ئەڤرۆ نیوز، لەزگین جوقی:

بەرپرسێ پشکا رەوشەنبیری ل دەستەیا بلندا بنگەھێ لالش یێ رەوشەنبیری و جڤاکی ل دھۆکێ دیار کر کو پشتی سێ رۆژان کوردێن ئێزدی ب رۆژی دبن رۆژا چارێ د کەنە جەژن و گۆت: “ل رۆژا 14/12/2018ێ ئێزدی دێ رێورەسمێن جەژنا رۆژیێن ئێزی گێڕن”.

شەمۆ قاسم، بەرپرسێ پشکا رەوشەنبیری ل دەستەیا بلندا بنگەھێ لالش یێ رەوشەنبیری و جڤاکی ل دھۆکێ بۆ ئەڤرۆ نیوز دیار کر کو ئێزدیان دەست ب گرتنا رۆژیێن خوە کریە و پشتی گرتنا سێ رۆژیان دێ بیتە جەژنا رۆژیێن ئێزی، ئانکو ل رۆژێن سێشەمب و چارشەمب و پێنجشەمبی ئێزدی ب رۆژی نە و رۆژا دووڤ دا رێورەسمێن جەژنێ دھێنە گێڕان و گۆت: “رێورەسمێن جەژنێ ژی ل مالان دھێنە گێران ل ئێڤاریا جەژنێ سەوکا دپێژن ب سەر دەرو جیرانان دا بەلاڤ دکەن ھەتا کو نانێ وان تێکەلی ئێک دبیت و خەلک خوارنێ ب خێرا مریێن خوە ددەن و خەلک بۆ پێرۆزکرنا جەژنێ قەستا مالێن ھەڤال و دوست و ناسیارێن خوە دکەن”.

ناڤھاتی ئاماژە دا وێ چەندێ کو ل سالا 2014 دەمێ کارەساتا ب سەری مللەتێ ئێزدی ھاتی جڤاتا روحانیا ئێزدیان بڕیارا دا رێورەسمێن جەژنێ نەھێنە گێران و بۆ دەمێ چەند سالان ھاتنە راگرتن، لێ پشتی پێشمەرگێ کوردستانێ شنگال رزگارکری جارەکا دی جڤاتا روحانی بڕیارا دا ئێزدی رێورەسمێن جەژنێن خوە ب گێرن و گۆت: “تیرۆرستێن داعش 68 مەزارگەھێن ئێزدیان پەقاندن پشتی دەڤەرێن ئێزدیان ھاتینە رزگارکرن ژ لایی پێشمەرگەی ڤە ئێزدیان دەست ب ئاڤاکرنا مەزارگەھێن خوە کرن وەکو بەرسڤدانەکا بۆ تیرۆرستێن داعش کو ئێزدیاتی ھەموو دەمان دگەشبوونێ دایە”.

ل دووماھیێ شەمۆ قاسم دیار کر کو کوردێن ئێزدی ھەشت جەژن ھەنە ژوان ژی رێورەسمێن ھندەک جەژنان ل پەرستگەھا لالش دھێنە گێران وەکو جەژنا جەمایێ و جەژنا چلێ ھاڤینێ و جەژنا زڤستانێ و جەژنێن دی رێَورەسمێن وان ل ناڤ جڤاکێ ئێزدی دھێنە گێران وەکو جەژنا سەر ساڵێ و جەژنا رۆژیێن ئێزی و جەژنا بێلندێ و جەژنا خدر ئلیاس و جەژنا قوربانێ.

ئەڤرۆ نیوز، لەزگین جوقی:

بەرپرسێ رێکخراوا کوردستان بۆ پاراستنا مافێن ئاژەلی ل پارێزگەھا دھۆکێ بۆ ئەڤرۆ نیوز دیارکر کو نوکە وەرزێ کۆچبەریا بالندان بۆ ھەرێما کوردستانێ دەست پێ کریە، نوکە ل سەر سکرێ پارێزگەھا دھۆکێ بالندە زێدەبووینە وەکو نورس و حاجی لەق لەقە.

