ئەڤرۆ نیوز ، تۆڤی:
ره‌جه‌ب ته‌یب ئه‌ردۆغان سه‌رۆک کۆمارێ توركیا ئاشكراكریە: کو ل 10 و 11 هەیڤا چریا دویێ ل پاریسا پایته‌ختێ فره‌نسا ل گه‌ل دۆنالد تره‌مپێ سه‌رۆكێ ئه‌مریكا كۆم بیت.
ئه‌ردۆغانی گۆتیه ژی: ئەڤ کۆمبوونا ل گه‌ل دۆنالد تره‌مپی دێ بزاڤا گفتوگۆكرنێ ل سه‌ر چه‌ندین بابه‌تێن جۆدا پەیداکەت.
هه‌روه‌سا ئاشكراكریە: بەری چه‌ند رۆژان وی په‌یوه‌ندیەکا ته‌له‌فۆنی ل گه‌ل تره‌مپی ئه‌نجامدایه و وان گفتوگۆ ل سه‌ر چه‌ندین كێشێن باكورێ سوریێ كرینە ب تایبه‌تی پرسا باژێرێ مه‌نبج.
ئه‌ڤرۆنيوز:
هه‌رێما كالادۆنيا يا فه‌ره‌نسى ئه‌ڤرۆ ئێكشه‌مبى 4/11/2018 ريفراندۆما سه‌ربخوه‌يێ بۆ جودابوونێ ژ وه‌لاتێ فه‌ره‌نسا ئه‌نجامدا، ل دووڤ ئه‌نجامان ژى وه‌لاتيێن وێ هه‌رێمێ ده‌نگ بۆ مانا هه‌رێما خوه دناڤ فه‌ره‌نسا دا ودژى جودابوونێ بوون.
مالپه‌رێ le Figaro يێ فه‌ره‌نسى به‌لاڤكر كو ئه‌نجامێن ريفراندۆمێ ب شێوه‌كێ نه‌فه‌رمى هاتنه به‌لاڤكرن وتێدا 59% ژ وه‌لاتيێن هه‌ريما كالادۆنيا دژى جودابوونێ بوون ژ فه‌ره‌نسا.
ل هه‌رێما كالادۆنيا 175 هزار كه‌سان مافێ ده‌نگدانێ دوێ ريفراندۆمێ دا هه‌بوو، به‌لێ ژ وێ رێژێ تنێ 75% چوونه سه‌ر سندووقێن ده‌نگدانێ.
هه‌رێما كالادۆنيا يا فه‌ره‌نسى ل به‌ره خوه به‌رهه‌ڤ بكه‌ت تاكو دو سالێن دى دووباره ريفراندۆمێ بۆ جودابوونێ ژ فه‌ره‌نسا ئه‌نجام بده‌ت.
حوكمه‌تا فه‌ره‌نسا چو رێگرى ل به‌رده‌م ريفراندۆمێ ل سه‌ر جودابوونا كالادۆنيا نه‌كر، به‌لكو راگه‌هاندبوو كو دێ فه‌ره‌نسا رێزێ ل ريفراندۆمێ گريت.
ئه‌ڤرۆنيوز:
رێڤه‌به‌ريا گشتى يا هاتنوچوونێ ل هه‌رێما كوردستانێ هه‌موو خودانێن ترومبێلێن هژمار كاتى ئاگه‌هدار دكه‌ت.
رێڤه‌به‌ريا ناڤبرى ئاگه‌هداريا هه‌موو وان خودانێن ترومبێلان دكه‌ت كو هژمارا كاتى ل سه‌ر تابلۆيێن وان ندكه‌ت يێن هه‌تا نوكه ل چو رێڤه‌به‌ريێن هاتنوچوونێ ل پاريزگه‌هێن هه‌رێما كوردستانێ تۆمار نه‌كرين، پێدڤيه پشتى كرينا وان جۆره ترومبێلان دده‌مێ 60 رۆژان دا سه‌ره‌دانا رێڤه‌به‌ريا هاتنوچوونێ ل پاريزگه‌هان بكن وترومبێلێن خوه تۆمار بكه‌ن، هه‌كه نه ب گۆره‌ى بريارا جڤاتا وه‌زيرێن هه‌رێما كوردستانێ يا هژمار 79 يا سالا 2016 (برگا 43) سزايێ گيروبوونێ دێ ژێ گريت وب گۆژمێ ئێك مليۆن ديناران هێنه سزادان.
رێڤه‌به‌ريا ناڤبرى داخواز ژ خودان ترومبێلێن هژمار كاتى دكه‌ت به‌رى ب دووماهى هاتنا وێ ده‌مێ بۆ هاتيه دياركرن، سه‌ره‌دانا رێڤه‌به‌ريێن هاتنوچوونێن پارێزگه‌هان بكه‌ن بۆ تۆماركرنا ترومبێلێن خوه.
