ئه‌ڤرۆنيوز:
رێڤه‌به‌ريا گشتى يا كه‌شناسيێ وبيڤه‌له‌رزان ل هه‌رێما كوردستانێ پلێن گه‌رمێ يێن ئه‌ڤرۆ وسوباهى ل پاريزگه‌هێن هه‌رێما كوردستانێ وكه‌ركووكێ به‌لاڤكرن.
ل دۆر پلا گه‌رمێ يا ئه‌ڤرۆ دوشه‌مبى 10/9/2018 ل پارێزگه‌ها دهۆكێ، رێڤه‌به‌ريا ناڤبرى ئاماژه دا كو 35 پله‌يه.
دياركر ژى كو پلا گه‌رمێ ل پارێزگه‌ها دهۆكێ يا سوباهى سێشه‌مبى 11/9/2018 دێ 36 بيت.
ئه‌ڤرۆنيوز:
هه‌ردو مه‌كته‌بێن سياسى يێن پارتى ديموكراتى كوردستان وئێكه‌تى نيشتمانى كوردستان به‌ياننامه‌ك ل دۆر كۆمبوونا خوه يا ئه‌ڤرۆ به‌لاڤكر وراگه‌هاند، ژبۆ به‌رژه‌وه‌نديا گه‌لێ مه وهه‌ستياريا ره‌وشێ، هه‌ردولا دووپاتيێ ل سه‌ر ئێك هه‌لويستيێ وپێكڤه‌كاركرنێ ل به‌غدا وكوردستانێ دكه‌ن وبۆ ڤێ مه‌ره‌مێ ژى لژنا هه‌ڤپشك دێ دپه‌يوه‌نديا به‌رده‌وام دا بيت وبه‌رهه‌ڤيێن پێدڤى ئه‌نجام ده‌ت.
مه‌كته‌بێن سياسى يێن پارتى وئێكه‌تيێ ئه‌ڤرۆ دوشه‌مبى 10/9/2018 ل پيرمام كۆمبوون وپشتى ب دووماهى هاتنا كۆمبوونێ، به‌ياننامه‌كا سێ خالى به‌لاڤكر.
دپشكه‌كا به‌ياننامێ دا هاتيه” هه‌روه‌كو دده‌مێ بۆرى دا ژى ب ئاشكرا مه راگه‌هاندى بۆ ئيكرێزيا ناڤمالا كوردستانى وپشكداريا هه‌موو لايه‌نێن پشكدار دپرۆسا سياسى دا، داخوازا كۆمبوونه‌كا هه‌ڤپشك يا هه‌موو لايه‌نان دكه‌ين، بۆ ڤێ مه‌ره‌مێ ژى لژنه‌ك هاتيه راسپاردن بۆ به‌رهه‌ڤكرنا پێدڤيێن وێ كۆمبوونێ.
شاندێ پارتى پێكهاتبوو ژ سه‌رۆك مه‌سعود بارزانى، نێچيرڤان بارزانى جێگرێ سه‌رۆكێ پارتى، فازل ميرانى، فوئاد حسێن، هوشيار زێبارى، مه‌حمود محه‌مه‌د، ئازاد به‌روارى، رۆژ نورى شاويش.
شاندێ ئێكه‌تيێ پێكهاتبوو ژ كوسره‌ت ره‌سۆل جێگرێ سكرتێرێ گشتى، سه‌عدى ئه‌حمه‌د پيره، حاكم قادر، عومه‌ر فه‌تاح، شوره‌ش ئيسماعيل، بافل تاله‌بانى.
ئه‌ڤرۆنيوز:
شه‌وقى كانه‌بى، ئه‌ندامێ ديار يێ به‌رێ يێ بزاڤا گۆران ل باژێرێ هه‌ولێرێ ل به‌رپه‌رێ خوه ل سه‌ر تۆرا جڤاكى يا فه‌يسبووكى به‌لاڤكر، ژ ڤێ خۆله‌كێ ئه‌ز وه‌كو وه‌لاتيه‌كێ كورد پشته‌ڤانيێ ل ستراتيژيه‌تا پارتى ديموكراتى كوردستان دكه‌م بۆ باشوورێ كوردستانێ ومه‌سعود بارزانى ب سه‌رۆكێ خوه ددانم.
شه‌وقى دبێژيت” پارتى تاكه هێزه‌كه به‌رگريێ ژ كوردان دكه‌ت ودشێت مه ژدۆژمنان بپارێزيت” وئێدى ده‌مێ وێ چه‌ندێ پشته‌ڤانيێ ل ستراتيژيه‌تا بارزانى بكه‌ين ورێ نه‌ده‌ين به‌ره‌يێ ئيرانێ وحه‌شدێ وميليشيێن كوردى يێن ب سه‌ر ئيرانێ ڤه كوردستانێ داگير بكه‌ن”.
