ئه‌ڤرۆنيوز:
په‌يڤدارێ وه‌زاره‌تا ئه‌وقافێ وكاروبارێن ئايينى ل هه‌رێما كوردستانێن، نه‌به‌ز ئيسماعيل، درۆهنكرنه‌كێ دا به‌لاڤكر، ژئه‌گه‌رێ هاتنا خوار يا بهايێ ئۆتێلان وخوارنێ ل وه‌لاتێ سعوديێ وڤه‌كرنا 700 كۆمپانيێن تايبه‌ت ب عومرێ ڤه ل وى وه‌لاتى، بهايێ گه‌شتێن عومرێ هاتيه خوار ژ هزار دۆلاران بۆ 700 دۆلاران وهنده‌ك جاران كێمتر ژى.
گۆت ژى”ده‌مێ مانا عه‌ر عومره‌كاره‌كى ل سعوديێ 10 رۆژن”.
ئه‌ڤرۆنيوز:
سه‌رۆك مه‌سعود بارزانى ئه‌ڤرۆ پێنجشه‌مبى 15/11/2018 د په‌يامه‌كێ دا خوه‌شحاليا خوه دياركر ب ئازادبوونا عه‌بدولره‌حمان ئاپۆ ئه‌ندامێ سه‌ركردايه‌تيا پارتى ديموكراتى كوردستان سووريا ژ زيندانێن په‌يه‌دێ.
سه‌رۆك بارزانى دپه‌ياما خوه دا دبێژيت”ب ئازادبوونا عه‌بدولره‌حمان ئاپۆ ئه‌ندامێ سه‌ركردايه‌تيا پارتى ديموكراتى كوردستان سووريا ژ زيندانێن په‌يه‌دێ گه‌له‌ك خوه‌شحال بووم.
دياركر” ب راستى جهێ خه‌باتكه‌ره‌كێ وه‌كو وى دڤيا زيندانێن دوژمنان با، نه‌كو زيندانا لايه‌نه‌كێ كوردى”.
سه‌رۆك بارزانى گۆت ژى” هيڤيدارم ئه‌ڤه ببيته ده‌سپێكه‌ك بۆ ئازادكرنا هه‌موو گرتيێن لايه‌نێن سياسى يێن رۆژئاڤايا كوردستانێ كو دزيندانێن په‌يه‌دێ دانه وهه‌روه‌سا ديتنا هه‌موو وان چالاكڤانێن كوردى ئه‌وێن بێ سه‌ر وشوين بووين”.
گۆت ژى” هيڤي دارم ژ نوكه وپێڤه رۆژئاڤايا كوردستانێ ڤه‌كرنا سياسى ب خوه‌ڤه ببينيت وئێدى خه‌لك ولايه‌نين سياسى ژبه‌ر بيرورايێن سياسى نه‌هێنه ئازاردان وزيندانكرن”.
ئه‌ڤرۆنيوز:
رێڤه‌به‌ريا ساخله‌ميا شه‌قلاوه ئاشكرا دكه‌ت كو جۆره كرمه‌ك دناڤ قوتابيان دا به‌لاڤبوويه كو بوويه ئه‌گه‌رێ دروستبوونا برينان ل ده‌ف وان.
موحسن قه‌سرۆكێ، به‌رپرسێ هشياريا ساخله‌ميێ ل رێڤه‌به‌ريا ساخله‌ميا شه‌قلاوه ئه‌ڤرۆ پێنجشه‌مبى 15/11/2018 راگه‌هاند” دوهى ئه‌م ژلايێ رێڤه‌به‌رێ قوتابخانا گوندێ(ره‌زگه‌ى ديوين) يێ سه‌ر ب شه‌قلاوه ڤه هاتينه ئاگه‌هداركرن كو جۆره حاله‌ته‌كێ مه‌ترسيدار دناڤ قوتابيان دا ول هه‌موو پۆلان به‌لاڤبوويه”.
