ئەڤرۆ نیوز:
گرۆپێ قەیرانا نێڤدەولەتی ل دۆر ئاریشا کەرکووکێ و دەڤەرێن دی داخواز ژ نەتەوێن یەکگرتی دکەت کو پرۆژێن خوە بۆ چارەسەریێ پێشکێش بکەت.
گرۆپێ قەیرانا نێڤدەولەتی ئاماژە ب هندێ دکەت کو نها دەلیڤەکا باش ل هەولێر و بەغدایێ هاتیە پێش و هەکە نەتەوێن یەکگرتی ژی پرۆژێن خوە بۆ چارەسەریێ پێشکێش بکەت دێ هەر دو ئالی بۆ چارەسەریێ پتر نێزیکی هەڤدو بن و ژ بەر هندێ ژی رۆلێ نەتەوێن یەکگرتی نها گرنگە.
ئەڤرۆ نیوز، نەوزاد ھلۆری:
ل سنورێ ناحیا قەسرێ یا سەر ب قەزا چومان، چێلەک ل جھەکێ ئاسێ دبیت، گەنجەک ژی کو خوەدانێ چێلێ بوو دچیت دا کو چێلا خوە رزگار بکەت، بەلێ چێل چوقەکێ لێ ددەت و توشی خوون بەربوونێ دکەت، ھەتا کو ئەوی گەنجی دگەھیننە نەخوەشخانێ گیانێ خوە ژ دەست ددەت.
مورشید محەمەد، وەلاتیەکێ دەڤەرێ و ژ نێزیک ھایدارێ روودانێ یە بۆ ئەڤرۆ نیوز گۆت: (گەنجەک بناڤێ حەمە ئەمین عەبدلرەحمان نەبی کو دژیێ ٢١ سالیێ دایە و ل سنورێ ناحیا قەسرێ یا سەر ب قەزا چومان دژیت، پشتی کو چێلا وی ل جھەکێ ئاسێ دبیت، ئەو ژی دا کو چێلا خوە رزگار بکەت، بەلێ چێل چوقەکێ لێ ددەت و توشی خوون بەربوونێ دکەت، ھەتا کو ئەوی گەنجی دگەھینیە نەخوەشخانێ گیانێ خوە ژ دەست دا).
ئەڤرۆ نیوز، نەوزاد ھلۆری:
بێوار عەبدولعەزیز، بەرپرسێ راگەھاندنا بەرەڤانیا باژێری ل دھۆکێ بۆ ئەڤرۆ نیوز گۆت: (ئەڤرۆ بەری نیڤرو زارۆیەکێ دوو سالی بناڤێ ” ھـ.م” ل ناحیا فەیدیێ کەفتبوو د گومەکا ئاڤێ دا و خەندقی).
زێدەتر گۆت: (تیمێن مە ئەو زارۆ ل گوما ئاڤێ دا دەرینا و رەوانەیێ نوشداریا داد کر ل دھۆک بۆ زانینا ئەگەرێن خەندقینێ).
دھێتە زانین کو ئەڤ سالە ل سنورێ پارێزگەھا دھۆک نێزیکێ ٥٧ کەس خەندقینە، و نێزیکێ ٦٢ کەس ژی ھاتینە رزگارکرن بەری کو بخەندقن.
ئەڤرۆ نیوز:
به‌رده‌وامیدان بو په‌یداكرنا ده‌لیڤێن كارى بو گه‌نج ولاوان ئه‌ڤرو سپێدێ 15-12-2018ل هولا ناڤه‌ندا قوتابییان ل زانكویا دهوكێ ب چاڤدێریا فه‌رهاد ئه‌مین ئه‌تروشى پارێزگه‌رێ دهوكێ وب ئاماده‌بونا اسماعیل محمد احمد هاریكارێ پارێزگه‌رى بو كاروبارێن مروڤایه‌تى نونه‌رێ پارێزگه‌رێ دهوكێ وسالار ئوسمان بریكارێ وه‌زاره‌تا ره‌وشه‌نبیرى ولاوان ونونه‌رێ رێكخراوا GIZیا ئه‌لمانى وژماره‌كا زور یا گه‌نج ولاوان رێ ورسمێن ب دوماهى هاتنا ئاهه‌نگا ده‌رچونا پشكدارێن دوو پروژێن په‌یداكرنا ده‌لیڤێن كارى هاتنه گێران.
