NO IORG
نووترين نووچه
Facebook

ئه‌ڤرۆ نيوز:

کارگەھەکا چێکرنا زێڕی بۆ جارا ئێکێ ل ھەرێما کوردستانێ ھاتە دامەزراندن و سەرۆکێ کۆمەلا زێڕینگرانژی دبێژیت: بەرھەمێ ناڤخوە خواستەکا زۆر ل سەر ھەیە و بەرھەمێ کارگەھا ناڤخوە ژ لایێ کوالێتیێ ڤە چو جوداھی دگەل بەرھەمێ یێن وەلاتێن دەوروبەر نینە.

قارەمان جەوھەر، سەرۆکێ کۆمەلا زێڕینگرێن کوردستانێ بۆ رۆژناما ئەڤرۆ ئاشکرا کر، کارگەھەکا بەرھەمئینانا زێڕی ل ھەرێما کوردستانێ ھاتیە دامەزراندن و ل گورەی خواستێن وەلاتی و بازاڕی زێڕی بەرھەم دئینیت و گۆت: “زێڕێ ھەرێما کوردستانێ ل بازاڕی خواستەکا زۆر ل سەرە و کڕیارێن زۆر ھەنە، ژ بەرکو ب کوالێتەکا بلند دھێتە بەرھەمئینان و چو جوداھی دگەل زێڕێ وەلاتێن دەڤەرێ نینە، لەوڕا ژی د دەمێ نوکە دا بەرھەمێ کارگەھا زێڕێ ناڤخوە کڕیار زۆرن و بەرھەم ژی بەھرا کڕیاران دکەت”.

قارەمان جەوھەر ئاماژە ب وێ چەندێ ژی کر کو پێکھاتێن دەستپێکی یێن چێکرنا زێڕی ل دەرڤەی ھەرێما کوردستانێ دھێن، بەلێ ژ لایێ کارگەھەکا ناڤخوە دھێتە نەخشاندن و ل گورەی خواستا کڕیاران دھێتە چێکرن و گۆت: “ئەز باوەر دکەم ل داھاتی دێ شێت ھەموو پێکھاتێن زێڕی ژی ھەر ل ناڤ کوردستانێ بکاربینیت، ژ بەرکو کانزایێن دبنە زێڕ ل ھەرێما کوردستانێ ھەنە، دیسا یا خویایە کوردستان ب جۆرەھا کانزایێن بھا گران یا زەنگینە، دامەزراندنا کارگەھەکا زێڕی ژی بۆ جارا ئێکێ پێنگاڤەکا مەزن و ئەرێنیە ل کوردستانێ”.

ئه‌ڤرۆ نيوز:

پشتی ھەوا ھەلبژارتنان بۆ دەمێ حەفتیەکێ ھاتیە پاشخستن، نوکە گۆمان پەیدابویە ھەلبژارتنژی بھێتە پاشخستن، پەرلەمانتارەکژی دبێژیت، پارتی یا رژدە ل سەر ئەنجامدانا ھەلبژارتنان، و ھەکە بھێت و ھەلبژارتن نەھێنەکرن ئەڤە دێ پەرلەمان تەمەنێ خوە درێژبکەت، ھەروەسا دیارکر، بێی رێککەفتنا ناڤبەرا لایەنێن سیاسی پەرلەمان نەشێت بەردەوامبیت و دێ ھەرێم کەڤیتە ڤالاھیا قانوونی دا.