ناڤبرى، ل دووڤ وشه، گۆت ژى” تيمه‌كا پاراستنا ساخله‌ميێ سه‌ر ب رێڤه‌به‌ريا ساخله‌ميا شه‌قلاوه سه‌ره‌دانا وێ قوتابخانێ كر وژ نێزيك پشكنين ودووڤچون كر كو نێزيكى 32 قوتابى تووشى حاله‌تێ ( حه‌ساسيێ) ببوون، ئه‌گه‌ر ژلى ئه‌وبو كو رۆژا پێشتر چه‌ند قوتابيه‌ك دچنه ده‌وروبه‌رێن گوندى بۆ كۆمكرنا كڤاركان وژداروبارى وگژوگياى جۆره كرمه‌كێ ره‌نگ سوورێ بچووك دچيته دناڤ له‌شێ وان قوتابيان دا ول گه‌ل هاتنا وان بۆ قوتابخانێ ئه‌و كرمه دهێته ڤه‌گوهاستن بۆ ناڤ پۆلان وهه‌تا نوكه 32 قوتابى يێن تووشى حاله‌تا حه‌ساسيێ بووين”.
خوياكر” هنده‌ك ژ له‌شێ قوتابيان يێ بوويه برين، له‌وما مه داخواز ژ رێڤه‌به‌ر ومامۆستايان كر كو پێدڤيه ئه‌و قوتابيێن تووشبووى بهێنه هنارتن بۆ نه‌خوه‌شخانێ بۆ وه‌رگرتنا چاره‌سه‌ريێ، مه ژى ژبلى هنده‌ك پێدڤيێن ساخله‌ميێ، مادێ پاقژككه‌ر بۆ دابين كريه وچه‌ندين رێنماييێن هشياريێ وخوه‌پاراستنێ بۆ قوتابيان ومامۆستاين=ان به‌حس كر ژبۆ پاراستنا ساخله‌ميا قوتابيان”.
ئه‌ڤرۆ نیوز،هه‌ژار مه‌عروف:
راپورتێن روژنامه‌‌ڤانی ل ئورۆپا وه‌سا داینه دیارکرن دورخستنا راهێنه‌رێ نوکه یێ یانا بایرن میونیخ نیکو کوڤاتیچ نێزیک بوویه ژبه‌ر ئه‌و ئه‌نجامێن لاواز هه‌تا نوکه دخۆلێ دا تومارکرین.
روژناما زه‌سه‌ن یا برێتانی دیارکریه کارگێریا یانا بایرن میونیخ هزر ل ئینانا راهێنه‌ره‌کێ نوو کریه ل ماوێ بهێت ل جهێ کوڤاتیچ کو ئیدارا یانا ئه‌لمانی راهێنه‌رێ فره‌نسی و یانا ریال مه‌درید یێ به‌ری نوکه زێدان کریه ئارمانجا خوه یا سه‌ره‌کی.
ئه‌وێ روژنامێ ئه‌و چه‌نده ژی دیارکریه هه‌لوه‌شاندنا هه‌ڤبه‌ستا راهێنه‌رێ نوکه پشتی خوساره‌تیا یانا باڤاری د کلاسيکویا ئه‌لمانیا دا به‌رامبه‌ر بروسیا دورتموند گه‌له‌ک نێزیک بوویه ژبه‌رکو حه‌فتی بو حه‌فتیێ ره‌وشا وێ به‌ر ب لاوازبوونێ ڤه دچیت نوکه یانا باڤاری ل رێزا پێنچێ دهێت د لیستا خۆلا بڕندس لیگا دا .
ئه‌ڤرۆ نیوز، نه‌وزاد هلۆرى:
پشتى كو سێ وه‌لاتیێن گوندێ ئه‌ره‌دنا یا سه‌ر ب ناحیا سه‌رسنكێ كه‌فتینه به‌ر هێرشا فرۆكێن توركى و هاتينه شه‌هیدكرن، ئه‌ڤرۆ پشتى نیڤرۆ د رێورسمه‌كێ دا ل گوندێ ئه‌ره‌دنا هاتنه ڤه‌راشتن، قایمقامێ قه‌زا ئامێدیێ ژى دیاركر كو پێدڤیه وه‌لاتى خوه ل وان ده‌ڤه‌ران دووربێخن كو مه‌ترسیا بوردومانێ ل سه‌ر هه‌یه ب تایبه‌تى ده‌ڤه‌رێن سنوورى و دور.
