ئه‌ڤرۆنيوز:
خۆلا نوو يا ته‌پا پێ يا عيراقێ بۆ يانێن پلا ناياب 2018-2019 ئه‌ڤرۆ ئه‌ينيێ 14/9/2018 ب ئه‌نجامدانا چار ياريان ده‌ستپێكر كو يانا هه‌ولێرێ ل ده‌رڤه‌ى ياريگه‌ها خوه دئێك ژوان ياريان دا وه‌كهه‌ڤ بوو.
ئه‌نجامێن گه‌را ئێكێ ژ خۆلا عيراقێ ب ڤى شێوه‌ى بوون:
نه‌فت – هه‌ولێر 2-2
نه‌جه‌ف – كه‌رخ 1-1
ئه‌مانه‌ت به‌غداد – به‌حرى 0-0
صناعات كهربائيه – جه‌ويه 0-1
ئه‌ڤرۆنیوز:
كۆمپانيا گه‌لف كيستۆن پترۆليۆم راگه‌هاند، تاكو ناڤه‌راستا سالا 2019، به‌رهه‌مێ په‌ترۆلا كێلگه‌يا شێخان ژ 30 هزار به‌رميلاندررۆژێ دا بۆ 55 هزار به‌رميلان درۆژێ دا دێ بلند بيت.
گه‌لف كيستۆن ل گه‌ل كۆمپانيا MOL يا هنگارى ب هه‌ڤپشكى ل كيلگه‌يا په‌ترۆلا شێخان كار دكه‌ن وب گۆژمێ 200 هه‌تا 230 مليۆن دۆلار وه‌به‌رئێنان ل كێلگه‌يا په‌ترۆلا شێخان دا كريه كو پشكا گه‌لف كيستۆن 160 مليۆن دۆلاره،
ب گۆره‌ى به‌رنامه وپلانا هه‌ڤپشك يا هه‌ردو كۆمپانيان، ل ناڤه‌راستا 2019 ئه‌و دێ به‌رهه‌ئينانێ ل كێلگه‌يا په‌ترۆلا شێخان گه‌هيننه 55 هزار به‌رميلان درۆژێ دا، پاشى وان پلان يا هه‌ى وێ رێژێ بۆ 75 هزار به‌رميل هه‌تا 110 هزار به‌رميلان درۆژه‌كێ دا بلند بكه‌ن.
گه‌لف كيستۆن و MOL يا هنگارى پلانا په‌ره‌پێدانا كێلگه‌يا په‌ترۆلا شێخان دايه وه‌زاره‌تا سامانێن سروشتى ل هه‌رێما كوردستانێ ورازيبوون ل سه‌ر هاتيه كرن تاكو ناڤه‌راستا سالا 2019 رێژا به‌رهه‌مى بگه‌هيته 55 هزار به‌رميلان درۆژه‌كێ دا.
نوكه رۆژانه رێژا دناڤبه‌را 27 هه‌تا 32 هزار به‌رميلێن په‌ترۆلا خام ل كێلگه‌يا په‌ترۆلا شێخان دهێته ده‌رئينان ودهێته هنارتن بۆ ده‌رڤه، به‌لێ وه‌به‌رئێنان ل كێلگه‌يێ به‌رده‌وامى يا هه‌ى وپێشبينى دهێته كرن رێژا به‌رهه‌مێ دو سالين داهتى گه‌له‌ك زێده‌تر ببيت.
ئه‌ڤرۆنيوز:
ئه‌ندامه‌كا په‌رله‌مانێ عيراقێ ژ ليستا نيشتمانى راگه‌هاند، پرسا هه‌ڤركيێ ل سه‌ر پۆستێ سه‌رۆكاتيا په‌رله‌مانى ناكۆكى نينه دناڤبه‌را ليستێن سونى دا، له‌كو هه‌ڤركيه‌كا ئاسايى يه وبه‌ربژاركرن بۆ وى پۆستى مافێ هه‌موويانه، به‌لێ گرێداى ل هه‌ڤهاتنێ يه ل گه‌ل ليستێن دى ودێ رێككه‌فتنه‌كا سياسى هه‌بيت بۆ ئێكلاكرنا به‌ربژاره‌كى,
ئينتيسار جبوورى، په‌رله‌مانتارا عيراقێ ژ ليستا نيشتمانى ب سه‌رۆكاتيا ئه‌ياد عه‌لاوى بۆ ئه‌ڤرۆنيوز گۆت”دانوستاندن دبه‌رده‌وامن دناڤبه‌را ليستێن سونى دا وب ديتنا من ئه‌ڤرۆ ئه‌ينى دێ يا ئێكلاكه‌ر بيت بۆ دياركرنا تنێ دو به‌ربژاران ژ سه‌رجه‌مێ 9 به‌ربژاران وپێشبينيێ دكه‌م هه‌ڤركى دناڤبه‌را محه‌مه‌د حه‌لبوسى وئوسامه نوجێفى دێ هيته كرن وپاشى ب رێيا ده‌نگدانه‌كا نهێنێ دێ ئێك ژوان هێته هه‌لبژارتن وه‌كو به‌ربژارێ سونه‌يان بۆ سه‌رۆكاتيا په‌رله‌مانێ عيراقێ”.