حەیات مەجید پەرخی، پەرلەمانتارا فڕاکسیۆنا پارتی لپەرلەمانێ کوردستانێ بۆ رۆژناما ئەڤرۆ گۆت” بابەتێ پاشخستنا ھەلبژارتنێن 30ی ئیلوونێ یێن ھەرێما کوردستانێ ددەستێ پەرلەمانی دەرکەفتیە و نوکە تنێ لایەنێن سیاسی و حوکمەت دشێن بڕیارێ لدۆر ئەنجامدان و نەدانا ھەلبژارتنان بدەن، بەلێ ئەم وەکی پارتی دیموکراتی کوردستان ھێشتا د رژدین لسەر ھەلویستێ خوە کو پێدڤیە ھەلبژارتنێن پەرلەمانێ کوردستانێ ددەمێ خوەدا بھێنە ئەنجامدان و نەھێنە پاشخستن بۆڤێ مەرەمێ ژی چەندین جارا پارتی لسەر ئاستێن بلند ئەف چەندە پشتڕاستکریە، بەلێ دگەل ڤێ چەندێ ژی ھەگەر بھێت و ھەلبژارتن د ژڤانێ دیاری کری نەھێنە کرن و بھێنە گیرووکرن ئەڤە دێ کەڤیتە سەر لایەنێن سیاسی ئەو چو بڕیار بدەن، خۆلا نوکەیا پەرلەمانێ کوردستانێ ھەتا ھەیڤا یازدە دێ یا بەردەوامبیت و پشتی ئەڤی ژڤانی تەمەنێ پەرلەمانی دێ تەمام بیت و ھەرێما کوردستانێ دێ کەڤیتە ڤالاھیا قانوونی، تنێ ب مەرجەکی دێ ئەف ئاریشەی ھێتە چارەسەرکرن لایەنێن سیاسی دناڤبەرا خوەدا رێکەڤن و ئێکدەنگیێ پەیدا کەن لسەر پاشخستنا ھەلبژارتنان.

حەیات مەجید پەرخی گۆتژی” پارتی دیموکراتی کوردستان بەردەوام لسەر پرسێن نەتەوەیی و نیشتیمانی تەنازۆلکرینە و زۆرجارا ل مافێ خوە خۆشبویە تنێ بۆ بەرژەوەندیێن گشتی، لەوڕا سەرەڕای پێداگیریا پارتی لسەر ئەنجامدانا ھەلبژارتنان ددەمێ خوەدا، ئەگەر ھەموو لایەنێن سیاسی بۆچوونەک ھەبیت و دگەل ھەلبژارتنان نەبن پارتی وی دەمی نابیتە ئاستەنگ، چونکە پارتی یا پشتڕاستە دێ ھەر دەنگێن خوە ئینیت و ھەلبژارتن بھێتە کرن و نەھێتەکرن و پارتی سەنگا خوە ھەیە، بەلێ رەوشا نوکەی و نەڕازیبوونا ھندەک لایەنێن سیاسی ژی لبەرچاڤە، خویایە ھەلبژارتن نەھێنەکرن ددەمێ خوە یێ دیاری کری چەندین ئاریشەیێن دی لھەرێما کوردستانێ پەیدابن، ئێک ژوان درێژکرنا تەمەنێ پەرلەمانیە ھەتا ئەڤی دەمێ لایەنێن سیاسی لسەر دگەھنە رێکەوفتنێ، چونکی بێی رێکەفتنا لایەنێن سیاسی و ئێک دەنگیا فڕاکسیۆنێن ناڤا پەرلەمانی ب چو شێوەیەکی پەرلەمان نەشێت تەمەنێ خوە درێژ بکەت بۆ ئێک رۆژا دیژی.

ئەڤرۆ نيوز:

شیرەتکارەکێ حزبا کۆماریا ئەمریکی دبێژیت، ل عیراقێ بۆ چار سالێن بھێتە حوکمەتەکا لاواز دێ ھێتە دروستکرن، نوکە رەوشا عیراقێ ژ ئالیێ حوکمڕانیێ و ئابووری و سیاسی و جڤاکی بە رب نەمانێ و وێرانکرنێ دچیت.