ئیسماعیل محه‌مه‌د، قایمقامێ قه‌زا ئامێدیێ بو ئه‌ڤرۆ نیوز گۆت: (وه‌كو دیاره ژ ئه‌گه‌ره‌كێ نه‌دیار سێ وه‌لاتێن گوندێ ئه‌ره‌دنا یا سه‌ر ب ناحیا سه‌رسنكێ چووینه ده‌ڤه‌رێن چیایى و پاشى بووینه ئارمانجا فرۆكێن توركى و شه‌هیدبووینه، وه‌كو قایمقامیا ئامێدیێ دلگرانبووین ب شه‌هیدبوونا وان و ب توندى ڤێ روودانا هوڤانه دژى وه‌لاتیێن سڤێل یێن ئامێدیێ شه‌ر‌مزار دكه‌ین).
زێده‌تر گۆت: (پێشتر ژى چه‌ندین جاران مه داخواز ژ وه‌لاتیێن سنوورێ قه‌زا ئامێدیێ كریه كو نه‌چنه ده‌ڤه‌رێن دوره ده‌ست و وان ده‌ڤه‌رێن كو چه‌كدارێن په‌كه‌كێ لێ هه‌ين داكو نه‌بنه ئارمانجا فروكێن توركى، دیسا ب رێیا راگه‌هاندنێ مه داخواز ژ په‌كه‌كێ كریه كو ئه‌و ژى خوه ل ده‌ڤه‌رێن ئاڤه‌دانى دووربێخن، ژبه‌ركو توركیا وان دكه‌ت بهانه بۆ بوردومانكرنا وه‌لاتیێن سڤێل، ژبه‌رڤێ ئه‌م دخوازین كو وه‌لاتى نه‌چنه وان ده‌ڤه‌ران ب تایبه‌تى ده‌ڤه‌رێن سنوورى ب تایبه‌تى تر ژى ل ده‌مێ شه‌ڤێ).
قایمقامێ ئامێدیێ دیاركر ژى كو نابیت ب چو شێوه‌یان ده‌ڤه‌رێن ئاڤه‌دانی يێن هه‌رێما كوردستانێ ب گشتى و ئامێدیێ ب تایبه‌تى ببیته مه‌یدانا سیاسه‌ت و شه‌رێ دو هێزان و گۆت ژى: (خه‌لكێ ده‌ڤه‌رێ ب ژیانا خوه‌ڤه و لسه‌ر مولك و بیستان و ره‌زێن خوه دمژوولن و چو گونه‌ها خوه نینه كو ببنه قوربانیێن سیاسه‌تێ، ژبه‌رڤێ پێدڤیه هه‌موو لایه‌ك خوه بكه‌ت خودان بو راگرتنا بوردومانان).
ئه‌ڤرۆ نیۆز، هه‌رهین محه‌مه‌د:
ئه‌كته‌را گه‌نج ئه‌نداما پرۆگرامێ به‌زمى به‌زم دلسوز ماوه‌تى دیداره‌كێ دا بۆ ئه‌ڤرۆ نیۆز گۆت: ل ده‌مه‌كى من كاركریه خوبه‌خش ژبه‌روێ چه‌ندێ خزمه‌تا هونه‌رى كوردى بكه‌م و هه‌كه داهاته‌ك پێڤه بهێت ژى مافێ منه و ئه‌ز ئه‌كته‌رم و هه‌ر روله‌كێ ب كه‌ڤیته به‌رسنگێ من دێ كه‌م، به‌لێ هه‌موو ده‌مان حه‌زدكه‌م دزارڤه‌كرنێ دا به‌روڤاژى كه‌سایه‌تیا خوه بم و ئافره‌ته‌كا هاربم.
دلسۆزێ گۆت: به‌رى چه‌ند سالان من ئه‌و پسیاره ژ رۆژنامه‌ڤانێن بادینى كر ئه‌رێ بۆچى دبیاڤێ زارڤه‌كرنێ دا كچ یاكێمه و هه‌موو ده‌مان من حه‌زدكر ل ده‌ڤه‌را بادینان ژى ئه‌كته‌رێن ژن هه‌بن و ما بۆچى ئه‌ز دێ هێمه ده‌ڤه‌را بادینان كارێ ئه‌كته‌ریێ كه‌م و ب زه‌راڤێ بادینى ئاخڤم و چ جوداهى دناڤبه‌را من و ژنێن بادینى دانینه و ئه‌ڤ چه‌نده‌ژى بۆ هندێ دزڤریت كو هێشتا داب و نه‌ریت ل سه‌ر كه‌لتورێ مه‌یێ زاله گۆت: هه‌ست ب خوه‌شیێ دكه‌م ده‌مێ دچمه سه‌ر ده‌پێ شانویێ وهه‌موو بینه‌ر ته‌ماشه‌ى من دكه‌ن، چونكو هه‌موو شیانیچن ئه‌كته‌رى ل سه‌ر ده‌پێ شانویێ دیاردبن و ده‌پێ شانویێ تشته‌كێ زیندى یه و دڤێت ئه‌كته‌ر هه‌میى شیانێن خوه ل سه‌ر دیاربكه‌ت بۆ بینه‌ران.
