا ھیڤی یا زارۆکان کو ب رێیا ڤان پرۆژان ئەم بشێن پتر خزمەتا ساخلەمیا دایک و زارۆ و تەنگاڤیان بکەین”.
ناڤھاتی خویا کر کو ئەڤی پرۆژەی د چەندین واران دا خزمەتا رێڤەبەریا گشتی یا ساخلەمیا پارێزگەھا دھۆکێ کریە بۆ وێ چەندێ بشێن خوە ل بەر ڤێ قەیرانی بگرن و گۆت: “دخوازم بەردەوامی ب پێشکیشکرنا ھەموو جۆرێن خزمەتێن ساخلەمیێ بھێتە دان، چونکو ل سالا 2014ێ دەمێ ھاتنا رێژەکا مەزن یا ئاواران بۆ سنوورێ پارێزگەھا دھۆکێ بارگرانیەکا مەزن ل سەر پارێزگەھێ پەیداببوو و یا زەحمەت بوو بێ پشتەڤانیا ھەموو جڤاکێ نێڤدەولەتی ب تایبەتی ژی ئێکەتیا ئورۆپا و ئیتالیا، ئەڤە بۆ جارا ئێکێ یە پشتەڤانیەکا ب ڤی رەنگی مەزن دکەن وەکو وان ئاماژە ژی پێکری بۆ جارا دویێ ژی دێ پشتەڤانیا ساخلەمیێ کەن بۆ وێ چەندێ پرۆژەکێ دی ب ھەمان کوژمە بشێن باشتر خزمەتا ساخلەمیی بکەین، ئەڤ پرۆژە گەلەک یی گرنگ بوویە، چونکو بۆ جارا ئێکی بوو چەندین ھۆلێن نشتەرگەریێن سەردەمانە ل گۆر ستاندەرێن جیھانێ و چاڤدێریا چر بۆ زارۆیێن ژنوو ژدایک دبن ل نەخۆشانا ژن و زارۆبوونێ بھێنە دروستکرن”.
رێڤەبەرێ گشتی یێ ساخلەمیا پارێزگەھا دھۆکێ خویا کر کو د ھەمان پرۆژە دا ئامیرین نوو ھاتینە دابینکرن و خۆلێن مەشق و راھێنانی بۆ ستافی ھاتینە ڤەکرن بۆ جارا یە ل سەرانسەری عیراقێ یەکیێن ڤاکسیندانێ ب شێوەیەکێ سیستەمێ کارەبێ بھێنە دابینکرن و گۆت: “سیستەمێ سولارا دێ ل 11 بنگەھێن ساخلەمیێ ھێتە دانان و 52 بنگەھێن ساخلەمیێ ژی ب پشتەڤانیا ڤی پرۆژەی ھاتینە نووژەنکرن و کەفتینە دخزمەتا وەلاتیان دا و ئەم سوپاسیا ئێکەتیا ئورۆپا دکەین بۆ ئەنجامدانا ڤان پرۆژێن گەلەک گرنگ د وارێ ساخلەمیێ دا، ئەڤ پرۆژە ھەموو د چەندین قووناغان دا یێن ھاتینە چێکرن، ھەکە مرۆڤ تەماشە بکەت دی بینیت چەند یا ب زەحمەت مرۆڤ نەخۆشخانەکێ نووژەن بکەت و بێخیتە د خزمەتێ دا و ئەز باوەرناکەم نەخۆشخانەکا وەکو نەخوشخانا ھیڤی یا زارۆکان یا سەردەمانە ل ھەرێما کوردستانێ ھەبیت ل دھۆکێ نەخۆشخانەکا مۆردین و سەردەمانە ھەیە خزمەتا زارۆکان دکەت”.
ژ ئالیێ خوە ڤە ئیسماعیل محەمەد، ھاریکارێ پارێزگارێ دھۆکێ بۆ کاروبارێن ئاوارە و پەنابەران دیار کر کو ھەر دو قۆنسلی ئێکەتیا ئوروپا و قۆنسلێ حوکمەتا ئیتالیا ئەڤرۆ 16/12/2018 سەرەدانا پارێزگەھا دھۆکێ کرینە بۆ ڤەکرنا ھژمارەکا پرۆژەیێن گرنگ یێن ساخلەمیێ بناڤی ئیدارا پارێزگەھا دھۆکێ سوپاسیا وان کر بۆ ئەنجامدانا پرۆژێن ساخلەمیێ و ھەڤکاریا رێڤەبەریا گشتی یا ساخلەمیا پارێزگەھا دھۆکێ.
د. نزار بەکر، رێڤەبەرێ نەخۆشخانا ھیڤی یا زارۆیان ل دھۆکێ دیار کر کو ئێکەتیا ئورۆپا و ئیتالیا پێشکەفتنەکا مەزن د نەخۆشخانێ دا دروستکریە ھەموو ئامیرێن مۆدرێن بۆ نشتەرگەریان ھاتینە دابینکرن و ژوورێن نشتەرگەریا یێن سەردەمانە یێن ھاتینە دروستکرن و 51 تەخت ژی ل ناڤ نەخۆشخانێ یێن ھاتینە زێدەکرن .

ئەڤرۆ نیوز، رێوار مزیری:

رێڤەبەرێ پاسپۆرتان ل دھۆکێ بۆ ئەڤرۆ نیوز دیار کر کو رێڤەبەریا پاسپۆرتان ل دھۆکێ رێزبەندیا ئێکێ ل سەر ئاستێ عیراقێ بۆ دەرئینانا پاسپۆرتان ب دەست خوە ڤە ئینا و گۆت: “ل وەرزێ ھاڤینێ خواست ل سەر دەرئینانا پاسپۆرتان زێدەترە”.

عەمیدێ مافپەروەر دلدار نوری عەباس، رێڤەبەرێ پاسپۆرتان ل پارێزگەھا دھۆکێ ئاشکرا کر کو پشتی رێڤەبەریا گشتی یا رەگەزناما عیراقی ئامارەک ل دۆر ھژمارا مامەلێن ل رێڤەبەریێن پاسپۆرتان دھێنە ب رێڤەبرن ئەنجامدای، رێڤەبەریا پاسپۆرتان ل دھۆکێ رێزبەندیا ئێکێ ل سەر ئاستێ عیراقێ بۆ دەرئینانا پاسپۆرتان ب دەست خوە ڤە ئینا و گۆت: “ب ڤێ ھەلکەفتێ رێڤەبەریا گشتی یا رەگەزناما عیراقی رێز و سوپاسی ئاراستەیی رێڤەبەر و ئەفسەر و فەرمانبەر و کارمەندێن رێڤەبەریا مە کرن”.

ناڤھاتی ئاماژە دا وێ چەندێ کو ل وەرزێ ھاڤینێ خواست ل سەر دەرئینانا پاسپۆرتان زێدەتر ژ بەر کو خەلک زێدەتر گەشتان ئەنجام ددەن و گەشتێن وان ژی زێدەتر بۆ وەلاتێ تورکیا نە و گۆت: “د وەرزێ ھاڤینا ئەڤ سالە دا رۆژانە ھزار ھەتا ھزار و 200 پاسپۆرتان ل رێڤەبەریا مە بۆ وەلاتیان دھاتنە دەرخستن”.