ئەڤرۆ نیوز، قائید میرۆ:
بڕیارا پارتی دیموکراتی کوردستان بۆ بەربژارکرنا نێچیرڤان بارزانی بۆ پۆستێ سەرۆکێ ھەرێما کوردستانێ و مەسڕور بارزانی بۆ پۆستێ سەرۆک وەزیرێن ھەرێما کوردستانێ بوویە جھێ ئومێدا جەماوەرێ کوردستانێ و مامۆستایەکا زانکۆیێ ژی دیار کر کو پارتی بڕیارەکا وێرەک و گونجایی بۆ قووناغا نوکە یا ھەرێما کوردستانێ دەرکریە و گۆت: ” حوکمەتەکا بھێز دێ ھێتە دامەزراندن و کوردستان دێ بیتە خودان دستوورێ خوە”.
ئاشنا بابان، مامۆستایا زانکۆیێ بۆ ئەڤرۆ نیوز دیار کر کو بڕیارا جڤاتا سەرکردایەتیا پارتی بۆ بەربژارکرنا نێچیرڤان بارزانی و مەسڕوور بارزانی د جھێ خوە دایە، دێ کار ھەبیت ل سەر بەر ب پێشڤەبرنا ھەرێما کوردستانێ، ژ بەر کو نێچیرڤان بارزانی ژ لایێ دبلۆماسی ڤە پەیوەندیێن بھێز دگەل جیھانا دەرڤە ھەنە و دشێت ب رێیا پۆستێ سەرۆکێ ھەرێما کوردستانێ ئەڤان پەیوەندیان پێشڤەببەت، ب تایبەتی دێ دەستھەلات ژی ھەبن بۆ پشتەڤانیکرنا حوکمەتا مەسڕووری.
ناڤھاتیێ ئاماژە دا وێ چەندێ کو مەسڕوور بارزانی ژی ھێزەکا دی تێدا ھەیە و ھەر دو پێکڤە دێ کابینەکا بھێز ل ھەرێما کوردستانێ ب رێڤەبەن بۆ چار سالێن داھاتی یێن حوکمڕانیا کوردستانێ و گۆت: “ب دیتنا من گرنگیا بڕیارا پارتی دڤێ چەندێ دایە، شیایە دو گەنجێن خوە بەربژاربکەت بۆ وەرگرتنا دو پۆستێن گرنگ و ھەستیار، کو دشێن ب رێیا ھەر دو سەرۆکاتیا وەلاتی بەر ب پێشڤە ببەن و زێدەتر خزمەتا وەلاتیێن ھەرێما کوردستانێ بھێتەکرن، پارتی ئیدی وێرەکانە بڕیاردا ل ئەڤی سیستەمێ چاڤلێکرنێ دەرکەڤیت و بەر ب کوردستانەکا بھێز پێنگاڤێن باش ب ھاڤێژیت”.
ئەڤرۆ نیۆز، قائید میرۆ:
پشتی دو جاران کۆمبوونا جڤاتا نوونەرێن عیراقێ ھاتیە دەستپێکرن، بەلێ ھژمارەکا کۆتلێن پەرلەمانی شکەستن ب کۆمبوونا پەرلەمانی ئینا.
ھندرین لەزگین دۆسکی، ئەندامێ فڕاکسیۆنا پارتی ل جڤاتا نوونەرێن عیراقێ بۆ ئەڤرۆ نیوز دیار کر کو جڤاتا نوونەران دوھی بۆ دەنگدانێ ل سەر ھەشت وەزیرێن کابینا حوکمەتا عیراقێ کۆمبو، جارا ئێکێ رێژا قانوونی تەمام نەبوو، بەلێ جارا دویێ 168 ئەندام بەرھەڤی کۆمبوونا جڤاتا نوونەران بوون و قورئان ژی ھاتە خواندن، بەلێ ھژمارەکا پەرلەمانتارێن کۆتلا سائیرۆن ھاتنە د ناڤ کۆمبوونێ دا و گۆتن رێژا قانوونی تەمام نەبوویە و دێ پەرلەمانتارێن بەرھەڤبووی ھێنە ھژمارتن.