دلسوزێ لدور پرۆگرامێ به‌زمى به‌زم گۆت: نوكه كاردكه‌م ل گه‌ل گرۆپێ پرۆگرامى به‌زمى به‌زم و هه‌ركه‌سه‌كێ ژمه موچه‌كێ هه‌یڤانه هه‌یه و مه دڤێت هه‌ردبه‌رده‌وا بین ل سه‌ركارێ ئه‌كته‌ریێ و دیسان ئه‌م بهێزتر لێ دهێن به‌رامبه‌رى بینه‌ران.
ل دووماهیێ گۆت: من فلمه فیسته‌ڤالا دهۆك ژ لایێ راگه‌هاندێ ڤه دیت و بۆ من یاگرنگ نینه كو ئه‌ز داخاز نه‌كریم، چونكو فیسته‌ڤال هه‌بن یان نه‌بن خه‌لك من دنیاسن پێدڤى نینم خه‌لك بۆ من ده‌ستا ب قوتن من چ كه‌لتورێ كوردى دفیسته‌ڤالێ دا نه دیت و فیسته‌ڤال ب ستایلێ ئه‌وروپى ب رێڤه چوو بتنێ خونیشاندانا خانمان بۆ ب مخابنى ڤه بینه‌رێن فلمانه‌بوون و ئه‌كته‌رێن بیانى هاتبوون گه‌له‌كێ رێز لێ دهاته گرتن و بۆچى وه‌زاره‌تا ره‌وشه‌نبیرى رێزێ ل ئه‌كته‌رێن كورد ناگریت و مه گه‌له‌ك ئه‌كته‌رێن كورد هه‌نه و هه‌رچار پارچێن كورد وان دنیاسن و هه‌تا نوكه (ناسناما) سه‌ندیكایێ نینه و دبێژنێ تونه‌یێ خانده‌ڤانى و نزانم سه‌ندیكا و وه‌زاره‌تا ره‌وشه‌نبیرى دنڤستینه.
ئه‌ڤرۆ نیوز،هه‌ژار مه‌عروف:
به‌ری ده‌مه‌کێ کێم پێنچ یاری ژ گه‌را پێنچێ ژ خۆلا پلا نایاب یا کوردستانێ ب دووماهیی هاتن کو چار یاری ب وه‌کهه‌ڤی ب دووماهی هاتن کو هه‌ر سێ نوونه‌رێن پارێزگه‌ها دهۆکێ ژی د یاریێن خوه ئه‌ڤرۆ دا نه‌شیان سه‌رکه‌فتنێ توماریکه‌ن پشتی وه‌کهه‌ڤبووین.
د که‌شو هه‌وایه‌کێ بارانی تیما ته‌پا پێ یا دهۆک نه‌شیا به‌ردوامی ب ده‌ته کاروانێ سه‌رکه‌فتنێن خوه پشتی ل یاریگه‌ها خوه ل گه‌ل یانا هه‌ولێر وه‌کهه‌ڤبووی بێ گول کو هه‌ردو یانان چه‌ندین بزاڤکرن بۆ تومارکرنا گوله‌کێ تایبه‌ت ژلایێ یانا دهۆک ڤه لێ هێلا به‌ره‌ڤانیا هه‌ولێر و گولچیێ وی به‌رامبه‌ر هه‌موو هێرشێن یانا دهۆک راوستان.، سه‌راره‌ی ژه‌کهه‌ڤیا ئه‌ڤرۆ یانا دهۆک سه‌رێ لیستا خولێ پاراست ب ١١ خالان و هه‌ولێر خالێن خوه گه‌هاندنا حه‌فت خالان.
