ئه‌ڤرۆ نيوز:

رێڤەبەرێ پەروەردا شێخان دیار کر کو د ئەڤ سالە دا ل سنورێ پەروەردا مە ‏دەرگەھێن 143 قوتابخانا دھێنە ڤەکرن، پشتی ڤەکرنا وان لژنێن ڤەکرن و داخستنا ‏قوتابخانا ل ھەر دەڤەرەکێ قوتابخانە پێویست بیت قوتابخانە لێ دھێن ڤەکرن، ل ‏دووڤ داخازکەرێن دەڤەرێ و مۆختاری و راپورتێن سەرپەرشتیاران ڤە بۆ ڤەکرنا ‏قوتابخانێ بۆ دەڤەرێن پێدڤی، دگەل ڤەکرنا دەرگەھێن چار باخچەیێن زارۆیانە و ئێک ‏ژ وان ل ناحیا قەسرۆکە بۆ ئێکەم جارە باخچەک لڤێ ناحیێ دھێت ڤەکرن زارۆیێن ‏پێنج سالی لێ دھێنە وەرگرتن.‏

ئەسعەد محیەدین، رێڤەبەرێ پەروەردا شێخان بۆ ئەڤرۆ دیار کر، بۆ خواندنا ئەڤ ‏سالە 20 ئاڤاھی یێن قوتابخانا ژلایێ رێکخراوا یونسیف ڤە ھاتینە نووژەنکرن، دیسا ‏نھا کار ل سەر 21 ئاڤاھیێن دی دھێتە کرن بۆ نووژەنکرنا وان ژلایێ پەروەردا گشتی ‏ب رێیا پارێزگەھا دھۆک ڤە، دیسان 63 قوتابخانە ل سنورێ پەروەردا شێخان مفادار ‏بووینە ژ ئاڤا پاقژ ب رێیا ئامیرەکێ پاقژکرنا ئاڤێ بۆ قوتابخانا ھاتینە دانان دگەل ‏بەرادێن ئامیری بۆ ڤەخارنێ.‏

ئەسعەد محیەدین، رێڤەبەرێ پەروەردا شێخان بۆ رۆژناما ئەڤرۆ دیار کر، د نھا دا ‏قوتابخانەیەک ل گوندێ سمریت دھێتە دانان بۆ 1/10 کار ل سەر دووماھیک ھێت ب ‏شێوەیەکێ کەرەڤان پتری 200 قوتابی دێ لێ مفاداربن ژلایێ کومپانیا ھانت وێل ڤە ‏یا بەرھەم ئینانا پترولێ ل قەزا شێخان. بەری نھا ئەڤ گوندە یێ بێ قوتابخانە بوو ‏سالانە بکوژمەکێ پارەی دا ترومبێلا ڤەگوھاستنێ بو شێخان دھاتن ڤەگوھاستن نھا ‏ئەو ئاریشە ھات چارەسەرکرن، دوو پرۆژێن مەزن یێن دروست کرنا ئاڤاھیان ل ناحیا ‏قەسرۆک ھات دانان، ژ وان دانانا قوتابخانەکێ ژلایێ رێکخراوا یونسیف دناڤ سەنتەرێ ‏باژێرێ قەسرۆک ب کوژمێ دو ملیار و 400 ملیون دیناران. دیسا ئاڤاھیەک دێ د ناڤ ‏سەنتەرێ کەلەکچێ ھێتە دانان ب کوژمێ دو ملیار و 250 ملیون دیناران ب کەل و ‏پەلێن قوتابخانێ ڤە ئەڤ سال دەرگەھێن ھەردو قوتابخانا دھێن ڤەکرن. دیسان ‏دروستکرنا باخچەکێ زارۆیان د ناڤ سەنتەرێ قەسرۆک ژلایێ رێکخراوا ‏IOM ‎‏ ڤە ئەڤ ‏سال دەرگەھێ وێ ھێت ڤەکرن بۆ ئێکەم جارە ئەڤ ناحیە دبیتە خودان باخچەکێ ‏زارۆیان و بەری نھا چو باخچە نەبوون، مە قوتابخانەک ھەیە ل گوندێ خاتین ئاڤا و ‏ئاڤاھیێ باخچەکێ زارۆیان د ناڤ سەنتەرێ شێخان دا کار ل سەر ھاتیە راوەستاندن ‏رێژەکا کێم ژی کار ل سەر مایە ئەڤەیە ئەو قەیرانێن ب سەر ھەرێما کوردستانێ دا ‏ھاتین. پێتڤیە ئەڤ ئاڤاھیە دوبارە بھێن دروست کرن ژبەرکو ئەم پێتڤی ب ئاڤاھیان ‏نە ، مە ‏

