ئه‌ڤرۆنيوز:

برياره‌ ل ده‌مژمێر 12 ئه‌ڤ شه‌ڤه‌ بانگه‌شا هه‌لبژارتنێن په‌رله‌مانێ كوردستانێ ده‌ستپێ بكه‌ت كو دێ زێده‌تر ژ دو حه‌فتيان به‌رده‌وام بيت.

ل دووڤ رينمايێن كۆمسيۆنا هه‌لبژارتنان وراپرسيێ ل هه‌رێما كوردستانێ، ل ده‌مژمێر 12 ئه‌ڤ شه‌ڤه‌ بانگه‌شا هه‌لبژارتنێن په‌رله‌مانێ كوردستانێ دێ ده‌ستپێكه‌ت ودێ به‌رده‌وام بيت هه‌تا ده‌مژمێر 8 سپێده‌يا 28/9/2018.

ل رۆژا 30/9/2018 هه‌لبژارتنێن په‌رله‌مانێ كوردستانێ دێ هێنه‌ ئه‌نجامدان.

ئه‌ڤرۆنيوز:

ب گۆره‌ى دووماهى داتايێن كۆمسيۆنا بلند يا هه‌لبژارتنان وراپرسێ ل هه‌رێما كوردستانێ 3 مليۆن و85 هزار و461 كه‌سان مافێ ده‌نگدانێ دهه‌لبژارتنێن په‌رله‌مانێ كوردستانێ دا  يا هه‌ى.

ل دووڤ وان داتايان 719 هزار و 375 كه‌سان  ل پارێزگه‌ها دهۆكێ مافێ ده‌نگدانێ دهه‌لبژارتنێن په‌رله‌مانێ كوردستانێ دا يێ هه‌ى.

دياركريه‌ ژى كو ژوێ هژمارێ 676 هزار و860 وه‌لاتيێن پارێزگه‌ها دهۆكێ مافێ ده‌نگدانێ دهه‌لبژارتنێن گشتى دا يێ هه‌ى و42 هزار و515 كه‌سێن دى مافێ پشكداريێ دده‌نگدانا تايبه‌ت دا يێ هه‌ى.

ئه‌ڤرۆ نیوز:
ته‌ڤگه‌را گۆڕان بریارا خوه‌ ئێكلا كر و بریار دا پشكداری هه‌لبژارتنێن په‌رله‌مانێ كوردستانێ ببیت كو بریاره‌ ل 30 ئیلۆنێ بهێن كرن.
جڤاتا نیشتمانی یا گۆڕان ئه‌ڤرۆ پشتی چه‌ند ده‌مژمێرێن كۆمبوونێ بریار دا پشكداری د هه‌لبژارتنان دا بكه‌ن و 11-9-2018 ده‌ست ب بانگه‌شا ئاسایی بكه‌ن.

ئه‌ڤرۆنيوز:

سه‌رۆك وه‌زيرێن هه‌رێما كوردستانێ، نێچيرڤان بارزانى ئه‌ڤرۆ دوشه‌مبى 10/9/2018 پێشوازى ل وان خۆسێه ئيسكۆبار باليۆزێ ئيسپانيا ل عيراقێ كر.

باليۆزێ ئيسپانى ئاماژه‌ ب ره‌وشا سياسى يا عيراقێ وپه‌يوه‌نديێن هه‌رێما كوردستانێ وئيسپانيا وپێشڤه‌برنا وان دبوارين زانستى وكه‌لتوورى وئابوورى دا كر، هه‌روه‌سا ده‌ستخوه‌شى ل حوكمه‌تا هه‌رێمێ كر بۆ پێشوازيكرنێ ل هژماره‌كا ئێكجار مه‌زن ژ ئاواره‌ وپه‌نابه‌رێن ده‌ستێ تيرۆرێ.

نێچيرڤان بارزانى دياركر كو هه‌رێما كوردستانێ وحوكمه‌تا وێ ب گرنگێ سه‌حدكه‌نه‌ په‌يوه‌نديان ل گه‌ل ئيسپانيا ودبه‌رهه‌ڤن بۆ پێشڤه‌برنا په‌يوه‌نديان دهه‌موو بواراندا ب تايبه‌تى په‌يوه‌نديێن ئابوورى.

به‌حسكرنا ره‌وشا سياسى وپێكئينانا كابينا نوو يا حوكمه‌تا عيراقێ وديالۆكا سياسى دناڤبه‌را لايه‌نێن سياسى يێن عيراقى ورۆلێ هيزێن سياسى يێن هه‌رێما كوردستانێ دپێكئينانا حوكمه‌تا عيراقى دا وپشكداريا راسته‌قينه‌يا وان تێدا، لايه‌نه‌كێ دى يێ وێ ديدارێ بوو.

ئه‌ڤرۆنيوز:

جڤاتا ئاسايشا هه‌رێما كوردستانێ ئامارا هێرشێن چه‌كدارى وكرژيێن ل ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ پشتى 16 ئوكتۆبه‌رێ وهه‌تا نوكه‌ به‌لاڤ دكه‌ت.

ئه‌ڤرۆ دوشه‌مبى 10/9/2018 جڤاتا ئاسايشا هه‌رێما كوردستانێ، ل به‌په‌رێ خوه‌ ل تۆرا جڤاكى يا تويته‌رى دچه‌ند تويته‌كا دا به‌لاڤكر كو 700 پێكدادانێن چه‌كدارى وته‌قين پشتى 16 ئوكته‌به‌را 2017 هه‌تا ئه‌ڤرۆ 10/9/2018 ل ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ رووداينه‌.

دياركر ژى كو ل هه‌يڤا ته‌باخا بۆرى زوورترين رووداو تێدا هاتينه‌ تۆماركرن كو 80 حاله‌تێن هێرشێن چه‌كدارى وته‌قين بخوه‌ڤه‌ گرتبوو.

ئاماژه‌ دا كو ژسه‌رجه‌مێ گشتى يێ وان هێرشان 40 هێرش ب رێيا بۆمبان هاتينه‌ كرن ل سه‌ر هيزێن ئه‌منى يين عيراقى وحه‌شدا شه‌عبى ل كه‌ركووكێ وده‌ڤه‌رێن ده‌وروبه‌ر، هه‌روه‌سا 28 هێرش كو هێرشێن خوه‌كوژيێن چه‌كدارێن داعشێ بوون هاتينه‌ تۆماركرن.

ل دووڤ وان ئاماران، ب كێمى شه‌ش هێرش ل سه‌ر ويستگه وتاوه‌رێن كاره‌بێ هاتينه‌ كرن كو دئه‌نجامدا كاره‌با ده‌ڤه‌رێ هاتيه‌ برين، ئه‌ڤ هێرشه‌ ل هه‌يڤا گۆالانا بۆرى زوورترين هژمار لێ هاتينه‌ تۆماكرن.

به‌لاڤكريه‌ ژى كو هژماره‌كا حاله‌تێن كوشتنێ وهێرشان ب نارنجۆكان بۆ سه‌ر پێگه‌ ومالێن به‌رپرسێن هێزێن عيراقى وحه‌شدا شه‌عبى ووه‌لاتيێن مه‌ده‌نى ل وان ده‌ڤه‌ران هاتينه‌ تۆماكرن.