ناڤھاتی ئاماژە دا وێ چەندێ کو پەرلەمانتار ھاتنە ھژمارتن، لێ جێگرێ ئێکێ یێ سەرۆکێ پەرلەمانی و دو پەرلەمانتاران ھۆلا کۆمبونێ بجە ھێلا و دیسان کۆمبوونا بۆ نیڤ دەمژمێرێ ھاتە گیرۆکرن، پشتی بۆ جارا سیێ دەست ب کۆمبونێ ھاتیەکرن ئیدی شەڕ پەیدابوو و کۆمبوون ھاتە پاشخستن و گۆت: “ھەکە ب ڤی دەست و داری بیت کۆتلێن پەرلەمانی نەگەھنە رێکەفتنێ ب زەحمەت ئەڤ پرسە بھێتە ئێکلاکرن”.
ئه‌ڤرۆ نيوز:
رێڤەبەریا گشتیا کەشناسی و بیڤەلەرزێ ل ھەرێما کوردستانێ راگەھاند کو سوبەھی رۆژا پێنجشه‌مبى رێکەفتی 6ى كانوونا ئێكێ 2018ێ ئه‌سمان دێ ئه‌ورێ ته‌مام بيت ل گه‌ل باران بارينێ ل ده‌مێن جودا.
پشکا پێشبینیان ل رێڤەبەریا گشتیا کەشناسی و بیڤەلەرزێ ل ھەرێما کوردستانێ د نڤیسارەکێ دا کو دانەک بۆ ئەڤرۆ نیوز رەوانە کرینە راگەھاند کو دھێتە پێشبینیکرن ئه‌سمان ئه‌ورێ ته‌مام بيت ل گه‌ل باران بارينێ ل ده‌مێن جودا.
پشکا پێشبینیان دایە زایە زانین کو دێ ئله‌زاتيا بايى د ناڤبەرا 10 ھەتا 20کم دا و ماوێ دیتنێ ژی دێ د ناڤبه‌را 7 بۆ 9كم دا بیت، پلێن گەرمێ ژی دێ د ناڤبەرا 8 بۆ 14 پلان دا بن.
پشکا پێشبینیان ل رێڤەبەریا گشتیا کەشناسی و بیڤەلەرزێ ل ھەرێما کوردستانێ هه‌ر وه‌سا دايه زانين ژى كو ل ده‌ڤه‌رێن چيايى ژى به‌فر دێ باريت.
ئه‌ڤرۆ نيوز:
هشيار زێبارى، ئه‌ندامێ مه‌كته‌با سياسى يا پارتى ديموكراتى كوردستان و وه‌زيرێ به‌رێ يێ دارايى ل عيراقێ ده‌رباره‌ى سه‌رنه‌كه‌فتنا حوكمه‌تا نها يا عيراقێ ب سه‌رۆكاتيا عادل عه‌بدولمه‌هدى هوشدارى دا.
پشتى رۆژا سێشه‌مبى 4ى كانوونا ئێكێ 2018 جڤاتا نوونه‌رێن عيراقێ نه‌شيايى ده‌نگى ل سه‌ر كانديدێن هه‌شت وه‌زاره‌تێن حوكمه‌تا نوو يا عيراقێ بده‌ت كو هێشتا وه‌زير نينن و شه‌ره‌ده‌ڤ و تێكدانێ ل جڤاتا نوونه‌ران ل سه‌ر وى پۆستى دروست دكه‌ن.