ئه‌ڤرۆنيوز:
جڤاتا ئاسايشا هه‌رێما كوردستانێ ئه‌ڤرۆ ئێكشه‌مبى 4/11/2018 دبه‌رپه‌رێ خوه دا ل سه‌ر تۆرا جڤاكى يا تويته‌رى، ئامارێن هه‌يڤه‌كێ يێن هێرشێن تيرۆرستى به‌لاڤكرن وتێدا ئاماژه ب وێ چه‌ندێ دا كو تۆمارا روودانێن ئه‌منى بۆ هه‌يڤا 10 يا سالا 2018 دياردكه‌ت كو هێرشێن تيرۆستى ب رێيا ترومبێلێن مينرێژكرى ل كه‌ركووكێ ومووسلێ دووباره يا سه‌رهلداى، هه‌روه‌سا تيرۆركرنا موختاران وئارمانجكرنا ويستگه‌هێن كاره‌بێ ژى يا به‌رده‌وامه.
جڤاتا ئاسايشا هه‌رێمێ رۆهنكر ژى كو دو هێرش ب ترومبێلێن مينرێژكرى دژى وه‌لاتيان وهێزێن ئه‌منى هاتينه ئه‌نجامدان، دو هێرش ژى هاتينه ژناڤبرن، ل 13/10/2018 ژى ترومبێله‌كا مينرێژكرى شه‌ش كه‌س برينداركرن، ل 23/10/2018 ژى ل گه‌ياره ل نه‌ينه‌وا دهێرشه‌كا دى دا نێزيكى 10 كه‌سان هاتن كوشتن و30 كه‌سێن دى ژى برينداربوون.
ژبلى وان هێرشان ئاماژه ب وێ چه‌ندێ ژى هاتيه دان كو ل 2/10/2018 داعش هێرشه‌كا چه‌ند قۆلى بۆ سه‌ر گوندێ (ره‌بزه) ل نێزيك حه‌ويجه ئه‌نجامدا وتێدا موختارێ گوندى كوشت، ل 10/10/2018 ژى داعشێ موختارێ گوندێ (جاسميه) دمالا وى دا كوشت، پاشى ل 20/10/2018 تيرۆرستێن داعشێ موختارێ گوندێ (كه‌ريم داوده) سه‌ر ب قه‌زا خانه‌قينێ ڤه كوشت.
جڤاتا ئاسايشا هه‌رێما كوردستانێ رۆهنكر ژى كو ل 17/10/2018 دا تيرۆرستێن داعشێ تاوه‌ره‌كێ كاره‌بێ ل نێزيك گوندێ (خوزه‌يفيه) په‌قاند وبۆ ئه‌گه‌رێ برينا كاره‌با باژێرێ حه‌ويجه يێ ب سه‌ر پاريزگه‌ها كه‌ركووكێ ڤه، ل 18/10/2018 ژى بۆومبه‌كا چاندى ترومبێله‌كا پۆليسێن سه‌ر ب كۆمپانيا په‌ترۆلا باشوور ڤه كره ئارمانج ل نێزيك گوندێ (مه‌فتوولى) سه‌ر ب ناحيا ره‌شاد ڤه ل پارێزگه‌ها كه‌ركووكێ ودئه‌نجامدا پێنج پۆليس بريندار بوون.
خوياكر ژى كو ب درێژيا هه‌يڤا بۆرى، 40 هێرشێن ب رێيا بۆمبێن چاندى هاتينه ئه‌نجامدان كو تێدا ترومبێل، بازگه‌يێن پۆليسێن فيدرالى، بنگه‌هێن له‌شكرێ عيراقێ، باره‌گا وكه‌سايه‌تيێن سه‌ر ب حه‌شدا شه‌عبى ڤه وهه‌روه‌سا وه‌لاتى ژى تێدا كرينه ئارمانج.
ئه‌ڤرۆنيوز:
وه‌زاره‌تا په‌روه‌ردێ ل هه‌رێما كوردستانێ داخوازيه‌كێ ئاراسته‌ى رێڤه‌به‌ريێن گشتى يێن په‌روه‌رده‌يێن پارێزگه‌هێن هه‌رێما كوردستانێ دكه‌ت.
د وێ نڤيسارا وه‌زاره‌تا په‌روه‌ردێ يا هژمار 16435 ل 1/11/2018 دا هاتيه” پشتى رازيبوونا وه‌زيرێ په‌روه‌ردێ ل سه‌ر ياداشتا ڤه‌كۆله‌رێن جڤاكى وده‌روونى وژبه‌ر گرنگيا وان بسپۆريان، داخواز دكه‌ين ل ده‌مێ ڤه‌كرنا دامه‌زراندنا به‌رده‌وام وگرێبه‌ستان، پێدڤيا قوتابخانان ب ڤه‌كۆله‌رين جڤاكى وده‌روونى ل به‌رچاڤ وه‌ربگرن”.
