ئه‌ڤرۆنيوز:

وه‌زاره‌تا كاروبارين شه‌هيد وئه‌نفالكريان راگه‌هاند، ل چه‌ند رۆژێن بهێت پارێ خواندنا ساله‌كێ يا كه‌سوكارێن شه‌هيدان دێ هێته‌ به‌لاڤكرن.

فوئاد عوسمان، په‌يڤدارێ وه‌زاره‌تا كاروبارێن شه‌هيد وئه‌نفالكريان ل هه‌رێما كوردستانێ گۆت”پشتى وه‌رگرتنا رازيبوونا وه‌زاره‌تا دارايى، ل چه‌ند رۆژێن بهێت دا دێ پارێ خواندنێ يا ساله‌كێ يا كه‌سوكارێن شه‌هيدان هێته‌ به‌لاڤكرن”.

ناڤبرى زێده‌تر بۆ باسنيوز گۆت”ل دووڤ قانوونێ، پارێ خواندنا كه‌سوكارێن شه‌هيدان ل سه‌ر حوكمه‌تا هه‌رێما كوردستانێ يه‌، به‌لێ ژئه‌گه‌رێ قه‌يرانا دارايى، ده‌مێ دو سالانه‌ پارێ خواندنێ گيرۆبوويه”.

رۆهنكر ژى” ل چه‌ند رۆژێن بۆرى وه‌زاره‌تا دارايى رازيبوون ل سه‌ر خه‌رجكرنا پارێ سالا خواندنێ 2016 – 2017يا كور وكچێن شه‌هێدان ده‌ربريه‌، بۆ سالا خواندنێ 2017 -2018 ژى، ل گه‌ل زانكر وپه‌يمانگه‌هان وناڤه‌ندێن خواندنێ رێككه‌فتن هاتيه‌ كرن كو قوتابيێن كور وكچێن شه‌هيدان فۆرمه‌كێ دابگرن و ب وێ فۆرمێ پارێ خواندنێ نه‌ده‌ن، تاكو حوكمه‌ت پاره‌ى خه‌رج دكه‌ت”.

دياركر” ل چه‌ند رۆژێن داهاتى دا ئه‌و پاره‌ دێ ل رێڤه‌به‌ريێن كاروبارێن شه‌هيد وئه‌نفالكريان ل پارێزگه‌هان هێته‌ به‌لاڤكرن وهه‌كه‌ هه‌ر قوتابيه‌كى چ گۆژمه‌كێ پاره‌ى دابيت، دێ پاره‌ پێ هێته‌ دان به‌لێ هه‌كه‌ پارێ خواندنێ نه‌دابيت، راسته‌وخوه‌ پارێ خواندنێ دێ ب  زانكۆ وپه‌يمانگه‌هان هێته‌ دان”.

ئه‌ڤرۆنيوز:

وه‌زاره‌تا پێشمه‌رگه‌ دبزاڤا كێمكرنا ليوايێن وه‌زاره‌تێ دايه‌، به‌رپرسه‌كێ وێ وه‌زاره‌تێ ژى دبێژيت دبه‌رنامێ وه‌زاره‌تا پێشمه‌رگه‌ى دايه‌ ليوايێن خوه‌ ژ چار ليوايان بكه‌ته‌ سێ ليوا.

وه‌زاره‌تا پێشمه‌رگه‌ چار ليوا يێن هه‌ين كو هه‌ر ليوايه‌ك نێزيكى 2500 پێشمه‌رگه‌يان ب خوه‌ڤه‌ دگريت وهه‌ر لێوايه‌كێ چار فه‌وج يێن هه‌ين وهه‌ر فه‌وجه‌كێ ژى 550 پێشمه‌رگه‌ نه‌.

ليوا بابه‌كر فه‌قێ ئه‌حمه‌د، رێڤه‌به‌رێ گشتيێ راگه‌هاندنێ وهشياريا نيشتمانى ل وه‌زاره‌تا پێشمه‌رگه‌ بۆ مالپه‌ري فه‌رميێ پارتى ديموكراتى كوردستان گۆت” به‌رنامه‌ك يێ هه‌ى بۆ كێمكرنا ليوايێن وه‌زاره‌تێ بۆ ڤێ مه‌ره‌مێ جڤاتا بلند يا وه‌زاره‌تا پێشمه‌رگه‌ كۆمبوونا فه‌رمى ل دۆر ڤێ چه‌ندێ كريه‌، تاكو ب شێوه‌كێ ئه‌كاديمى وب شێوێ ليوا رێكخستنه‌كا نوو بۆ زێره‌ڤانى ويه‌كه‌يێن 70 و 80 بهێته‌ كرن، به‌لێ ئه‌ڤه‌ كاره‌كێ زۆر بۆ دڤێت وهه‌تا نوكه‌ نه‌كه‌ڤتيه‌ دبوارێ بجهئينانێ دا”.

گۆت ژى” هه‌كه‌ ليوا بهێنه‌ كێمكرن، دێ ژ چار ليوايان بنه‌ سێ ليوا، كێمكرن دێ ل سه‌ر ميلاكاتێن وان ليوايان بيت، نه‌كو هه‌يبه‌تا لێوايێ، وى ده‌مى ب شێوه‌كێ ئه‌كاديمى ونيزامى دێ هێنه‌ رێكخستن وهه‌موو كه‌لوپه‌لێن وان لێوايان ب شێوه‌كێ رێكوپێك دێ هێنه‌ بجهئيان وچه‌ك وته‌قه‌مه‌نى وپێدڤيێن دى دێ هه‌ڤپه‌يمانان دابين كه‌ن”.

دياركر” كێمكرنا ليوايان ورێكخستنا وان دێ شێوێ سيسته‌مێ ليوايێن نێڤده‌وله‌تى بيت”.