ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 29ى چريا ئێكێ 2018ێ بهايێ زێر و زيڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 1 گرام زێرێ (ع) 18 | 37500 |
| 1 گرام زێرێ (ع) 21 | 42500 |
| 1 گرام زێرێ (ع) 22 | 44500 |
| 1 گرام زيڤ | 3000 |
ئەڤرۆ نیوز ، زنار تۆڤی:
موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز دا خویاکرن: کو ئەڤرۆ د روودانەکا ترافیکێ دا دو کەس بریندار بووینە.
ناڤهاتی زێدەتر دا دیارکرن: ئه‌ڤرۆ دوشه‌مبی 29/10/2018 ل ده‌مژمیر(10:20)سپێدێ روودانه‌كا ژ جورێ وه‌رگەریان ل سه‌ر رێیا دناڤبه‌را قه‌زا به‌رده‌ره‌ش و ناحیا كه‌له‌ك و ل نێزیك گوندێ(گرده‌پان) روودایه و د وێ روودانێدا دو كه‌س بریندار بووینه و هەروەسا هەردو هاتینه ره‌وانەكرن بۆ نه‌خوشخانێ.
ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 29ى چريا ئێكێ 2018ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:3
| 100 دولارێ ئه‌مريكى | 120.500 دينار |
| 100 يۆرۆيێ ئه‌ورۆپى | 138.000 دينار |
| 100 ليرێ توركى | 21.500 دينار |
بۆ وه‌رگرتنا نووترين پێزانينان ل سه‌ر ره‌وشا دراڤى ژماره “2” بۆ شورتكودێن “KOREK “2279 يان “Asiacell “4593 يان ژى ب ره‌نگه‌كێ به‌رده‌وام سه‌ره‌دانا مالپه‌رێ ئه‌ڤرۆ نيوز www.evronews.net بكه.
ئه‌ڤرۆ نيوز:
سپيده‌هيا ئه‌ڤرۆ رۆژا دوشه‌مبى فرۆكه‌كا ئه‌نده‌نوسى ب 189 سه‌رنشين ڤه ل نێزيك جاكارتا كه‌فته ناڤ ده‌ريايێ و گه‌ريان ل دووڤ سه‌رنشينان و پارچێن فرۆكێ يێ به‌رده‌وامه.
وه‌زاره‌تا ڤه‌گوهاستنا ئه‌ندونسيا راگه‌هاند كو ده‌مژمێر 6:20 ده‌قيقه‌يا سپێده‌هيا ئه‌ڤرۆ رۆژا دوشه‌مبى فرۆكه‌كا جورێ Boeing 737 MAX 8 سەر ب هێلا ئاسمانی يا لیۆن ئایه‌ر، فرۆكخانا جاكارتا ب جهـ هێلا و پشتى 13 ده‌قيقان ل ده‌مژمێر 6:33 ده‌قيقه كه‌فته ناڤ ده‌ريا سه‌ر ب دورگێن پانگكال پينانگ.
پشتى ديارنه‌مانا فرۆكێ ژماره‌كا زۆر يا تيمێن فرۆكه‌ڤانيێ ره‌وانه‌يى جهێ روودانێ كرن ل وێ ده‌ڤه‌رێ و فرۆكه كه‌فتيه خوار، پشكه‌ك ژ پارچێن فرۆكێ هاتينه ديتن.
ل 2013ێ فرۆكه‌كا ژ جۆرێ بۆينگ 737 ل ده‌مێ روونشتن ل دوورگا سه‌ر ب بالى ب 108 سه‌رنشين ڤه تێك شكه‌ست بوو.
ل 2014ێ ژى فرۆكه‌كا سه‌ر ب هێلا فرۆكه‌ڤانيا ئايه‌ر ئاسيا كو ژ سورابيێ د چوو سه‌نگافۆرا، كه‌فته ناڤ ده‌ريايێ و 162 كه‌س تێدا بوون، هه‌ر هه‌موو سه‌رنشينان ژى گيانێ خوه ژ ده‌ست دا.
