ئه‌ڤرۆنيوز:

شيره‌تكارێ جڤاتا ئاسايشا هه‌رێما كوردستانێ، مه‌سرور بارزانى، ئه‌ڤرۆ سێشه‌مبى 18/9/2018 پێشوازى ل برادلى سۆدن باليۆزێ نيوزيلاندا ل عيراقێ كر.

دديداره‌كێ دا، پێشهاتێن سياسى وله‌شكرى يێن ده‌ڤه‌رێ ب گشتى وگه‌فێن تيرۆرستان وب رێڤه‌چوونا پرۆسا هه‌لبژارتنان ل هه‌رێما كوردستانێ هاته‌ به‌حسكرن، مه‌سرور بارزانى ئاماژه‌ دا كو هێشتا تيرۆرستين داعشێ گه‌فا سه‌ره‌كى ومه‌ترسيدارن بۆ ئاسايش وسه‌قامگيريا ده‌ڤه‌رێ، ب تايبه‌تى ل مووسل وئه‌نبار وده‌وروبه‌رێن كه‌ركووكێ.

دپشكه‌كا دى يا ديدارێ دا به‌حسێ بزاڤ وپێنگاڤێن پێكئينانا حوكمه‌تا عيراقى يا نوو هاته‌ كرن وهه‌ردو لا دهه‌ڤرا بوون كو پێدڤيه‌ حوكمه‌ته‌ك بيت ره‌نگڤه‌دانا پێكهاتێن عيراقێ بيت وبزاڤێن خوه‌ بۆ ئاشتبوونا نيشتمانى ودابينكرنا خزمه‌تگوزاريێن سه‌ره‌كى وچاره‌سه‌ركرنا كێشان بكه‌ت، ل دۆر وێ چه‌ندێ باليۆزێ نيوزيلاندا پشته‌ڤانيا حوكمه‌تا وه‌لاتێ خوه‌ بۆ پێكئينانا حوكمه‌ته‌كێ راگه‌هاند كو نوونه‌راتيا هه‌موو پێكهاتان وخواست وداخوازيێن ولاتيان بكه‌ت.

سه‌باره‌ت بزاڤێن پێكئينانا حوكمه‌تا نوو، مه‌سرور بارزانى دياركر كو هه‌رێما كوردستانێ بزاڤا پێكئينانا هه‌ڤپه‌يمانيه‌كێ دكه‌ت كو داخوازيێن كوردستانێ وماده‌ وبرگێن دستوورى بجهبينيت، هه‌روه‌سا ئاماژه‌ ب له‌زكرنا بزاڤان بۆ دامه‌زراندنا جڤاتا بلند يا سياسه‌تين ستراتيژى ل عيراقێ كر، وه‌كو بزاڤه‌كا گرنگ بۆ رێگرتنێ ل تاكره‌ويێ ل ب رێڤه‌برنێ وده‌ركرنا بريارێن چاره‌نڤيسساز.

بحسكرنا په‌يوه‌نديێن دو قۆلى دناڤبه‌را هه‌رێما كوردستانێ ونيوزيلاندا وپێڤه‌برنا وان دهه‌موو بواراندنا ته‌وه‌ره‌كێ دى يێ ديدارێ بوو.

ئەڤرۆ نیۆز، قائید میرۆ

هژمارەكا ئەندام و لایەنگرێن بەرهەم سالحی پەیوەنديێ ب پارتی دكەن،  بەرپرسەكێ پارتی ژی دبێژیت، خەلك گەهشتیە وێ باوەریێ كو پارتی خزمەتا مللەتی دكەت.

كەنعان خەیلانی، سەرۆكێ فڕاكسیۆنا پارتی ل جڤاتا پارێزگەها هەولێرێ بۆ ئەڤرۆ نیۆز  راگەهاند” پشتی بێ ئومێدبوونا هژمارەكا بەرچاڤ يا ئەندامێن حزبا بەرهەم سالحی و باوه‌رى ب سیاسەت و هەلوێستێن پارتی دیموكراتی كوردستان ئيناى،  ل رۆژێن بۆری هژمارەكا مه‌زن يا ئەندام و لایەنگرێن هەڤپەيمانیا بەرهەم سالحی پەیوەندی ب رێزێن پارتی دیموكراتی كوردستان كریە.

خەیلانی گۆت ژی” پارتی ب سینگەكێ بەرفرهه‌ پێشوازی ل هاتنا ڤان ئەندام و لايه‌نگرێن هەڤپەیمانیێ بۆ دیموكراسيێ ودادپه‌روه‌ريێ كریە و نوكە خەلك گەهشتیە وێ باوەریێ  كو پارتی تاكە حزبە كار بۆ خزمەتا هەرێما كوردستانێ دكەت و لایەنێن دی ل دووف بەرژەوەندیێن خوە دگەرهن”.

ئەڤرۆ نیۆز، قائید میرۆ

كۆمسیۆنا بلند يا هەلبژارتن وراپرسيێ ل هەرێما كوردستانێ ئاشكراكر،  كۆمسیۆنێ چەندین ناڤێن مریان دناڤا تۆمارا دەنگدەران دا رەشكرینە و تۆمارا دەنگدەرێن هەرێما كوردستانێ پاقژترە ژ یا بەغدا.

جوتیار عادل، ئەندامێ جڤاتا بلندا كۆمسیۆنا هەلبژارتنێن هەرێما كوردستانێ دیاركر” كۆمسیۆنێ ددو قۆناغان دا تۆمارا دەنگدەران پاقژكریە و قۆناغا ئێكێ پەسەندكرنا لیستا تۆمارا دەنگدەران بوویە و قۆناغا دویێ ژی رەشكرنا ناڤێن مریان بوو، هەكه‌ لایەنێن سیاسی گازندە هەبن بلا سكالایان پێشكێشی كۆمسیۆنێ بكەن، چونكى نابیت هەر لایەنەك ب خوه‌ گازندان بكەت”.

جوتيارى خویاكر” مە دڤێت بەلگە هەبن هەر لایەنەكێ پێزانين هەنە چەند كەسێن مری دناڤا لیستا تۆمارا دەنگدەران دا هەنە، بلا بەلگەیێن خوە پێشكێش بكەن و بێ بەلگە ئاخڤتن ناهێتە وەرگرتن”.

ئاماژە كر” كۆمسیۆنێ پێنگاڤێن باش هاڤێتینە بۆ پاقژكرنا تۆمارا دەنگدەران، بۆ نموونە لیستا مە یا كۆمسیۆنا هەرێمێ 250 هزار ناڤان كێمترە ژ یا بەغدا”.