ئه‌ڤرۆ نيوز:

پارێزگارێ سه‌پاندى يێ كه‌ركووك ب به‌هانه‌يا رێكه‌فنه‌تنا لايه‌نێن سياسى هێشتا نه‌چوويه‌ په‌رله‌مانى و سووندا قانوونى نه‌خواريه‌، ئێكه‌تيێ ژى دڤێت ل به‌غدا لايه‌نێن سياسى رازى بكه‌ت بۆ دانانا پارێزگاره‌كى ژ پشكا حزبا خوه‌ و چاڤه‌رێ ماوێ قانوونى يێ سووندخوارنا راكان جبۆرى پارێزگارێ سه‌پاندى يێ كه‌ركووك دكه‌ت كو ده‌ستپێكا هه‌يڤا بهێته‌، پارتى ژى وه‌سان دبينيت كو پشتى راكان دڤێت ئه‌و پۆست بهێته‌ راده‌ستكرن بۆ قايمقامێ مه‌ركه‌زى يێ كه‌ركووك هه‌ر وه‌كو د دستوورى دا هاتى.

ئەڤرۆ نيوز:‏

ئاژانسا فرەنسا یا نووچەیان د راپۆرتەکێ دا دیار کریە کو چەندین گرۆپێن چەکدار ل عەفرینێ ‏دەست ب رەڤاندنا وەلاتیان کرینە و ل ھەمبەر ئازادکرنا وان ژی داخوازا پارەکێ مەزن ل ‏کەسوکارێن وان کەسان دکەن و ھەتا نھا چەندین کەس ژی ھاتینە کوشتن، رەوشا نھا یا ل عەفرینێ ‏گەلەکێ خرابە و رۆژانە کارەساتێن مرۆڤی روو ددەن و مخابن وەلاتێن رۆژئاڤایی ل ھەمبەر رەوشا ‏عەفرینێ بێدەنگن.‏

د بەردەوامیا راپۆرتێ دا ئەو یەک ژی ھاتیە دیار کرن کو گەلەک زەویێن چاندێ یێ خەلکی ژ ئالیێ ‏وان گرۆپان ڤە ھاتینە تێکدان و پارە ب زۆرێ ژ جۆتیاران وەردگرن و خەلکێ عەفرینێ بێزار ‏بووینە.‏

ئه‌ڤرۆ، سەرجان مەحمود:‏

ل تورکیا و باکورێ کوردستانێ قۆناغا ھەلبژارتنێن باژێرڤانیان دەستپێکریە و گەلەک پارتێن تورکیا ‏بەربژێرێن خوە ژی دەستنیشان کرینە و ئاکپارتی ب سەرۆکاتیا رەجەب تەیب ئەردۆگان دخوازیت ‏باژێرڤانیێن مەزن یێن باکورێ کوردستانێ ژ دەستێ ھەدەپێ دەرخینیت و بۆ ڤێ چەندێ ژی ‏ئۆپەراسیۆنێن مەزن یێن گرتنا ئەندام و ئالیگرێن ھەدەپێ دەستپێ کرینە و د ناڤا ھەفتیەکێ دا ‏نێزیکی ٢٠٠ ئەندام، بەرپرس و ئالیگرێن ھەدەپێ ل باژێرێن باکورێ کوردستانێ ھاتنە گرتن و د ‏ھەمان دەمی دا ئۆپەراسیۆنێن سەربازی ژی ب دژواری بەردەوام دکەن.‏

سلێمان سۆیلو وەزیرێ ناڤخوە یێ تورکیا د داخۆیانیەکی دا راگەھاند کو ئەو ب ھەموو رەنگەکێ کار ‏دکەن دا کو باژێرڤانیێن باشور و رۆژھەلاتێ تورکیا (باکورێ کوردستانێ) قەزەنج بکەن دا کو ‏نەکەڤیتە دەستێ پشتەڤانێن تیرۆرێ و گۆت: (گەلەک ئاشکرایە کو ھەدەپە پشتەڤانیا پەکەکێ دکەت ‏و باژێرڤانیان دکەتە د بن خزمەتا پەکەکێ دا و ئەم دێ خەباتێ کەین دا باژێرڤانیێن باشور و ‏رۆژھەلاتێ تورکیا قەزەنج کەین و مە دڤێت دربەکا مەزن ل رێکخستنا تیرۆرست و ھەڤکارێن وێ ‏بدەین).‏

مەرال دانش بێشتاش جێگرا ھەڤسەرۆکێن ھەدەپێ ژی راگەھاند کو حوکمەتا ئاکپارتی گەلەک باش ‏دزانیت کو دێ د ھەلبژارتنێن باژێرڤانیان دا تووشی شکەستنەکا مەزن ھێت و بۆ ڤێ چەندێ ژ نھا ‏ڤە دەست ب گرتنا بەرپرس، ئەندام و ئالیگر و کادرێن ھەدەپێ کریە و گۆت: (دڤێت ھەموو گەلێ ‏کورد و ئالیێن دیموکرات مل ب ملێ پارتا مە د ناڤا خەباتێ دا جھێ خوە بگرن و ئەم دێ پێکڤە ‏دوبارە باژێرڤانیێن ل باکورێ کوردستانێ قەزەنج کەین).‏