هشيار زێبارى ل تۆڕا جڤاكيا فه‌يسبۆكى نڤيسيه: “عادل عه‌بدولمه‌هدى د ده‌ربازكرنا هه‌شت وه‌زيرێن نوو دا شكه‌ستن ئينا و نه‌شيا حوكمه‌تێ ته‌مام بكه‌ت، ئه‌گه‌رێ وێ ژى خرابيا پلاندانانێ و ب ده‌ست ڤه نه‌ئينانا ته‌وافقا سياسى يا پێدڤى بوو، كو به‌رى روونشتنا جڤاتا نوونه‌ران بهێته ئه‌نجام دان ب ده‌ست ڤه ئينابا”.
گۆتژى: “جه‌مسه‌رێن دژوارێن سياسى يێن شيعان و كوراتيا قه‌يرانان و له‌رزوكيا پشته‌ڤانيا سياسى يا كوتلان بۆ سه‌ر سه‌رۆك وه‌زيرێن عيراقێ به‌ر ب ئاراسته‌ى شكه‌ستنا حوكمه‌تا نها دچيت و هه‌ڤدژى به‌رژه‌وه‌نديێن گه‌ل و وه‌لاتى يه”.
هشيار زێبارى ئاماژێ ب وێ چه‌ندێ ژى دكه‌ت كو پشتى ئه‌ڤا ل جڤاتا نوونه‌ران روودايى، “گوله‌يا ئاگه‌هداركرنێ يه و په‌يامه‌كا دلته‌نگيێ يه و دێ داهاتى مه‌زنتر بيت”.
ئەڤرۆ نیۆز، رەمەزان ھەرنی:
بەرھەمێ سروشتیێ کڤارکێ ل بازارێن کەسکاتی بازارەکێ باش ھەیە و گەلەک کرین و فروتن ب بەرھەمێ کڤارکێ دھێتە کرن و گرانتر ژ ھەموو جۆرێن گوشتی دھێتە فرۆتن و ئەڤ بەرھەمە گەلەک یێ زۆرە ل دەڤەرا ئاکرێ.
نزار زەکەریا، وەلاتیەکێ دەڤەرا ئاکرێ یە بۆ ئەڤرۆ نیوز دیار کر کو ل دەڤەرێن چیایی ھەموو جۆرە بەرھەمەک شین دبیت و پرانیا جاران بۆ فروتنێ ئەو دچنە چیایان جودا ژ ھەموو بەرھەمان کڤارک گەلەک یا زۆرە و بھایێ وێ ژی گەلەک یێ گرانە ژ 10 ھەتا 15ھزارا دیناران ئەو کیلویێ د فرۆشن و گەلەک رۆژان چار ھەتا پێنج کیلۆیان ل چیای دکەن پاشی ل جھێ فرۆتنا کەسکاتی و گۆمرکێن فێقی دفرۆشن و گەلەک ب ساناھی دھێتە فرۆتن، بەلێ ھەتا ل چیایی دگەریێن گەلەک ماندوو دبن.
ژ ئالیێ خوە ڤە خەلیل محەمەد، خودانێ گۆمرکا کەسکاتی و فێقی ل دەڤەرا ئاکرێ بۆ ئەڤرۆ نیوز ئاشکرا کر کو بەرھەمێ کڤارکێ خوش بۆ وان دھێت و ئەو کێلویێ ب نەە ھەتا 12 ھزار دیناران دکرن و ب 14 ھەتا 15 ھزار دیناران دفرۆشن و گۆت: “دەڤەرا ئاکرێ گەلەک یا دەولەمەندە ب بەرھەمێ سرۆشتێ یێ خوارنێ ل چیایان، بەلێ چو بەرھەمەک وەکو کڤارکێ نیە و بھایێ وێ ژ یێ گۆشتێ بەرخی و گیسکی و گۆلکی گرانترە”.
ئه‌ڤرۆ نيوز:
بڕياره ئه‌ڤرۆ به‌لاڤكرنا مووچێ هه‌يڤا ئيلۆنێ يێ فه‌رمانبه‌رێن هه‌رێما كوردستانێ ده‌ست پێ بكه‌ت و وه‌زاره‌تا ئێكێ ژى پێشمه‌گه دێ مووچه‌ى وه‌رگريت.