گۆت ژى” سوباهى شه‌مبيێ 15/9/2018 په‌رله‌مان دێ روونشتنا خوه كه‌ت بۆ هه‌لبژارتنا سه‌رۆكێ په‌رله‌مانى وڤێ چه‌ندێ پێدڤى ب ل هه‌ڤهاتنا نه تنێ ليستێن سونى، به‌لكو پێدڤيه ليستێن شيعى وسونى وكوردى ل سه‌ر به‌ربژارێ وى پۆستى رێكبكه‌ڤن”.
ئه‌ڤرۆنيوز:
ره‌وشا سووريێ ژ ئێكلابوونێ يا نێزيك دبيت وپێدڤيه ئێك ژ دو لايه‌نين بالا ده‌ست ( ناتۆ يان رووسيا) مه‌يدانێ چۆل بكه‌ت، يان روو ب رووبوونه‌كا ڤه‌كرى دناڤبه‌را هه‌ردو به‌ره‌يێن (رووسيا وئيران) دژى به‌ره‌يێ( ئه‌مريكا وبريتانيا وفه‌ره‌نسا) ده‌ست پێ بكه‌ت.
هه‌ڤپه‌يمانيا ناتۆى پێدڤى ب تنێ ب دو رۆژێن دى يا هه‌ى بۆ تمامبوونا به‌رهه‌ڤيێن خوه يێن له‌شكرى بۆ لێدانا سووريێ، ده‌مێ راپۆرت ئاماژێ بۆ وێ چه‌ندێ دكه‌ن كو غه‌واسا ئه‌تۆمى يا بريتانى ” HMS Talent ” ل 8/9/2018 يا گه‌هشتيه ده‌ريا ناڤه‌راست وپێدڤى ب تنێ ب دو رۆژێن دى يا هه‌ى بۆ گه‌هشتنێ بۆ وێ دووراتيا پێدڤى بۆ پشكداريێ دلێدانا سووريێ دا كو ئه‌و غه‌واسه 10 مووشه‌كێن تۆماهۆك دهه‌لگريت وشيانێن لێدانا ئارمانجێن خوه‌يه ژ دووراتيا 1600 كيلۆمه‌تران.
ل دووڤ پێزانينان، هه‌ر ل وێ ده‌ڤه‌رێ سێ غه‌واسێن ئه‌تۆمى يێن ئه‌مريكى وسێ بوردومانكه‌رێن ئه‌مريكى يێن هه‌ين ودبه‌رهه‌ڤن بۆ شه‌رى، وه‌كو شاره‌زا دياردكه‌ن وان غه‌واسێن شه‌رى يێن ده‌ريايى 148 مووشه‌كێن تۆماهۆك دگه‌لدانه ول گه‌ل غه‌واسا بريتانى دێ هژمارا وان گه‌هيته 158 مووشه‌كان.
ئه‌ڤرۆنيوز:
لايه‌نێن سياسى ل عيراقێ بزاڤێن خوه زێده‌تر لێ كرينه بۆ ئێكلاكرنا ناڤێن به‌ربژار بۆ هه‌رسێ سه‌رۆكاتيان ( كۆمار وحوكمه‌ت وپه‌رله‌مان) به‌رى ئه‌نجامدانا روونشتنا سوباهى يا په‌رله‌مانێ عيراقێ.
چه‌ندين ده‌نگوباس هاتينه به‌لاڤكرن ل دۆر نێزيكبوونا لايه‌نێن شيعى بۆ ده‌ستنيشانكرنا به‌ربژاره‌كى ژده‌رڤه‌ى حزبان بۆ پۆستێ سه‌رۆكاتيا وه‌زيران.