ئه‌ڤرۆ نیوز ، زنار تۆڤى:
ده‌رهێنه‌رێ كورد جه‌مشید به‌هرامى كو خه‌لكێ رۆژهه‌لاتێ كوردستانێ یه و نوكه ل وه‌لاتێ ئه‌لمانیا دژیت، بۆ ئه‌ڤرۆ نیوز گۆت: ئه‌ڤ ساله وى ب فلمه‌كێ دكیۆمێنتارى ب ناڤێ ” ده‌نگ ” پشكدارى د شه‌شه‌مین فلمه فیسته‌ڤالا دهۆكێ دا كریه، كو ژنڤێسین و ده‌رهێنانا وى ب خوه‌یه، كو ناڤه‌رۆكا ڤى فلمى ل سه‌ر ریفراندۆما باشورێ كوردستانێ یه، هه‌ر چه‌نده ئه‌ڤ ساله ڤى فلمى پشكدارى د فلمه فیستیڤالا سیێ یا سلێمانیێ دا كربوو، لێ ژبه‌ركو ل سه‌ر ریفراندۆمێ بوو، نه‌هێلا بهێته نیشاندان، هه‌ر چه‌نده فلمێ من به‌ربژارێ وه‌رگرتنا خه‌لاتێ وێ فیسته‌ڤالێ بوو.
ناڤهاتى گۆت ژى: ئه‌ڤ فلمه به‌حسێ پێشمه‌رگه‌كێ رۆژهه‌لاتێ كوردستانێ دكه‌ت، كو د ژیێ 90 سالیێ دایه، وى پێشمه‌رگه‌ى دڤیا پشكداریێ د ریفرادۆما سه‌ربه‌خۆیا كوردستانێ دا بكه‌ت، لێ ژبه‌ركو ره‌گه‌زناما عیراقى نه‌بوو، نه‌شیا ده‌نگێ خوه بۆ ریفراندۆمێ بده‌ت، ئه‌ڤ فلمێ دكیۆمێنتارى 15 خوله‌كان یێ درێژه، هه‌رروه‌سا ئه‌ڤه ئێكه‌م جاره ئه‌و پشكداریێ د فلمه فیسته‌ڤالا دهۆكێ دا دكه‌ت، دیسا ئه‌ڤه ماوێ 22 سالانه ئه‌و كارێ سینه‌مایێ دكه‌ت.
جه‌مشید هێشتا دبێژیت: وى ل ئیرانێ پشكا شانۆیێ خواندیه و نوكه ل ئه‌لمانیا ماسته‌رێ د وارێ سینه‌ما و میدیایێ دا دخوینیت، هه‌تا نوكه وى 12 فلمێن دكیۆمێنتارى ل گه‌ل نه‌ه كورته فلمان چێكرینه، هه‌روه‌سا وى پشكدارى د شێست كارێن شانۆیى ژى دا كریه، هه‌روه‌سا نوكه ئه‌و مژوولى چێكرنا فلمه‌كێ یه ل ئورۆپا كو به‌حسێ شه‌رێ داعش دكه‌ت و دیسا ئه‌و روودانێن پشتى شه‌رێ داعش رووداین، كو ئه‌ڤه ژى فلمه‌كێ كورته و 25 خوله‌كان یێ درێژه، ل سالا بهێت دێ پشكداریێ د فیسته‌ڤالان دا كه‌ت.
ئه‌ڤرۆ نيوز:
ڤەکۆلەرێن بریتانی ئاشکرا کر کو ئەو زارۆیێن رۆژانە نیڤ سەعەتێ ئەنترنێتێ بکاردئینن، خوارنێن نەساخلەم ژ دایک و بابێن خوە دخوازن.
زانستی ئاشکرا کرییە کو ئەنترنێتێ و ئامیرێن دی یێن وەکو تێلەڤزیۆنێ و ئامیرێن ئەلکترۆنی کارتێکرنێن نەرێنی ل سەر چالاکیا جەستەیی و گەریانێ و خواندنێ ھەیە، لەورا شارەزا داخواز ژ دایک و بابان دکەن دەمێ زارۆیان ل سەر ئەنترنێتێ و ل پێش تێلەڤزیۆنێ دەستنیشان بکەن، کو رۆژانە ژ دو سەعەتان نەبووریت.
