ئه‌ڤرۆ نيوز:

سەرۆکێ ئێکەتیا مامۆستایان راگەھاند، پشتی چەندین کۆمبوونان ل گەل وەزارەتا ‏پەروەردێ یا حۆکمەتا ھەرێما کوردستانێ، ئەم گەھشتینە وێ قەناعەتێ کو ئۆفێن ‏شەمبیان نەھێنە ڤەگەراندن، بەلکو رێڤەبەرێن قوتابخانان ماف ھەبیت بۆ ھەر ‏ماموستایەکێ خوە د حەفتیێ دا رۆژەکێ بکەتە بێھنڤەدان، ب مەرجەکی زیان ب ‏خواندنێ نەکەڤیت. سەرۆکێ لقێ دھۆکێ یێ ئێکەتیا مامۆستایان ژی راگەھاند کو د ‏ڤێ حەفتیێ دا دێ ل گەل رێڤەبەرێن پەروەردێ روونن و داخواز ژێ کەن، ھەر ‏مامۆستایەکێ وانەیا خوە بێژیت، ئازاد ببیت و بچیتە مالا خوە.‏

عەبدولواحد محەمەد، سەرۆکێ سەندیکا مامۆستایێن کوردستانێ بۆ ئەڤرۆ دیار کر، ‏پشتی چەندین کۆمبوونان ل گەل وەزارەتا پەروەردێ، ئەم رازی بووین کو بێھنڤەدانا ‏رۆژا شەمبیان نەمینیت، چونکو زیان ب کەرتێ خواندنێ دکەڤیت و پێدڤیە خواندن ل ‏چو رۆژان نەھێتە راگرتن، بەلکو ل شوونا وێ بۆ ماموستایان د حەفتیێ دا رۆژەک ‏ببیتە بێھنڤەدان، بێکو زیان ب خواندنێ بکەڤیت و پرۆگرامێن خواندنێ و خشتێ ‏حەفتیانە یێن قوتابیان وەکو خوە برێڤە بچیت.‏

ئاشکرا ژی کر کو ئەو بڕیارە ژی ھاتە دان کو ئەو رۆژا ئۆف و بێھنڤەدان ب تنێ بۆ ‏قوتابخانێن ئێڤاران بیت، ئەو ژی ل ھەموو رۆژێن پێنچشەمبی دێ ب شێوەیەکێ ‏فەرمی بۆ قوتابخانێن ئێڤاران بیتە بێھنڤەدان و گۆت: بەری نھا ژی ئەڤ رۆژا ‏پێنچشەمبی بۆ قوتابخانێن ئێڤاران بێھنڤەدان بوو، بەلێ ل سالا بۆری پشتی رۆژێن ‏شەمبی بۆ ھەموو قوتابخانان بوویە بێھنڤەدان، ئووفا قوتابخانێن ئێڤاران ژی بۆ ‏شەمبیێ ھاتبوو ڤەگوھاستن.‏

عومەر عەلی، رێڤەبەرێ گشتیێ پەروەردا پارێزگەھا دھۆکێ بۆ ئەڤرۆ دیار کر کو ھەتا ‏نھا چو بریار و نڤیسارێن فەرمی نەگەھشتینە دەستێ مە کو رۆژەک وەکو بێھنڤەدان ‏ژلایێ قوتابخانان ڤە بۆ مامۆستایان بھێتە دان و ب تنێ بریارا بۆ مە ھاتی ئەوە کو ‏بھێنڤەدانێن رۆژێن شەمبی نەماینە.‏

وەھبی یونس، سەرۆکێ لقێ دھۆکێ یێ سەندیکا مامۆستایان بۆ ئەڤرۆ دیار کر، ئەم ‏یێ ھەولددەین د ڤێ حەفتیێ دا، کۆمبوونەکا سەرانسەری ل گەل رێڤەبەریا گشتیا ‏پەروەردا دھۆکێ و ھەر 10 رێڤەبەرێن پەروەردێ ل پارێزگەھا دھۆکێ ئەنجام بدەین ‏و د ڤێ کۆمبوونێ دا ئەم ب ژڤانین دوو داخوازی و پێشنیاران ژ پەروەردێ بکەین، ‏داخوازیا ئێکێ ئەوە کو رێ بھێتە دان ھەر مامۆستایەک د حەفتیێ دا رۆژەکێ وەکو ‏بێھنڤەدان وەربگریت، بێکو زیان ب کەرتێ خواندنێ و خشتێ خواندنا قوتابیان ‏بکەڤیت.‏