ب گۆره‌يى پێزانينێن ئه‌ڤرۆ نيوز، ئه‌ڤرۆ رۆژا چارشه‌مبى به‌لاڤكرنا مووچێ هه‌يڤا ئيلۆنێ دێ ده‌ست پێ كه‌ت و ديوان و ليوايێن سه‌ر ب وه‌زاره‌تا پێشمه‌رگه‌ى دێ مووچه‌ى وه‌رگرن.
بڕياره سوبه‌هى رۆژا پێنجشه‌مبى ژى هێزێن 70 و 80 مووچه‌ى وه‌ربگرن و پاشان ژى ل ده‌سپێكا حه‌فتيا بهێت دێ هه‌ر ئێك ژ په‌روه‌رده و ساخله‌ميێ مووچه‌ى وه‌رگرن.
ئەڤرۆ نیۆز، ئەمیر ئەترووشی:
حوكمەتا هەرێما كوردستانێ یا بەرهەڤیان دكەت بۆ هندێ پێشینا خانوبەران بدەت، بەلێ ل دەستپێكێ دێ پێشینە بۆ وان بیت یێن بەری سالا 2014 نیڤا پێشینێ وەرگرتی و نیڤ مای و پشتی هینگی دێ دەست ب یێن دی هێتە كرن.
سەباحەت حەمە تاهر، رێڤەبەرا بانكا خانوبەران ل وەزارەتا دارایی یا حۆكمەتا هەرێما كوردستانێ بۆ ئەڤرۆ نیۆز دیار كر، بەرهەڤی دهێنە كرن كو د سالا 2019 دا، حۆكمەت جارەكا دی دەست ب بەلاڤكرنا پێشینا خانوبەران بكەت و بۆ جارا ئێكێ دێ بۆ وان كەسان بیت یێن بەری سالا 2014 نیڤا قستێ خوە وەرگرتی و نیڤ نە وەرگرتی و دێ ئەو وەلاتیە نیڤا مایی ژ قستێ خوە وەرگرن و پاشی دێ دەست ب یێن دی هێتە كرن.
ئاشكرا ژی كر كو ئەو وەلاتیێن بەری سالا 2014 نیڤا قستێ خوە كو 12 ملیۆن و 500 هزار دینار وەرگرتین، دێ نیڤا پارێ مایی ژی هێتە وەرگرتن كو 12 ملیۆن و 500 هزار دینارن و گۆت: ئەوێن مامەلا خوە ب دووماهی ئینای و ڤەدیتن بۆ خانیێ وان هاتیە كرن، دێ ل رێزبەندا دوویێ بیت و پشتی هینگی دێ گەرا وان وەلاتیان بیت یێن پێشكێشكرین و ڤەدیتن بۆ خانیێن وان نەهاتیە كرن.
ل سالا 2008 حۆكمەتا هەرێما كوردستانێ دەست ب دانا پێشینا خانوبەران كریە و ل سالا 2014 ژ ئەگەرێ قەیرانا دارایی یا حۆكمەتا هەرێما كوردستانێ ڤەگرتی پێشینە هاتینە راگرتن و د ماوێ وان شەش سالان دا حۆكمەتا هەرێمێ پێشینا خانۆبەران دایە 26 هزار كەسان و مفاداربووینە.
ئه‌ڤرۆ نیوز:
سه‌ندیكا نۆشدارێن كوردستانێ، تایێ دهۆكێ، د به‌یاننامه‌كێ دا، كو ئاراسته‌ى سه‌رۆكایه‌تیا دادگه‌ها پارێزگه‌ها دهۆك، جڤات و پارێزگه‌ها دهۆك و سه‌ندیكا نۆشدارێن كوردستانێ ئه‌نجومه‌نێ بالا و رێڤه‌به‌ریا گشتى یا ساخله‌میا دهۆك كریه، ب دژوارى هێرشا ل سه‌ر پروفیسور د.كه‌مال احمد سعید، بسپورێ نشته‌رگه‌ریا گشتى ل ده‌مێ خزمه‌تكرنێ ل كلینیكا خوه یا تایبه‌ت ل سلێمانیێ شه‌رمزار كریه.