لبه‌راهیێ نێچیرڤان سادق رێڤه‌به‌رێ رێڤه‌به‌ریا لاوان په‌یڤه‌ك پێشكێشكروبخێر هاتنا هه‌موولایه‌نان كر هه‌روه‌سا سوپاسیا رێكخراوا GIZ یا ئه‌لمانى كر كو پشته‌ڤانیا هه‌ردوو پروژێن وان كریه ژبو په‌یداكرنا ده‌لیڤێن كارى بو 260گه‌نجان ژهه‌ردوو ره‌گه‌زا.
رێڤه‌به‌رێ رێڤه‌به‌ریا لاوان ته‌كه‌زكر كو گه‌نج هێزا كاریگه‌ره بو ئاڤاكرنا هه‌ر وه‌لاته‌كى وئاڤاكرنا ژێرخانا ئابورى وخواست كو رێكخراوا GIZ ورێكخراوێن یوئێن به‌رده‌وام پشته‌ڤانیا گه‌نجان بكه‌ن وده‌لیڤێن كارى بو په‌یداكه‌ن ودیاركر كو ل ده‌مه‌كێ نێزیك ب رێكا 12 ناڤه‌ندێن وه‌رزش ولاوان دێ خول وراهێنان بو (600) گه‌نج ولاوێن دى دێ هێنه ڤه‌كرن.
پاش نونه‌رێ پارێزگه‌رێ دهوكێ په‌یڤه‌ك پێشكێشكر بناڤێ كارگێریا پارێزگه‌هێ پیروزباهى ل پشكدارین دهه‌ردوو پروژان دا وسوپاسیا رێكخراوا GIZ یا ئه‌لمانى كر كو پشته‌ڤانیا هه‌ردوو پروژا كریه هه‌روه‌سا په‌سنا رێكخراوا ناڤبرى كر كو زور هاریكاریا ئاواره وپه‌نابه‌ران وخه‌لكێ خوجهێ پارێزگه‌هێ كریه وخواست هاریكاریێن وان دبه‌رده‌وامبن.
پاش په‌یڤا بریكارێ وه‌زاره‌تا ره‌وشه‌نبیرى هاته خاندن ورولێ گه‌نجان دئاڤاكرنا وه‌لاتى دا به‌رچاڤكر وسه‌ركه‌فتن بو پشكدارێن هه‌ردوو پروژا خواست.
پاش په‌یڤا رێككخراوا جى ئاى زێد یا ئه‌لمانى هاته خاندن
هه‌ژى گوتنێ یه رێڤه‌به‌ریا لاوان ب هاریكاریا رێكخراوا GIZ یا ئه‌لمانى خول وراهێنان بو 260 گه‌نجان بو ماوێ دوو مه‌هان ڤه‌كرینه وده‌لیڤێن كارى بو په‌یداكرینه كو بشێن داهاته‌كى بو خو په‌یداكه‌ن.
ئەڤرۆ نیوز، بارزان مزووری:
قایمقامێ قەزا شێخان بۆ ئەڤرۆ نیوز دیار کر کو قەزا شێخان ژ لایێ ئیدارێ ڤە سەر ب پارێزگەھا نەینەوا ڤەیە، بەلێ ھاتیە پشت گوە ھاڤێتن و پرۆژێن خزمەتگوزاری ژ لایێ حوکمەتا ھەرێما کوردستانێ ڤە لێ دھێنە ئەنجام دان و گۆت: “د ئەڤ سالە دا کۆمپانیێن بەرھەمئینانا پەترۆلێ ب ھەماھەنگی ل گەل حوکمەتا ھەرێما کوردستانێ ب کوژمێ پتری دو ملیار دیناران پرۆژێن خزمەتگوزاری ل سنوورێ قەزا شێخان ئەنجامداینە”.
