ئه‌ڤرۆ نيوز:
گۆره‌كێ ب كۆم يێ كوردێن ئێزدى ل گۆندێ كه‌سر ميحراب ل تله‌عفه‌ر هاته ديتن. 18 ته‌رم تێدا بوون كو ناسناما هه‌شت ته‌رمان ئاشكه‌را بوويه و ئه‌ڤرۆ دێ بۆ شنگال هێنه ڤه‌گوهاستن.
ب گۆره‌يى ئه‌و پێزانينێن ئه‌ڤرۆ نيوز هه‌ين، حه‌فت ژ ڤان كه‌سان خه‌لكێ گۆندێ كۆچۆنه و ئێك ژى خه‌لكێ گوندێ حاتيه يه، هه‌موو كوردێن ئێزدى نه و داعش ل ده‌ستپێكا گرتنا شنگال ل 2004ێ ب ره‌نگه‌كێ كۆمه‌لكۆژى كوشتينه.
فه‌رهاد ئه‌مین ئه‌تروشی پارێزگه‌رێ دهوكێ ئه‌ڤروسپێدێ 15-10-2018 پێشوازیا به‌رێز(بارك یونغ كیو) كونسلێ گشتی یێ وه‌لاتێ كوریا باشور وشاندێ دگه‌لدا كر.
دهه‌ڤدیتنه‌كێدا به‌حسێ په‌یوه‌ندیێن دووقولی دناڤبه‌را كوریا باشور وهه‌رێما كوردستانێ وچاوانیا پێش ئێخستنا وان په‌یوه‌ندیا دوارێ ئابوری وبازرگانی وكه‌رتێ وبه‌رهێنانێ دا هاته كرن.
پارێزگه‌رێ دهوكێ سوپاسیا حكومه‌تا كوریا باشور كر هه‌مبه‌ر ئه‌و هاریكاریێن به‌رده‌وام دوارێ ئاڤه‌دانكرنێ دا بو هه‌رێما كوردستانێ وپارێزگه‌ها دهوكێ پێشكێش كرین وخواست كو حكومه‌تا كوریا یا هاریكاربیت بو كارێن ڤه‌كولین وبشكنینێ ل سه‌ر گورێن ب كۆم تایبه‌تی گورێن ب كۆم ل ده‌ڤه‌را شنگالێ .
ئه‌ڤرۆ نيوز:
جڤاتا نوونه‌رێن عيراقێ ئه‌ڤرۆ رۆژا دوشه‌مبى بۆ دانوستاندنێ ل سه‌ر چه‌ند پرسان دێ كۆم بيت.
ب گۆره‌يى به‌رنامێ كارى يێ جڤاتا نوونه‌رێن عيراقێ بڕياره دانوستاندن ل سه‌ر چه‌ند پرسان بهێته كرن و ژ وان ژى لژنێن ناڤخۆ يێن جڤاتا نوونه‌ران.
هه‌ر ب گۆره‌يى به‌رنامێ كارى، بڕيار دانوستاندنێ ل سه‌ر خولا سيێ يا ئه‌زموونێن خولا سيێ يا قوتابيان بهێته كرن كو چو په‌يوه‌ندى ب هه‌رێما كوردستانێ ڤه نينه.
ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 15ى چريا ئێكێ 2018ێ بهايێ زێر و زيڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 1 گرام زێرێ (ع) 18 | 36000 |
| 1 گرام زێرێ (ع) 21 | 42500 |
| 1 گرام زێرێ (ع) 22 | 44500 |
| 1 گرام زيڤ | 3000 |
ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 15ى چريا ئێكێ 2018ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:3
| 100 دولارێ ئه‌مريكى | 121.000 دينار |
| 100 يۆرۆيێ ئه‌ورۆپى | 139.000 دينار |
| 100 ليرێ توركى | 21000 دينار |
بۆ وه‌رگرتنا نووترين پێزانينان ل سه‌ر ره‌وشا دراڤى ژماره “2” بۆ شورتكودێن “KOREK “2279 يان “Asiacell “4593 يان ژى ب ره‌نگه‌كێ به‌رده‌وام سه‌ره‌دانا مالپه‌رێ ئه‌ڤرۆ نيوز www.evronews.net بكه.
ئه‌ڤرۆ نيوز:
زارڤەکەرێ ئەمریکی ئەریک روبرتس دەمێ پشکداری د فیستەڤالا ئەنتالیا یا سینەمای ل تورکیا کری دیار کر کو زارڤەکەرێن ب رۆلێ کەسایەتیێن ترسناک ئانکو ب ترس رادبن باشترین ترۆمبێل دگرن و جوانترین ژن ژی دبنە ھەڤالێن وان.