دەربارەی داخوازیا دوویێ یا سەندیکا مامۆستایان ژی، وەھبی یونس دبێژیت: ئەم ‏دێ داخواز ژ پەروەدێ کەین کو ئازادیێ بدەنە ماموستایان، ھەر دەمێ وانێن خوە ‏یێن رۆژێ گۆتن، بچنە مالێن خوە و ل قوتابخانێ نەمینن، ب تنێ ل گۆرەی وانە و ‏خشتێ خوە ل قوتابخانێ بمینن و وەکو دی دەلیڤە ب وان بھێتە دان بچنە مالێن ‏خوە.‏

ئه‌ڤرۆ نيوز:

پارێزەرەکێ دادگەھا دھۆکێ راگەھاند کو کچەک و کورەک بۆ ماوێ سێ سالان ‏حەز ژ ئێکدو دکەن، پشتی خێزان پێکئینای، بۆ ماوەکی رەوشا وان یا ئابوری ‏لاواز بوو، ژنەکا گەلەک ژ گەنجی مەزنتر بزاڤ کر وی ب پارەی سەردا ببەت، ‏کورکی ژی حەز ژێ کر ژبەر سەروەت و سامانێ وێ و گۆت: ئەڤێ ژنێ گەلەک ‏زێر و پارە دانە کورکی، ھەتا کورکی مار کری، پشتی سالەک ل سەر ھەڤژینا ‏وان بوری ھەڤژینا وی یا ئێکێ زانی و خوە ژێ دا بەردان.‏

پارێزەر نەوزاد سەعید دوسکی ل دادگەھا دھۆکێ بۆ ئەڤرۆ دیار کر کو کچەک و ‏کورەک ژیێ ھەر ئێک ژ وان د بیست سالیێ دابوو، پەیوەندیەکا ئەڤینی بۆ ماوێ ‏سێ سالان ل گەل ئێک ھەبوو و گۆت: (ھندی کورکی کچک د خواست نەدا وی، ‏پاشی بابێ کچکێ رازی بۆ و خێزان پێک ئینا، پشتی ماوەکی ل گەل ئێک ماین ‏خودێ زارۆ نەدانێ رەوشا وان یا ئابووری یا لاواز بوو، کورک کرێکارێ ‏خارنگەھەکێ بوو).‏

پارێزەری دیار کر ژی کو د وی ماوەی دا ھەڤنیاسین دناڤبەرا وی و ژنەکا ‏گەلەک ژ وی مەزنتر ئانکو نێزیکی 15 سالان ژ وی مەزنتر پەیدا بۆ و رابوو ‏پتر خوە نێزیکی وێ ژنێ کر و حەز ژێ کر ژ بەر سەروەت و سامانێ وێ و ‏گۆت: (زەلامێ ڤێ ژنێ مر و زارۆیێن وێ نێزیکی وی کوری بوون، پشتی زەلامێ ‏وێ مری گەلەک میرات بۆ وێ ما، ئانکو کورک ب پارەی سەردا بر بوو، ‏پەیوەندیا وان بەرفرەە بوو و ھندەک زێر و پارە دانە کورکی).‏

پارێزەری ئاشکرا کر ژی کو پاشی کورکی بەرامبەری پارەکێ زۆر ئەڤ ژنە ماھر ‏کر، پشتی سالەک ل سەر ھەڤژینیا وان بوری ھەڤژینا وی یا ئێکێ نە دزانی، لێ ‏پشتی ھینگێ زانی و ئاریشە دناڤبەرا واندا پەیدا بوون گۆتێ یان دێ من ‏بەردەی یان دێ وێ ژنا بیژن بەردەی و گۆت: (کورک نەشیا ھەڤژینا خوە یا ‏مەزن بەردەت، چۆنکی گەلەک پارە دابوونە کورکی وەکو بەڵگەک کو ھەکە ب ‏اڤا بەردانا وێ بکەت ئەو نەشێت چ جاران لێ بزڤرینیت، کورکی گۆتە ھەڤژینا ‏خوە خوە لمن بگرە ھەتا بشێم بەردەم، نێزیکی سالەکێ کچکێ خوە ل ھیڤیا وی ‏گرت ھەتا ھەڤژینا خوە یا مەزن بەردەت، بەلێ کورک ھەر نەشیا بەردەت).‏

پارێزەری گۆتژی: (ھەڤژینا وی ژی داخازا بەردانێ ژێ کر ل دادگەھێ، کورکی ‏گەلەک بزاڤ کرن کو برایێ کچکێ و مالا وان وێ رازی کەن دا کو خوە نەدەتە ‏بەردان، بەلێ کچکێ قەبوول نەکر و دوسیە بۆ وێ کەفت و دادوەری ژ ئێک دانە ‏بەردان، چۆنکی زەلامی ژنا دویێ ئینا بوو بێ رازیبوونا وێ و مافێن ژنکێ ژی ‏ھەموو گەھشتنێ مەھرا پێشەکی و پاشەکی و مەزاختیێن وێ یێن بوری و ‏بەردەوام ژی ھەموو گەھشتنێ).‏