ئەڤرۆ نیوز، نەوزاد ھلۆری:

نێزیکێ دو سالایە کار د چێکرنا خالا گومرکی یا “زێد” ئەوا دکەڤیتە د ناڤبەرا قەزا مێرگەسوور و باکوورێ کوردستانێ دھێتەکرن، بەلێ نوکە ژ بەر بارینا رێژەیەکا زۆرا بەفرێ کار د چێکرنا وێ گومرکێ دا ھاتە راگرتن، رێڤەبەرێ ناحیا شێروان مەزن دیارکر کو رەنگە چەند ھەیڤەکا کار بھێتە راگرتن.

کوڤان رەشید، رێڤەبەرێ ناحیا شێروان مەزن یا سەر ب قەزا مێرگەسوور بۆ ئەڤرۆ نیوز گۆت: (خالا گومرکی یا “زێد” نێزیکێ دو سالایە بەردەوام کار ل سەر چێکرنا وێ دھێتەکرن و کارێن وێ بەر ب دووماھیێ ڤە دچن، ژ بەر کو رێیەکا چیایی و ئاسێ و ب زەحمەتە کاروبارێن وێ ب خاڤی ب رێڤە دچن، نوکە کو بوویە وەرزێ بارینا بەفرێ و گرتنا رێیا و ھەبوونا چەندین ئاستەنگان د رێیا ئامیرێن چێکرنا رێ دا، کار د چێکرنا گومرکا “زێد” دا ھاتیە راگرتن).

زێدەتر گۆت: (ئەم نوزانین کا دێ بۆ دەمێ چەندێ ھێتە راگرتن، بەلێ ھندی بەفر ل وان دەڤەران ھەیە و دباریت کار ژی دێ ھێتە راگرتن و رەنگە چەند ھەیڤەکان ڤەکێشیت، بەلێ ب پشت راستی دێ کارێن وێ ھێنە تمامکرین و بیتە ئێک ژ خالێن گرنگ د ناڤبەرا ھەرێما کوردستان و باکوورێ کوردستانێ و تورکیا دا).

ئەڤرۆ نیۆز:

 ئەڤرۆکە سێشەمبیێ ١١/١٢/٢٠١٨ هەر دو مەکتەبێن سیاسی یێن پارتی دیموکراتی کوردستان و ئێکەتی نیشتمانی کوردستان ل هەولێرێ کۆمبوون و دانوستاندن ل دۆر چەندین بابەتێن گرنگ هاتنە کرن.

ئێکەم: رێکخستن و باشترکرنا پەیوەندیێن پارتی و ئێکەتیێ د بیاڤێن سیاسی، دبلۆماسی و ئابووری دا کو ل گۆر پێویستیا نها بیت و ببیتە پشتەڤانیەکا باش بۆ حوکمەتا هەرێما کوردستانێ.

دویەم: پێڤکە کارکرن بۆ چارەکرنا ئاریشێن د ناڤبەرا حوکمەتا هەرێما کوردستانێ و بە‌غدا دا، ژناڤبرنا ئاستەگیان و چارەکرنا ئاریشێن کەرکووکێ و دەڤەرێن کوردستانی یێن دەرڤەیی ئیدارا هەرێما کوردستانێ و هەموو ئەو بابەتێن کو ئاریشە ل سەر هەنە و بهێزی و ئامادەبوونا کوردان ل بەغدایێ.

سێیەم: پێکئینانا لیژنەکا هەڤپشک بۆ ئامادەکرنا پرۆژەکا هەڤپشک بۆ رێکخستنا پەیوەندیان ب رەنگەکێ گشتی بۆ ئێک هەلویستیا کوردان و چاوانیا سەرەدەری کرنێ ل گەل بە‌غدا و چارەکرنا ئاریشێن ناڤخوەیی یێن هەرێما کوردستانێ و دەڤەرێ، و دووڤچوونا هەموو روودانان بهێتە کرن.

چار: پشتەڤانی کرن ل لیژنا تایبەت یا پێکئینانا کابینا نەهێ و هەموو سازیێن دیتر بۆ دابینکرنا ئارامیێ و حوکمرانیێ ل سەر بنەمایێ یاسا و پێکڤەکارکرنێ ل گەل وان پارتێن دی کو دێ پشکداریێ د کابینا نوو یا حوکمەتێ دا کەن.

پارتی دیموکراتی کوردستان

ئێکەتی نیشتمانی کوردستان

١١/١٢/٢٠١٨