ئەریکی گۆتژی ئەو گەلەک حەزژێ وەرگرتنا رۆلێن کەسایەتیێن جێواز دکەن، ب تایبەت یێن ب ترس، زێدەباری قازانجکرنا گەلەک پاران.
زێدەباری پشکداریا وی د دەھان فلمان دا و تێدا دیسان ب دەھان جاران یێ ھاتیە مراندن، ئەڤ تشتە بۆ وی خوشیەکێ چێدکەت.
دھێتە زانین کو روبرتس ژ دایک بوویێ 18 ھەیڤا چارە ل سالا 1956، کاروانێ خوە یێ ھونەری ل سالا 1977 دەستپێکر، وەکو ستێرەک برسقی د ھەشتیان دا، گەلەک ب ناڤ و دەنگ کەت د فلمێن پولیسی و تاوانان دا.
ئه‌ڤرۆ نيوز:
بێگومان مەرەما ھەر خانمەکێ ژ بویاغکرنا پرچا خوە جوانیا سەروبەری وێ یە و پاراستنا ماقویلیا وێ یە، داکو ئەڤ ب جوانی پرچا مرۆڤی بھێتە بویاغکرن پێدڤیە مرۆڤ ھونەرێ بەری و پشتی بویاغکرنا پرچی بزانیت داکو رەنگێ پرچا مرۆڤی ب شێوەکێ جوان دیار کەت:
ــ بەری پرچا خوە رەنگ بکەی ب سێ رۆژان، زەیتا زەیتونێ لێبدە پاشی ب ئاڤا گەرم بشوو.
ــ بەری پرچا خوە رەنگ بکەی بشوو چۆنکو نابیت یا پیس بیت دیسان زۆرا پاقژ ژی نەبیت داکو رەنگێ پرچی جوان دەربکەڤیت.
ــ بەری مادێ بویاغێ بکاربینی ئاگەھدار بە بزانە چ مادێ کیمیاوی تێدایە، نابیت مادێ ئەمونیا تێدا بیت چۆنکو مادەکێ زیانبەخشە بۆ پرچی.
ــ پشتی تو پرچا خوە بویاغ دکەی ب دوو رۆژان پرچا خوە ب شامپوویێ بشوو.
ــ داکو رەنگێ پرچا تە جوان و باش دەربکەڤیت، ب ئاڤا سار بشوو.
ئه‌ڤرۆ نيوز:
ل ھندەک وەلاتان زەلامێن کەچەل ب شەنسن و خەلکێ وان وەلاتان ب پیروزی بەرێخوەدەنێ، بۆ نموونە ل وەلاتێ مەغربێ زەلامێ کەچەل ھاتیە نافکرن ب تاجێ زەلامینیێ و ل وەلاتێ تورکمانستانێ ب تنێ زەلامێ کەچەل دشێت پتر ژ ھەڤژینەکێ بۆ خوە بینیت، ھەروەسا ل بەرازیلێ ئێک ژ مەرجێن کچا جوان بۆ شووکرنێ ئەوە زەلامێ کەچەل بیت یان کێم پرچ ھەبیت چۆنکو لنک وان زەلامێ پرچا وی بووش بیت نە ھندێ خوشتڤیە لنک وان.
ل وەلاتێ ئوزباکستانێ ژی زەلامێ کەچەل بێ مەھر خێزانێ پێکدئینیت، دیسان ل وەلاتێ ئەرجەنتینێ خانما شوو ب زەلامێ کەچەل دکەت دھێتە زانین ب خانما باژێرێ خوە.
ھەر وەسان ل وەلاتێ ئەندونیسیا ژی ئەو دادوەرێ زەلامەکێ کەچەل ل ژنەکێ مار دکەت داخاز دکەت وێنەکی دگەل ھەڤژینان بگریت وەکو دەستکەفتەک بۆ وی وەکو دادوەرێ ھەڤژینێ کەچەل، دیسان ل وەلاتێ ئوستورالیا ژی ھەڤژینێ مافێ ھەی دەمێ بۆ خوە خوشتڤیەکێ کەچەل بینیت ھەڤژینێ خوە یێ ب پرچ بھێلیت و شوو ب زەلامێ کەچەل بکەت.