د. سلێمان تەمەر، بەرپرسێ رێکخراوا کوردستان بۆ پاراستنا مافێن ئاژەلی ل پارێزگەھا دھۆکێ دیار کر کو ل ڤی دەمێ سالێ ژ بەر ھەبوونا سەرمایەکا دژوار ل وەلاتێن ئورۆپی بالندە ژ وان وەلاتان کوچبەر دبن قەستا ھەرێما کوردستانێ و عیراقێ و سووریا و تورکیا و ئێران و ھندەک وەلاتێن دی دکەن و گۆت: “سەقایی دەڤەرا مە ژ یێ ئورۆپا خوەشترە ژ بەر ڤێ چەندێ د ڤی وەرزی دا چەندین جۆرێن بالندان قەستا دەڤەرێ دکەن وەکو حاجی لەق لەق و بالندێ ژ جۆری نورس پشتی ل ئورۆپا سەرما دژوار نەمینت ئەڤ جۆرێن بالندەی جارەکا دی قەستا وەلاتێن ئورۆپا دکەن و دچنە بەر لێڤێن دەریایان”.

ناڤھاتی ئاماژە دا وێ چەندێ کو ئاشکرا کر کو ژ بەر رەشاندنا دەرمانێن کیمیاوی و سۆتنا دارستانی و بەردەوامی دان ب نێچیری و دانانا تورێن کارەبێ مەترسیا نەمانێ ل سەر ھندەک جۆرێن گیانەوەران ل پارێزگەھا دھۆکێ دروست بوویە ب تایبەتی ژی وەکو شێر و ھرچ و پلنگان.

ئەڤرۆ نیوز، لەزگین جوقی:
رێکخەرێ چالاکیا ساخکرنا سالڤەگەرا داستانا لومانا بۆ ئەڤرۆ نیوز دیار کر کو ب ئامادەبوونا سەرۆک بارزانی سالڤەگەرا داستانا لومانا ئەڤرۆ 12/12/2018 ل دەمژێر 1:00 نیڤرۆ دێ ب چەندین چالاکیان ل ھۆلا کونفرانسان ل زانکۆیا دھۆک ھێتە ساخکرن.
غازی گەردی، رێکخەری چالاکیا ساخکرنا سالڤەگەرا داستانا لومانا بۆ ئەڤرۆ نیوز دیار کر کو جەنابێ سەرۆک بارزانی دێ پەیڤەکێ پێشکێش کەت وەکو د ناڤ بەرنامێ چالاکیێ دا ھاتیە دیارکرن و دێ چەندین کەسایەتی و کەسوکارێن سەربلندێن شەھیدان و ھژمارەکا مەزن یا مێھڤان بەرھەڤ بن و گۆت: “ئەڤ چالاکیە ژ لایێ کۆڤارا سەنگەر و پێشمەرگە ڤە ب ھەماھەنگیی و ھەڤکاریا فەرماندەیا دھۆکێ و لەشکرێ ئێک و گولان ڤە ھاتیە رێکخستن”.
ناڤھاتی ئاماژە دا وێ چەندێ کو ل سالا 1961 پێشمەرگێ قەرەمان کوردستانێ داستانا لومانا ل شۆرەشا ئیلولێ تۆمارکر د وی دەمی دا ڤێ داستانا مەزن حوکمەتا بەعس نەچارکر بھێن دانوستاندنێ بکەن، چونکو پێشمەرگێ کوردستانێ ل وی دەمی ھژمارەکا مەزن یا لەشکرێ حوکمەتا بەعس وەکو دیل دەستەسەرکرن و گۆت: “د ڤێ چالاکیێ دا ژبلی خواندنا پەیڤان دی پێشانگەھەکا وێنان ھێتە ڤەکرن بۆ جارا ئێکی دێ ھندەک وێنە ھێنە نیشادان یێن شورەشا ئیلولێ و سەرۆک بارزانی و فلمەکێ دیکومینتاری ل سەر داستانا لومانا ل زاویتەی دھێتە نیشادان دگەل بەلاڤکرنا ھژمارەکا مەزن ژ کوڤارا سەنگەر و پێشمەرگە”.