ئەڤرۆ نیوز:

دەقێ بەیانناما بارزانی:

بناڤێ خودایێ بەخشندە و میهرەبان

16 ئۆكتۆبەرێ ڕۆژەکا تاریە د مێژوویا میللەتێ مەدا. د وێ ڕۆژێ دا بوو كو خیانەتا نەمەردانە، ل ئومێد و هیڤیێن گەلەکێ مەزلووم هاتە كرن، ب ئەگەرێ دەستەکێ نافخۆیی ڤە یاریەكا بێویژدانانە ب چارەنڤیسێ گەلێ مە هاتە كرن و ئەو ئاخا ب خوینا هزاران کورێن ڤی نیشتیمانی یا پاراستی بوو، د چارچۆڤێ پیلانەكێدا كەفتە ژێر داگیركاریێ و كاڤلكاریێ و سفکاتی ب پیرۆزیێن گەلێ كوردستانێ هاتە کرن.

ئەو پیلانا نەگریسە، سفكایەتی بوو ب 100 سالێن خەبات و قوربانیدانا گەلێ مە. سفكاتیكرن بوو ب خوینا شەهیدان و ئەو پێشمەرگێن قارەمان یێن ل شەڕێ تیرۆریستێن داعشدا كەركووك و دەڤەرێن كوردستانی یێن دی یێن دەرڤەی ئیدارا هەرێمێ پاراستی و ژ پێش هەموو مرۆڤاتیێ ڤە شەرێ تیرۆرێ دكر، هەروەسا سفكایەتی بوو ب دەنگێ ڕەوا و ئاشتییانە یێ گەلێ كوردستانل کو ب تنێ تاوانا وان ئەو بوو، کو دەنگێ راستەقینەیێ خوە د گەهاندە گوهێ جیهانی.
مە پێشبینییا هەموو ئەگەران كربوو، بەلێ چو جاران ئەم چاڤەرێی هندێ نەبووین دەستەکێ نافخۆیی ب ڤی شێوەی خەنجەرێ ل پشتا گەلێ كوردستانێ بدەت.

ئەوان دڤیا ب نەپاكی و داگیركاریێ و زەبروزەنگێ، ئیرادا گەلێ مە بشكێنن كو ئازادیخوازی و پەیاما ئاشتی و پێكڤەژیانێ یە، بەلێ ئیرادا گەلێ مە ب زیندوویی ما و ب دلنیایی ڤه ئازادیخوازی و پەیاما ئاشتیێ، سەربەرزیە، نەپاكی و داگیركاری ژی سەرشۆری و شوورەییە.

ئارمانجا 16 ئۆكتۆبەرێ، نەهێلانا كیانێ هەرێما كوردستانێ و بێماناكرنا مافێن گەلێ كوردستانێ بوون، ئەو ژی ب هەڤكاری و چاڤساغی یا دەستەکێ نەپاكێ نافخۆیی، پیلانەکا گەلەک مەزن ل دژی گەلێ مە د ئارادا بوو، بەێ پێشمەرگەی بریارا بەرگریێ و كۆلنەدانێ دا، هاوكێشە گوهۆین و سەربەرزی بۆ گەلێ كوردستانێ ما.

دڤێ یادا تەحل دا، داخوازێ ژ هەموو لایەكی دكەم رێزێ ل مێژوو و مافێن گەلێ كوردستانێ بگرن، سیاسەتا شۆڤینی و ئینكاركرنێ هیچ ئەنجامەک نینە و ب تنێ شەر و پاشکەفتن لێ دکەڤیت.

هەمووگاڤا مە داخواز كریە كو كەركووك ببیتە نموونا پێکڤە ژیانێ، بەلێ مساومێ ل سەر ناسناما كوردستانیبوونا كەركووكێ ناهێتە کرن، داخوازێ ژ وەلاتیێن كوردستانێ دكەم ب ئومێد و هێزڤە بەرێ خوە بدەنە داهاتی، دۆزا گەلێ مە یا رەوایە و ب شەر و پیلان و نەپاكیێ، ب دووماهی ناهێت.

16 ئۆكتۆبەر ئەو رۆژا تارییە د مێژوویا گەلێ مە دا كو چو جاران ناهێتە ژبیرکرن و دڤێت ببیتە وانەک بۆ تاك تاکێن گەلێ كوردستانێ.