سەردار یەحیا عەبدولعەزیز، قایمقامێ قەزا شێخان بۆ ئەڤرۆ نیوز دیار کر کو ژ دەست پێکا سالا 2018 ھەتا نوکە بکوژمێ پتری دو ملیار دیناران پرۆژە د کەرتێن پەروەردە و رێ و بان و ئاڤ و کارەب و ساخلەمیێ دا ل قەزا شێخان ھاتینە ئەنجامدان و سەرەرایی ڤێ چەندێ چەندین ھۆلێن بیرەوەریان ژی ھاتینە چێکرن و گۆت: “حوکمەتا ھەرێما کوردستانێ د قەیرانەک مەزن یا دارایی دا بوو و ئەو بۆدجا بەری چەند سالان بۆ ژ لایێ بەغدا ڤە دھات ھاتیە بڕین ژ بەر ڤێ چەندێ حوکمەتا ھەرێمێ ب ھەماھەنگی ل گەل کۆمپانیێن بەرھەمئینانا پەترۆلێ ل قەزا شێخان ئەڤ پرۆژە ئەنجامداینە و گەلەگ ژ وان پرۆژان ژ لایێ رێکخراوێن بیانی و بوردێ کاروبارێن مروڤایەتی ژی ڤە ھاتینە ئەنجام دان”.
ژ ئالیێ خوە ڤە ئەندازیار خالد نەرمو، سەرۆکێ باژێرڤانیا قەزا شێخان بۆ ئەڤرۆ نیوز دیار کر کو پشتی سالا 2003 قەزا شێخان بەرفرەیەکا زێدە ب خوەڤە گرتیە و چەندین تاخێن نوو ھاتینە دروستکرن و پشتی ھاتنا ھژمارەکا مەزن یا ئاواران ژی رێژەکا مەزن یا ئاواران بۆ خوە ئاڤاھی ل شێخان ئاڤاکرینە ژ بەر ڤێ چەندێ قەزا شێخان بۆ چێکرنا پرۆژێن خزمەتگۆزاری پێدڤی ب بۆدجەکا زێدەتر ھەیە.
ئه‌ڤرۆ نيوز، نيوار محه‌مه‌د سه‌ليم:
وه‌زاره‌تا دارايى يا عيراقێ راگه‌هانديه كو ئه‌و كار ژ بۆ وێ چه‌ندێ دكه‌ن، 50% ژ داهاتێ گۆمركان بۆ پارێزگه‌هان بيت و نوونه‌ره‌ك ژى ئاشكه‌را دكه‌ت كو ئه‌ڤ پێنگاڤه يا سه‌ركه‌فتى نابيت.
د. ئه‌حمه‌د سه‌فار، ئه‌ندامێ جڤاتا نوونه‌رێن عيراقێ ل سه‌ر فراكسيۆنا پارتى ديموكراتى كوردستان د داخۆيانيه‌كێ دا بۆ ئه‌ڤرۆ نيوز گۆت: “هێشتا پرۆژێ بوودجێ نه‌هاتيه جڤاتا نوونه‌ران و چو تشتێ وه‌سان ژى تێدا نينه، هه‌كه ژنوو زێده بكه‌ن، به‌لێ باوه‌رناكه‌م سه‌ربگريت”.
ئه‌ندامێ جڤاتا نوونه‌رێن عيراقێ ل سه‌ر فراكسيۆنا پارتى ديموكراتى كوردستان زێده‌تر گۆت: “داهات يێ ناڤه‌ندى يه و دڤێت ڤه‌گه‌ريته گه‌نجينا ده‌وله‌تێ”.
د. ئه‌حمه‌د سه‌فار دا زانين ژى كو هه‌كه وان دڤێت خزمه‌ته‌كێ بكه‌ن، “بلا پارێ پترۆدۆلار ب دروستى بده‌نه پارێزگه‌هان باشتره. يا دى دێ پتر ده‌ليڤێ ده‌ته ده‌ستكاريێ و گه‌نده‌ليێ”.
ته‌كست ژى ل سه‌ر وێ چه‌ندێ كر كو ئه‌و ل گه‌ل وێ بۆچوونێ نينه، به‌لێ ئه‌و ب تنێ ژى كه‌سه‌كه ژ ناڤ 21 كه‌سان كو د ڤێ لژنێ دانه و گۆت: “ئه‌ز بۆچوونا هه‌ڤالێن خوه نزانم، به‌لێ ب ديتنا من ئه‌ڤه كاره‌كێ سه‌ركه‌فتى نابيت”.
ده‌رباره‌ى وێ چه‌ندێ كا هه‌كه ئه‌ڤ پرۆژه په‌سه‌ند بوو دێ هه‌رێما كوردستانێ ژى ڤه‌گريت، د. ئه‌حمه‌د سه‌فار گۆت: “سيسته‌مێ دارايى ل هه‌رێما كوردستانێ ب ته‌مامى يێ جودايه ژ عيراقێ و هه‌كه ل وێرێ په‌سه‌ند ژى بيت باوه‌ر ناكه‌م ل كوردستانێ په‌سه‌ند بيت”.