شیرەتکارێ حزبا کۆماریا ئەمریکی زردەشت تۆفیق بەگ ب تایبەتی بۆ رۆژناما ئەڤرۆ راگەھاند، بەری ھەلبژارتنێن 12/5 یا ئەڤ سالە رەوشا ئابۆری و سیاسی و جڤاکی و لەشکری یا عیراقێ گەلەک یا خراب بوو، نوکە ژی پشتی ھەلبژارتنان رەوشا عیراقێ ب گشتی خرابترە، لەورا بۆ چار سالێن بھێن ل عیراقێ حوکمەتەکا لاواز و بێی کارتێکرن دێ ھێتە دروستکرن، کو شیانێن چارەکرنا کێشێن عیراقێ نەبیتن، ھەروەسا بەردەوام راپۆرت بۆ نەسەقامگیریا سیاسی و ئابوری و لەشکری بۆ کوچکا سپی بھێنە بلندکرن.

زردەشت تۆفیق بەگ دبێژیت، حوکمڕانیا عیراقێ ددەستێن عیراقیان دا نینە، و ژ دەرڤەیی حوکمڕانیا عیراقێ سیاسەتا وێ دھێتە دارشتن و ئەوێن حوکمڕانیا عیراقێ دکەن بڕیارێن وانا دھێنە بجھئینان.

سەبارەت ھەبوونا ھێزێن حەشدا شەعبی و ھەلویستێ ئەمریکا بەرامبەری وێ ھێزێ، شیرەتکارێ ئەمریکی گۆت: حوکمەتا ئەمریکی ب فەرمی حوکمەتا عیراقێ ئاگەھدار کریە، ھێزا حەشدا شەعبی بھێتە ھەلوەشاندن، و نابیت ھێزەک بناڤێ حەشدا شەعبی ل عیراقێ بمینیت، ھەلوەشاندنا حەشدا شەعبی د ستراتیژیەتا نوکە یا ئەمریکا دایە.

ل دۆر خواندنا ئەمریکا بۆ دەزگەھێن ھەرێما کوردستانێ ژی ناڤبری گۆت:ل واشتنۆن کو ناڤەندا بڕیارێن ئەمریکایە، بەرپرسێن وەزارەتا دەرڤە یا ئەمریکا و سیناتۆر و ئەز بخوە ژی چەندین جاران بەحسێ وێ چەندێ مە کریە، د عیراقێ دا ھەرێما کوردستانێ ژ ئالیێ دەزگەھێن ئابوری و لەشکری و ئەێمناھیێ ڤە گەلەک باشترە و ل بەراھیا حوکمڕانیا ل بەغدا دھێت، چەندێن راپۆرت لبەر دەستێن بەرپرسێن ئەمریکا ھەنە کو بەحسێ ھێزا لەشکری و ئێمناھیی و ئابووری و سیاسی یا ھەرێما کوردستانێ دکەن.

سەبارەت رەوشا عیراقێ کو نوکە وەلاتی دژی حوکمەتا و کاربدەستێن عیراقێ نە، خونیشادان دھێنە کرن، ناڤبری دبێژیت، حوکمەتا عیراقێ یا بھێزە و شیاینَن چارەکرنێ نینە، کو بشێت داخوازیێن وەلاتیان بجە بینیت، بەلێ ب ھەر ئەگەرەکا توندکرنا ل سەر حوکمەتێ، ل عیراقێ ھەر ئەو کەس دھێنە پێش یێن نەشێن چارەکرنا کێشێن عیراقێ بکەن.

ل دۆر ھێزا ئەمریکا نوکە ل عیراقێ د چ ئاستدایە، تۆفیق بەگ گۆت: ھێزا ئەمریکا ل عیراقێ ل گەل ھەبوونا ھێزا ئیرانێ ل عیراقێ ناھێتە بەراوەردکرن، ب تایبەتی ژ روویێ لەشکری ڤە، بۆ نموونە ئەمریکا ژ روویێ لەشکری ڤە گەلەک یا ب ھێزە بەلێ ئیران ژ روویێ مەزھەبی ڤە ب ھێزترە کو ئەم ل ئەمریکا کارێ ل سەر مەزھەبی ناکەین.