ئاشکرا ژی کر کو 1700 ماموستا ھەنە پتری 100 ماموستا بۆ دھۆک دھێنە ‏ڤەگوھاستن 886 ماموستا ھەنە یێن وانەبێژ ھەنە ئەگەر ئەم سەحکەینە ڤێ رێژێ دێ ‏دیاربیت ئەم پتری 500 ماموستایاینە بۆ ئەڤ سال، دەزگەھێ خێرخازی بارزانی ئەڤە ‏دوەم سالە چانتە و پێدڤیێن قوتابیان دابین دکەت. دیسان ئەو قوتابی یێن ‏سەرکەفتی یێن ئێکێ 46 قوتابی نە دھێن خەلات کرن ژلایێ کومپانیا ھانت وێل ڤە ‏ھەر ئێک ژوان ڤە لاپتوپەک بۆ دھێت دان ئەڤە دووەم سالە ئەڤ کومپانیە قوتابیێن ‏دوو سالا خەلات دکەت.‏

ناڤھاتی خویاکر کو ئەم پێدڤی ھەشت ئاڤاھیێن قوتابخاناینە و مە پلانا خوە بۆ ‏وەزارەتێ ھنارتیە، ژ بەر کو گەلەک ئاڤاھیێن مە دوو دەوامی نە و پتریا قوتابخانێن ‏ناڤ سەنتەرێ شێخان دگەل قوتابخانێن سەر ب مووسل ڤە ھەڤپشکن. ‏

ئه‌ڤرۆ نيوز:

محمود محمد ئەندامێ مەکتەبا سیاسی یا پارتی دیموکراتی ‏کوردستان دیارکر، کو دڤێت ئەم کورد خواندنەک و پلانەکا ‏نووی بۆ ھەمو وان روودانان بکەین، کو ب سەر دەڤەرێ دا ‏ھاتین دا بشیێن بەرەڤانیێ ل خوە بکەین، دا نەکەڤیتە بەر ‏وان روودان و شەپولێن ب سەر دەڤەرێدا دھێن، ھەکە نە دێ ‏زیان ب مە کەڤیت، چونکی ئەم وەلاتەکێ سەربەخۆ نینین و ‏پشکەکین ژ وەلاتەکێ کو پشکەک ژ ھزر و سیاسەتا وان ل گەل ‏مە ناگونجیت، بەر ھندێ پشکداریکرنا خەلکی د ھەلبژارتنا دا ‏پێنگاڤەکا باشە و ئارمانجا مە کوردستانەکا ب ھێزە، کو نە ب ‏تنێ ژ ئالیێ چەکی ڤە ب ھێزبین، بەلکو یا گرنگ ئەوە ئەم ‏بنیات و ژێرخانەکا ئابووریا ب ھێز دروست بکەین، دا شیانێن ‏خوە برێڤەبرنێ ھەبن، ب ڤێ چەندێ دێ شێین بناغەکێ بھێز ‏دروست کەین.‏