ژلایه‌کێ دویڤه ل باژێرێ سلێمانیێ تیما زاخۆ بۆ یاریا پێنچێ ل دیڤ ئێک نه‌شیا سه‌رکه‌فتنێ ل وه‌رزێ ئه‌ڤ ساله توماربکه‌ت پشتی ئه‌ڤ جاره ژی وه‌کهه‌ڤبووی بێ گول ڵ گه‌ل یانا نه‌وروز و خالێن خوه گه‌هاندنه ٤ خالان و نه‌وروز خالێن وێ بوونه ٦ خال و یانا ئاکرێ ب خاله‌کا گرنگ ژ باژێرێ که‌رکوک ڤه‌گه‌ریا پشتی وه‌کهه‌ڤبووی ل گه‌ل یانا گازی باکور ب سێ گولان کو ئاکرێ ژی خالێن وێ بوونه ٤ خال و گازی باکور شه‌س خال.
ژلایه‌کێ دویڤه ده‌ربه‌ندیخان ل گه‌ل برایه‌تی ب گوله‌کێ وه‌کهه‌ڤبوون و ئارارات شیا سه‌رکه‌فتنه‌کا گرنگ ژ ده‌رڤه‌ی یاریگه‌ها خوه ل سه‌ر یانا هه‌ندرین توماربکه‌ت دو گولان به‌رامبه‌ر گوله‌کێ.
چاڤه‌رێ دهێته کرن سوباهی به‌ردوامی ب یاریێن ڤێ گه‌رێ بهێنه‌کرن کو نوونه‌را پارێزگه‌ها دهۆکێ و هه‌لگرا ناسناڤێ وه‌رزێ بوری زێره‌ڤانی دێ یاریا خوه ل گه‌ل پێشمه‌رگا سلێمانیێ که‌ت و پێشمه‌رگا هه‌ولێر دێ ل گه‌ل شێروانه که‌ت
ئه‌ڤرو سپێدێ 15-11-2018 ل كه‌مپا شاریا یا ئاوارا ل سنورێ قه‌زا سێمێلێ ب ئاماده‌بونا به‌رێزان فه‌رهاد ئه‌مین ئه‌تروشی پارێزگه‌رێ دهوكێ وبارك یونگ كونسلێ گشتی یێ وه‌لاتێ كوریا باشور وچه‌ند به‌رسێن میری ل ده‌ڤه‌رێ هاریكاریێن نوشداری یێن وه‌لاتێ كوریا باشور هاتنه راده‌سته‌كرن بو بنگه‌هێ ساخله‌میێ ل كه‌مپا شاریا یا ئاوارا.
درێ ورسمێن راده‌ستكرنا وان هاریكاریێن نوشداری دا پارێزگه‌رێ دهوكێ په‌یڤه‌ك پێشكێشكر وبناڤێ كارگێریا پارێزگه‌هێ وخه‌لكێ پارێزگه‌هێ ونڤێسینگه‌ها بورها سوپاسیا گه‌ل وه‌لاتێ كوریا كر هه‌مبه‌ر دابینكرنا وان هاریكاریێن نوشداری بو بنگه‌هێن ساخله‌میێ لناڤ وده‌رڤه‌ی كه‌مپان .
وگوت: حكومه‌تا كوریا وب رێكا كونسلێ گشتی گه‌له‌ك هاریكاریا ئاوارا وپه‌نابه‌ران وكه‌رتێن دی یێن خزمه‌تكاری ل سنورێ پارێزگه‌هێ كریه‌وهیڤی خاستن كو حكومه‌تا كوریا یا به‌رده‌وامبیت ب هنارتنا هاریكاریا بو هه‌ژار ووپه‌نابه‌ر وئاوارێن سنورێ پارێزگه‌ها دهوكێ چونكو پتری پێنچ سالایه ژماره‌كا زور یا ئاواره وپه‌نابه‌ران ل سنورێ پارێزگه‌هێ هه‌نه وپێدڤی ب هاریكاریا جڤاكێ ده‌وله‌تی ورێكخراوێن مروڤایه‌تی هه‌یه وسوپاسیا هه‌موو لایه‌نان كر یێن ل سالێن ده‌ربازبوی هاریكاریا ئاواره وپه‌نابه‌ران كری.
پارێزگه‌رێ دهوكێ داخاز ژجڤاكێ ده‌وله‌تی ورێكخراوێن نیڤ ده‌وله‌تی كر كو فشارا سیاسی بێخه‌نه سه‌ر حكومه‌تا عیراقا فیدرال كو ئارمی وخزمه‌تكاریا بو ده‌ڤه‌را شنگالێ په‌یداكه‌ت دا ئاواره ڤه‌گه‌رن سه‌ر جه وارێن خو.