ئه‌ڤرۆنيوز:
ل باژێرێ سه‌عده يێ يه‌مه‌نى ده‌مێ شوفێره‌ك سه‌رپێچيێ دكه‌ت، پۆليسێن هاتنوچوونێ ب ڤى شێوه‌يێ دوێنه‌ى دا ديار سزايێ شوفێرێن سه‌رپێچكار دده‌ت.
عه‌لى عيسا، پۆليسه‌كێ هاتنوچوونێ يه ل باژێرێ سه‌عده بۆ جه‌زريه نێت گۆت” پتريا شوفێران پێگيريێ ب قانوونێن هاتنوچوونێ ناكه‌ن”.
گۆت ژى” هنده‌ك جاران نه‌چار دبم ب دارى دناڤ له‌پێ ده‌ستێ وان بده‌م، يان گوهێ وان شوفێرێن پێگيريێ ب قانوونێن هاتنوچوونێ نه‌كه‌ن بكێشم، ئه‌ڤه ژى سزايه‌كه تاكو ژبير نه‌كه‌ن، ب تايبه‌تى شوفێرێن مينى پاسان، چونكى شوفێرى هونه‌ر وره‌وشه‌ته.
ئه‌ڤرۆنيوز:
به‌رپرسێ ميحوه‌رێ گوێر – مه‌خموور يێ هێزا پێشمه‌رگێ كوردستانێ، سيروان بارزانى راگه‌هاند، گرۆپه‌كێ داخ ددلى دا ودژى ره‌وتێ نيشتمانى به‌رپه‌رێ وى هاككريه.
نڤيسينگه‌ها سيروان بارزانى، د رۆهنكرنه‌كێ دا دياركر كو هه‌روه‌كو ل 27/10/2018 مه به‌لاڤكرى كو به‌رپه‌رێ فه‌يسبووكى يێ سيروان بارزانى ژلايێ گرۆپه‌كێ داخ ددلى دا ودژى ره‌وتێ نيشتمانى هاككريه، نوكه ژى ئاگه‌هداريا هه‌موو لايه‌كى دكه‌ين كو مه ئه‌و به‌رپه‌ر ڤه‌گه‌راند.
ئه‌ڤرۆنيوز:
پارتى ديموكراتى كوردستان سه‌ره‌دانا لايه‌نێن سياسى بۆ پشتى كۆمبوونا ئێكێ يا په‌رله‌مانێ كوردستانێ دياركر.
دهه‌لبژارتنێن 30 ئه‌يلوولێ، پارتى 45 كورسيێن په‌رله‌مانێ كوردستانێ بده‌ستڤه‌ئينابوون ونوكه مافێ پێكئينانا حوكمه‌تا نوو يا هه‌رێما كوردستانێ يێ هه‌ى، به‌لێ برياره به‌رێ پێكئينانا حوكمه‌تێ، پارتى سه‌ره‌دانا لايه‌نێن سياسى يێن كوردستانێ بكه‌ت.
ئاراس حه‌سو ميرخان، ئه‌ندامێ سه‌ركردايه‌تيا پارتى ديموكراتى كوردستان دداخۆيانيه‌كا رۆژنامه‌ڤانى دا گۆت” كۆمبوونا سه‌ركردايه‌تى ومه‌كته‌با سياسى يا پارتى بۆ دياركرنا شاندێ دانوستاندنێن حوكمه‌تێ وسه‌ره‌دانا لايه‌نێن سياسى دێ كه‌ڤيته پشتى كۆمبوونا په‌رله‌مانێ كوردستانێ كو برياره ل رۆژا سێشه‌مبيا داهاتى بهێته ئه‌نجامدان”.
گۆت ژى” ئێكه‌مين سه‌ره‌دانا شاندێ پارتى دێ ل دووماهيا ڤێ حه‌فتيێ بيت ودێ سه‌ره‌دانا ئێكه‌تيێ هێته كرن”.
ئەڤرۆ نیوز :
یانا یوڤێنتۆس یا ئیتالی به‌رده‌وامی دا ده‌ستپێكا خۆ یا نموونه د خولا ئیتالی دا و سه‌ركه‌فتنا ده‌هێ تۆماركر، ڤێ جارێ سەرکەفتن ل سه‌ر مێڤانا خۆ كالیاری تۆمارکر ب سێ گۆلان به‌رامبه‌ر گۆله‌كێ ژ هه‌ڤركیێن گه‌را یازدێ و پاولو دیبالای گۆلا ئێکێ بۆ یوڤێنتۆس تۆماركر.