ئەنجامێن ڤەکۆلینا بریتانی ژی ئاشکرا کریە کو ئەو زارۆیێ رۆژانە نیڤ سەعەتێ ئەنترنێتێ و ئامیرێن ئەلکترۆنی ب کاردئینن، داخوازیێن وی ل سەر خوارنێن بلەز یێن نەساخلەم زێدە دبن وەکو پتاتێن قەلاندی و ڤەخوارنێن غازی و خورانێن دی یێن خراب بۆ ساخلەمیێ.ٍ
ھەروەسا ئاشکرا ژی کریە، 80% ژ وان کەسێن کومپیۆتەری بکاردئینن دبنە قوربانیێن قەلەویێ و سەنگێ زێدە، شارەزا دبێژن رێکلامێن کۆمپانیان کو ڤەخوارنێن غازی گالۆرێن گەرمێ تێدا نینن، ئێک ژ ئەگەرێن قەلوبوونێ نە د ناڤ زارۆیان دا ل ھەموو جیھانێ.
وەکو یا زانا کو قەلەوی دبیتە ئەگەرێ 13 جۆرێن پەنجەشێرێ ژ وانا پەنجەشێرا مەمکی و حەفکێ، ھەروەسا دبیتە بارگرانی ل سەر دلی و دەلیڤا تووشبوونێ ب نەخۆشیێن دەمارێن خوینێ زێدە دکەت و گەلەک نەخۆشیێن دی ژێ چێدبن.
ئه‌ڤرۆ نيوز:
پارێزەرەکێ دادگەھا شێخان راگەھاند کو کەسەکێ خودان ھەڤژین د پشت ھەڤژینا خوە را پەیوەندیەکا ئەڤینی ل گەل کچەکێ گرێ دا، دڤیا ھەڤژینا خوە بەردەت و چ مافێن وێ ژی پشتی بەردانێ نەدەتێ و گۆت: لدەف ھەڤژینا خوە ب دەنگەکێ بلند ل گەل خوشتڤیا خوە د ئاخڤت و پشتی زانی ھەڤژینا وی ژی خوشتڤیەک یێ ھەی رێ بۆ وێ خوش دکر داکو خیانەتێ لێ بکەت و بشێت وێ بەردەت بێ کو چ ماف بۆ بکەڤن.
پارێزەر عیماد عادل ئاکرەیی ل دادگەھا شێخان بۆ ئەڤرۆ دیار کر کو کەسەکێ خودان ھەڤژین د پشت ھەڤژینا خوە را پەیوەندیەکا ئەڤینی ل گەل کچەکێ گرێ دا و گۆت: (دڤیا ھەڤژینا خوە بەردەت و چ مافێن وێ ژی پشتی بەردانێ نەدەتێ، کەسەکێ بەخیل بوو، و چ زارۆ ژی نەبوون، رەفتارێن وەسا دکرن داکو ھەڤژینا وی ژێ بێزار ببیت و بێژیتێ من بەردە د ژوورا نڤستنێ ڤە ل سەر جھی لدەف ھەڤژینا خوە ل گەل ئەڤیندارا خوە د ئاخفت، ھەروەسا ئەو پەیوەندیا ھەڤژینیا دناڤبەرا واندا پشت گوە ھاڤێت بوو، و چ پیتە ب ھەڤژینا خوە نە دکر).
پارێزەری گۆتژی: (ھەڤژینا وی ژی پەیوەندیەکا ئەڤینی ل گەل کەسەکی گرێدا، پشتی ھەڤژینێ وێ زانی رێ بۆ وێ خوش دکر، داکو دەزگرێ وێ بھێتە دەف و رۆژەکێ ل گەل ئێک ببینیت و ل سەر ھەلبیت داکو بشێت ھەڤژینا خوە ب وێ تومەتێ بەردەت و لدەف مالباتا وێ ژی روو رەش بکەت و نە گەھیتە چ مافێن خوە ژی).