ل دۆر کا ئەمریکا چ جورێ حوکمەتێ دڤێت ل عیراقێ بھێتە دروستکرن، شیرەتکارەکێ حزبا کۆماریا ئەمریکی گۆت: ئەم دزانین حوکمەتەکا بھێز ناھێتە دروستکرن، بتنێ ئەوا مە دڤێت حوکمەتەک ھەبیت کارێن عیراقێ یێن پلوماسی و لەشکری ل گەل بھێتە رێکخستن، ھەکە نە کو مەبڤێت حوکمتەکا بھێز ل عیراقێ ھەبیت و کونترۆلا عیراقێ ھەموویێ بکەت، ئەو حوکمەت دروست نابیت.

ئەڤرۆ نیوز ، زنار تۆڤی:

هەردوو فراكسیۆنێن سه‌ره‌كى د په‌رله‌مانێ عیراقێ دا، پشتی روونشتنا نە ئاسایی یا پەرلەمانی، دەربارەی رەوشا به‌سرا داخواز ژ عه‌بادی کریە کو ده‌ستی ژ کار بكێشیت‌.
حه‌سه‌ن عاقولى پەیڤدارێ لیستا سائیروون ب سه‌رۆكاتیا موقته‌دا سه‌دری گۆتیە: داخوازێ ژ حه‌یده‌ر عه‌بادی سه‌رۆك وه‌زیرێ كاربرێكه‌ر یێ عیراقێ د‌كه‌ین، کو ئەو و کابینا خوە دەست ژ کاربکێشن و داخوازا لێبورینێ ژی ژ گەلێ عیراقێ بكه‌ن.

هەروەسا ئه‌حمه‌د ئه‌سه‌دی، په‌رله‌مانتار و پەیڤدارێ هەڤپه‌یمانیا فه‌تح ب سه‌رۆكاتیا هادى عامرى گۆتیە: كێمته‌رخه‌مى و شكەستنا حوکمەتێ د قه‌یرانا به‌سرا یا ئاشكرا و روونه‌ و ئه‌ڤە ژی بۆچوونا هەموو په‌رله‌مانتارانه‌، هەروەسا داخواز ژ حه‌یده‌ر عه‌بادی كریه، ده‌ست ژ كار بكێشیت.

195

ئەڤرۆ نیوز ، زنار تۆڤی:

خەوێ گەلەک كاریگه‌ری ل سەر ساخلەمیا لەشی و ده‌روونێ مرۆڤی هه‌یه‌، خه‌وەکا ساخلەم و رێكخستی چه‌ندین مفایان دگەهینیتە ساخلەمیێ و ژ وان ژی:

. كێمبوونا دو دلیێ و فشارا ده‌روونى.
. چالاكبوونا كۆئه‌ندامێ ده‌ماران و پاراستنا مەژی ژ نه‌خۆشیێن وه‌كو زه‌هایمه‌رێ و خەله‌فانێ.
. هاریکاریا كێمبوونا دوهنی كۆمکری یێ له‌شی ددەت.
.خه‌وەکا باش به‌رگریا له‌شی بهێز دکەت و مرۆڤی ژ نه‌خۆشیان دپارێزیت.
. خه‌و هاریکاریا له‌شی ددەت بۆ دەرکرنا‌ ژه‌هرێ و مادێن زیانبه‌خش.
. ساخلەمیا دلی و زڤرینا خوینێ دپارێزیت.
.ئازاران هێور دکەت.
. ساخلەمی و جوانیا پیستی د‌پارێزیت.
. رێکێ ل‌ هه‌لوه‌ریانا پرچی و بێهێزبوونا وی دگریت.

ئه‌ڤرۆنيوز:

نوكه‌ ياريا هه‌ردو هه‌لبژارتيێن ئيسپانيا وئينگلته‌را دچارچۆڤێ خۆلا نه‌ته‌وێن ئورۆپا دا ل ياريگه‌ها ويمبلى ل له‌نده‌ن ب سه‌ركه‌فتنا هه‌لبژارتيێ ئيسپانيا ب ئه‌نجامێ 2-1 ب دووماهى هات.