ئەڤرۆ نیوز:
بریارە ئەڤرۆ دەمژمێر ٣:٣٠ ئێڤاری تیما تەپاپێ یا یانا دھۆک یا وەرزشی دەست ب بەرھەڤیێن خوە بکەت بۆ ھەڤرکیێن خولا ھەرێما کوردستانێ یا نایاب.
راگەھاندنا یانا دھۆک ئاماژە دایە ڤی پەیامی و ئاشکرا کر ئەڤرۆ تیما وان دێ ب فەرمی دەست ب بەرھەڤیان کەت بۆ ھەڤرکیێن خولا ھەرێما کوردستانێ یا تەپاپێ بۆ یانێن نایاب ئەوا بریارە ل ٢٢ ھەیڤا چریا دویێ یا بھێت دەسپێبکەن.
ھەمان ژێدەر ئەو چەندە ژی دیارکر کو بەری نوکە کارگێریا یانێ دگەل یاریزانان کومبویە و بۆ ئەنجامدانا راھێنانێن خوە ئەڤرۆکە ئێڤاری ب سەرپەرشتیا راھێنەر ھەرمان سالح و ھاریکارێ وی زێرەڤان سەعدولا و راھێنەرێن گۆلپارێزان جوتیار محسن.
ئه‌ڤرۆ نیوز، نه‌وزاد هلۆرى:
رێڤه‌به‌ریا گشتى یا فه‌رمانگه‌هێن كاروبارێن په‌رله‌مانێ عیراقێ ب نڤیساره‌كا فه‌رمى ناڤێن هه‌شت كه‌سان وه‌كو به‌ربژار بو وه‌رگرتنا پوستێ سه‌روكێ نوو یێ په‌رله‌مانێ عیراقێ دیاركرن و ئاراسته‌یێ سه‌روكاتیا په‌رله‌مانى كرن داكو باوه‌ریێ ژێوه‌ربگرن.
نڤیسار ئه‌ڤرۆ رۆژا دووشه‌مبى رێكه‌فتى 10ێ ئیلونێ 2018 ب ب هژمارا 77 ده‌رچویه و دیاردكه‌ت كو هه‌شت كه‌سان وه‌كو بو وه‌رگرتنا پوستێ سه‌روكێ په‌رله‌مانى به‌ربژاركریه كو ئه‌و ژى پێكدهێن ژ ” دكتور محه‌مه‌د ته‌میم، ته‌لال زه‌بیعى ، ئه‌حمه‌د عه‌بدوللا جبورى ، ئوسامه نوجێفى ، محه‌مه‌د حه‌لبوسى ، ره‌شید عه‌زاوى ، ئه‌حمه‌د عه‌بدوللا خه‌له‌ف و محه‌مه‌د خالدى”.
ئه‌ڤرۆ نيوز:
1- پێکھاتنا بەرکێن زەراڤێ:
ڤەکولینەکا نوو ل زانکویا بافالو ل باژێرێ نیویورک یێ ئەمریکی ھاتە کرن و ئیشارەت ب وێ چەندێ دا کو شێوازێ ژیانا رۆژئاڤای ئەوێ بەرنیاس ب کێم ئەنجامدانا راھێنانێن وەرزشی و گەلەک خوارنا روینی و چەوریان دگەل شەکرێ و تشتێ شرین دبیتە ئەگەرێ پەیداکرنا بەرکێن زەراڤێ ب شێوەیەکێ زێدە و ئەوژی دبنە ئەگەرێ شەمابوونا جەگەرێ یا زەر ئەگەر ھات و کەنالێن جەگەری یێن سەرەکی ئەوێن رادبن ب ڤەگوھاستنا ڤان دەرھاڤێژان بۆ رووڤیکان ھاتنە گرتن، خوارنا سیستەمەکێ خوارنێ یێ کێم روین و نە توورکری و ئەنجامدانا راھێنانێن وەرزشی یێن بەردەوام دبنە ئەگەرێ کێمکرنا بەرکێن زەراڤێ ب شێوەیەکێ بەرچاڤ..
2- سوتنێن چاڤی:
ل دەمێ تۆ ب کارێن ناڤمالێ رادبی دبیت بەرھەڤی سوتنا چاڤان ب شلەمەنیێن کەل ببی چ ئاڤ یان زەیت بیت، یانژی دبیت ژئەگەرێ کەرستێن پاقژکرنێ چاڤێن تە ب سۆژن، ل وی دەمی یا باشترە چاڤێن خۆ بۆ دەمێ دەە خولەکان ب ئاڤەکا تەزی بشووی و پاشی کەمادێن تەزی بدانە سەر و ددووڤدا قەستا نوژدارەکێ تایبەتمەند بکە و ھندەک کەرستە وەک (ئەستلین و غازا کاربونیک و بروبان) دبنە ئەگەرێ تەزاندنا چاڤی بەلێ ئەگەر تە چاڤێن خۆ بۆ دەمەکێ درێژ ھێلانە ڤەکری ئەو کەرستە دبنە ھلم و دچاڤی دا نامینن.