سه‌ندیكا نۆشدارێن كوردستانێ، تایێ دهۆكێ داخواز ژ هه‌مى دام و ده‌زگه‌هان كریه كو ب رژدى كار ل سه‌ر كونترولكرنا ڤێ دیاردا مه‌ترسیدار بهێته كرن و یاسا سه‌روه‌ر بیت و رێكارێن یاسایى دگه‌ل سه‌رپێچكارا بهێته كرن.
ده‌قێ به‌یاننامێ كو دانه‌یه‌ك بۆ ئه‌ڤرۆ نیوز هنارتیه
ئەڤرۆ نیوز، زنار تۆڤی:
دەرهێنەرێ فلمێ دکیۆمێنتاری روو ب بوو بوونا مرنێ ب کەتەری یێ پێشمەرگێ کوردستانێ سەروەر عەبدوللا بۆ ئەڤرۆ نیوز دیارکر: کو فلمێ دکیۆمێنتاری روو ب رووبوونا مرنێ ب کەتەری خەلاتێ (Blecong) یێ باشترین کورتە فلمێ ئاسیا ل سێزدەمین فلمە فیستەڤالا (Jogja-Netpac) ل وەلاتێ ئەندونیسیا کو ئێکە ژمەزنترین فلمە فیستەڤال ل کیشوەرێ ئاسیا وەرگرت.
ناڤهاتی گۆت ژی: فلمێ دکیومێنتاری روو ب روۆ بوونا مرنێ ب کەتەری یێ ئەندازا سەربازی یا پێشمەرگەیە، کوو هەموو قارەمان و پشکدارێن ڤی فلمی ئەفسەر و پێشمەرگێن سەر ب کەتیبەیا ناڤبری ڤەنە، ماوێ فلمی (45) خولەکن، ئەڤ فلمە ل پتریا میحوەرێن شەری د ماوێ دو سال و نیڤا دا هاتیە وێنەکرن، هەروەسا د دەمێ وێنەکرنێ دا سێ ژ قارەمانێن فلمی شەهید دبن، و ئێك ژی بریندار دبیت و پەککەفتی بوویە، دیسا ئەڤ فلمە ب گشتی کورتیەکە لسەر قارەمانی و لێهاتی و گیان فیداییا پێشمەرگێن کوردستانێ یە ل شەرێ دژی تیرورستێن داعش، کارێ ڤێ تیمێ راکرن و ژناڤبرنا بومب و مینێن داعشێ یە، ناڤهاتی گوت ژی: ئەڤ فلمە وان ئاستەنگ و زەحمەت و مەترسیێن دکەڤنە درێیا ڤێ تیمێ دا ددەتە دیار کرن، هەر چەندە وان کارەکێ گەلەک مەترسیدار ئەنجامدایە و دیسا گەلەک ئاستەنگ هەبوون بو چێکرنا ڤی فلمی دناڤا بومب و مینا دا و دناڤ تەکتیکێن داعشێ یێن سەردەم دا، بەلێ ئەو یێ رژد بوو ڤی فلمی بەرهەم بینیت و تمام بکەت، هەروەسا وی هەموو ئەو روو ب روو بوونێن ل گەل مرنێ ب چەند کەل و پەلێن سادە مینا کەتەر و شەفرە و چەقویا دڤی فلمی دا دکیومێنت کرینە و نیشا جیهانێ داینە، هەتا نوکە ئەڤ فلمە ل چەندین ولاتێن جیهانی هاتیە نیشاندان و ل چەندین فلمە فیستەڤالێن نێڤدەولەتی پشکدار بوویە چەندین خەلاتێن نێڤدەولەتی وەرگرتینە.
نيشاندان