ل وەلاتێ فلەندا دەمێ قوتابیا کچ دھێتە وەرگرتن ل زانکویا ھلسنکی دھێتە وەرگرتن ھیڤیا وێ ئەو نینە ب سەرکەڤیت بەلکو بکەڤیتە ئەڤینا قوتابیەکێ کەچەل.
ئه‌ڤرۆ نيوز، فاتما مزوورى:
ل سوران رێژەیەکا زور ژ خەلکی ب زمانێ فارسی ئاخڤن، ھندەک کەس زمانێن بیانی بکار دئینن دا ژبیر نەکەن ھندەک ژ وان ژی وەکو چاڤلێکرنەک بکاردئینن داکو کەسانێن بەرامبەر یێن کو فارسی نەزانن بێزاریا خوە ژێ بینن د ڤی دەرباری دا ڤەکۆلەرەکا جڤاکی دبێژیت: ئاخفتن ب زمانێن بیانی ل سەر کەسایەتی و رەوشەنبیری و رەوشتێ کەسان دمینیت.
بەژدار تەھا چالاکڤان د بیاڤێ جڤاکێ مەدەنی دا دیار کر کو پشتی کورد ب ھەر ئەگەرێ بیت دەربەدەری وەلاتێن دەوروبەر بووین ل گەل کلتورو زمانێ وان دژیان نەشیان خوە ژێ خلاس بکەن و بێنە سەر رەوشت و تیتالێن خوە، ھەروەسا سیاسەتەکا وەسا نەبو کارتێکرن ل سەر تاکێ کورد ھەبیت داکو زمان و کولتورێ خوە ژبیر نەکەن و گۆت: (ئەڤە چەند سالە ئاخفتن ب زمانێن بیانی ب تایبەت فارسی دناڤ ئاکنجیێن سۆران یا رەنگ ڤەدای و بەردەوام د زێدە بوونێ دایە کو گەلەک کەس ژی ژ بۆ بەرژەوەندیێن خوە یێن تایبەت پێ دئاخڤن، ئەڤە ژی رەنگڤەدانەکا تایبەت ل سەر جڤاکێ مە دھێلیت و وەناکەت زمانێ کوردی وەکی زمانێن دیتر گەشە بکەت).
بەژدار ئەو چەندە ژی گۆت: (ھندەک کەس داکو زمانێ فارسی ژ بیرا وان نەچیت، پێ دئاخڤن، ھندەکێن دی ژی وەکی خوە سەپاندن و چاڤلێکەری پێ دئاخڤن و ئەڤە دیاردەیەکا کرێت و نە جوانە ھەرچەندە ھەر کەسەک ئازادە ب چ زمانێ بڤێت باخڤیت و فێر ببیت، لێ نە ب بەردەوامی و نە ل ھەموو جھا و نە ل سەر کیستێ زمانی کوردی).
یەلدا شوکری کچەکا 21 سالیە دیار کر کو ئەڤە بو ماوێ دو سالایە ئەو ژ ئیرانێ ڤەگەریاین، لێ ھەتا نھا نزانیت باش ب کوردی ب ئاخڤیت و گۆت: (ل سۆران بەھرا پتر خەلک ب زمانێ فارسی دئاخڤن و ب ھەموو رەنگەکی ل گەل تیتال و رەوشتێن واننن).
سام سامی گەنجەکێ 23 سالیە دیار کر کو راستە زمانێ سەرەکی یێ مە زمانێ فارسیە، لێ ئەز یێ ل ئیرانێ مەزن بویم و من خواندن ل وێرێ خلاس کریە، ژبەرھندێ ب زمانێ فارسی دئاخڤم و گۆت: (جاران ھەکو ب زمانێ فارسی دئاخڤین ئاریشە بۆ مە دروست دبن، ژبەرکو کەسێن ل دەوروبەرێن مە فارسی نزانن و نەڤێت ئەم ب فارسی ب ئاخڤین ئەم ژی کوردی باش نزانین، لەوما دگوت ھوون یێ بەحسێ مە دکەن، راستە ھندەک کەس ب مەبەست ب زمانین دی دئاخڤن داکو دەورو بەرێن خوە بێزار بکەن، لێ نە ھەموو کەس).
سام گۆتژی: (ل سۆران ژ بلی زمانێ فارسی گەنج ب زمانێن عەرەبی ژی دئاخڤن، ژبەرکو پشتی رەوشا نەخوش یا ئیراقێ و ئاوارەبونێ گەلەک کەسان قەستا کوردستانێ کریە و ب تایبەتی ژی سۆران و ب عەرەبی د ئاخڤن و عەرەبی ژی ب رەنگەکێ زوور بەربەلاڤ بوویە، ئانکو تێکەل بوونەک دناڤا زمانان دا چیبوویە).