سلاڤ بۆ شەهیدێن كورد و كوردستانێ و هەموو شەهیدێن رێیا ئازادیێ.

سلاڤ بۆ پێشمەرگێن قارەمان.

سلاڤ بۆ تێكۆشەران و نیشتیمانپەروەران.

مەسعود بارزانی

16ـی 10ـی 2018

ئەڤرۆ نیوز ، زنار تۆڤی:

ئه‌ڤرۆ سێشەمبی 16.10 سالڤه‌گه‌را ئێكێ یا كه‌فتنا باژێرێ كه‌ركوكێ یه ژ لایێ هێزێن عیراقی و حەشدا شەعبی ڤە‌، ئەڤ چەندە هات پشتی کو ل 16 ئۆكتۆبه‌را سالا 2017، حه‌شدا شه‌عبی ب هاریكاریا هنده‌ك وه‌لاتێن ده‌ڤه‌رێ و بهاریکایا هێزێن ئێکەتیێ هێرش کرە سەر باژێرێ كه‌ركوكێ و چەندین ده‌ڤه‌رێن دیتر یێن كوردستانی داگیرکرن.

هەروەسا باله‌كێ ئێكه‌تیێ كو ب خیانه‌تكارێن 16 ئۆكتۆبه‌رێ دهێنە بناڤكرن، ب نهێنی رێككه‌فتن ل؛گه‌ل حه‌شدا شەعبی و هێزێن عیراقی كرن و وان چه‌په‌رێن خوە ڤالا كرن و پێشمەرگێن ئێکەتیێ بێی شەر كه‌ركوك راده‌ستی حەشدێ كر، دیسا حوکمه‌تا عیراقێ ژی ب ناڤێ سه‌پاندنا قانوونێ هێرش کرە سەر كه‌ركووكێ و ب هزاران وه‌لاتیێن وی باژێری ئاواره‌ و ده‌ربه‌ده‌ر بوون، كو هێشتا پرانیا وان وەلاتیان د كه‌مپان دانە ل هه‌رێما كوردستانێ و ڤەنەگەریاینە کەرکوکێ.

هەروەسا ژبەر خیانەتا 16 ئوکتۆبەرێ ئەڤرۆ پرانیا کوردێن وی باژێری دوکانێن خوە داخستیە و ڤەنەکرینە وەکو کارفەدانەک، ژبەر وێ خیانەتا ئێکەتیێ کری.

ئه‌ڤرۆ نيوز:

ئەندامەکێ رێکخراوا مافێ مرۆڤی یا رۆژھەلاتێ کوردستانێ دیار دکەت کو د ماوەیێ دو سالان دا ‏ئیرانێ سزایێ سێدارەدانێ ل سەر سەد گرتیێن کورد سەپاندینە و د ماوەیێ بۆری دا گەلەک گرتی ‏ژی ھاتنە سێدارەدان و ھەتا نھا ژی سازیێن مافێ مرۆڤی یێن جیھانی ل ھەمبەر کریارێن ئیرانێ ‏بێدەنگن.‏

ئەحمەد شادانی ئەندامێ رێکخراوا مافێ مرۆڤی یا رۆژھەلاتێ کوردستانێ بۆ رۆژناما ئەڤرۆ دیار کر ‏کو د ماوەیێ بۆری دا ئیرانێ سزایێ سێدارەدانێ ل سەر سەد گرتیێن کورد سەپاندینە و نھا مەترسیا ‏سێدارەدانا گەلەک ژ وان یا ھەی و گۆت: (پرانیا وان کەسان چالاکڤانێ مەدەنی بووینە و ھندەک ژی ‏رۆژنامەڤانن و گەلەک ژ وان کەسان کارێ سیاسی ژی نەکرینە، لێ چالاکڤانێن کوردن و ھندەک ‏داخوازێن وان بووینە ئەگەرێ ھندێ کو سازیێن ئێمناھیێ یێن ئیرانێ وان دەستەسەر بکەن و سزایێ ‏سێدارەدانێ ل سەر وان بسەپینن).‏