3-بێھنا دەڤی:
ژ ئەگەرێن ھاتنا بێھنێ ژدەڤی نەخوشیێن ددانانە، ددانا پووچ بووی دناڤ ڤالاھیێن خو دا بەرمایکێن خوارنێ ھەلدگرن، یا ب زەحمەتە ب رێکا فرچەکرنێ بھێنە دەرئێخستن و بەرئاتافی ھندەک کاریگەریێن کێمیاوی دبن و بێھنەکا نەخوش ژێ پەیدادبیت، ھەروەسان کراسکرنا ددانی و چێکرنا ددانی ژی ئەگەر یا دروست نەبیت یان ھەبوونا ڤالاھیان دناڤ ددانان دا دبیتە ئەگەرێ کومڤەبوونا خوارنێ ل وان جھان و ھەروەسان بێھن دکەڤیتە دەڤێ مرۆڤی.
4- ئێشانا سەری:
گەرمکرنا دەستان بۆ نەھێلانا ئێشانا سەری د بەرێ دا ھەبوو، ب راستی ژی ئەو کریار سەری تەنا دکەت و ئێشانێ ناھێلێت، دەمێ ئەم پێن خو دکەینە دناڤ ئاڤا گەرم دا ھەر ئەو ئەنجام بدەست مە دکەڤن، دەمێ ئەم کەمادا ددانینە ل سەر جینیکێن خو دیسان سەرێ مە تەنا دبیت، بەلێ ئەگەر سەرئێشان یا بەردەوام بوو پێدڤیە قەستا نوژداری بکەی بۆ زانین و چارەسەرکرنا ئەگەرێن وێ.
5- شیر بۆ قولونێ باشە: گوڤارەکا خوارنێ یا پزیشکیا ئەمریکی دیارکر کو شیر پەنجەشێرا قولونێ کێم دکەت، 18 کەسێن کو رۆژانە 1000ملگم کالسیومی ڤەدخون ژ بەرھەمێن شیری، بۆ دەمێ حەفتیەکێ لێ راوەستیان و جوداھی دناڤبەرا دەستئاڤا وان دا ھاتە کرن و ڤەکولەران زێدەبوونەکا بەرچاڤ د ئەگەرێ پەنجەشێرا قولونێ دا دیت و دبیت ئەگەرێ وێ ڤەگەریتە وێ چەندێ کو کالسیوم و فوسفات رادبن ب قورتالکرنا لەشی ژوان ترشیاتیێن کو چەنداتیا دەستئاڤێ چارەسەردکەن.
ئەڤرۆ نیوز، نەوزاد ھلۆری:
رۆژ بو رۆژێ کومپانیێن بەرھەمئینانا موبایلێن زیرەک سالوخەتێن نوو و سەرنجراکێش درۆست دکەن، و دنوکە دا کومپانیەکا چینی رابویە ب زێدەکرنا سالوخەتەکا نوو لسەر کامیرا موبایلێ و جیھان حێبەتی کریە.
کومپانیا Oppo یا چینی دایە دیارکرن کو ئەوان نووترین موبایلا زیرەک درۆستکریە کو کامیرا وێ زور یا پێشکەفتی یە ، و گرنگترین سالوخەتا وێ ژی ل دەما کارنەکرنێ چوو شینوارێن کامیرێ لسەر روویێ موبایلێ دیار نینە، بەلکو تنێ ل وان دەما کامیرە دیارە کو کەسەکێ بڤێت کار ب کامیرێ بکەت.
کامیرا دشیان دایە کو مرۆڤ ب حەزا خوە ھەموو گوشەیێن کارپێکرنا کامیرێ بگوریت و شیانێن زڤرینێ بو ھەموو لایان ھەیە، و ئەڤێ زێدەیا کامیرێ ئەو کەس حێبەتی کرینە کو ب دوڤ نووترین سالوخەتێن موبایلا دگەریێن.
ئێک ژ سالوخەتێن دن یێن کامیرا موبایلا نوو ئەوە کو ب چوو شێوەیان کامیرا موبایلێ پیس نابیت و توز ناچیتە سەر شاشەیا وێ، و ھەر ب پاقژی دمینیت ڤە، و بڤێ یەکێ وێنە و ڤیدیویەکا کوالێتی باشتر و جوانتر دھێتە گرتن و تومارکرن.
