ئەڤرۆ نیوز،بارزان مزووری:

رێڤەبەرێ گەشتوگۆزارێ ل قەزا سۆران بۆ ئەڤرۆ نیوز دیار کر کو رێیا دناڤبەرا بێخال بۆ خەلیفان ئەڤرۆ رۆژا 10/12/2018 ێ ھاتیە داخستن.
بارزان محەمەد، رێڤەبەرێ گەشتوگۆزارێ ل قەزا سۆران ئاشکرا کر کو رێیا دناڤبەرا بێخال بۆ خەلیفان دا ژ بەر ھاتنا خوارا کەڤرێن مەزن ژ چیایی ھاتیە داخستن و گۆت: “ئەڤ کەڤرە کەفتینە د رێیێ دا و رێ ب تمامی داخستیە”.

ناڤھاتی ئاماژە دا وێ چەندێ کو تیمێن سەخبێریا رێک و پرا نھا کار دکەن بو دووبارە ڤەکرنا وێ رێ یێ ژ بەر چوونا وەلاتیێن وێ دەڤەرێ و چوونا گەشتیاران بو جھێن گەشتیاری .

ئەڤرۆ نیوز:

ژ ئەگەرێ ھاتنا بەفر و بارانێن زۆر و داخستنا ھندەک رێیێن دەڤەرا بەرواری بالا و تێکچوونا کەش و ھەوای، رێڤەبەریا دەرگەھێ سەرزێری دەمێ ھاتنوچوونا رێڤینکان دگوھۆریت.

رێڤەبەریا دەرگەھێ سەرزێری د راگەھاندنەکێ دا کو دانەیەک ژێ بۆ ئەڤرۆ نیوز ھنارتیە دیار کریە، ھاتنا بەفرێ ل دەرگەھێ سەرزێری نەبوویە ئەگەرێ داخستنا دەرگەرھێ سنووری یێ سەرزێری و ھاتنوچوون تێدا یا بەردەوامە و ئەم داخواز ژ ھەموو رێڤینکان دکەین بزانن رێ یا ڤەکریە، بەلێ دەمێ ھاتن و چوونا رێڤینکان یێ ھاتیە گوھۆرین.

د وێ راگەھاندنێ دا ھاتیە کو ژ بەر ھاتنا بەفرێ، ھاتنوچوونا رێڤینکان دێ ل دەمژمێر 9:00ی سپێدێ ھەتا 5:00 ی ئێڤاری دێ دەرگەە یێ ڤەکری بیت و ھاتنوچوون تێدا دێ یا ئاسایی بیت.

د سالا بۆری دا ل 2017 ل دەرگەھێ سەرزێری دا 176 ھزار کەسان ب مەرەما سەرەدان و گەشتیاریێ د دەرگەھێ سەرزێری دا ھاتنوچوون کریە ژ ھەرێما کوردستانێ بۆ وەلاتی تورکیا و ژ تورکیا بۆ کوردستانێ”. ل رێککەفتی 2/9/2015 ب شێوەیەکێ فەرمی دەرگەھێ سنووری یێ سەرزێری ل ناحیا کانی ماسێ دناڤبەرا وەلاتێ تورکیا و ھەرێما کوردستانێ دا ھاتیە ڤەکرن و د حەفتیێ دا ب تنێ پێنچ رۆژان دھێتە ڤەکرن.