رۆژناما (الحيات) يا له‌نده‌نى، به‌لاڤكر كو ئه‌ڤرۆ ئه‌ينيێ 14/9/2018 دێ رۆژه‌كا ئێكلاكه‌ر بيت دپرسا رێككه‌فتنا لايه‌نێن شيعى يێن سه‌ره‌كى ل عيراقێ ل سه‌ر دياركرنا به‌ربژاره‌كى ژده‌رڤه‌ى حزبان كو هه‌شت ناڤ يێن هاتينه دياركرن ل دووڤ مه‌رجێن مه‌رجه‌عيه‌تا شيعى يا بلند ئه‌وژى هه‌ر ئێك ژ عادل عه‌بدولمه‌هدى وه‌زيرێ به‌رێ يێ په‌ترۆلێ وسه‌ركردێ به‌رێ يێ جڤاتا ئيسلامى يا بلند، مسته‌فا كازمى سه‌رۆكێ هه‌والگيريێ، عه‌بدولوه‌هاب ساعدى فه‌رماندێ ديار يێ هێزا دژه تيرۆر يا عيراقى، ئه‌سعه‌د عيدانى پارێزگه‌رێ به‌سرا، فالح فه‌ياز شيره‌تكارێ به‌رێ يێ جڤاتا ئاسايشا نيشتمانى، عه‌لى شوكرى سه‌ركرده ل ليستا فه‌تح، له‌يس كوبه په‌يڤدارێ حوكمه‌تا ئيبراهيم جه‌عفه‌رى ل 2005، عه‌لى عه‌لاوى وه‌زيرێ به‌رێ.
ئه‌ڤرۆنيوز:
رێڤه‌به‌ريا گشتى يا كه‌سناشيێ وبيڤه‌له‌رزان ل هه‌رێما كوردستانێ دياركر كو سوباهى پلێن گه‌رمێ دێ ل هه‌رێما كوردستانێ هێنه خوار.
رێڤه‌به‌ريا ناڤبرى پلێن گه‌رمێ ل پارێزگه‌هێن هه‌رێما كوردستانێ وكه‌ركووكێ به‌لاڤكرن.
دياركر ژى كو پلا گه‌رمێ يا ئه‌ڤرۆ ئه‌ينيێ 14/9/2018 ل پاريزگه‌ها دهۆكێ 42 پله‌يه وسه‌باهى شه‌مبيێ 15/9/2018 پلا گه‌رمێ ل پاريزگه‌ها دهۆكێ دێ 39 بيت.
ئه‌ڤرۆنيوز:
پشتى كۆمبوونا ئه‌ڤرۆ ئه‌ينيێ دناڤبه‌را كۆسرت ره‌سول وبه‌رهه‌م سالح، ئيكه‌تيێ وهه‌ڤپه‌يمانيێ به‌ياننامه‌كا هه‌ڤپشك ده‌ركر.
د وێ به‌ياننامێ دا هاتيه”ئه‌ڤرۆ ئه‌ينيێ 14/9/2018 ل سلێمانيێ ول مالا كۆسره‌ت ره‌سول عه‌لى جێگرێ سكرتێرێ ئێكه‌تى نيشتمانى كوردستان وب به‌رهه‌ڤبوونا به‌رهه‌م سالح سه‌رۆكێ هه‌ڤپه‌يمانيێ كۆمبوونا بلند يا ئێكه‌تى نيشتمانى كوردستان وهه‌ڤپه‌يمانى بۆ ديموكراسيێ وداپه‌روه‌ريێ هاته ئه‌نجامدان”.
وێ به‌ياننامێ ئاماژه دا”هه‌ردو لا دووپاتى ل سه‌ر چاره‌سه‌ركرنا قه‌يرانێن كوردستانێ وئه‌و كێشێن روو ب روويێ وه‌لاتيان بووين، ئه‌ڤه ژى دچارچۆڤێ رێككه‌فتنا سياسى يا هه‌مه‌لايه‌نه بۆ رێكخستنا ناڤمالا كوردستانى ب هه‌ڤپشكيا هێز و لايه‌نێن سياسى”.
ل دووماهيا وێ به‌يانناما هه‌ڤپشك دا هاتيه دياركرن كو” بريار هاته دان كۆمبوون دبه‌رده‌وام بن”.
ئه‌ڤرۆنيوز:
شانده‌كێ هه‌ڤپه‌يمانى بۆ ديموكراسى ودادپه‌روه‌رى ب سه‌رۆكاتيا به‌رهه‌م سالح ئه‌ڤرۆ ئه‌ينيێ 14/9/2018 گه‌هشته مالا كۆسره‌ت ره‌سول جێگرێ سكرتێرێ گشتيێ ئێكه‌تى نيشتمانى كوردستان، چاڤدێره‌كێ سياسى ژى بۆ ئه‌ڤرۆنيوز دياركر دبيت ئێكه‌تى به‌رهه‌م سالحى بۆ پۆستێ سه‌رۆكاتيا كۆمارا عيراقێ به‌ربژاره بكه‌ت.