هه‌لبژارتيێ ئينگلته‌را ل خۆله‌كا 13 گۆلا خوه‌ يا ئێكانه‌ ب رێيا ياريكه‌رێ خوه‌ راشفورد تۆماركر وهه‌ردو گۆلێن ئيسپانيا ل خۆله‌كێن 13 و32 ژلايێ ياريكه‌ران ساول نيگويز و ريدريگۆ مورينۆ هاتن تۆماركرن.

ئه‌ڤ ياريه‌ يا ئێكێ يه‌ بۆ لويس ئه‌نريكى وه‌كو راهێنه‌رێ هه‌لبژارتيێ ئيسپانيا.

ئه‌ڤرۆنيوز:

وه‌زاره‌تا دارايى وئابوورى ل هه‌رێما كوردستانێ دێ مووچێ هه‌يڤا شه‌ش 2018 يێ دو وه‌زاره‌تان ب ڤى شێوه‌ى به‌لاڤكه‌ت:

  • ‌ ئێكشه‌مبى 9/9/2018 مووچێ وه‌زاره‌تا په‌روه‌ردێ.
  • دوشه‌مبى 10/9/2018 مووچێ وه‌زاره‌تا ساخله‌ميێ.

ئه‌ڤرۆنيوز:

د تۆپبارانكرنا ئه‌ڤرۆ يا باره‌گايێن هه‌ردو حزبا ديموكراتا كوردستانێ وحزبا ديموكراتا كوردستانا ئيرانێ ( حدك ) و ( حدكا) ل كۆيه، كو ژلايێ ئيرانێ ڤه‌ هاتيه‌ ئه‌نجامدان 13 كه‌س شه‌هيد بوون وب ده‌هان كه‌سێن دى بريندار بوون، دناڤ برينداران دا هه‌رئێك ژ مسته‌فا مه‌ولودى سكرتێرێ حزبا ديموكراتا كوردستانێ وخالدێ عه‌زيزى سكرتێرێ به‌رێ يێ حزبا ديموكراتا كوردستانێ وكه‌مال كه‌ريمى ئه‌ندامێ رێبه‌راتيا حزبا ديموكراتى يێن هه‌ين.

ئه‌وين هاتينه‌ شه‌هيد كرن ژى ناڤێن وان ئه‌ڤه‌نه‌:

1- سوهەیلا قادری، ئەنداما کۆمیتەيا ناڤەندی

2- برایم زێوەیی، ئەندامێ کۆمیتەیا ناڤەندی

3- نەسرین حەداد، ئەنداما کۆمیتەيا ناڤەندی

4- هاشم عەزیزی، ئەندامێ کۆمیتەیا  ناڤەندی

5- کەریم مەهدەوی، ئەندامێ کۆمیتەيا ناڤەندی

6- رەحمان پیرۆتی، ئەندامێ کۆمیتەیا ناڤەندی

7- مام شێرکۆ رەسوڵ زادە

8- عوسمان عوسمانی

9- جەمال ئەکبەری

10- مەنسور مەهابادی

11- فاروق حسێنی

12- یاسر

13- موختار

14- نه‌هاتيه‌ نياسين

ئاژانسا ميهرنيوز يا ئيرانى به‌لاڤكر” به‌رى نيڤرۆيا ئه‌ڤرۆ شه‌مبيێ ب مووشه‌كێن دوورهاڤێژ توپبارانكرنا باره‌گايێن هه‌ردو حزبێن ديموكراتا كوردستانا ئيرانێ (حدكا) وحزبا ديموكراتا كوردستانێ (حدك) ل باژێرێ كۆيه‌ هاته‌ كرن ودئه‌نجامدا 14 كه‌س هاتنه‌ كوشتن و39 كه‌س 1ى بريندار بوون كو هژماره‌كا وان ئه‌ندامێن سه‌ركردايه‌تيێ وربه‌رپرسێن وان هه‌ردو حزبانه‌.