ئیسماعیل رەحیم ئیکە ژ وان کەسێن کو بەردەوام ب زمانێ فارسی د ئاخڤیت و دبێژیت: (تشتەکێ رەوایە مرۆڤی چ زمان بڤێت پێ باخڤیت، ژبەرکو زانینا زمانان نیشانا پێشکەفتن و زیرەکی و تێگەھشتنا خەلکێ وی وەلاتی یان ژی وی باژێریە، دیسان نەیا ب ساناھیە کو کەسەک 25 سالان ل جھەکی ژیا بیت و دەمێ ل کوردستانێ بیت بشێتن ب ساناھی و زوو فێری زمانێ کوردی ببیت).
ل دور ھەمان بایەت ڤەکولەرا جڤاکی زەلال سولحی خویا کر کو مرۆڤ د ژیانا خوە دا ئازادە ب ھەر زمانەکێ بڤێت ب ئاخڤیت، ژبەرکو مرۆڤ چەند زمانان ب ئاخڤیت و فێر ببیت ھەر کێمە و گۆت: (جاران ھندەک کەس ژ بۆ ھندەک بەرژەوەندی و مەبەستێن دیتر زمانێ فارسی و زمانێن دی بکاردئینن داکو دەوروبەرێن خوە بێزار بکەن، لێ ب گشتی ئاخفتن ب زمانێن بیانی ل سەر کەسایەتی و رەوشتێن کەسان دمینن کا د چ ئاستێ رەوشەنبیری دانە و دێ ل چ دەمەکی و چاوا زمانێ دویێ بخوە بکارئینن).
ئه‌ڤرۆ نيوز:
سێ ھەیڤێن ئەڤ سالە ئاھێن خوارنێ نەھاتینە بەلاڤکرن و رێڤەبەرێ گشتیێ بازرگانی ژی دبێژیت: پشکا خوارنا وەلاتیان ب شێوەیێ ھەیڤانە نەمایە و ب تنێ جار جار چەند کەرەستێن خوارنێ دھێنە بەلاڤکرن و ھەکە بودجەکا باش نەھێتە مەزاختن ئەڤا ھەیژی نامینیت.
نەوزاد ئەدھەم، رێڤەبەرێ گشتیێ بازرگانی ل ھەرێما کوردستانێ بۆ رۆژناما ئەڤرۆ گۆت: “ھەتا نوکە پشکا خوارنا ھەیڤانە یا وەلاتیان وەکو خوە ب رێڤە نەچوویە و ب تنێ د ئەڤ سالە دا حوکمەت سێ ھەیڤان قەڕدارێ وەلاتیانە، ئانکو ھەکە حوکمەت پشکا خوارنا ڤێ ھەیڤێ بەلاڤ بکەت؛ دێ ھێشتا سێ ھەیڤ مینن نەھاتیە بەلاڤکرن و ئەز باوەرم ناھێتە بەلاڤکرنژی، چونکو ئەز دشێم بێژم نوکە پشکا ئاھێن خوارنێ وەکو ھەیڤانە نەمایە بھێتە بەلاڤکرن، بەلکو وەکو ھاریکاریەکێ یە و ھەر چەند ھەیڤان جارەکێ دھێتە بەلاڤکرن”.
نەوزاد ئەدھەم ئاماژە ب وێ چەندێ ژی کر کو وان بەردەوام گازندێن وەلاتیان گەھاندینە جھێن پەیوەندیدار، بەلێ چونکو د دەسھەلاتا حوکمەتا ھەرێما کوردستانێ دا نینە، ئەو نەشیاینە چارەسەر بکەین و گۆت: “ئەم ب خوە دگەل بریکاران ژی زۆر بێزاربووینە ل سیستەمێ بەلاڤکرنا ئاھێن خوارنێ، ژ بەرکو بێسەرۆبەریا زۆر پێڤەدیارە و ھەکە رەوش ھوسا بچیت و حوکمەتا بەغدا بودجا کڕینا تایبەت ب ئاھێن خوارنێ زێدە نەکەت، ئەڤە بێگومان دێ بەلاڤکرن ھێشتا کێمتربیت و ئەڤا نوکە دھێتە بەلاڤکرنژی نامینیت”.
نيشاندان