ئه‌ندامێ جڤاتا نوونه‌رێن عيراقێ ل سه‌ر فراكسيۆنا پارتى ديموكراتى كوردستان نه‌ڤه‌شارت ژى كو ئه‌و روونى ژى د داهاتێ گۆمركان دا ب ره‌نگه‌كێ گشتى نينه هه‌تا بزانن چه‌ند داهات دهێت و چه‌ند دێ بۆ پارێزگه‌هان بيت و چاوان دێ هێته ب كارئينان.
ل دۆر ئه‌گه‌رێن ده‌ركرنا ڤێ بڕيارێ د. سه‌فار گۆت: “دبيت ئه‌ڤه زێده‌تر ژ به‌ر وان خوه‌نيشاندانێن به‌سرا بيت ژ به‌ر كو ئه‌و د نه‌رازى نه و 85% ژ داهاتێ په‌ترۆلێ يێ عيراقێ يێ پارێزگه‌ها وانه و خزمه‌تگۆزارى وه‌كو پێدڤى نينن، به‌لێ ئه‌ڤه جارێ دبيت ب تنێ پێشنياز بيت و وه‌زيرێ دارايى ژى ئه‌و ده‌سته‌لات نينه كاره‌كێ ژ وى ره‌نگى بكه‌ت”.
د به‌ياننامه‌كێ دا كو نڤيسينگه‌ها راگه‌هاندنێ يا جێگرێ سه‌رۆك وه‌زيرێن عيراقێ بۆ كاروبارێن داراى و وه‌زيرێ دارايى ل حوكمه‌تا فيدرال، د. فوئاد حسێن، راگه‌هاند كو ل ده‌مێ ديدارا ناڤبرى ل گه‌ل شاندێ ئێكه‌تيا ئورۆپى ئه‌وان به‌حس ل هندێ كريه كو دێ به‌هرا پارێزگه‌هان زێده كه‌ن ب ره‌نگه‌كى كو هه‌ر پارێزگه‌هه‌كێ 50% ژ داهاتێ گۆمرك و ده‌رگه‌هێن سنورى بۆ وان بيت.
ئەڤرۆ نیوز، نەوزاد ھلۆری:
دەستەیا ئامارا ھەرێما کوردستان و وەزارەتا پلاندانانا عیراقێ و بەنکا نیڤدەولەتی د روویپێڤانەکێ دا، چەند داتایەکێن نوو ل بارا ئاستێ ھەژاریێ ل ھەرێما کوردستان و عیراقێ بەلاڤ کرن.
د رووپيڤا وان دا کو ھەشت ھزار و 640 خێزان وەکو نموونە ل ھەموو باژێرێن عیراقێ و 900 خێزان ژی ل ھەرێما کوردستانێ وەرگرتیە و بەحس ل ئاستێ ژیانا وان یا ئابووری دکەت و تێدا ھاتیە، 31% ژ خێزانێن عیراقێ ھەیڤانە کێمتر ژ ملیون دیناران دمەزێخن، 48.2% ژ خێزانێن عیراقێ ھەیڤانە د ناڤبەرا ملیونەک بۆ دو ملیون دیناران مەزاختنێ دکەن، 14.6% ژ خێزانێن ھەرێما کوردستانێ و عیراقێ ژی کێمتر ژ سێ ملیون دیناران دمەزێخن، دیسان 5.7% ژ خێزانان ژی ل سەر سێ ملیون دیناران ھەیڤانە دمەزێخن.
ل عیراقێ 38.9% د ژیێ خوار ژ 25 سالیێ دانە و ئەڤێن دى د سەر 26 سالیێ دانە، دیسان 98% ژ عیراقیان غازێ بۆ دروستکرنا خوارنێ بکاردئینن، 17 دەمژمێران کارەبا نیشتمانی و 6 دەمژمێران ژی کارەبا موالیدەیان بکاردئینن بۆ پێدڤیێن کارەبێ، 92% ژ خەلکێ عیراقێ ئاڤا پاقژ بکاردئینن بۆ ڤەخوارنێ ژ وانان ژی 35% ب رێیا تورێن حوکمەتێ، 58% ب رێیا تانکەران، 4% ب رێیێن دى.