ئه‌ڤرۆنيوز:

دكۆمبوونا ئه‌ڤرۆ شه‌مبيێ 8/9/2018 يا په‌رله‌مانێ عيراقێ كو تێدا حه‌يده‌ر عه‌بادى سه‌رۆك وه‌زيرێن عيراقێ وهژماره‌كا وه‌زيرێن حوكمه‌تا وى وپارێزگه‌رێ به‌سرا تێدا به‌رهه‌ڤ بووين، شه‌ره‌ ده‌ڤ دناڤبه‌را حه‌يده‌ر عه‌بادى وپارێزگه‌رێ به‌سرا هاته‌ كرن.

ئه‌سعه‌د عيدانى، پاريزگه‌رێ به‌سرا كو هه‌ر ژ ليستا نه‌سر يا حه‌يده‌ر عه‌بادى يه‌، د روونشتنا په‌رله‌مانێ عيراقێ دا دبێژيت” رێڤه‌به‌رێ پۆليسێن به‌سرا دزيكه‌ره‌ ول سه‌ر من يێ هاتيه‌ سه‌پاندن دوى پۆستى دا بيت”.

دياركر ژى” ئه‌و بريارێن نوكه‌ سه‌رۆك وه‌زيران خواندين بۆ هاريكاريا به‌سرا، به‌رى چه‌ندين هه‌يڤ وسالان ژى هاتبوو دان وچو نه‌هاتينه‌ بجهئينان”.

دبێژيت ژى” ئه‌و ئاخڤتنێن نوكه‌ دهێنه‌ گۆتن ژلايێ سه‌رۆك وه‌زيران ووه‌زيران ڤه‌ وه‌سا دده‌نه‌ دياركرن كو چو كێشه‌ ل به‌سرا نينن”.

عه‌بادى ژى ب توره‌يى ڤه‌ دبێژيته‌ وى” تو پارێزگه‌رێ به‌سرا تو بۆچى ل به‌سرا نينى؟”.

نڤيسينگه‌ها رزگاركرنا ره‌ڤانديێن ئێزدى

ئەڤرۆ نیوز،باسم قاسم شنگالی

 ئەڤرۆ شەمبیێ 8/9/2018 ێ کچەکا  ئێزدی ژ دەستێن رێکخراوا داعش يا تیرۆرستی ل سووریێ هاتە رزگارکرن

حسێن قائيدى، بەرپرسێ نڤسینگەها کاروبارێن رەڤاندیان ل دهۆکێ بۆ ئەڤرۆنيوز گۆت “ئەڤرۆ ب هەڤکاریا نڤیسنگەها مە کچەکا  ئێزدى ژده‌ستێن داعشێ ل سووریێ هاتە رزگارکرن”.

دياركر” کچا رزگاربووی ب ناڤێ (یناس ناسر رەشۆ  )  ژيێ وێ 14  سالن کو خەلکا کۆمالگەها خانەسۆرێ یە سەر ب ناحیا سنونێ ڤە ل باکوری چیایێ شنگالێ “.

 پتر گۆت “ل دەمێ ل 3/8/2014 داعشێ دەڤەرا شنگالێ داگێرکری ئەڤ  كچە  ژی مینا  ب هزاران کچ و ژنێن ئێزدی هاتبوو  ره‌ڤاندن ژلایێ رێکخراوا تیرۆرستیا داعشێ ڤە”.

خوياكر ژى”،نڤیسنگەها کاروبارێن رەڤاندیان ل دهۆکێ یا بەردەوامە دبزاڤێن رزگاركرنا وان ره‌ڤانديێن هەتا نۆکە ماینه‌ ددەستێن تیرۆرستێن داعشێ دا”.

website security
WP Facebook Auto Publish Powered By : XYZScripts.com