پارێزەری ئەو چەندە ژی ئاشکرا کر کو ھەڤژینا وی ژی دگۆت ھەردەم وی رێ بۆ وێ خوش دکر داکو پتر ل گەل دەزگرێ خوە ب ئاخڤیت و ژڤانا بدەتێ بھێتە مال لدەف وێ، دەرگەھێ بانی بۆ وێ دھێلا ڤەکری نێزیکی سێ جاران دەزگرێ وێ دھاتە مال لدەف و ھەڤژینێ وێ دزانی دا بێژیت دێ چمە سەر کاری و ئەو ب خوە نە دچوو، بەلکو چاڤدێریا وێ دکر دا بزانیت کانێ پلانا وی باش ب رێڤە دچیت یان نە).
پارێزەری زێدەتر گۆت: (پشتی پلانێن زەلامی سەر گرتین ھەڤژینا خوە ب تومەتا خیانەتا ھەڤژینیێ بەردا، بێگومان ژن دا ل سەر تاوانا خیانەتا ھەڤژینیێ حوکم بیت و چیتە د زیندانێ ڤە، بەلێ زەلامی رێکەفتن ل گەل ژنکێ کر کو ھەکە ئەو داگێرانێ ژ ھەموو مافێن خوە یێن ھەڤژینیێ بکەت، ئەو ژی دێ داگێرانێ ژ داوا خیانەتا ھەڤژینێ کەت و ژن ناکەڤیتە زیندانێ، ل دووماھیێ ژن نەچار بوو دەست ژ ھەموو مافێن خوە بەردان).
پارێزەری دا دیار کرن ژی کو ل ڤێرە ل گەل غەدرا زەلامی لێ کری وێ ژی غەدرە ل خوە کر و خیانەت ل ھەڤژینێ خوە کر، چۆنکی بەری بکەڤیتە ڤێ خەلەتیێ دشیا زیز بیت و بچیتە مالا بابێ خوە و نەزڤریت ھەتا کو زەلامێ وێ بەر ددەت).
ئه‌ڤرۆ نيوز:
خواندنێ گەلەک مفا ھەنە، لێ ڤەکۆلینەکا نوو یا زانکۆیا یێل یا ئەمریکی مفایەکێ دی لێ زێدەکر ئەو ژی درێژکرنا ژیێ مرۆڤانە.
زانایان پشتی سەربۆرەکا دوازدە سالان ئاشکرا کر کو خواندنا پرتووکان بەرھنگارییا وەستیانێ و نەئارامیێ دکەت.
ل گۆرەی ئەنجامێن ڤەکۆلینێ خواندنا پرتووکان دشێن نەئارامیێ ب رێژەیا 68% کێم بکەت، ژبەرکو خواندن یا ھاریکارە بۆ ئارامکرنا کوئەندامێ دەماران کو کارتێکرنا وێ گەلەک ژ دەرکەفتنا ل بەر بایێ پاقژ زێدەترە.
ھەر ل گۆرەی ئەنجامێن ڤەکۆلینێ، خواندنا پرتووکان کوئەندامێ دەماران ژ گەلەک نەخۆشیان دپارێزیت، د ئەنجام دا جەلتێن دلی و مەژی ب رێژەیا 40% کێمتر لێدکەت.
ھەروەسا خواندنێ شیاینَن ھزری ل نک مرۆڤی دپارێزیت ژبەرکو مەژی دپارێزیت، ژبۆ وێ یەکێ ژی ڤەکۆلینێ دوپات کرییە کو کەسێنۆ دانعەمر یێن پرتووکان دخوینن شیانێن وان یێن ھزری دپاراستینە.
ڤەکۆلینێ ئاشکرا ژی کر، ئەو کەسێن رۆژانە نیڤ سەعەتێ پرتووکان دخوینن ئانکو حەفتیێ 210 خۆلەکان، ئەو ب ریژەیا 23% کێمتر تووشی مرنێ دبن.
ئەڤرۆ نيوز:
رێڤەبەرێ بەلاڤکرنا بەرھەمێن گازێ ل پارێزگەھا ھەولێرێ راگەھاند، دەمێ چەند رۆژانە ھنارتنا گازێ ژ لایێ بەغداڤە زێدەبوویە، لەوما ل گەل دەڤەرێن چیایی وان دەست ب بەلاڤکرنا گازێ ل ناڤ سەنتەرێ باژێرێ ھەولێرێ ژی کریە و دبێژیت: ل دەستپێکێ دێ ل تاخێن ھەژار یێن باژێڕی گازێ بەلاڤ کەین.