ژلایێ خوڤه قونسلێ گشتی یێ وه‌لاتێ كوریا باشور ته‌كه‌زكر كو هه‌ر ژده‌ستپێكا هاتنا داعش حكومه‌تا كوریا به‌رده‌وام هاریكاریێن ته‌ندورستی وپه‌روه‌رده‌یی بو ئاوارا ل عیراقێ وهه‌رێما كوردستانێ پێشكێشكرینه وبو ئه‌ڤ ساله ژی دێ به‌رده‌وامیێ ده‌نه وان هاریكاریا .
پاش چه‌ند هاریكاری ل سه‌ر زاروكان هاتنه به‌لافكرن ولدوڤدا هاریكاریێن نوشداری ب شێوه‌كێ فه‌رمی هاتنه راده‌ستكرن.
هه‌ژی گوتنێ یه حكومه‌تا كوریا ب هه‌ڤكاری دگه‌ل وه‌زاره‌تا نافخوی یا حكومه‌تا هه‌رێما كوردستانێ و ب رێكا نڤێسینگه‌ها به‌رسڤدانا قه‌یرانا (jcc) (106) ئایتم یێن جورا وجور یێن ده‌رمانان بو رێڤه‌به‌ریا گشتی ساخله‌میێ دابینكرینه و25% ژوان هاریكاریا بو بنگه‌هێ ته‌ندورستی ل كه‌مپا شاریا هاتینه ته‌رخانكرن.
ئەڤ سالە 98 جاران بوردومان و 87 جاران توپ بارکرنا تورکی ل دەڤەرائامێدیێ ھاتیەکرن
ئەڤرۆ نیوز، نەوزاد ھلۆری:
بوردومان و توپابارنکرنا فروکە و سوپایێ تورکیا بو سنوورێ قەزا ئامێدیێ بەردەوامی ھەیە، ھەتا نوکە ژی حوکمەتا ھەرێم و ناڤەندی و لایەنێن شولەژێ نەشیاینە رابگرن، چالاکڤان و خەلکێ دەڤەرێ دخوازن کو ژ چوار لایان ڤە بزاڤ بھێتەکرن بو راگرتنا بوردومان و توپبارانان ، ئەندامەکێ جڤاتا پارێزگەھا دھۆکێ ژی دیارکر کو بوردومانا فروکێن تورکیا بو ھەرێما کوردستانێ سیاسی یە و دڤێت ب ھێزەکا چەکداری بھێتە راگرتن.
ئەحمەد شامکی، ئێکە ژ چالاکڤانێن دەڤەرا ئامێدیێ بۆ ئەڤرۆ نیوز گۆت: (بوردومان و توپبارانکرنا دەڤەرا ئامێدیێ ب گشتی بابەتەکێ نوو نینە بھێتە بەحسکرن، بەلکو پێدڤی بو ھەتا نوکە لایەنێن سیاسی و حوکمی خوە لێ کربایە خودان و بابەت ب ئێکجاری ھاتبایە ئێکلاکرن و ھەموو جورە چالاکیێن سەربازی سەر ئاخا ھەرێما کوردستانێ ب گشتی و ناڤا خێزان و مالێن وەلاتیان ب تایبەتی دناڤبەرا تورکیا و پەکەکێ ھاتبانە راگرتن)
زێدەتر گۆت: (چوار ئەگەرێن سەرەکی ھەنە بو راگرتنا بوردومان و توپبارانکرنا دەڤەرێن مە کو ئەو ژی حوکمەتا ھەرێما کوردستانێ و حوکمەتا ناڤەندی ل گەل ھەر ئێک ژ پەکەکێ و تورکیا ب جدی دانوستاندنێ بکەن، بو چارەسەرکرنا ئێکجارەکی یا کێشا دناڤبەرا پەکەکێ و تورکیا، بەروڤاژی دێ روژ بو روژێ بوردومانا فروکێن تورکیا و توپخانەیێن وان بو دەڤەرێن مە بەردەوام بیت، ژلایەکێ دنڤە دڤێت خەلکێ دەڤەرێ ژی لسەر خوە قبول نەکەن و بھێنە سەرخەت و گڤاشتنێ لسەر حوکمەت و لایەنێن شولەژێ بکەن ب تایبەتی د رێیا نونەرێن خوە پەرلەمانێ کوردستان و عیراقێ بکەن داکو ئێدی ئەو نەبنە قوربانێ یا ململانا سیاسی ل دەڤەرێ)
شامکی، ل سالێن 1991 پشتی سەرھلدانێ ھەتا نوکە زێدەتر ژ 30 وەلاتیێن شێلادزێ دەڤەرا ئامێدیێ ب گشتی و شێلادزێ ب تایبەتی شەھیدکرن و ھژمارەکا دن ژی بریندار و بەرزە بوینە، نێزیکێ 200 گوندێن دەڤەرێ ژی مەترسیا بوردومانێ لسەر ھەیە و خەلک نەشێت بچیتە سەر رەز و بیستان و جە و وارێن خوە و بێ بەھر بوینە ژ ھەموو خێر و بێرێن گوندێن خوە.