د رووپیڤا عیراقێ دا ھاتیە ژی کو 41.7% ژ خەلکێ عیراقێ ترومبێلێ بکاردئینن،78.5% ژی ژ وان کەسێن کو موبایلێ بکاردئینن، موبایلا وان ژ جورێ موبایلا زیرەکه.
دیسان 13.8% ژ خەلکێ عیراقێ د سەر ژیێ 15 سالیێ دا د بێ کارن، 13% ئاستێ ژیانا خەلکێ عیراقێ يێ باشە و 56% يێ نورمالە و 31% ژی زۆر خرابە، د بەرامبەر دا ئاستێ ژیانێ ژ سالا 2014 هه‌مبه‌ر نها بۆ عیراقێ و ھەرێما کوردستانێ ژی 44% يێ خرابە.
ئەڤرۆ نیوز، نەوزاد ھلۆری:
د دەما 24 دەمژمێرێن بوری فروکێن تورکیا ل سنورێ ناحیا شێلادزێ ب تایبەتی دەڤەرا نێروەورێکان دزڤرن، چەند جھەک ژی بوردومان کرینە، ھەتا بەرھەڤکرنا ئەڤی نووچەیی ژی زڤرینا وان يا بەردەوام بوو.
عەبدولا ئیسماعیل، وەلاتیەکێ شێلادزێ یە دیارکر کو ئەڤە پتری 24 دەمژمێرايە فروکێن تورکیا ل سنوورێ ناحیا شێلادزێ بێ ڤەبرین دزڤرن و زێدەتر بۆ ئەڤرۆ نیوز گۆت: “د ماوەیێ پتر ژ 24 دەمژمێرێن بوری سێ جاران فروکێن تورکیا گوندێن دەڤەرا نێروەورێکان بوردومانکرینە، ب تایبەتی گوندێن شاجا و بێزەلێ و دەردورێن وان، دوھی بێھنڤەدانا ئه‌ینیێ بوو، خەلکەکێ زۆر قەستا سەر گوند و دەڤەرێن خوە کربوون، بەلێ ژ ئەنجامێ بوردومانێ ب لەز ڤەگەریان ، ھەتا نوکە ژی زڤرینا فروکێن تورکیا بۆ دەڤەرا شێلادزێ بەردەوامە، چو کەس ژى نەشێن بچنە دەڤەرێ).
زێدەتر گۆت: (بەردەوامبوونا فرۆکێن تورکیا بۆ دەڤەرا مە بوویە ئەگەر زێدەباری کو مەترسیێن ئێکسەر بۆ سەر گیانێ وەلاتیان ھەبیت، د ھەمان دەم دا مەترسی بۆ سەر بوردومانکرنا جھێن بازرگانی و گەشتوگوزاری ژی ھەبیت مینا ھاڤیگەھا ئاڤا مارک، خوە ئەگەر بوردومان ژی نەکەن، خەلک نەشێت بچیتە وان جھان و ب ڤێ یەکێ کرین و فروتنا بازارێن ھاڤینگەھا ئاڤا مارک راوستایە، ژ بەر ڤێ چه‌ندێ دخوازین کو دەڤەر بھێتە ئارامکرن و بوردومان بهێته راوستاندن).
ئەحمەد شامکی، چالاکڤانەکێ شێلادزێ یە بۆ ئەڤرۆ نیوز گۆت: (بوردومانا فروکێن تورکیا و زڤرینا وان ل سەر گوندەوار و سەنتەرێ ناحیا شێلادزێ ژی بوویە ئاوازەکا رۆژانە و خەلک ژ گازندەکرنێ ژی تێر بوو، نوزانن ھەوارێن خوە بۆ راگرتنا بوردومانێ بگەھیننە کێ؟ ژ بەر ڤێ چه‌ندێ بۆ جارا چەندێ يه دبێژین پێدڤی یە لایەنێن شولەژێ ھزرێ د د پاراستنا خەلکی و بەرژەوەندیێن خەلکی دا بکەن، چارەسەریەکێ بۆ راگرتنا شەری و بوردومانان بکەن، بەروڤاژی دێ خەلکێ دەڤەرێ درێژیێ ب کاروانێ قوربانیدانا ململانێ يا سیاسی دەن).
د چەند رۆژێن بوری دا پشکەک ژ رۆژنامەڤان و چالاکڤانان ل سنورێ پارێزگەھا دھۆک ب گشتی و دەڤەرا ئامێدیێ ب تایبەتی دەست ب ھەوا کومکرنا ئیمزایان کریە و دخوازن نێزیکێ 30 ھزار ئیمزا کۆم بکەن، پاشان رەوانەى بەغدا بکەن، دا کو بەغدا وەکو فشارەک ل گەل تورکیا بکاربینیت بۆ راگرتنا بوردومانێ.