ناڤبری د بەردەوامیا ئاخڤتنا خوە دا ئەو یەک ژی دیار کر کو پشتی ئەمریکا خوە ژ رێککەفتنا ‏ئەتۆمی یا ل گەل ئیرانێ ڤەکێشای رەوشا مافێ مرۆڤی ل ئیرانێ خرابتر لێ ھاتیە، رۆژانە چالاکڤانێن ‏کورد دھێنە دەستەسەر کرن و ئەو یەک ژی براستی نھا خرابە، چونکو کورد بێ خوەدانن و د ئاستێ ‏جیھانێ دا کەس پشتەڤانیێ ل کوردان ناکەت، بەری نھا ٥ لاوێن کورد د رۆژەکێ دا ھاتنە سێدارەدان ‏و رێکخراوێن مافێ مرۆڤی ھەر بێدەنگ مان، بێدەنگیا جیھانێ ژی وەسا کریە کو ئیران ل گۆر کەیفا ‏خوە سەرەدەریێ ل گەل کوردان بکەت و گۆت: (بەری چەند رۆژان ژی ل زیندانا ئورمیێ چەند ‏گرتیێن کورد ب نھێنی ھاتنە سێدارەدان و ھەتا نھا تەرمێ وان ژی رادەستی مالباتێن وان نەھاتینە ‏کرن، ژ بەر ھندێ ژی براستی نھا رەوشا ناڤخوەیی یا رۆژھەلاتێ کوردستانێ گەلەکێ خرابە و ‏پارتێن رۆژھەلاتێ کوردستانێ ژی د رەوشەکا لاواز دانە و نەشێن ل ھەمبەر ھەر روودانەکا وەسا ‏دلتەزین دا بەرسڤا کریارێن ئیرانێ بدەن).‏

ئەندامێ رێکخراوا مافێ مرۆڤی یا رۆژھەلاتێ کوردستانێ ئەو یەک ژی دیار کر کو پشتی حەسەن ‏رۆحانی بوویە سەرۆک کۆمارێ ئیرانێ رێژا سێدارەدانا کوردان ل چاڤ سەردەمێ ئەحمەدی نەژادی ‏زێدەتر لێ ھاتیە، گرتنا چالاکڤانێن سیاسی و ئەشەکەنجەدانا لاوێن کورد گەلەکێ زێدە بوویە و ‏گۆت: (ھەکە ئەم نھا بەحسێ بابەتێ کۆلبەران ژی بکەین ئەو یەک ژی کارەساتەکا دی یا مەزنە، ‏رۆژانە کۆلبەر ل سەر سنۆران ب گوللەیێن سەربازێن ئیرانێ دھێنە کوشتن، کۆلبەر کەسێن ھەژارن ‏بۆ دابینکرنا نانێ زارۆیێن خوە ژ نەچاریێ بەرێ خوە ددەنە وێ رێیا زەحمەت و مخابن رۆژانە ‏چەندین کۆلبەر دھێنە کوشتن و ھەتا نھا ژی کوشتنا کوردان ل ئیرانێ یا بەردەوامە).‏

ناڤھاتی د دووماھیا ئاخڤتنا خوە دا ئەو یەک ژی نە ڤەشارت کو ھەتا کورد ژی وەکو نەتەوێن دی ل ‏ڤێ جیھانێ نەبنە خوەدان دەولەتا خوە یا نەتەوی و نوونەرێن وان ل نەتەوێن یەکگرتی دا نەبن ‏دێ رۆژانە تووشی کارەساتان بن، چونکو کەس بەحسێ کوردان ناکەت، کەس دەنگێ کوردان ‏ناگەھینتە جیھانێ و مە چو ھەڤال ژی نینن و گۆت: (گەلەک وەلاتان بەری نھا دگۆتن کورد ‏قارەمانن و دێ پشتەڤانیێ ل کوردان کەین، لێ دەمێ ریفراندۆما ھەرێما کوردستانێ ھاتیە کرن مە ‏دیت کا چاوا پشتەڤانی ل داگیرکەرێن کوردستانێ کرن و خوە بێدەنگ کرن، ژ بەر ھندێ ژی ھەکە ‏کورد ببنە ئێک دێ شێن خوە پارێزن و گەھنە مافێن خوە، لێ ھەتا کورد د ناڤا خوە دا پارچە بن ‏دێ چارەنڤیسێ مە ژی ئەڤە بیت).‏