دوهى جڤاتا سه‌ركردايه‌تيا ئێكه‌تى نيشتمانى كوردستان كۆمبوو وپشتى كۆمبوونێ به‌ياننامه‌ك ده‌ركر وتێدا ئاماژه دابوو كۆمبوون ل سه‌ر چار بابه‌تان هاتبوو كرن، كو ئێك ژوان بابه‌تان ل دۆر بريارا هه‌ڤپه‌يمانى بۆ ديموكراسى ودادپه‌روه‌رى كو دانوستاندنێ ل گه‌ل ئێكه‌تيێ بكه‌ن بۆ ئێكگرتنێ وئێكه‌تيێ ژى پێشوازى ل ڤێ بريارێ كريه وشانده‌ك بۆ دانوستاندنێ ل دۆر ئێكگرتنا هه‌ردو لايه‌نان پێكئينايه.
هه‌ر دوهى پێنج ئه‌ندامێ ديار يێن هه‌ڤپه‌يمانيێ ده‌ست ژناڤ رێزێن وێ حزبا به‌ردابو وبه‌ياننامه‌كا تژى ره‌خنه ل سه‌ر به‌رهه‌م سالح به‌لاڤكربوو.
چاڤدێره‌كێ سياسى ژى بۆ ئه‌ڤرۆ نيوز گۆت” خوه ڤه‌كێشانا هه‌ڤپه‌يمانيێ ژ هه‌لبژارتنێن په‌رله‌مانێ كوردستانێ پێنگاڤا ئێكێ بوو يا چوونا وێ حزبا نوو بۆ ناڤ رێزێن ئێكه‌تيێ”.
وى چاڤدێرى زێده‌تر گۆت” ده‌مه‌كێ درێژه چاڤێ به‌رهه‌م سالحى ل پۆستێ سه‌رۆكاتيا كۆمارا عيراقێ يه ول خۆلا بۆرى ژى هه‌ڤركێ فوئاد مه‌عسووم بوو، به‌لێ دده‌نگدانا په‌رله‌مانتارێن ئێكه‌تيێ وپارتى ل به‌غدا، فوئاد مه‌عسووم پتر ده‌نگ ژ به‌رهه‌م سالحى ئينان وپۆستێ سه‌رۆكاتيا كۆمارێ وه‌رگرت”.
ئاماژه دا ” كۆمبوونا ئه‌ڤرۆ يا كۆسره‌ت ره‌سول وهژماره‌كا سه‌ركردێن ئێكه‌تيێ ل گه‌ل به‌رهه‌م سالحى ل دۆر چوونا هه‌ڤپه‌يمانيێ يه بۆ ناڤ رێزێن ئێكه‌تيێ وده‌ستپێكه‌كه بۆ بزاڤا به‌ربژاركرنا به‌رهه‌م سالحى بۆ پۆستێ سه‌رۆكاتيا كۆمارى، ب تايبه‌تى كو سوباهى شه‌مبيێ 15/9/2018 روونشتنه‌كا گرنگ يا په‌رله‌مانێ عيراقێ يا هه‌ى بۆ هه‌لبژارتنا سه‌رۆكێ په‌رله‌مانى كو ئه‌و پۆسته بۆ عه‌ره‌بێن سونه‌يه و9 به‌ربژار يێن بۆ وى پۆستى هه‌ين”.
خوياكر ژى” ئه‌و هه‌ردو كورسيێن هه‌ڤپه‌يمانيا به‌رهه‌م سالحى دهه‌لبژارتنێن په‌رله‌مانێ عيراقێ ب ده‌ستڤه‌ئينان، پشتى چوونا هه‌ڤپه‌يمانيێ بۆ ناڤ رێزين ئێكه‌تيێ، دێ ئه‌و هه‌ردو كورسى ژى ل سه‌ر كورسيێن ئيكه‌تيێ زێده‌بن”.
ئه‌ڤرۆنيوز، باسم قاسم شنگالى
پشتی سێ سالان ل سەر کۆمکوژیا ئێزدیان ئەوا ل 3/8/2014 ل قەزا شنگالێ روودای و ب هەزاران ژ ئێزدیان هاتينە کوشتن ورەڤاندن و دەستەسەرکرن ژ لایێ رێکخراوا تیرۆرستیا داعشێ ڤە ـ لەورا رێورسمێن ڤان جمایان ل چیایێ شنگالێ نەدهاتن گێران ب شێوەیەکی فەرمی بۆ ده‌مێ سێ سالان هاتبوون راوەستاندن،
ئه‌ڤرۆ ئه‌ينيێ 14/9/2018 رێ وره‌سمێن جمایا شێشمس و شێخ بەرەکات ل چیایێ شنگالێ هاتن گێران كو ئه‌ڤرۆ دبيته رۆژا پەری سوارکرنێ ژ جمایا شێشمس و شێخ بەرەکات و ب ئامادەبوونا ب سەدان ژ خەلکێ دەڤەرا شنگالێ پەری هاتنە سوارکرن.
نيشاندان