هەر چەندە ل خۆله‌كا 36 جواو گلڤاو گۆلا وەکهەڤیێ بۆ کالیاری تۆمارکر، لێ دو خۆله‌ك بورین و هه‌ڤالێ وی فیلیپ براداریچ ب خه‌له‌تیڤه جاره‌كا دی یوڤێنتۆس پێشخست، و به‌ری ب دووماهی هاتنا ده‌مێ دروستێ یارییێ ب سێ خۆله‌كان خوان كوادرادوی د هێرشه‌كا هه‌ڤدژ دا و ب پاسه‌كا كریستیانو رۆنالدوی گۆلا سێیێ و مسۆگه‌ركرنا سه‌ركه‌ڤتنێ تۆماركر و ب ڤی ئه‌نجامی خالێن یوڤێنتۆسێ گه‌هاندنه 31 خالان ل رێزا ئێكێ.
به‌ری ده‌ستپێكرنا یارییا یوڤێنتۆس و مێڤانا وێ كالیاری ل یاریگەها ئه‌لیانز، سه‌رۆكێ یانه‌یا یوڤێنتۆس ئه‌ندریا ئانیێلی كریستیانو رۆنالدو ب هه‌لكه‌فتا تۆماركرنا 400 گۆلان د خۆلێن ئورۆپا دا خه‌لاتكر.
هەروەسا ل گه‌را نه‌هێ یا خولا ئیتالی دا و دیاریا به‌رامبه‌ر جه‌نه‌وا دا، هەردو یانە ب گۆلەکێ وەکهەڤ ببوون، رۆنالدوی گۆلا یوڤێنتۆسێ تۆماركربوو كو دببوو گۆلا وی یا 400 دخۆلێن ئورۆپی دا و دیسا دبیته ئێكه‌م یاریكه‌ر ڤێ هژمارا گۆلان دهه‌ر پێنج خۆلێن مه‌زن دا تۆمار بکەت،
لەوما ب ڤێ هه‌لكه‌فتێ و به‌ری ده‌ستپێكرنا یاریا كالیاری ئانیێلی درێسه‌كێ یوڤێنتۆسێ یێ هژماره 400 وه‌كو ئاماژه‌ك بۆ هژمارا گۆلان پێشكێشی رۆنالدۆی كر.
ئه‌ڤرۆنيوز:
ئه‌ندامه‌كێ فراكسيۆنا پارتى ديموكراتى كوردستان ل په‌رله‌مانێ عيراقێ راگه‌هاند، وه‌زاره‌تا كۆچ وكۆچبه‌رێن عيراقێ مافێ پارتى يه وبۆ ڤێ مه‌ره‌مێ ژى به‌ربژارێ پارتى بۆ وه‌رگرتنا پۆستێ وێ وه‌زاره‌تێ يێ هاتيه دياركرن.
دانا شه‌هيد جه‌زا، ئه‌ندامێ په‌رله‌مانێ عيراقێ ژ فراكسيۆنا پارتى گۆت”هه‌تا نوكه پارتى دو وه‌زاره‌ت بده‌ستڤه‌ئيناينه وبزاڤا بده‌ستڤه‌ئينانا وه‌زاره‌ته‌كا دى ژى دكه‌ت كو وه‌زاره‌تا كۆچ وكۆچبه‌رانه وهه‌كه هاته ئێكلاكرن، نه‌وزاد هادى پارێزگه‌ري نوكه يێ هه‌ولێرێ به‌ربژارێ پارتى يه بۆ پۆستێ وێ وه‌زاره‌تێ”.
داناى دداخۆيانيه‌كا رۆژنامه‌ڤانى دا دياركر ژى” داخوازا دو وه‌زاره‌تێن دى بۆ كوردان يا هاتيه كرن، هه‌كه هات وئه‌و دو وه‌زاره‌ته بۆ كوردان ئێكلابوون، وى ده‌مى وه‌زاره‌ته‌ك دێ بۆ ئێكه‌تى نيشتمانى كوردستان بيت، به‌لێ ئه‌ڤ چه‌نده يا ماى ل سه‌ر سه‌رۆك وه‌زيران عادل عه‌بدولمه‌هدى كو رازى ببيت ل سه‌ر وێ چه‌ندێ”.
خوياكر ژى”پارتى ب مافێ خوه دزانيت وه‌كو هێزا ئێكێ يا هه‌رێمێ يا سه‌ركه‌فتى وان پۆستان بده‌ستڤه‌بينيت، چونكى هه‌تا نوكه پۆسته‌كێ سيادى يێ وه‌رگرتى، به‌لێ ئێكه‌تيێ پۆستێ سه‌رۆك كۆمار يێ وه‌رگرتى”.
نيشاندان