ئەڤرۆ نیوز، رەمەزان ھەرنی:
پشتی دیارکرنا بەربژارێ سەرۆکاتیا کابینا نوو حوکمەتا کوردستانێ ژ لایێ پارتی دیموکرانی کوردستان ڤە، پێکھاتێن سنوورێ ماددێ 140 ب ئاڤەدانکرنا دەڤەرێن خوە د گەشبینن.
عامر سلێمان، وەلاتیەکێ سنوورێ ماددێ 140ــە بۆ ئەڤرۆ نیوز دیار کر کو ئەو چاڤەرێ دکەن و د گەشبینین ب کابینا نوو یا حوکمەتا ھەرێما کوردستانێ کو دێ ژ وان نەخۆشیێن چەند سالێن بۆری د ناڤ شەری دا دیتیتن دەربازبن و دێ ژیانەکا نوو دەست پێ کەنە ڤە.
غازی ئەحمەد، چالاکڤانەکێ سنوورێ ماددێ 140 بۆ ئەڤرۆ نیوز خویا کر کو پشتی چەند سالێن نەخوەشیی و خرابکرنا گوند و جھێن ژیانا وان ئەو ب کابینا نوو یا حوکمەتا ھەرێما کوردستانێ دگەشبینن کو دێ دەستێ ئاڤەدانیێ گەھینیتە دەڤەرێن وان و ل چار سالێن داھاتی دێ ژیانەکا خوش دەرباز کەن.
بەری نوکە نوونەرێن کریستیان و شەبەکا ل دەشتا نەینەوا بۆ ئەڤرۆ نیوز دیارکربوو کو ئەو دخوازن ڤەگەڕنە ب سەر ھەرێما کوردستانێ ڤە ژ بەر وێ ئارامی و ئاڤەدانیا لێ ھەی و گۆتبوون: “نوکە ژی ئەو ب کابینا نوو یا حوکمەتا کوردستانێ دگەشبینن”.
ئه‌ڤرۆ نيوز:
به‌رپرسێ راگه‌هاندنێ ل رێڤه‌به‌ريا گشتى يا ساخله‌ميا پارێزگه‌ها دهۆكێ راگه‌هاند كو سوبه‌هى نوونه‌راتيا ئێكه‌تيا ئورۆپا و قونسلا ئيتاليا دێ سه‌ره‌دانا پارێزگه‌ها دهۆكێ كه‌ن و هژماره‌كا چالاكيان دێ هه‌بن.
حه‌مزه ره‌زيكى، به‌رپرسێ راگه‌هاندنێ ل رێڤه‌به‌ريا گشتى يا ساخله‌ميا پارێزگه‌ها دهۆكێ د داخۆيانيه‌كێ دا بۆ ئه‌ڤرۆ نيوز گۆت: “ب ئامادەبوونا قونسلا وەلاتێ ئیتالیا و نوونەرێ ئێکەتیا ئۆرۆپی ل هەولێرێ سوبه‌هى رۆژا ئێكشه‌مبى رێكه‌فتى 16ى كانوونا ئێكێ 2018 دێ هژماره‌كا چالاكيان هێنه ئه‌نجامدان”.
به‌رپرسێ راگه‌هاندنێ ل رێڤه‌به‌ريا گشتى يا ساخله‌ميا پارێزگه‌ها دهۆكێ ئاشكه‌را كر كو سوبه‌هى ده‌مژمێر 9:00 دێ هۆلا نشته‌رگه‌ريان ل نه‌خۆشخانا ته‌نگاڤيان هێته ڤه‌كرن پشتى كو هاتيه نووژه‌نكرن و گۆت: “د دووڤ دا دێ سه‌ره‌دانا بنگه‌هێ خه‌بات يێ ساخله‌ميێ ده‌ن و پرۆژێ وزا رۆژێ بۆ يه‌كێن ڤاكسيندانێ هێته ڤه‌كرن و پاشان ژى سه‌ره‌دانا نه‌خۆشخانا هيڤى كه‌ن و هۆلێن نوو يێن نشته‌رگه‌ريان ڤه‌كه‌ن”.
نيشاندان