مستەفا تاھا، رێڤەبەرێ بەلاڤکرنا بەرھەمێن گازێ ل پارێزگەھا ھەولێرێ بۆ مالپەرێ فەرمیێ پارتی دیموکراتی کوردستان گۆت: “ل دووماھیا حەفتیا بۆری مە ل تاخێ سەیداوە یێ سەنتەرێ ھەولێرێ گازا سپی ل سەر وەلاتیان بەلاڤکر، دیسا ل کەسنەزان ژی دھێتە بەلاڤکرن و دێ بەردەوام بین ل سەر بەلاڤکرنا گازێ ھەتا ھەموو وەلاتی وەدگرن”.
گۆتژی: “ل سنوورێ پارێزگەھا ھەولێرێ ب گشتی مە پێدڤی ب 100 ملیۆن لترێن گازێ ھەیە و بۆ ئەڤ سالە ژی بەرمیلەکا گازێ ب 50 ھزار دیناران دێ ل سەر وەلاتیان ھێتە بەلاڤکرن و ل دەرڤەی سەنتەرێ ھەولێرێ ب 51 ھزار دینارانە و ھەر بەرمیەلەک ژی 220 لترن”.
ئەڤرۆ نيوز:
جڤاتا وەزیرێن عیراقێ د راگەھاندنەکێ دا ئاشکرا کریە کو جڤاتا وەزیرێن عیراقێ پرۆژە قانوونا بودجا 2019 بۆ پەرلەمانێ عیراقێ ھنارتیە، داکو بکەڤیتە د بەرنامێ روونشتنێن بھێن یێن پەرلەمانێ عیراقێ دا.
جڤاتا وەزیرێن عیراقێ دوھی 28/10/2018 د وێ راگەھاندنێ دا دیار کر، پرۆژە قانوونا بودجا سالا 2019ێ بۆ پەرلەمانێ عیراقێ ھاتە ھنارتن، بۆ وێ یەکێ بکەڤیتە د بەرنامێ روونشتنێن بھێن یێن پەرلەمانێ عیراقێ دا.
ئاماژە ب وێ چەندێ ژی کریە کو جڤاتا وەزیران ب پشت بەستن ب ماددێن 61 و 80 ژ دەستوورێ عیراقێ، پرۆژە قانوونا بودجا گشتی یا عیراقێ بۆ سالا 2019 ھنارتیە پەرلەمانێ عیراقێ.
وەکو د پرۆژە قانوونا بودجا گشتی یا عیراقێ بۆ سالا 2019 دا ھاتی، بەھرا ھەرێما کوردستانێ 12,67% ھاتیە دەستنیشان کرن، دەنگۆیێ وێ یەکێ ژی ھەیە، پرۆژە قانوونا بودجێ دوبارە بۆ جڤاتا وەزیران بھێتە ڤەگەڕاندن، داکو پێداچوون بۆ ھندەک بڕگێن وێ بھێت کرن.
حوکمەتا عیراقێ د دەمێ کابینا عەبادی دا و ل دووماھی ھەیڤێن دەستھەلاتا خوە پرۆژە قانوونا بودجا گشتی یا عیراقێ بۆ سالا 2019 بەرھەڤ کربوو، نوونەرێن کورد ژی ھۆشداری ژ کێمکرنا بەھرا ھەرێما کوردستانێ دابوون.
ھەر د ڤی چارچوڤی دا ئەندامەکێ خولا سێیێ یێ پەرلەمانێ عیراقێ، ب پێدڤی دزانیت کو کار ل سەر ڤەگەڕاندنا پرۆژە قانوونا بودجا گشتی یا عیراقێ بۆ سالا 2019 بۆ وەزارەتا دارایی بھێتە کرن و پرۆژەکێ نوو ئاراستەی پەرلەمانی بھێتە کرن.