مەحمود محمد زێدەتر گۆت: دوژمنێن مە ھەردەم مفا ل وان ‏دەرزان وەرگرتی نە کو دناڤ مەدا دروست بووینە ب ھاروکاریا ‏ھندەک لایەنا دناڤ وان دەرزاندا ھاتینە ژور و ڤیایە دربێ ل ‏مە دبەن، ئەو دربا عیراقێ ل مەدای و کەرکوک رادەستکری ‏ھەر ب ھەڤکاریا ھندەک لایەنێن سیاسی بوو و خوە ڤەکێشان، ‏بەر ھندێ ئەم وەک پارتی وەسا دبینین ھەکە مە ‏پەرلەمانەکێ ب ھێز ھەبا، کومەکا تشتان روینەدا، وێرەکیا ‏عیراقێ و حەشدا شەعبی نە دگەھشتە وی رادەی کو وان ئەو ‏پێنگاڤ ھاڤێتبان، لەوما ئارمانجا مە ئەوە پەرلەمانەکێ ب ھێز ‏د ڤێ خولێ دا دروست بکەین، کو ئەو پەرلەمان نەبیتە ‏پشکەک ژ وان ئاریشێن دروست دبن، چونکی مە دیت خولا ‏چویدا ل جھێ ھندێ کو سەروکاتیا پەرلەمانی ئاریشا چارەسەر ‏بکەت، پتر ئاریشە پەیدا دکرن و مەزنتر لێ دکرن، ئەو ب خوە ‏بۆ رێگر ل ھەمبەر چارەکرنا کێشێن سیاسی، ژ ئالیەکێ دیڤە ‏ئەم ئارمانجا مە ئەوە کو بناغەکێ ب ھێز دروست بکەین ژ ‏ئالیێ ئابوری و پەروەردەی و قانونەک ھەبیت بۆ رێکخستنا ‏جڤاکی. ‏

ئاماژە دا وێ چەندێ ژی کو ل کیژ قوناغێ دا پارتی ب ‏ھێزبوویە، د وێ قوناغێدا جڤاکێ مە پێشکەفتن یا بخۆڤە ‏دیتی و خزمەتا خەلکی یا ھاتیەکرن، ژبەر ھندێ دڤێت پارتی ‏بھێزتر بیت داکو پێشکەفتنێن مەزنتر ب دەست مە ڤە بھێن، ‏بەر ھندێ پشکداری د ھەلبژارتنا دا یا گرنگە ژبەر وێ قوناغا ‏ھەستیارا ئەم تێدا دبوورین، ئەڤە دێ بیتە بناغەکێ بھێزێ ‏سیاسی و ئەو درزو و ڤالاھیێن سیاسی دێ ھێنە پرکرن و ‏دوژمنێن مە نەشێن کیشا بوومە دروست بکەن، لەوما دڤێ ‏ھەلبژارتنێ دا ئەم وەک پارتی دێ ھەولدەین کار ل سەر ئێک ‏رێزیا مللەتی کەین و پێکڤە ژیانەکا سیاسی ھەبیت و ئەم ‏ھەمی د چارچوڤەکێ سیاسیێ نەتەوەی دەرنەکەڤین و نابیت ‏ژ بەر جیاوازیا ئایدولوژی ئەم ئێک و دوو قەبوول نەکەین، ‏دڤێت ئایدولوژیەتا سیاسی و دینی نەبیتە ئەگەرێ ‏نەقەبوولکرن و نە ئێک رێزیێ و جڤاک تێک بچیت.‏

ل داویێ مەحمود محمد ئەندامێ مەکتەبا سیاسی یا پارتی ‏ئاماژە دا وێ چەندێ ئەگەر حیزبەک نەشێت ئێدارا خوە دناڤ ‏خوە دا رێک ب ئێخیت و چەند سالا یا مژوول بیت نەشێت ‏کومبوونەکا سەرکرداتی بکەت، ئەو حیزبا پیروزێن نەتەوەی و ‏دینی و جڤاکی و بشکێنیت و دێ چاوا ئەڤ حیزبە شێت ‏دەسھەلاتێ رێڤەبەت، بەرھندێ ئەو حیزبێن ھوسا ھەژی نین ‏دەستھەلاتێ بگرنە دەست، مەبەستا مە نە شکاندنا چو ئالیێن ‏سیاسی یە، لێ ئەڤە پرسیارەکە دڤێت ئەم ھەمی ل خوە ‏بکەین و ھزرێ تێدا بکەین.‏