ئه‌ڤرۆ نيوز:
مه‌كته‌با سياسى يا پارتى ديموكراتى كوردستان و ئێكه‌تى نشتيمانى كوردستان بۆ دانوستاندنێ ل دۆر پێكئينانا حوكمه‌تا نوو يا عيراقێ و چاوانيا پشكداريا كوردان د وێ حوكمه‌تێ كۆم بن.
مه‌ره‌م ژ كۆمبوونا پارتى و ئێكه‌تى دانوستاندنه ل دۆر ئێكلاكرنا خوه كا دێ چنه به‌غدا و پشكداريێ د حوكمه‌تا نوو يا عيراقێ دا كه‌ن يان ژى نه و كيش هه‌ڤپه‌يمانيا شيعان دێ زێده‌تر داخوازيێن كوردان بجهـ ئينن. ژبلى وێ چه‌ندێ ژى دێ ئێكده‌نگيا كوردى گه‌نگه‌شه كه‌ن.
ب گۆره‌يى پێزانينێن ئه‌ڤرۆ نيوز ته‌وه‌ره‌كێ دژى يێ كۆمبوونێ دێ ل دۆر هه‌لبژارتنێن په‌رله‌مانێ كوردستانێ بن كو بڕياره ل 30ى ڤێ هه‌يڤێ بهێنه ئه‌نجام دان.
ئەڤرۆ نيوز:
فۆکس نیۆز د راپۆرتەکێ دا دیار کریە کو پشتی کۆمبوونا روسیا، ئیران و تورکیا ل تەھرانێ بەرپرسێن وەزارەتا بەرگیریێ یا ئەمریکا بریار داینە کو ھێزێن زێدەتر رەوانەی رۆژئاڤایێ کوردستانێ بکەن و ھەروەسا دێ چەندین بنگەھێن سەربازی یێن نوو ژی ھێنە ئاڤا کرن.
د بەردەوامیا راپۆرتێ دا ھاتیە دیار کرن کو بەری نھا ترامپی دخواست ھێزێن ئەمریکا ژ سووریێ ڤەکێشیت لێ پشتی کۆمبوونا تەھرانێ، سەرۆکێ ئەمریکا بریار دایە کو ھێزێن زێدەتر رەوانەی سووریی و رۆژئاڤایێ کوردستانێ بکەت.
ئه‌ڤرۆ نيوز:
مەتین گورجان بسپۆرێ ئێمناھیێ و شارەزا د وارێ رۆژھەلاتا ناڤین دا راگەھاند کو کۆمبونا سێ قۆلی یا د ناڤبەرا سەرۆکێن روسیا، تورکیا و ئیرانێ ل تەھرانێ دا نەگەھشتیە چو ئەنجامەکێ و گۆت: (پوتین داخوازیێن ئەردۆگانی رەت کرن و رژدیا خوە ل سەر سازکرنا ئۆپەراسیۆنەکا بەرفرەە یا سەربازی ل ئدلبێ نیشا دا و ئیرانێ ژی پشتەڤانیا خوە بۆ ژناڤبرنا کۆمێن چەکدار و تیرۆرست ل ئدلبێ دیار کر و تورکیا ب تنێ ما، ئانکۆ ئەم دشێین بێژین گەلەک ئاشکرا بوو کو روسیا و ئیرانێ بۆ گەھشتنا ئارمانجێن خوە تورکیا بکار ئینان و نھا ژی گەھشتینە قۆناغا داویێ و دیارە قۆناغا داویێ دێ گەلەک دژوار بیت، ژ بەر ھندێ ژی دڤێت تورکیا دوژمناتیا کوردێن سووریێ نەکەت).
ناڤھاتی راگەھاند ژی کو نەخشێ ئۆپەراسیۆنا ئدلبێ ژ ئالیێ روسیا، ئیرانێ و سووریێ ڤە ب باشی ھاتیە دارێتن و د چارچۆڤێ نەخشێ دیار کری دا روسیا و سووریێ دەست ب لێدانا بنگەھێن سەرەکی یێن کۆمێن چەکدار دکەن و گۆت: (دەمێ کۆمبوونا تەھرانێ دھاتە سازکرن، فرۆکێن شەری یێن روسیا بنگەھێن چەکداران بۆمبە باران دکر و تانک و تۆپێن رژێما ئەسەد ژی ل سنۆرێ ئدلبێ بوون و ئەو یەک نیشا ددەت کو روسیا ل گەل ئیرانێ و سووریێ نەخشێ رزگارکرنا ئدلبێ داناینە و ل دووڤ ھزرا من پشتی ئۆپەراسیۆنا ئدلبێ دێ قۆناغا ئاستانا ب داوی ھێت و چو رۆلێ تورکیا ل سووریێ نامینیت).
نيشاندان