مەسعود حەیدەر، ئەندامی خولا سێیێ یێ پەرلەمانێ عیراقێ، بۆ (باسنیوز) ڕاگەیاند، ئەو ڕۆژا دەنگ بە کابینا عادل عەبدولمەھدی ھاتیە دان، عەبادی پرۆژە قانوونا بودجا گشتی یا عیراقێ بۆ سالا 2019 ئاراستەی پەرلەمانێ عیراقێ کر و گۆت: “من نەە تێبینی ل سەر نڤیسینە کو لایەنێ دستووری و قانوونی و ھونەری تێدانە، ژ بلی وێ چەندێ کو پشکا ھەرێما کوردستانێ بۆ 12,67% ھاتیە کێمکرن”.
وی ئەندامێ خولا سێیێ یێ پەرلەمانێ عیراقێ دوپات ژی کر کو دڤێت ئەو مووچێ فەرمانبەرێن ھەرێمێ و چاڤدێریا جڤاکی ل گەل مووچێ سالێن 2015 ھەتا 2017 ھەڤبەر بکەن، داکو بزانین چو دەستکاری تێدا ھاتیە کرن.
ئاشکرا ژی کر، ل دووڤ ماددێ 121 و 117ێ دستوورێ عیراقێ ھەرێما کوردستانێ، ھەرێمەکا فیدرالیە و د چارچوڤێ عیراقێ دا ھاتیە رێکخستن، بەلێ د پرۆژە قانوونا بودجا گشتی یا عیراقێ دا بۆ سالا 2019 ھەرێما کوردستانێ وەکو پارێزگەھان ناڤێ وێ ھاتیە ئینان، ئەڤە ب خوە ژی پێشێلکرنا دستوورێ عیراقێ یە.
مەسعود حەیدەر، ئەندامێ خولا سێیێ ل پەرلەمانێ عیراقێ ئاماژە ب وێ چەندێ ژی کر کو ئەو ب پێدڤی دزانیت د کۆمبوونا جڤاتا وەزیران دا ل گەل عادل عەبدولمەھدی، سەرۆک وەزیرێن نوو یێ عیراقێ دانوستاندن ل سەر ڤی بابەتی بھێتە کرن، ب سەرۆک وەزیرێن نوو بھێتە گۆتن کو ئەڤ پرۆژە قانوونا بودجێ یا عەبادی پێشکێشی پەرلەمانی کری، ل گەل بەرنامێ نوو یێ حوکمەتا وی و ئەو رێککەفتنێن سیاسی یێن د ناڤبەرا کورد و بەغدا دا ھاتینە کرن؛ ناگونجیت و گۆت: “پێدڤیە حوکمەتا نوو یا عیراقێ ب رەنگەکێ فەرمی داخوازا ڤەگەراندنا بودجێ بۆ وەزارەتا دارایی بکەت و ل سەر بنەمایێ بەرنامێ حوکمەتا نوو و رێکەفتنێن سیاسی پرۆژە قانوونا بودجێ بھێتە بەرھەڤکرن و پاشی پێشکێشی پەرلەمانی بھێتە کرن”.
ل دۆر رۆلێ دکتۆر فوئاد حسێن، وەزیری نوو یێ دارایی ل حوکمەتا عیراق بۆ ڕێگریکرن ل پرۆژە قانوونا بودجێ کو عەبادی پێشکێشی پەرلەمانی کریە، مەسعود حەیدەر گۆت: ”ئەزێ پشتراستم دێ رۆلەکێ ئەرێنی ھەبیت، بۆ ڤێ چەندێ ژی ئەم دێ ل گەل د ھەڤکار بین، من ب خوە دووڤچوون ب پرۆژە قانوونا بودجا عیراقێ یا سالا 2019 کریە و نوکە مژوولی بەرھەڤکرنا راپۆرتەکێ مە ل سەر، چونکو ب ھەموو خەلکێ کوردستانێ ڤە یا گرێدایە، دیسا رۆلێ فراکسیۆنێن کوردستانی ژی یا گرنگە پتر بزاڤان بکەن بۆ دوبارە ڤەگەڕاندنا پرۆژە قانوونا بودجا عیراقێ یا سالا 2019 بۆ وەزارەتا دارایی”.
نيشاندان