ژلایەکێ دنڤە، ئیدری ھەرکی، ژ لژنا ئەمنی و نافخوە یا جڤاتا پارێزگەھا دھۆک بو ئەڤرۆ نیوز: (بابەتێ بوردومانا فروکە و سوپایێ تورکیا و بوردومان و توپبارانکرنا ھەرێما کوردستانێ ب گشتی و دەڤەرا ئامێدیێ ب تایبەتی ب ھەلویست و دەرئێخستنا بەیاننامە و خوەپێشاندان و رەتکرنێ ناھێتە راگرتن و دێ بەردەوام بیت و قوربانیێن زێدەتر ژی دھێنە چاڤەرێکرن، ژبەرکو بابەت سیاسی یە و بەزاندنا سەروەریا ھەرێمێ یە ژلایێ تورکیا، راگرتنا بوردومان و توپبارانکرنا تورکیا تنێ ب ھێزەکا چەکدارە)
زێدەتر گۆت: (ھەرێما کوردستان و عیراق ژی نەشێت ب چوو شێوەیان بوردومان و توپبارانکرنا سنوورێن ھەرێما کوردستانێ رابگرن، بەلکو دڤێت ھەردوولا بزاڤێ بکەن ب رێیا لژنێن دەرڤەیێن پەرلەمانی و حوکمەتێ دەنگێ ستەما گەلێ کوردستانێ و قوربانیێن وان بگەھینن نەتەوەیێن ئێگرتی و ناتوی کو تورکیا ئێدی بوردومان و توپبارانکرنێ رابگریت، بەروڤاژی ھێزێ بەرامبەر بکاربینن، ئەگەر ئەڤ یەک نەھێتەکرن ب پتراستی دبێژم بوردومان و قوربانی دێ بەردەوام بن)
ناڤبری د درێژاھیا ئاخفتنێ، خوە دا دیارکر ژی کو وەکو جڤاتا پارێزگەھا دھۆک ئەوان ژ نێزیک سەرەدانا جھێن بوردومان و توپبارانێن بەری نوکە یێن تورکیا کریە و ھەموو پێزانین وەرگرتینە و بو لایەنێن شولەژێ بلندکریە و زێدەتر گۆت: (پێدڤی یە دەستپێکێ بوردومان بھێتە راگرتن، پاشان قەرەبویا خەلکێ زیانڤێکەفتی بھێتەکرن)
ب گورەی پێزانین ئەڤرۆ نیوز، لرۆژا 20/9/2017 ھەتا ئەڤرۆ 15/11/2018 ئانکو د دەما سالەکا و سێ دوو ھەیڤێن بووری فروکێن شەرکەرێن تورکیا 98 جاران، توپخانەیێن سوپایێ تورکیا ژی 87 جاران سنوورێ قەزا ئامێدیێ بوردومانکریە.
د ئەنجام دا 17 وەلاتی شەھیدبوینە و شەش ژی برینداربوینە کو ئەو ژی 10 شەھید و سێ بریندار ل سنوورێ ناحیا شێلادزێ ، شەھیدەک و دوو بریندار ل سنوورێ ناحیا دێرەلوک ، سێ شەھید ژی سنوورێ ناحیا سەرسنک ، سێ شەھید و بریندارەک ل سنوورێ ناحیا کانی ماسێ و سەنتەرێ قەزا ئامێدیێ، ئەڤە زێدەباری کو ملیونان دولار زیان ب ژینگەە و رەز و بیستان و مولک و گوندانگەھاندینە.
نيشاندان